ባንጂ ወረዳ ይቶፒያው ቦሊቮሉ ሻምፒዮና

እሱባለው አምሳሉ

አዊ ብሄረሰቡ ቺፅጝፂ ስፖርቱ ዜርፍስ ኩሪፄ ድሎ ሜዜጌብፁስ ሴጙኽ አኽⶓ ሜንችካ ታሪኩ ሜዝጌብካ እርዳትፃና።

ቮሊቦሉ እንክሪኪላ ልኩ ኩታው እንክሪታጊ ብሄረሰቡ ቺፅጝፂዳ እሳንስ አኮሜችስታው ስፖርቱ ዜርፍያኽ። ቤዴረሱ ዝቤንዳ ጎጃሙ ክፍለሃገር እስታማ እቑስታው ጊዝዳ አቕስቱንኩ ጄግንካ ቮሊቦሉ እንክራንትካ እሺና::

አዊ ብሄረሰቡ ቺፅጝፂዳ አግስታው ባንጂ ወረዳው ቮሊቮል ስፖርቱ ክሌቭ ናካኪላ ይሴንካ እንክራንትካዋ አቡቑኽ ያኹስ ሊጊሲሚ ጊዝዳ ጄሜራማ ክልሉ አችስ ቮሊቮል ስፖርቱ ዜርፍዳ አቹ ቲራግድሚዴስ ፋቲው ክሌብያኽ።

2015 ምሬት አሜትዳ ክልሉ አችስ ካስጙኽ ክልል አቡቑ ልኺትጚዳ ሜንችካ ልኺትጝካዋ ካስጝፃማ ቢዲሬ አቾ እሚጝስ ዋንቼ ጉሽጝኪላ ታክስስታውያኽ። ዲብስጝፅንኩ ክሌቡ አባልካ ስፖርቴን አየነው አየለስታ የትዋለ ትላሁን ዙሙኑውስታጊ አማኻሪ ክልልዴስ ቢዲሬ አቾ እምኑኻ አኽጞ ሲፋማ አጌሩ አችስ ካስጛው ልኺትጚዳ አሴቴፍጝጚስ አዲስ አበባሾ እንዝጜ ፄውናው ጊዛይ ክልላኻዳ ዝኩኽ ሰላሙ ችግር ዳድ ልምታታ ፄውⶓ ሲፋማ ኬፍቲኔ ችግሮ ካንትጞ ዙሜካ።

ችግር እንግርግራ ፄዋያሱ ባንጂ ወረዳው ቮሊቮል ስፖርቱ ክሌቭ ክልልታ ዝኩኽሳ ችግሮ ቲሪትጛማ እንጃቢሪዴስ ግልጌልሾስ አሶሳዋ ላጛ ጌርካሳ ሜኪናስ እንዜጙኒዴስ ፋላንጋ አሶሳ አዲስ አበባዋ ሩምብሊስ ካስጝስ ልኺትጜ ካስጝፁንኩ አኽⶓኪላ እርዳትፅካ።

ዋኽ ይቶፒያው ክልካዴስ ጛውሳ ጛውሳ ክልሎ ወኬልካማ ይንቱንኩ ክሌብካሊ ልኺትጜካማ እንክሬ አሌዱንኩ ባንጂ ወረዳው ቮሊቮል ስፖርቱ ክሌቭ ውላ ዙሩ እንክሪዳጊ ዊፃንትስ ዋይሜ ሜዜጌብፁንኩ ያኻኒስ ይቶፒያ ስፖርት አካዳሚስታ ኦሮሚያ ክልሎ ወኬሉኽ አምቦ ቮሊቮል ስፖርቱ ክሌብካሊ ጌቴምጙኑ ጊዛይ ይሴን ልኺትጜ ፄውስታሺኹ አኽⶓ እርዳትፅካ።

“ዊፅስትጝ ውርዴትያኽ” ናው ካንቲስ አድርቱኽ አዊ ብሄረሰቡ ቺፅጝፂዳ ባንጂ ወረዳው ቮሊቮሉ ስፖርቱ ክሌቭ ይቶፒያው ቮሊቮሉ ፌድሬሽን አጌሩ አችስ አዲስ አበባደ ካስጝፁኽ አጌራዊ ልኺትጚዳ አማኻሪ ክልሎ ወኬላማ ልኻ ዊድፄ ልኺትጜ ፄውጝስ ይቶፒያው ቮሊቮል ክሌቩ ሻምፒዮን አኽጝስ ካሊⶓኪላ ቶኬምካ።

