ቹዋ ታብል “እሉዋማኪ ኩሪስ ብሳማኪ ባጊስ ቢዲሊቲምኻና” ናሺና፡፡ “አሪዳ ክሚዳ
ዴኮ ጌምፅምባ፣ ዳቔራውሳስታ ባታን ናውሳ ሹማጊሌ ባድሚዳ ሴጝፅምባ” ኪላ ናሺና፡፡
ይጋ! ሹማጌል፣ አጌር ዋግፅኹ ክምባኺዳ እንጅኩዌካማ ስራስሪ ሼውስታ ጊጝትጜካማጊ
እንክርጛኒስ ፌይፁኑ እንፃኺት ዝቤናሳ እንግራ ዙርካ ካንትካማጊ ዴስናኒስ፣ ስራስሪሊ
ስራ ያኼካማ ሴኖ እንክርፃኒስ፣ ጌውስጙንኩሳ አምኽፃኒስ ንካንካማኪ ድባን ፌኬድኹ
ላካሳ እጂካማ ውንቲኒፋ ካሳኒስ ካንትስታሺኾ፡፡
“ፍናኪ፣ ጄር ጄሪ፣ እጄማኪ ጄር ታብሊ” ናኒስታ ኽሳንትካ ካንፅፁኑሳ ዳዶ
እሚንኩ ኽሳንትካ ባይካ ካሳኒ ኽሳንታ ያኼካማ እምፕልታቕ ክምንትዴስ ክምንቶ
ቻቤልጛማጊስታ ጌምትጛማጊ አጌራዋ አጌራ ፄውካማ እጂፅካ፡፡
ናካ ኩፅኒ ባታን ናንቲ ሹማጊሊ ኬቤርስታቲው ዝቤንዳ ታምብስታ፡፡ እንጚሱ
ጉሽፂስኪላ ስፍሪ ስፍራዳ ጋቻ ሚንቻማ እርፎ እሜካ አሬሳማ ጌቤራሺኹ ብሽታኖ
ዜኬራሺኹ ግባር ካሜንስታማ ሌጌስኹ ሙሪዴስ ፅንፌንስ ወርርስታማጊስታ ክራማጊ
ኹንስታ ስራስሪ ቱዋፋኑ ጝን ሌግስ ድጙስታማ ሴዴድስታኒስታ ዳዳ ፍዬ ፋታፋትካማ
ኹፃሺንኩ አቑሳ ታፎ ካንታኒስ እንቲታኪ ኹስታውዳ እሎ ዋያኒስ እሳንስ ካንትስታ፡፡
እንጚኪላ “ ኽሳንትካካ ብታኻዳ ኬሌቕስጉ ውታኺዳ”ናሺኑ ውንያኽ፡፡
ናካ እንአጌራ ችንካኻዳኽ ቲያስኪኹዊ፡፡ ስፍሪ ስፍራዳ ክልኽስታ ዋይቲ ሚንቻማ
አሬ ዋግፃሺኹ ባድሚ ዲጊሊ ያኻማ ምርክቱንኩስ ፊታሺኹ ግባር እርዳታ ማንዲ ያኻ፡
፡አዋኾኪላ አይላዋ ችግርዳኽ አግስታው፡፡ ፅንፌን ታምፁኑ ፅካትስ ጝን ሌግስ ጋብስታማ
ጎታሪ ድጙስታማ ስዴትዳ ቱዋ፡፡
ንባር ካንትፃውስታ 50 ሻይዴስ ጃላ አዋዋ ባድሚዴስ ቡኬካ ነቅቶ አቴካማ
ካኒስራዳስታ አግፁኑዳ እቴካ፡፡ ጋያኪ አምቢሊስ፣ ሶሪትስ፣ አርጃስ፣ አኺቲስ፣ፄውስትኹ
ቑል ድኹስታ ዊድስታላ፡፡
አይጛ እንኩዊኒዳ እሺንኩ እንዛኺ እኹሚስ ጌሽስትጝ፣ምርኪስ ድኽጝ አሬባ
ስግላሱ ዝኩዊኒ ያኻ፡፡ ክራፌካማ እርዳቴ ካሴንትካ ያኹንኩ እኒ እንዛኺ አርቴን ንጝስ
ዙራሙሪዳ አግስታው ምንግስቱ ሜዋክር እንፅኼ እንፃኽስትⶓ በያያኽ፡፡ ያኻችኽስጉ
ችግሩ እሳንትሊ ካንትጛኒ ውላውሳጊ አሬባሬብጜ ፋይፃው ያኻ፡፡ አኽጝስኪላ እኒ
እንዛኺስ እንግራ ቲሪትጝፅጝስ ታፍስታፎ እምትጝናና እምፕልታ ጁንስ፡፡
ታፍስታፎ እምትጝንስ !
