አዋዋው ሴይጚስታ ሚቲው ቴርት

ዘውዴ በካሉ

ይቶፒያ  ሚንችካ ብሄር ብሄረሰብካ አግስታንቲ አጌራኽ:: ብሄርብሄረሰብካ ጛው ያኹኽ ሊሊትጙኽ ባይል፣ታሪክስታ ወግ ዝኮ:: አዊው ብሄረሰብዳኪላ ሴይጝጚው፣ ሚቲው፣ ኻሱ፣ ሲንቲው፣ ሊንጊዴ ቻቤልጙስታ እሊኩኪላ ባይልካ አግስታና:: ነካስ አንቤብፅጝስ ፋኑኽኪላ ባንጂ ወረደዳስታ ዙሪዳ ሴይጝጚውስታ ሚቲውሳ ካስቶ ካንትኹ ፄውስትኹ ፅናትዴስ አግፅንኹሳ እንቲታኪ እንጃቢሪ ዩኒቨርስቲዳ አውጚው ኮንኪው ፁፍ ፅንታዳ ፎክለሩ ክንትፃንቲ አቶ እሱበለው ክንዴሊ  ፄውንኹሳ እጂጜኽ::

አዊ ብሄረሰቡ ቺፅጝፂዳ አግስታንኩ እምፕልታቕ ሚንቺትስ ትቲዴስ፣ ዛኺዴስስታ ምንጌ ሴጌካማ ውማይቲኒስ ጊቢፅካማ አኹኪ ሳኽፅካማ ሴያና::

ትቲዴስ አኹኪ ዛኺዴስ ጊቢስቱኽሳ ጝርጃኪ ጄትበብ ሱሬ፣ ወንቻሬ አኹኪ ተነፋነፎ፣ ጋቤስታ ኩታዋ ሴዬ:: ኹን ዴሜካ ክቢሶ፣ ኒፂሌ፣ ዱንጌስታ ባውንዶ ፄዋና::

እንቲታኪላ ሻሙኒው ዋይሚ ያኽያሱሳ ፋብሪካውሳ ቼርኮ ካሽምሮስታ ካኬ ሴያና:: ኹኑ ሴይጝጚ ዴሜካ ሚንቺትስ ስራስሪ፣ ወታትካስታ ቹትካ ኹን ሴያኑ ሽብሽቡ ያኹስ ወታትካ ሚንቺትስ ሴያና:: ሽብሽቦ ስዮ ጝርጄ ሚፂት አኹኪ ኺይስቲትኪ ያኻ ኽይስቲያስቲ ኹና ሴቴ::

ጝርጄ ሚፂት አኹኪ ኽይስቲት ኹና ሽብሽብዳ ሴንድዳ እንቲታኪ ጉርጉምዳ ዙሪዳ ኩልፎ ዙሬ ዙርፄታ ኮልፍቴ:: ኩልፎኪላ ኩፕፄው ኻሱ ወክትዳ ፂኻዋ ካንትጝስ  ሙሪኩ ስራስሪ ኩልፎ እያና:: ፂኻኪላ ኩፕፂኹሳ ኩልፎ ሽብሽቡዳ ኮሌፍቴ::

እሊው ኹኑ ስይኪላ ጉንፍስታ ጐዱ ክቢስ ያኹስ ላጛጊ ጉንፍ ክቢስ ይውዳ ጐማ ያኽስታማ ሳኽስቴ:: ጐዱ ክቢስ ዴሜካ ጐማስ ስኽስታውላስ ሻሙኒ ጊቢቱታ እሳን ያኻማ ታፋ ሚፅፂዴስ ኩክሬ ኺስታ እሳን ያኻማ ዱንጊስ ይውዳ እምስቴ:: ጋያኪ ጐዱ ክቢስ እዴት እላቲው ያኻማ ሚንቺትስ ቹትካ ሴያና:: ናካ ናካ ኽይስቲትኪ ያኻ ኽይስቲያስቲ  ኹና ሴይⶓ ጄሜርካ::  ጉንፍ ክቢስ ዴሜካ  ኽይስቲት ዎታታ ኹና ሴታው ስያኽ:: ጉንፍኪ ያኻ ጐዱ ክቢስ አቑውስታ ቲሪታስታ ቡዚትታ ኒንዲፊስ ሊኪስታማ ጊቢስታውያኽ::

