“አጌራዊ ኩስጝጚ አጌራዊ ቱትጝጚስ”

ታደለ አጋጄ

አጌራዊ ኩስጝጚ ሊሊትጙንኩ እምፕልታቕኩ ቤንካ ክቻዳ አሳቡ ሊሊት ፌቴርስታኒ፣ ኬፍቲኒ ፖላቲካው ችግርስ፣ ዎሬምዴስ ፋሌንጋ ኬሴትስታንኩ አኼንካስ አኹኪ ፖላቲካው ካይጝጚዳ አግስታንኩ ሚንች ታምብዌንካ አካልካሊ ቱትጚዳ ታምብጝስ አላሜ እሚኹስታ አጌራዊ ጜዋንትስ ግልፃ ያኹኽ ግብስታ አላሚ ዝኩኽ ኩስጝጚው ካስትያኽ::

ይቶፒያ አጌራዊ ኩስጝጚው ኮሚሽኖ 11 ኮሚሽናርካዋ ጎሌልጝስ ይካቲት 14/2014 ም.አ ሴዬምጝስ ይካቲት 16/2014 ም.አ እንፅኼ ይፋስ ጄሜራ::

ኮሚሽኑ ቲሪትጝፂ አዋጅዳ ግልፅስ እንኩርስትኹስታ ይቶፒያ ካስጝፄታጊ አግስቴው አጌራዊ ኩስጝጚ ኔፃስታ ጊሊልቲኒ ያኹኽ ኾትስ ጉስስትጝ ፋይፃው አኽጝታጊ ይቶፒያው አጌራዊ ኩስጝጚው ኮማሽን አዋጅስ ቲሪትጛታ ፄውስታ::

አጌራዊ ኩስጝጚው ኮሚሽን  ጋቻዋ ኽይጙ ሴልካዴስ እምፕል ያኹስ አጌራዊ ኩስጝጜ ፄውጝስ ካሊስታታ እዝቡ ዎኬልስታንትካው ኩስጚ ጝና ይቶፒያው አጌራዊ ኩስጝጚው ኮሚሽኑ ቲሪትጝፂ አዋጁ ቼፍ 1265/2014ዳ ፄዴካማ እንፅኺሾ ቱስታ::

ይቶፒያው አጌራዊ ኩስጝጚው ኮሚሽን ቲሪትጝፂ አዋጅዳ ቴግባራዋ ፄውጝስ ፋይፅኹ ውላ አቡቓው አጌራዊ ኩስጝጜያኽ:: አጌራዊ ኩስጝጚ ዎክቶ ማንዱኽስታ አጌራ ዝኪኹ አኺኒሊ ካንትስታኒ ጋቻዋ ኽይጙ እምፕል ዳዲያኽ::

አጌራዉ ኩስጝጚ እምፕል አሳብዳስታ እምፕል ዎጌን ይቪችካስ ኩስጝጚ ያኺትየስ ሊሊትጙንኩ አሳብካዳ፣ ትክምካዳ፣ ፋይካዳስታ ሜብትካዳ ኩስጝጚ ፄውስታዊያኽ::

ሊሊትጙንኩ እምፕልታቕኩ ቤንካ ዎኬላንኩ እምፕልታቕ አግስቴካማ እሳኖ ኩስጝጜ ካስጝፃኑ ያኹስ አጌራዳ ካንትስታንኩ ችግርካዳ ሊሊትቶ ቲሪፒዚዳ አግጝስ ይጋሬ ኽይቴ አግጝስ ፄውስታው ሴልያኽ::

አጌራዊ ኩስጝጚው ትክም ቹዋስ ጋቻዋ ኽይጝስ እንቲታኪ ፖላቲካውሳስታ ዲሞክራሲውሳ ካይጝጜ ሌጌፅጝስ ኬፍቲኒ ትክም ዝኩኹ ያኹስ ጋያኪ ጋቻዋ ካላካልጝጝስስታ ቺፅጝፅጝስ እንቲታኪ ችግሮ ኽይጝስ ቹዋ ሜሳሪ ያኻማ ካንትስቴ::

አጌራዊ ኩስጝጚው ቹዋ አላሚ ስርኩ አጌራዊ ጉዳይካዳ ዝኩንኩሳ ሊሊትካዋ ፄቤብፅጝስ፣ ቱትጜ አግጝስ፣ ሊሊትጙንኩ እምፕልታቕኩ ቤንካ ክቻዳ ምንግስትሊ ዝኩኹሳ ታምትጜ ኬሽጝፅጝስ፣ አምንጝጜ ሌጌፅጝስ፣ ዙሚትጚዳ ስርትኹ ፖላቲካው ባይሎ አግጝስ፣ ቻቤልት ዝኩኹሳ አጌራውሳ ምንግስቶ እምፕልትስ ፌቴርጝስ ሊሊትቶ ዴሜካ ሰላማዊ ያኹኽ ዳድስ ኽይጝስ ዲሞክራሲው ባይሎ ካይጝፅጝስስታ ልማቶ አሬኽስጝሲያኽ::