ዴስስቱኽሳ ዋንቼ ጉሽጝስስታ አቾ ማንዲፅጝስ ሲፋውስ እንዴስ ጃላ ትኩትስ እንፃኽስታንኩ አኽⶓ ዙሙንኩ ባንጂ ወረዳው ቮሊቮል ስፖርት ክሌቩ አባልካ እንጃቢሪ ዩኒበርስቲስ ምስጋኔ ዲግስካማ እንጃቢሪ ዩኒበርስቲስታ እሊኩ ፄዋኑሳ እርዳቴ ይስፅጝ ቱስታው አኽⶓ ዙሜካማ አብት ዌንስታ ትኩታኩ አካልካኪላ እርዳቴ ፄዋንታ ናኒስ ካሲካ።

ባንጂ ወረዳው ቮሊቮሉ ሴሌቴንፃንቲ አቶ ሰውበሰው ታደሰ ጛሾስ ክሌቡ ኬች ልኺትጚው ዝቤንዳ ስፖርቴንካው ኩርፄንትስስታ ፅሬትስ ዋንቺስ ቢኩኽ ያኹስ ይንታው አሜትስ ጄሜራማ ፕሪሚየር ሊጉ እንክሪዳ አሴቴፍጛንቲ አኽጝስ ክሌብስ ድጋፍ ፋይፃንቲ አኽⶓ ጌሌፅካ። ባንጂ ወረዳው ስፖርት ፅ/ጝናሱ አላፊ አቶ እሱባለው ጛሾስ ፋይናንሱሳ ችግሮ ኽይጝስ ካንታኩ ቤንካሊ እንፃኽስታንኩ አኽⶓ ጌሌፅካማ ባንጂ ወረዳው ቮሊቮል ስፖርቱ ክሌቭ ይቶፒያው ቮሊቮል ፌድሬሽኑ ሻምፒዮን ያኻታ ሜንቾ እንፅኼ እንፃኽስቱንኩ ያኻኒስ ክሌቩ አባልካው ሼው ፅንታሳ አድርፅጝስታ ይስጝፅጝ ቹዋ አኽⶓ እርዳትፅካ።

ባንጂ ወረዳው ቹዋ ቺፅጝፃንታስታ ስፖርት ኩስጚ ጝናሱ ኩፕፃንቲ አቶ ሞላ ወሌ ጛሾስ ቮሊ ቮሉ ኬች ሜንችካ ፅንጋኽካዋ ፌያማ ዋይሚስታ አኽⶓ ጋሼካማ 2017 ምሬት አሜትስ ካስጛው ፕሪሚየር ሊጉ እንክሪስ ይስጝፃውሳ ፋይስታውሳጊ እርዳቴ ፄዋንኩ አኽⶓ እርዳትፅካ።

አማኻሪ ክልል ስፖርት ቢሩዳ ቮሊቮል ፌድሬሽኑ አላፊ አቶ በላይ አበጀ ጛሾስ ባንጂ ወረዳው ቮሊቮል ስፖርቱ ክሌብ 2015 ምሬት አሜትዳ አማኻሪ ክልልዳ ካስጙኽሳ ልኺትጜ ዊፃማ ዋንቼ ጉሽጝስ እምፕላንቴ አቾ እሚⶓ ሲፋማ ይቶፒያ ቮሊቮሉ ፌድሬሽን አዲስ አበባዳ ካስጝፁኽ ልኺትጚዳ አማኻሪ ክልሎ ወኬላማ አሴቴፍጝጝስ ልኻ ዊድፄ እንክሬ ፄውጝስ ወረዳውሳ ዞኑሳስታ ክልሉሳ ስሞ እቑፃማ ዋንቼ ጉሽጝስ ካሉኹስ ምስጋኔ ዲግስካ።

እምፕል ክሌቭ ሻምፒዎኑ አችሾ ሌጌሳኒ ክልሎኺስታ ድጋፍስታ ሲፋሲፍጜ ፄውጝ ቱስቴ ናው ሜሜሪ ስፖርቱ ዜርፍዳ ፄዴኩኽ እግ አኽⶓ ዙሙንኩ አቶ በላይ አበጀ ክልሉ አችስኪላ ፋይስታውሳጊ እርዳቴ ፄዋንኩ አኽⶓ ቼሜትጝፄካ።