ዊዳፊ ሰላሙ ዙሪዳ ኩስጚ ካስጝጙኻ

አዊ ብሄረሰቡ ቺፅጝፂዳ ሊሊትጙንኩ እምፕልታቕኩ ቤንካዴስ ፊትጙንኩ ጛርት አቕሊ ዊዳፊ ሰላሙ ዙሪዳ ኩስጚው ሜድሬኽ ካስጝኾ::

ኩስጚው ሜድሬኽዳ ዙራሙሪውሳ ሰላሙስታ ፄትቲውሳ ጉዳዮ ዊዳፊስ ቼሜትጝፅጝስ ካሊፃንኩ አጄንድካ እሳኖ ኩስጜ ካስጝፅጝስ ይጋሪ ቱትጚዳ ታምብስታ::

ኩስጚው ሜድሬኽዳ አሴቴፍጙንኩ ክቻዴስ ኪስ ስንታየሁ የኔአባት ዙሙኑውስታ “ክልሉ ጋቻሾ ቱዋታ ፄውኹሳ ጉዳዮ ጎሌልጝስ ፣ሜሳሬ ዶንጌትካማ ቡንክትጛንኩ ዎጌንካዋ እምፕልታቕ  ኩስጝፅጝ ዝኮ” ናኒሳ ካሴካ:: ሜሳሬ ዶንጌትካማ ሴብትጚስ ኽይስታው ካሲ እላቲው አኽጝስ እዝብስ ጎሌልስትኹሳ ምንግስቶ ጉላሊስ ኪስስትምባኺስታ እግስስታ ቴርትስ ክምስትጝ ዝኮ ንካ::

አዊ ብሄረሰቡ ቺፅጝፂዉ  ሹኻንቲ ቤን ዙራሙሪ ሳይንስዳ አሱ ካርቴ እንፃኽስስታማ ክንታንትካዉ ክንትፂ ሜፃፍዳ ዲግኹ  ጉዳይ ክቼታ እምፕልታቕዴስ ሜንድሬኽዳ ካሲ ጁⶓ ቶኬምካ:: ክልሉ ቱስታ ጋቲው ዳድስ ብሄረሰቡ ቺፅጝፂዳ ታምፃው ትልካ ቱጝ እምፕልታቑ ሜብትዳ ቻኒስቶ ታምፃማጊ አኽጝ ክቼታ እምፕልታቕዴስ አሳብ ጁⶓ ዲብስካ::

ክልሉ ምንግስት ኢንቨስትመንትስ ናማ “ቸሌ” እስታው ዙራሙሪዳ እይስትኹ ብቲ ዙራሙሪዳ ጋቻው ጉሽፂ ያኻማ ሚንችካ እምፕልታቕ ፌኔኬልጛንታ ፄውኹስታ ሚንችካዋ ዴሜካ  ክራንታ ፄውኹ ጉሽፂ ጉዳይ አኽⶓ ሜንድሬኽዳ ቶኬምካ::

ፅንፌንካ አይልካሊ እንፃኽስታንኩ እምፕልካ እምፕልካ አመራርካ  ችግር ባስጛታ ፄዋካማጊ አኽጝ አመራርካዋ  ምንግስት ፃንኩፅጝ ቱስታው አኽⶓ እዝብካዴስ ጁኹ ካሲያኽ ንካ ኪስ ስንታየሁ::

እሊው እዝባዊ ኮንፈረንስዳ አሴቴፍጙንኩ አቶ አስቻለው ሙሉዬ ክልል ያኻ ዞን ባስኹ ችግራኻዳ ቶማ እምፕልታቕዳ ቼፍስታማ ድኻቲው ቤዴል ታምባ ንካ::

እምፕልታቕ ስፍሪዴስ ስፍሬ እንዜጝጝስ እንፃኽስታቲንታ ፄውስታ፤ አጌሩ ካላካልጚው ሴራዊቲዳ ፅካት ታምባ፤ ክርኹ አቒ ዴውስታቲታ ፄውስታ ንካ::

