ፍትሬት አብታሳ ማንዲጙ እንፅኺ ኽብፂውሳ አሉምቶ ዴሜካማጊ አኽጝ ጌሌፅትኾ

ዘውዴ በካሉ

ዲጊዴስናቴ ፍትሬት አብታሳ ማንዲጝ ዙራሙሪውሳ ፍንቶ ማንዳውስታ ኽብፂውሳ አሉምቶ ዴሜካው አኽⶓ አሬሳቻንትካ እርዳትስትካማጊ አግስታና:: አዊ ብሄረሰቡ ቺፅጝፂታ አሜት ቺፋ አኮሜችስታው ፍትሬት አብታሳ ማንዲጙ እንፅኺ ትሩ አርፊዳ ጄሜርስታ::

አንኪሺ ጉዋጉሲ ወረዳ ቱልቲ ኬቤሊው ዝኩዋንትካ ያኹንኩ አስር አለካ በላይ ካሳ ፍትሬት አብታስ ማንዲጝ ኽብፂውሳ አሉምቶ ዴሜካው አኽⶓ ዙሜካ:: ፍትሬት አብቶ ማንዲጝ ውላጊ አቒው አላፍት አኽⶓ ጉሹንኩ አስር አለካ በላይ ቱልቲ ኬቤሊ ብቲው ፍንት ጃላ ኩክሪስታ አሬ ዋግፃቲው ብቲ እሺኹ አኽⶓ ዲብስካ::

እን እንፅኺ ጄሜሩኒዴስ ፋሌንጋ ቴፋሴሱ እንፅኺስ ኩሪ ጝን ቺፋ ቱዋሺኹ ቲሪⶓ፣ ክራሪ ዋጋማ ክምካስ ኬሌቦ አግፅⶓስታ ብቲው አሉም ዙራማ አሊቤ አኹኪ አሬ ዜሬካማ ቴኬምስትካማጊ አኽⶓኪላ ዙሜካ::

እርኬኖ ግሽጝስ ችግኖ አንኬባኬብጝ ትር 22 ጌርክ 2016 ም.አሜትዳ ጄሜራው አኽጝስ ግብርኒኩ ውማይቴንካ እይኑሳ ሼውቴ እሚካማ ፋይፃውሳጊ ሜሳሬ ቴርስካማጊ አኽⶓ አስር አለካ ዲብካ::

ፌይንኩ 10 አሜትካዴስ ጄሜራማ እንፃኽስትኹ ፍትሬት አብታስ ማንዲⶓ እንፅኺ ዙራሙሪውሳ ብቲውሳ ፍንቶ ክችስኹ አኽⶓ ዲብሱንኩ አስር አለካ በላይ እርኬንዳ ክምካውሳ ሜኖስታ ችግኖ ቴኬልካማ ኽብፂውሳ አሉምቶ ዙርፃማ ምርቶስታ ምርታምቶ ዴሜካው አኽⶓ ድኹዌካ:: እን አሜትስኪላ እንዴስ ጃላ እንፃኽስትጝስ ኩርፄንካ አኽⶓ ድኹዌካ::

እሊው ቱልቲ ኬቤሊው ዝኩዋንቲ አቶ አስፋው ዘገዬ እስታና:: ፍትሬት አብት ማንዲጙ እንፅኺ ጄሜሩኒዴስ ጉሽፃማ ዙራሙሪው አይር እግልታ ኪስስትⶓስታ አሪ ዋጋቲው እሺኹ ብቲ ኽብፂው አሉምት ዴሜካማ አሬ ዜርካማ ቴኬምስትካማጊ አኽⶓ ዙሜካ:: ቴፋሰሶ እንፃኽስትጝስ ቤዴራ ቴርት ፄውስታማጊ አኽⶓ ጉሽካማ ኬቤሊ  ቺፋ ዝኩንኩ ልማት ኬቹ ጉሳንትካ  አቺትጛካማ ኹን ጝርጃ ውላ ልማትስ ቴርቱንኩ አኽⶓ ድኹዌካ::

አቶ አሰፋው ቴፋሴሱሳ አኹኪ ፍትሬት አብት ማንዲጙሳ እንፅኼ እንዴስ ፍና እሺኹሳስታ ናካ ዝኩኽሳ ኪሴስታ ትክሞ እዝብ ሼሻማ እንቲታኪ ግብርኒኩ ውማይቴንካውሳ አሳቦ ቻቤልካማ እንፃኽስትካማጊ አኽⶓ ዙሜካ:: ፋይፃንኩሳ ልማትኩሳ ሜሳርካዋ ቴርስካማ እንፅኺስ ጁትጙንኩ አኽⶓኪላ ዲብስካ::

