ዘውዴ በካሉ
ይቶፒያ ሚንችካ ባይልካ፣ እሴትካዋስታ ታሪክኩ ማኼትካዋ ፃቱት አጌራኽ:: ሚንችካ ባይልካ ዙራሙሪው ዝኩዊኒታስታ ባይሎ ስራ ፄውካማ ዙራሙሪውሳ ወጐ ካንትፃው ዳድስ ኬቤርስታና:: ይቶፒያኻዳ ኬቤርስታንኩ ባልካ ክቻዴስ አደባባይዳ ኬቤርስታንኩ ባልካ ባይሎ ካንትፅጝዴስ ድምክና ቱሪስቱ ጉስፃ ያኼካማ አጌላጌልና:: እኒጛ አጌራኻዳ ኬቤርስታንኩ ባልካዳስታ ልቓ አማኻሪ ክልልዳ ትር አርፊዳ ብሩኽ አኺንስ ኬቤርስታንኩ ባልካ ጊኒው ባል፣ ፅምቕቱ ባል፣ አገው ፌርስቴንካው ባል፣ ክዱስ መርኮሪዮሱ ባልስታ እሊኩኪላ አደባባይዳ ብሩኽ አኺኒስ ኬቤርስታና:: አደባባይዳ ኬቤርስታንኩ ባልካ ክቻዴስ ናካስ አንቤብፅጝስ ፋኑኽ አሜት ቺፋ ትር 23 ጌርክስ ኬቤርስታው አገዉ ፌሬስቴኑሳ ባሎ ካንትኹሲያኽ::
አገው ፌርስቴንካው ባል 2016 ም.አሜትዳ ትር 23 ጌርክስ 84ንቲ ጊዝስ ኬቤርስታ:: እን አገው ፌርስቴንካው ባል 62 ሻይዴስ ጃላ ማቢሪኩ አባልካ ዝኩኑ ያኹስ፤ ማቢሪኩ አባልካ ጛስጛዋ ዝኩኹሳ ታምትጜስታ ማይቤራዊ ጉዳይካዋ እምፕልታ አኮሜቻንታ ድሎ ብሳ:: አገው ፌሬስቴንካው ባል አዊው እዝብስ ባይሎስታ አይቶ አቕትጝፅጝስ ኽሳንቲ ፍሼ ዝኮ::
አገው ፌሬስቴኑ ባል ቲሪትጙኽ 84 አሜት ያኻ:: 1933 ም.አሜትዳ አባላምቲ አገው ፌሬስቴኑ ባል ኬቤርስትⶓ ጄሜራ:: ፊሪሲ አዋዋኾዳ ኽሳንቲ ባይሉ፣ ታሪኩስታ ማይቤራዊ ኩምችንካዋ አኮሜችጝስ አጌላጌላውያኽ::
እን ፌሬስቴንካው ባል ብሄረሰቡ ቺፅጝፂዳ አግስታንኩ ሴስታ ወረድካዳስታ ላጜታ ኬቴምኩ ቺፅጝፅካዳ ዝኩንኩ ፌሬስቴንኩ አባልካ 62 ሻይዴስ ጃላ ያኻና:: አገው ፌርስቴኑ አባል አኽጝ ፆቴ ጐሌላላኽ:: ድሜ 18 አሜትዴስ ጃላ ያኹኽ ውላጊ ፊሪስቲኒው አባላ አኽጝስ ካላና::