ምንግስቱ ስርዳ እሺንኩ አመራርካ አሱሳ ካርቴ እንፃኽስታታ ፄውጝስ ሚንችካ እምፕልታቕ ፌኔኬልጛንታ ፄውስትኹ አኽⶓ ዲብስካ::

ብሄረሰቡ ቺፅጝፂዳ ዝኩኹ ሰላሙ አኺኒ ባስጛታ ፄውኹ እምፕልካ እምፕልካ አመራርካ ፅንፌንካ አይልካሊ እንፃኽስትካማጊ አኽጝስ እንታኮንኩሳ አመራርካዋ ምንግስት ፃንኩፅጝ ቱስታታ እምፕልታቕ ካሲⶓ ቶኬምካማ ዶንጌትካማ ቡንክትጛንኩሳ ዴሜካ እምፕልታቕ ኩስጝፅጝስ ሰላምሾ ዙራንታ ፄውጝ ኩስጝጚዳ ጁⶓ ዲብስካ::

ሰላሙሳ እቑዌ ቻቤላንኩ ዎግንካ ዴሜካ እንፅኺሾ ቱዋንታ ፄውጝ ፋይፃው አኽⶓ ዲብስካ::

እምፕልታቕዳ ታምባማጊ ዝኩኹሳ ችግሮ እምፕልትስ ታፍስ ታፎ እምትጝናና ኽይጝ ዝኮ ኑንኩ አቶ አስቻለው ምንግስቱ እንፃኽስታንቲ እምፕልታቕስ ሼውቴ ፌቴርጝስ ኬፍቲኒ ታምብ ዝኩኹ አኽⶓ ዲብስካ::

እምፕልታቕዴስ ጁንኩ ካስካ ክልሉ አችስ እንቲታኪ ፌዴራሉ አችስ ኽይስታኑሳ ዳዶ ሲፍጝጛንኩ ዋረዳ ቺፋ ጎሌልስቱንኩ እምፕልታቕኩ ቤንካ ዝኩⶓ ዲብስካ::

ዞኑ አችስ ካስጝጙኹ ኩስጝጚ ኬቤሌ ኺስታ  አኽጝ ጌሌፅስታ:: ኩስጚውሳ ሜድሬኾ ጉሱንኩ ብርጋዴየር ጄኔራል ተሾመ አናጋው ጌሌፁኑውስታ ውላ እምፕልታቕኩ ቤንካዴስ ፊትጙንኩ አጌር ሹማጌልካ፣ አይማኖትኩ ታብል፣ ዋታትካ ምንግስትኩ እንፃኽስታንትካስታ ጊፁ እምፕልታቕዴስ ፊትጙንኩ   ኩስጚው ሜድሬኽዳ ዊዳፊ ሰላሙሳ ጉዳዮ ውና ፄውጝስ ካሊፅኹ፣ ውላው ቴሳትፎ ካንትስትኹስታ እዝብ አሳቦ ኔፃስ ጌለፁኑ ሜድሬኽ አኽⶓ ዲብስካ::

ሰላሙ ጉዳይ ፄትቲው አይልካ ይቢችካስ ቼሜትጛው ጋቲዊያኽ ኑንኩ ብርጋዴየር ጄኔራል ውላጊ እምፕልታቕኩ ቤንካ ዙራሙሪውሳ ሰላሞ ማንዲጝስ ጛውሳ ታምቦ ፊትጝጝ ቱስቴ ንካ::

እምፕልታቕ ፄትቲው አካልካሊ ፃምርትጚስ ሰላሞ ዊዳፊስ ቼሜትጝፅጝስ ይጋሪ ያኹኽ አኩዋሙሳ ጊሊፄ ቴርስጝስ ኩስጜ አሌዲስታ::