“ቴንኬኩን ዌራሳ ይንፂ ኬዋላ”

እን  አጌራ እርዳትስታንትዴስ ፍየታ ምግብስ ጛሬ ካሊጝስስታ እሊኩስኪላ ፊቲጝስ ፄውታው ልማቱ እንፅኺዳ ኩሪው ኬሴት ታምፃው ጉዳት ሳሴር ጋቲዌኽ::ዙራሙሪ ዋሺኒኪ ችግርዴስ ኔፃ ያኻኒ እምፕልታቕ ፖለቲካዊ፣ ኢኮኖሚያዊስታ ማይቤራዊ ጉዳይካዳ ቲጋማ አሴቴፍጝጝስ ልግስስ ጚውሳ ታምቦ ፊትጜ:: ፍትሬቱኪ ያኻ አቓ ግብርካ ኬሴትካ እምፕልታቑ ዝኩዊኒዳ ኩቲስስታ ኩታ ጋቲው ዳድስ ቻኒስቶ ታምፃና::

ኩሪው አዳጊ አቒው ይዎትዳስታ ንብሬትዳ ሚንቾ ችግሮ ታምፄ:: እምፕልታቕኪላ ሼውፅንታስ ጉዲስታንትካ ያኻና:: ኩሪው ኬሴት ታክስስታውላ ታምባው አኽጝስ ይንቱኒዴስ ፋሌንጋ “እንሳ እንፃኽስቴ” እፃቲው ጉዳያኽ:: ጄርካ ኹሩንታ፣ንሴስካ ውታኺዳ ዝኩንታ፣ ኻራስታ ጌርካ ናውላ አንቴሌቓው አኽጝስ ቤዴራማ ፄውስትጝ ቱስታውሳጊ ትንካኬ ፄውጝ ፋይፄ::

እምፕልታቖ አሜሬትኹሳ ምርቶስታ አፌርኹሳ ንብሬቶ ባያማ ሴዴድስትጝስ ካሌ:: ታምብኹሳ ችግሮ ዙርፃማ ቲሪትጝፅጝስኪላ ሚንቾ ጊዞ፣ ጌንዜቦስታ ግርቦ ፍሽፄ::

ጃላ ኩክራ ያኹንኩ ስፍርካዳ ዴዴክካዋ ግቢትጝ፣ ኽብፂስ ልምቱንኩ ኩራ ካፅፅካ ባይካዋ ክቺስጝስታ እሪ ይንታው ሳትስ ጝን አቕ ፉንታ ይጉዋቲንታ ማንዲጝ ፋይፄ::

ኩሪው ችግር እሌትዴስ ፌያማ አሜቱሳ አሊቤስታ እንቲታኪ ሚንች ዝቤንስ አጌላጌላውሳ ኽብፂውሳ አሉምቶጊ ካፄ:: ብቲ ካጋማጊ ካሳኒ ምርት ኔኬቴ:: ምርት ኔኬታኒ ጛርት አቑ ናማኪ አጌራውጊ ይኮኖሚ ድኻታ ጚውሳ ታምቦ ፊትጜ::ውላዴስኪ ጃላ ቲኪጝስ ካሊስታቲውሳ አቒውሳ ይወቶ ልቓ ደኪካኻዳ እሼያሱስታ ፄዌ::

አፍሪካኩ አጌርካዳ ጋያኪ ዙራሙሬ ቴክኖሎጀስስታ ፍትሬቶ ክቺክቺስ ማንዲጙ ሼውቲ ሌጌሳያሱ ዙራሙርካዳ ኩሪው አንቴሌቕጙ ችግር ባሳማ ካንትስቴ::

ዲጊ ጊዝዴስ ናቴ ኩሪው ኬሴት ኬቴምካዋ ዴሜካማ ሜንች ዙራሙርካዳ ሚንቺትስ ካንትስቴ::

እንሳ ችግሮ ኽይጝስ ችኽ ይንታኒ ይቢቺ ያኻውላ ሳኑዴስ ጉሽፃማ ዳድካው ግብሪዳ፣ ባይካውስታ ዲች ቦይ ግብራዳ እንቲታኪ ጌፄሩ ዙራሙሪዳ እርኬንካ ግቢትስታኒስ እስጜ ግምታኻዳ ሚፅጝ ማንዲስቴ::

ኩሪስ ፂኪስታንኩ ዙራሙርካዋ ቤዴራማ ሺሽጝስ ችግር ታምቡኒጊ ኽዮ ቴርስጝ ቱስቴ:: እምፕልታቕ አንዴስ ዙራሙሪዴስ ፍሽጝስ ትራንስፖርቱስታ ፄጌርጙንኩስ አግልግሎትካዋ ቤዴራማ ቴርስጝኪላ ማንዲስቴ::

ፍትሬቱሳ አዳጌ ካላካልጝጝ አኹኪ ይጉፅጝ ካሊስታቲው ያኹኒውላ ኬሴት ጊዙሳ እክዶ ቤዴራማ አኬድጝስ እንፃኽስትጝ ቱስቴ:: እንስኪላ ኩሪው ኬሴትስ ታምብጝስ ካላውሳ ውላቱዊ ኬሴቶ ኔኬትጝስ ካሊስቴ::

“ቴንኬኩን ዌራሳ ይንፂ ኬዋላ” ናኒስታጊ ችኹ ዎክት ማልጛ ይሳማጊ አንትጝዴስ ቤዴራማ ኩሪው ኬሴት ኬሴትስታቲታ ካንታው አካልጊ ቤዴራ ቴርቶ ፄውጝ ቱስቴ::