አንኪሺ ጉዋጉሲ ወረዳ ቱልቲ ኬቤሊው ግብርኒው ፅፌት ጝናሱ አላፊ አቶ አዲሱ ምትኩ 2016 ም.አሜቱ ፍትሬት አብት ማንዲⶓ እንፅኺስ ቤዴራ ቴርት አሌድስትⶓ ጌሌፅካ:: ትክላሊስ ፌይንኩ አሜትካኻዳ ፍትሬት አብት ማንዲጙ እንፅኺ እንፃኽስትኹ 520 ሄክታር ብቲ አኽⶓ ጌሌፅካማ 2015 ም.አሜትዳ 97 ሄክታር ብቴ እንፃኽስትⶓ እርዳትፅካ:: ቱልቲ ኬቤሊ እሊኩ ዙራሙርካዴስጊ ኽስትስ ኽብፂው ሺሽርስትጝስታ ብቲ አሬ ዋግፃቲው እሺኹ አኽጝስ ቴፋሴሱ እንፅኺ ኪሴ አግⶓኪላ ጌሌፅካ:: ዙራሙሪኩ ዝኩዋንትካ አጌሮ ባይካማ ሴዴድስታሽንኩ ናካ ኽብፂው አሉምት ዙራማ አሬ ዋግፅⶓ ጄሜራኒ፣ አርኬንዳ ችግን፣ ክምካው መኑ ቴኬልስታማ ግብርኒስኪ ያኻ ክምካዋ እሩብፅጝስ አሜችኹ ስፍሪ ያኻማ ዙራሙሪኩ አቕ ጛው አጌርዳ ቴኬምስታንትካ አኽⶓ ድኹዌካ:: እምፕልታቕኪላ ትክሞ ሼሽካማ ፍትሬት አብታሳ ማንዲጙ ፋይ ዴሜካማጊ አኽⶓኪላ ጌሌፅካ::

2016 ም.አሜትዳ ትር 22 ጌርክስ ጄሜራማ አጌርታጊ ፍትሬት አብታሳ ማንዲጙ እንፅኺ ጄሜራው አኽጝስ ቤዴራ ቴርት አሌድስትⶓ አቶ አዲሱ ጌሌፅካ:: ኬቤሊታጊ ልማቱ ኬች ቲሪትጛማ ጐትስስታ ሙሪ ቺፋ ኹን ጝርጃ ልማትስ ፋይፃንኩሳ ሜሳርካዋ ቴርስካማ እንፅኺስ ጁትጜካማጊ አኽⶓኪላ ዲብስካ:: አሜት ቺፋ እርኬኖ ግሽጝ፣ ችግኖስታ ሜኖ ቴኬልጝ ይቢቺ ያኻውላስ ችግኖስታ እርኬኖ ክምካ ቱዌካማ አቤሌሽቲንታ ማንዲጙ እንፅኺኪላ ይስጛማ ሲፋው አኽⶓ አቶ አዲሱ ጌሌፅካ::

ፍትሬት አብታሳ ማንዲጝ  ዙራሙሪውሳ ፍንቶ ኪሳውስታ ኽብፂውሳ አሉምቶ ዙርፃው አኽⶓ ጌሌፁንኩ አቶ አዲሱ ውላጊ ማቤር አቕ ጛው ጁትጝጚስስታ አላፍትስ እንፃኽስታንታ እንፅኼንቶኪላ ፌያፌይጝፅካ::

አዊ ብሄረሰቡ ቺፅጝፂ አንኪሺ ጉዋጉሲ ወረዳ ግብርኒው ፅፌት ጝናዳ ፍትሬት አብት ማንዲጙ ኬቹ ጉሳንታ ሙሉ ይስማው አጌርታጊ እክድ እምስታማ ፍትሬት አብት ማንዲጙ እንፅኺ ትር 22 ጌርክ 2016 ም.አሜትዳ ጄሜራው አኽⶓ እርዳትፅካ:: አንኪሺ ወረዳታጊ እንዴስ ፍና እንፃኽስቱንኩ 37 ቴፋሴስካ አኽⶓ ጌሌፁንኩ ፍትሬት አብት ማንዲጙ ኬቹ ጉሳንታ 2016 ም.አሜትዳ 37 ቴፋሴሴካዋ እንፃኽስትጝስ አኬድካማ፤ ፄትቲው ችግርስ ሹኻ ኬቤልካዳ እንፃኽስትጝስ ካሊስታያሱ አኽⶓ ዙሜካ::

ሴላሙ ችግር እላቲኩ ኬቤልካዳ 26 ቴፋሳሱሳ እንፅኼ እንፃኽስትጝስ ቤዴራ ቴርት አሌድስትⶓኪላ ጌሌፅካ:: እንዴስ ፍና እንፃኽስቱንኩ ልማትኩሳ እንፅኽካዋ፤ እርኬኖ፣ ችግኖስታ ክምካውሳ ሜኖ ክምካ አቤሌሻቲንታ ማንዲጝ ውላውጊ አላፍት አኽⶓ ጉሹንኩ ሙሉ ይስማው 2016 ም.አሜቱሳ ቴፋሴሱሳ እንፅኼ ጄሜርጝዴስ ፍና ቤዴራ እንፃኽስቱንኩሳ ፍትሬትኩ አብትካዋ ማንዲጙስታ አንኬባኬብጙ እንፅኺ ጋማጋምስትⶓ እርዳትፅካ:: 2016 ም.አሜቱ ቴፋሴሱ እንፅኺ ጄሜርጝስ ፋይፃንኩ ልማትኩ አክኽካዋ ጛርት አቕዳ ዝኩንኩሳስታ ምንግስት ዲግሳውሳ ሜሳሬ ቴርስካማ ቤዴራ ቴርት አሌድስትⶓ እርዳትፅካ::

አሬሳቻንትካ ፍትሬቱሳ አብቶ ማንዲጝ ኽብፂውሳ አሉምቶ ዴሜክጝስስታ ምርቶስታ ምርታምቶ ዴሜካው አኽⶓ ሼው ንጝስ ግብርኒው ውማይቴንካ ናኑሳ ሲፍጝስ እንፅኺስ ኩርፄና አኽጝ ፋይፃው አኽⶓ እርዳትፅካ::