አገው ፌሬስቴኑ ማቢሪዳ እንጃቢሪ ኬቴሙስታ ባንጂ ወረዳዳ ማቢሪው ኬቴኒው አላፊ አሊኪ አብዬ ሙሉነህ አገው ፌሬስቴንካው ማቢሪ 1932 ም.አሜትዳ ታክስስታማ 1933 ም.አሜትዳ ቲሪትጙኽ ማቢሪ አኽⶓ ዙሜካ:: አገው ፌሬስቴኑ ባል ኬብርስትⶓ ጄሜርኹዴስ 84ንቲ ጊዝ አኽⶓ ጉሻንኩ አሊኪ አብዬ 2016 ም.አሜትስ ኬቤርስታው 84ንቲ አገው ፌሬስቴንካው ባል ብሩኽ አኺኒስ ኬብርስታታ ብሄረሰቡ ቺፅጝፂታጊ ሊሊትጙንኩ ሜንድሬኽካዳ ኩስጚ ፄውስትⶓ ድኹዌካ::
“አዋዋኾዳ ፊሪሲ ውላ ዲብያኽ” ኑንኩ አሊኪ አብዬ ፊሪሲ እርሼ አሬስጝስ፣ ችቔ ኪዲጝስ፣ አሬ ኪዲጝስ፣ ጌቤላ ካስጝስ፣ ታቡቶ አጄብጝስ፣ ኻሶ አጄብጝስ፣ ሲንቲዳ አጄብጝስ… ፊሪሲው ውሌቲ ድኹስታማ አሌድስታቲው አኽⶓ ዲብስካ:: እንዴስ ፌያማ አደባባይዳ ኬቤርስታው አገው ፌሬስቴኑ ባልዳ አቒ ሰላምቴ ዜኔግኹ ጊዝዳ ፊሪሲ አቒስ ስላምቴ እያው አኽⶓኪላ አሊኪ አብዬ ድኹዌካ::
84ንቲ ጊዝስ አገው ፌሬስቴኑሳ ባሎ ብሩኽ አኺኒስ ኬቤርፅጝስ ቤዴራ ቴርት ፄውስታሺⶓ አሊኪ አብዬ ዲብስካ:: አደባባይዳ እሼውስስታ ባሎ ኬቤርፅጝስ ያኻውሳ ፊሪሴ ቑፅካማ፣ ጋሼ ዋላዋልካማ፣ አሊንጌ ላሳላስፅካማ፤ ፊሪሲውሳ ዋኾ ስዮ ኩሮ፣ ዎዴሌ፣ ፉርኒሴ፣ ግላሶስታ ፋይፃንኩሳጊ ውላዋ ግድካዋ ቤዴርካማ ቴርሳሺⶓ ዙሜካ::
ፊሪሲ ሲንቲ ብታዳኪ ያኻ ታቦቱ አጄቡስ እንቲታኪ ሊሊትጙንኩ አደባባይካዳ አቕስ ሰላምቴ እይስ ላጛ ልኮ ጉሻማ ሴጌዳማ አኽⶓ ዙሙንኩ አሊኪ አብዬ ፊሪሲ ሰላምቴ እያታ ቤዴርካማ ስልታኔ እያንኩ አኽⶓ ድኹዌካ::
አገው ፌሬስቴንካው ማቢሪ ትር 23 ጌርካስ ኬብርስታው ፋሺስት ታሊያን ይቶፒየዋ ዎሬርጛ ጂይኹ ወክትዳ ክዱስ ጊዮርጊሱሳ ታቡቶ ቡዌካማ አርቤንካ ታብል ፊሪሲስ ሴብትጜካማ ድላ ፄውኑሳ ታክስጝስ አኽⶓኪላ አሊኪ አብዬ ድኹዌካ::
አገው ፌሬስቴንካው ማቢሪ ክዱስ ጊዮርጊስ ካልኪዳን ዝኩኹ አኽጝስ ማቢሪው አባል ያኹኽ አቒ ጌውስጙኽሳ አሬክጝፅጝ፣ ዳዴኻውሳ ኩስጝፅጝ፣ ድፄ ቴግባሮ እንፃኽስታውሳ ኪፂጝስታ ኩስጝፅጝስ ክርፂ ምግባርስ ዝኮንታ ፄዋው አኽⶓ አሊኪ አብዬ ድኹዌካ::