አጌራዊ ኩስጝጚው ኮሚሽን አዋጅስ ቲሪትጙኽ ጊዝዴስ ጄሜራማ ሊሊትጙንኩ አጌራኩ ቤንካዳ ሊሊትጙንኩሳ እንፅኽካዋ አኮሜቻማጊ አግስቴ::

ይቶፒያዉ አጌራዊ ኩስጝጚው ኮሚሽን ስርኩ አጌራዊ ጉዳይካዳ ዉላ አሴቴፍጝፃውስታ ውላ አቡቕ ኩስጝጚ ፄውስታታ ቱትጚዳ ታምብስቱንኩ ጉዳይካዳ ጉዳይ ትኩታኩ አካልካስ ፌፄምስታንታ ፄውጝስታ ፌፄምጝጚው፣ እክዶ ቴርሳማ ዲግስጝ እንቲታኪ ቱስታውሳ ሲፋሲፍጜ ፄውጝ ቱስታው አኽⶓ ቲሪትጝፂ አዋጅዳ ዴንጌግስታ::

እንስኪላ ጉዳይ ካንታኩ አካልካ እይስትኹሳ ኩስጚውሳ አሳቦ ፌፄምፅጝስ ፅሬቶ ፄዋኑላ ይጉኒውላ ኮሚሽን ፌፄምፅጝስ ዋሳላካ አክም ዝኮ? ናው ካሲ ካቢትጝጚስ ጁዌ::

ኩስጝጚኩ አሳብካ ቴግባርዳ እሼታ ካሊፃው አክም አምፕልታቑስታ ታምብዌን አካልካው እርዳቲሲያኽ:: እንስኪላ ኩስጝጚውሳ ካስቶ ውላ አሴቴፍጛኑ፣ ውላ አቡቓውስታ ቻቤልስታንት ዝኩኹ ያኻታ ፄውጝ ፋይፃንቲያኽ::

እሊውሾስ ዴሜካ እንሳ ፌፄምፅጝሾስ ምንግስት ፖላቲካውሳ ፋዮስታ ኩርፄንቶ ካቢትጝፃማ ጌሌፃ:: ምንግስት፣ እዝብስታ ታምብዌን አካልካ ኩስጝጜካማ ቱትጚዳ ታምብስቱንኩ ጉዳይካ እዝብስ አቕፅጙ ሜብት ኮሚሽንስ እይስትኹ አኽጝስ ፌፄምፃንቲ አካል ፌፄምፃቲው ያኹኒጊ ምንግስት እምፕል ታምብዌና አካልታ ካሲስትጝዴስስታ ታሪክስ ዎኬስስትጝዴስ  ይጉዋቲዊያኽ::

አጌራዳ ቱትጜ አቲጝ ፌቴርስትጝስ ጉዲስታው እምፕልታቒያኽ:: እንኪሊ ዝኩጝ፣ ስፍሪዴስ እሊው ስፍሪሾ ካሳማ እንፃኽስትጝስስታ አብቶስታ ንብሬቶ አፌርጝስ ቼጌርስትጝ፣ ስርኩ አግልግሎትካ አግፅⶓ አቲጝስታ እሊኩ ችግርካስ ጉዳት ታምባው እምፕልታቕዳ አኽጝስ አጌራዊ ኩስጝጚዳ ጜዋና እዝብያኽ::

ትግራይስታ አማኻሪ ክልልዴስ ይጎ 12 ክልልካዳስታ ላጛ ኬቴሙ ቺፅጝፅካዳ አጌራዊ ኩስጝጚው ካስትዳ አሴቴፍጛንኩ አካልካ ጎሌልስትካ::

ኩስጝጚው ካስትዳ ጉዋልንኹ ፍሺ ዝኩክ ታምብዌንካ አካልካ ክቻዴስ ፖላቲካው ፓርትካ ቶኬምስታና:: ይቶፒያዳ ኩስጝጚው ካስትዳ ዝኩኽ አጌራዊ ኩስጝጜ ቻቤልጝስ ፋዮ ካንትፅካያስኩ ፖለቲካኩ ፓርትካ አሴቴፍጜካማጊ አግስታና:: ኩስጝጚው ካስትዳ ጉሻንኩ ካስካኪላ ኩስጝጜ ፄውጝስ ቱትጚዳ ታምብጝስ ፄውስትኹሳ፣ እርዳትጝስ፣ ክችስጝ ቱስታውሳ ጉዳዮ ክችስጝስ ቱትጜካማ ሚንችካ ፖላቲካኩ ፓርትካ አሴቴፍጜካማጊ አግስታና::