እሊው ኹን ቴኬምስታኑ ባይሉ ስይ ዴሜካ ዱንጊያኽ:: ዱንጌ ስራስሪዴስ ሹማጌሎ ኺስታ ዶንጌታና:: ዱንጊ ሻሙኒ እንፃኽስታው ቼርክያኽ:: ዱንጊ ጊቢስቱስኪላ ዋኽስዋኾ ትቴ ሴግካማ አኹኪ ትቲ ሴግስታማስታ ዛኼ ፄውካማ ጊቢፅጝስ ካላና:: ዱንጊው ሌጌሴምት ውላስጊ ክቢሱ አይኔትስ ጊቢስታው ዋልታ አኹኪ ላጜታ ክፍፃያ አኹኪ ሹኻ ሜትር ያኹስ  ወብ አኹኪ እሳንት ዴሜካ ላጛ ክፍፃያ አኹኪ እምፕል ሜትርያኽ::

ዱንጌ ጊቢፃንኩ አቕ ክቢሱ አይኔትታስታ ጛው ፋይታ አኽጝስ ካሌ:: ሽብሽቡ ቼርክስ ንጝኪ ፋብሪካው ዋይሚዴስ ጊቢስታው ሽብሽቡስ፣ ሻሙኒ ጊቢታው ሽብሽብ ክቢስስ፣ ጉንፍስስታ ጐዶ ክቢስስ እንፃኽስስታው ዱንጊ ክቢሱ ሜቴንስኪ ያኻ አይኔትስ ሊሊቲያኽ::

ሽብሽቡስ፣ ጐዱስስታ ጉንፍ ክቢስስ እንፃኽስስታ ዱንጊ እዲቴ ኩክሪሾ ሌጌሳቲው አኽጝስ ይውዳ ሴዛስታ አንኩዋ ዙሪስ ዙራዙርፅካማ ዶንጌታና:: ዱንጊዳ ቴኬምስታንኩ እዴትኩ አይኔትካኪላ ላጜታ ያኻና:: እኒጛኪላ አምሉ፣ ድሚ፣ ምሹ፣ ፃርኪ፣ ድባፂጊሪ፣ ዋይማ ፂጊሪ  ያኻማ ብርቕናማ ካንትስታውሳ አዴቲውሳ ኬለሞ ቴኬምስታና:: ጛሪዳኪላ ፃርኬ ባውንዶ ታማታማና:: ኹኑሳ ባይሉሳ ሴይጝጜ ካንትናኒ እሎ ጉሳው ኽታዊኔ ባይሎስታ ወጐ ካንትፃውያኽ::

ጝርጃው ባያሉሳ ሴይጝጜ ካንትናኒ ዴሜካ ብሄረሰቡ ቺፅጝፂዳ ጝርጃ ሴያኑ ኹንታጊ ትቲዴስ፣ ምንጊዴስስታ ዛኺዴስ አሌቔትጛማ ሻሙኒስ ጊቢስትኹሳ አኹኪ ዛኺዴስ፣ ምንጊዴስስታ ትቲዴስ ጛራጛራ ጊቢስትኹሳ ሴያና:: ሻሙኒ ዛኺዴስኪ ያኻ ምንጊዴስ ጋያኪ ትቲዴስ ግዲፃማ ጊቢቱኽሳ ቼርኮ ሱሬ ጊቢፃኒስ ጄትባቦ፣ ወንቻሬ አኹኪ ተነፋነፎ፣ ጋቤስታ ኩታዋ ቴኬምስታና:: ፋብሪካው ዋይሚዴስ አግስትኹሳ ቼርኮ ካሽምርዴስስታ ካኪዴስ እንፃኽስታንኩ ቼርክካዋኪላ ሴያና:: ወንቻሬ አኹኪ ተነፋነፍ እስታው ሱሪ ግርብዴስ ኩክራ ያኻ ግርብ ዙራ ያኽስታማ ኩክሬ ፄቤብፅካማ ጊቢፃኑ ሱሪያኽ:: ይውዴስ ግርቦ ኺስታ እሳን ናማ ግርብዴስ ኩክራ ዴሜካ ፅባብያኽ:: እንጜዋ ቼርኮ ሴያንኩኪላ ኹኑዋ ሚፁኒዴስ ፋሌንጋስታ ጄርካዋ ካሜንⶓ ጄሜሩንኩ ጝርጃኽ:: ድሚስ ሾማጌሉንኩ አቕ ሚንቺትስ ሴያና::