አገው ፌሬስቴኑ ማቢሪው አባል አኽጝስ ፆቴ ጐሌላውላስ ድሚ 18 አሜትዴስ ጃላ ያኹኽ ዎታት ጚው ያኹኽ ማቢሪው አባልካው አቕፂ እይስታማ ዎታትካ ድፂ ቴግባርሾ ካቲንታ፣ ማቢሪው አባል ያኻማ ማቢሬ ዝቓታ፣ ማቢሪው አባል ያኻማ ዳዴኻቲንታ፣ አስሜሴኬርቲንታ፣ አቒ ኩዊቲታስታ ፄጌርጙንኩ ድፅኩ ቴግባርካዋ አኮሜቻቲታ ማቢሪው አባል አኽጝ ፋይፃው አኽⶓ እርዳትፅካ::
አገው ፌሬስቴንካው ማቢሪ አሌሙ ማኺቲዳ ሜዜጌብስትⶓስታ ቴሮ ማንዳማጊ አኽⶓ ጌሌፁንኩ እሊኩ አብዬ ደሴስታቲው ማኺቲዳ ሜዜጌብፅጝስ እንፃኽቴካማጊ አኽⶓ ዙሜካ::
አዊ ብሄረሰቡ ቺፅጝፂዳ ባይሉስታ ቱሪዝሙ ማምሪዳ ማኺቲውስታ ቱሪዝሙ ኬቹ ጉሳንቲ አቶ ሰውነት ሽፈራው 84ንቲ ጊዝስ ኬብርስታው አገው ፌርስቴንካው ባልስ ቤዴራ ቴርት አሌድስትⶓ ጌሌፅካ:: አጌራኻዳስታ ባርኾቼዳ አግስታንኩ እምፕልታቕ ትር 23 ጌርክስ ኬቤርስታው አገው ፌሬስቴንካው ባልዳ አግስቴካማ ባሎ ብሩኽ አኺኒስ ኬቤርፅⶓ ጌሌፅካ::
“አገው ፌርስቴንካው ባል እዝቡ ባል አኽጝስ ባሎ ኬብርፃው እዝብያኽ” ኑንኩ ማኺቲውስታ ቱሪዝሙ ኬቹ ጉሳንቲ አቶ ሰውነት አጌራኻዴስኪ ያኻ ባርኾቼዴስ ይንታንኩሳ ሌንጌዶ ቻቤልጝስ ኮሚቴ ቲሪትጛማ ሌንጌድፅⶓ ዙሜካ::
ሌንጌዶ ቻቤላንኩ ሆቴልካ ሌንጌድፃንትካዴስ አብት ዋኒስኺስታ አዊውሳ ባይሎስታ ወጐ ካንትፃውሳ ስዮ፣ ሚቴ፣ ኹጝ ዝቒስታ ሌንጌዶ ቻቤልጙስ እሴቶ ሲፋንታ እንፅኺ አኮሜችስታማ ባል ብርኹ አኺኒስ ኬቤርስታ::
2015 ም.አሜትዳ 83ንቲ ጊዝስ ኬቤርስትኹ አገው ፌሬስቴኑ ባልዳ ባሎ ኬቤርፅጛ እንጃቢሪ ኬቴምዳ ቺፅጝፂሾ ይንታሺንኩ ሌንጌድካ 450 ሻይዴስ ጃላ አኽⶓ ጌሌፁንኩ አቶ ሰውነት ባሎ ኬቤርፅጝዴስ ድምክና ቱሪዝምዴስ አግስቱኽ ሚፂ 1 ትኩሚ 5 ሚሊዮንዴስ ጃላ አኽⶓ እርዳትፅካ:: 2016 ም.አሜትዳኪላ እንዴስ ጃላ ብሩኽ አኺኒስ ባሎ ኬቤርፅⶓስታ ፄውስትኹ ቤዴራ ቴርት ዋይሜ ሜዜጌብፅⶓ ቶኬምካ::