ይቶፒያው አጌራዊ ኩስጝጚው ኮሚሽን አጌራዳ ካስጛው ኩስጝጚዳ አሴቴፍጝፃውስታ ውላ አቡቑ ያኻታ አሴቴፍጛንትካዋ ጐሌልጙ ቴግባር እንዳራ ስራ ፄዋማ አኮሜችስታው አኽⶓ? ዋዴስ ጄሜርጝ ቱስታው አኽⶓ? ዋታኮው ዳድስ ካስጛው? ናንኩ ካስካስ ኮሚሽን ሚንችካ እንፅኽካ  አኮሜቻ::

ይቶፒያው አጌራዊ ኩስጝጚው ኮሚሽን ውላ ፓርትካዴስ ኩስጝጚው ካስትዳ አሴቴፍጛንታ ፄውጝስ ፅሬት ፄውሰታማጊ አግስታው አኽⶓ ኮሚሽን ጌሌፃ:: ፖላቲካኩ ፓርትካስታ ታምብዌንካ አካልካ አጀንዴ ኩፕፅጙስታ ኩስጝጚው ካስትዳ ኩታ አሴቴፍጛንትካ ያኻንታ ዝኮ ናንኩ አጃንድካዋ ኩታ ኮሚሽንስ ዲግሳንታ ውላጊ ክቻ ድል እይስታማ አሴቴፍጛንትካ ያኻንታ ፄውጝስ ኮሚሽን ፅሬቶ ፄዋማጊ አኽⶓ አቕፃ::

ይቶፒያዳ ካስጛማጊ አግስታዉ አጌራዊ ኩስጝጚ ጉስስታው ሜርህዴስ እምፕል ውላ አቡቓዉስታ አሴቴፍጝፃው አኽጝያኽ:: እንዴስ ጁጝስኪላ አጌራው ጉዳይዳ ውላ ታምብ ዌን አካልካ አሴቴፍጛንታ ሚንች ፅሬት ፄውስታ::

እጉሳ ሴግቴንቶ ኬቤርፅኹ ዳድስ ዶንጌትካማ ምንግስትሊ ሴብትጛንኩ አይልካ ኩስጝጚው ካስትዳ አሴቴፍጛንታ ኮሚሽን እቑዌ ዲግሳ:: ዶንጌትካማ ሴብትጛንኩ አይልካዋ ጋቻሾ ቱዋንታ ፄውንኩ ጉዳይካ ኩስጝጚ  ካስትዳ አጃንዲሾ ያጋንታ ፄውጝ ዝኮ:: ያኼስጉ ኩስጝጚዴስ  ኬምፕስ ኬምፖ ዎሬሙ ሴብትጝጚስ ችግሮ ኽይጝስ ካሊስታላ:: ዋይሚስታ ያኼ እስታማኪላ ማንዲስታላ:: ምንግስቶ ዴሜካማ ጋቻሾ ቱንኩ ዎጌንካስ ሊሊትጙንኩ አጃንድካዳ ኩስጝጚ ካስትሾ ዲጋንታስታ አሴቴፍጛንትካ ያኻንታ ታምብዌንካ አካልካ ኮሚሽንሊ ቲቢቢርጚስ እንፃኽስታማጊ አኽጝ ጌሌፅታ::

ወረዳው አችስ አጀንዴ ኩፕፅጙ ሜድሬኽዳ አሴቴፍጛንኩ እምፕልታቖ ዎኬላንኩ ዎኬልስታንትካ 12 ክልልካዳሰታ 2 ኬቴሙ ቺፅጝፅካዳ ካስጝጛ:: ትግራይዳስታ አማኻሪ ክልልዳ ኩፂ አሴቴፍጛንትካ ጎሌልጙ ካስት ካስጛያላ::

ስንብቶ አዲስ አበባ ኬቴምዳ አምፕልታቕኩ ቤንካዋስታ ሊሊትጙንኩ አካልካዴስ ዎኬልስቱንኩ ዎኬልስታንትካ አጃንዴ ኩፕፅጙ ካስት ጄሜርታ::

ንባር፡- አጌራዊ ኩስጝጚ ኮሚሽኑ ማይቤራዊ ታምትጝፂ ፍንዴስ