ወንቻሬ ፋብሪካው ቼርካዴስኪ ያኻ ሻሙኒው ቼርክዴስ ሳኽስታው ያኹስ ላጛጊ ጛው ያኹኽ አላሚስ እሼና:: ሻሙኒው ቼርክዴስ ግቢስታውኪ ቲንስ እስታማ አሜትዴስ እምፕላኒ አኹኪ አሜቱ ባልስ ሴይስታው ያኹስ ፋብሪኪው ቼርካዴስ ጊቢስታው ዴሜካ ዜዎትሮ አኹኪ ጌርክ ቺፋ ቴኬምስታኑዌያኽ::

ጝርጃው ሴይጝጚው አይኔትዴስ ግርብ ታምባ ሱሪ እምፕልያኽ:: እንኪላ ወንቻሬታጊ አምፕል ጝርጂ ወታትኔቱሳ ጊዞ ፌያኒ አኹኪ ሾማጌልቱ ድሚው አችዳ ታምባኒ እንቲታኪ ኹናዋ ሚፁኒዴስ ፋሌንጋ ሴዬ::

ግርብ ዙራ ሱሪ ሳኽስቱስ ይውዴስ ኩክራ ግርቦኺስታ እሳን ናማ ግርብዴስ ኩክራ ልኩ ሳምባዳ ፄቤባማ ሳኽስቴ:: ፋብሪኪው ቼርካዴስ ሳኽስታው ግርብ ታምባ ሱሪ አሜት ባልዳ፣ ኻስዳ፣ ሲንቲዳስታ ፄጌርጙንኩ አደባባይካዳ ሴይስታው አኽጝስ አብቱ ሊኪፂ ፄውስታማ ካንትስቴ::

እሊው ዴሜካ ጋቢስታ ኩታኽ:: ሴይስታውኪላ ድሚስ  ሾማጌሉንኩ ኹንኪ ያኻ ጝርዳ ሴያኑ ስያኽ:: እንኪላ ትቲኪ ያኻ ምንጊ  ሻሙኒስ ታስስማኽ:: ቲሪ ሚንቺትስ 28ዴስ 32 ክፍፃያ ያኹስ ውብ አኹኪ እሳንት ዴሜካ 400 (ሲዚ ሊኻ) ዛኺ ያኻማ ጊቢስታውያኽ:: ጋቢ ጊቢስቱስ እዴት ፅሊ ያኻማ እንፃኽስቴ :: ኩታ እምፕል እምፕል ዙራሙሪዳ ጐዶ እስታማ አቕስቴ:: ጐዶ እዴት እላቲውያኽ ጐዶ አኹኪ ኩታ ጋቢዴስ ሊሊታ ፄዋው እዴት እንኩርስቱስያኽ:: ጋቢስታ ኩታ ሴይስታው ሲንቲዳ፣ ኻሳዳ እንቲታኪ ባሉ ወክትዳኽ:: እኒጛ ባይልካስታ ሴይጝጚው፣ ሚቲው እንቲታኪ ግዱ ቴርት ናካ ዝቤን ያጉኽ ፋብሪካኩ ዋይምካስ ዊፅስታማጊ ኽታዊኔ ባይሎስታ ታሪኮ ሲፍፅጝ ይጉዋማጊ ይንታ::

ያኼስጉ ናካ ናካ ዴሜካ ጃኑ ስይስ አዊው ባይሉ ስይ አደባባይዳ ጉዋል ናማ ካንትስታማጊያኽ:: እንጚስኪላ አገው ፌሬስቴንካው ባል አሜት ቺፋ ኬቤርስትጝ አቕ ጛውሳ ባይሎስታ ታሪኮ አቕትጝፃንታ ኽሳንቴ ድሎ ብሳ:: አዊውሳ ባይሎ ዋትጛይ ሲፍፅጝስ ካሊስታው? አዊው ባይልስታ ታሪክ ዋትጛይ ናውሳ ካንትኹስኪላ እንጃቢሪ ዩኒቨርስቲዳ አውጚው ኮንኪስ ፁፍ ፅንታዳ ፎክለሩ ክንትፃንቲ አቶ እሱበለው ክንዴ አዊው ሴይጝጚ ሊሊትጙንኩ ጊዝካስስታ አኼንካስ ሊኪስታው አኽⶓ ጌሌፅካ:: አቶ እሱባለው አዊው ስይ ሴይስታኑ ጊዝዴስ፣ ሴያኑ አቑ ድሚዴስ ሴያንኩ አቑ አኺኒዴስ ካንትስታማ አዊው ጝርጂ ሴያው ስይ፣ ኹና ሴታው ሲይ፣ ድሚው አችስ ሴያኑ ሴይስታ ወታኮው ጊዝስ ሴያኑ አኽⶓ ሼሽጝስ ካሊስታው አኽⶓ ዙሜካ::

