ስንሻው አበበ
52 አሜታ ናታሊ ዳው 12 ጌርክካኻዳ 1ሻይ ኪሎ ሜትሮ ጊጝጝስ ታይላንድዴስ ጂያታ ሲንጋፖሮ ታምቤ::
ናታሊ እምፕል ጌርክስ 84 ኪሎ ሜትሮ (ላጛ ማራቶኖ ላካሳ) ጊጝጝስ ካሊኩ ጌርክኪላ እሺና::
ናታሊ ሚንች እቺቱ ጊጛንታ ታኹስ ልኺትጚው አሊዲዳ አባላምቲዳኪ ያኻ አሊዲዳ ፊጝ ሊሊት እላኬኽ:: “አሌሙ እዝብዴስ ሊኽዴስ 99 ትኩሚ 95 ታፋ ሳኪትጝፅጝስ ካላቲውሳ ዲቦ ፄውጝስ ካለኽ” ኔ::
ጊጚው ወክትዳ እሺኹ ይሴን አዋው እንኩዊንትዴስ ድምክና አባላምቲ ጌርክስ እንጅኩፂዳስታ 3ንቲ ጌርክስ ዴሜካ ቻኺው ቦንቢው ኢንፌክሽን አኹኪ ቑንዚ ጊጜ ይዝኩዋ ፄዋሺኾ::
እንዴስ ቤዴራ ጊጝታሽቲኹ 200 ኪሎ ሜትሮ ይቢቼ አኽⶓ ጊሊፂት ናታሊ፤ ይጛርትጛሳ ሊሊትጙኽ ዳድስ ፌቴንጝስ ኹሉ ቺፋ ቴርታኽ ኒሲ ቢቢሲስ ጊሊፄ::
ታይላንዱ ድንቤርዴስ ማሌጂያሾስ ፌያማ ሲንጋፖርሾ ካሳታ አኬድስትኹ ጊጚው ፕሮጀክት 1 ሻይ ናውሳ ስያሜ አግፃ::
ናታሊ ጊጝቱስ 12 ጌርክካኻዳ ክማኒ እሌት ቺፋ ፌይፂኩሳ ችግርካዋ ቢቢሲስ ድምፅስ እንፅኼንትስ እንፃኽቱስ ስኽታ::
5ንቲ ጌርክዳ “ዳድዳ ኩርሶ ኹጝስ ልቓ ጊዞ ካብስ ጁጝዴስ ቤዴራ 5 ደኪካስ ያኻው ጊዝስ ዙራሙሬ ጐቤንጝስ ዴስ እናሸኑኻ፤ ናኪኒ ጌርክ ክርፂ እሺኹ ያኹኒላ ኹሉ ቺፋ ክርፂ ያኼናታ አምናላ ጌና ሚንች ይጉዌ” ኒስ እንፅኼንቶ እንፃኽታሽቲኾ::
ክማኒ 2ዴስ 5 ሳታስ ይቢቼ ኹሪጝስ ጌደድስትኹ ናታሊው ኬች 3ንቲ ጌርክዴስ ጉሽፃማ ጌርኩ አይሊኒ አዋው እንኩዋንትዴሰ አሜሌትጝስ ኻራ ጊጛታኪላ ጌዴድስታሺኻ::
ሚንች ጌርክካስኪላ “ስግላ ጃጊ ጊጝⶓ አቴይ ኻሲ?” ናው ጅፊፂ ኪሲ እንኮኽስታሺት አኽⶓኪላ ዙሜ:: ታምብጛ ታኹስ አካላት ዴሬታሺት አኽⶓ ዙሜ::
አይሎ ሊጊሲሜ እቺቶ ጊጛንትካ “ሊሊቲ አቕት አኹኪ ታክስጚው አክም ዝኩክያኽ ኒስ ናታሊ ዙሜ:: ጛርቱ ሳኪትጚዴስ ድምክና አኹኪ ጛርትስ አግፂኹ ክርፂ ወይሚዴስ ድምክና ፕሮጀክት 1 ሻይ ኹኖ ይስጝፃው ኔታ ቴስፋ ፄውታሽቲት አኽⶓ ናታሊ አቕፂ::
ሚንችካ ወትትካ ኹን ስፖርትዳ አሴቴፍጛንታ ይስጝፃው ባኩ ፍካዴንቱ ፕሮጀክት ያኹኽ GRLS (ጂ አር ኤል ኤስስ) 37 ሻይ ዶላር ያኻው ጊጚዴስ ኩፓ::
“አቕ ይካኪ ባይካኪ እንፅኼንቶ ፌያፌይጝፃኑ ሜንድሬኽ እሺኾ” ኒስ ናታሊ ዙሜ::
ናታሊ ጊጜ አሌድጝዳ ዝኩኽ ዴስቲ ቑንዜስታ ድርትኔጊ ዜኔግፃው አኽⶓ ካሲስቴኒ “ፅሬትዳስታ ዴስዳ ክርፂ ወይሚ ዝኮ” ኔ::