አዋዋኾዳ ኹን ሼያኑ ስይ ጛው ድሚው አችታጊ ሊሊቲ አኽⶓኪላ አቶ እሱባለው ጌሌፅካ:: ጝርጄ ሚፂት ኹና ክቢሶ፣ ባውንዶ፣ ዱንጌ ድጋጐ አኹኪ ጃንችሌ፣ ታፍዳ አምባሮ፣ ልኩዳ ዲሬ፣ ላጜትዳ ቲባኔ፣ ጉርጉምዳ ብሮ ክፅሌ፣ ሚስኪሌ፣ አልቦ፣ ዲሬስታ እሊኩሳጊ ቲኪምስቴት አኽⶓኪላ ዙሜካ:: ጝርጄ ሚፂያስቲ ዴሜካ እንፃኺታስ ናካስታ ፋብሪካው ስይ ሚንቻያሱዳስታ ቴክኖሎጂ ሌጌሳያሱዳ ጊዝዳ አሜትባል ያኻኒ፣ ታቡት ፉስ ቹዋውሳ ባውንዶ፣ ዱንጌ ቴኬምስታሺና ጃጊ ጌታጌቶ አኹኪ ግዶ ቴኬምስትጝ አዋዋኾዳ ዴስስታያሱ አኽⶓኪላ ዙሜካ::

ኹናዋ ሚፁኹ ጝርጂ ዴሜካ ወንቻሬ፣ ግርባኔ አኹኪ ግርብ ዙራሳ፣ ሱሬ፣ ጋቤ ሴያማ ግንቦ አኹኪ ዜንጐ እሜማ ኹናዋ ሚፅጝዴስ ፍና እሺኹዴስ ጃላ ጚጛራሳ ማንዳማ ዝኩዋው፤ ጝኑ አላፍት እንኮኽስታው አኽⶓ አቶ እሱባለው እርዳትፅካ::

አሌሙ ልግስኒሊስታ ቴክኖሎጂሊ እምትጛማ አዋዋኾሱ ባይል ኪስስታማጊ አኽⶓ ጉሹንኩ አቶ እሱባለው ኻሱ ቴርትዴስ ጄሜራማ ኪስስታማጊ አኽⶓ ጌሌፅካ:: ቴክኖሎጂ ሌጌሳኒ ባይሎጊ አብሮ ሌጌፅጝጉ ባይሎ ድፃማ ቴክኖሎጂስ ኪስጝ ጉዳ ጋቲው አኽⶓኪላ ዙሜካ:: ባይል ድሳቲታ ባይሎ ቴክኖሎጂሊ አብርታ ሌጌፅጝ ቱስታኩ ኾትካ ንጝኪ ባይልስታ ቱሪዝም፣ እንጃቢሪ ዩኒቨርስቲ፣ ባይልስታ ፅናቱ ይንስቲቲዩት፣ አውጚው ኮንኪስታ ፁፍፅንታ፣ ብሄረሰቡ ኩስጚ ጝናስታ ሚዲያ እንቲታኪ ውላጊ አቒ ታምቦጊ ፊትጛንታ እንፅኼንቶ ፌያፌይፅካ::

ባይልስታ ቴክኖሎጂ አብርታ ሌጌሳታ ባይል ፊልምስ፣ ቲያትርስ፣ ጅሚስ እሳንጛማጊ ክምንትስ ፌያፌይጛታስታ ባይል ድሳቲታ እንፃኽስትጝ ታምብዌኒዴስ ማንዲስታው አኽⶓኪላ ጉሽካ አቶ እሱባለው:: ኪቢርስቲንኻ ቺርቤዋ ጋዚቴ አንቤባንትካ ናካ ቤን ላኹዳ አንቤብፁንኹ አዊው ሴይጚው ቴርት እንጚስ አሌድስቴ:: ሲፋው እትሜትዳ ቤን ላጛስ ሚቲውሳ፣ ሲንቲውስስታ አባላሚውሳ ሴይጝጜ ካንትኹስ እንቶጂሱላ ታምፅናኻኽ::  ቲኖይን::