ግባቱ ዲግስጝጚ

ዘውዴ በካሉ

2016/17 ምርቱ ዝቤንስ ኽብፂው ማዳባሪውሳ ዲግስጝጚውስታ ታምፅጙ ቤዴራ ቴርቱ እንፅኺ አሌድስታታ ክልሉ ግብርኒው ቢሩ ታክስፃ::

አዊ ብሄረሰቡ ቺፅጝፂ አንኪሺ ጉዋጉሲ ወረዳ ፅርባ ኬቤሊው አሬሳቻንቲ አቶ አይነታው አገኝ 2016/17 ምርቱ ዝቤንስ ያኻው ኽብፂው ማዳባሪ ዲጋማጊ ጋቲው አኽⶓ ዙሜካ:: ብሄረሰቡ ቺፅጝፂዴስ አንኪሺ ወረዳ አኹዋቲ ልማትስ አቕስቱኹ ዙራሙሪ አኽⶓ ዲብስካማ ግብአቱ ዲግስጝጚዳ ችግር ዝኩኽ አኽⶓ ድኹዌካ::

አንኪሺ ጉዋጉሲ ወረዳ ፅርባ ኬቤሊዳ ሹኻ ዴዴክ ዝኩኽ አኽⶓ ጉሹንኩ አቶ አይነታው ኩላንቲ ዴዴክ፣ አዮ ዴዴክስታ ቡረና ዴዴክ አኽⶓ ጌለፅካ:: እንዴስ ፍና እኒጛ ሹኻ ዴዴክካስ ወክትስ ዲጋሽኹ ኽብፂው ማዳባሪ ናኪኒ ወክትዳ ዋሺኒዳኪ ዴዴክዳኪ ያኻ ማቤራትካዳ ዲጋያሱ አኽⶓ ድኹዌካ::

ናኪኒ ወክትዳ ችኹ ሴብል ኩፕናማ ሳኑ አኹዋቲስ ያኻው ብቲ አሬስስታማ ላስላሳማ ዲጋኩስ ግብአቱ ችግርስ ዜርጝስ ካላካያስኩ አኽⶓ ዲብስካ::

አክም ዝኩኽ አሬሳቻንቲ ጊፂኒዴስ ጌቤልዴስ ጌቤሎ እንዜጛማጊ ጁዋማጊ ዜራማጊ ያኹኒኪላ አክማ ጋቲንኩ አሬሳቻንትካ ብቴ ላሳላሰፅካማ ዲግስካማ ዜርስታውላስ ይጉⶓ ዲብስካ::

አሬሳቻንቲ አይነታው ዜርጝስ ቴርሱኑ አኹዋቲው ልማትስ ያኻው ብቲ ሹኻ ኩፃ አኽጝስ ስንዳዮ፣ ቤርቤሮ፣ ሹምቤስታ እሊኩስጊ ትክልትካዋ ዜርጝስ አኬድⶓ ዲብስካማ ግብአቱ ዲግስጝጚው ችግርስ አኬድስትኹሳ ብቴ ዜርስ ሾፌንጝስ ካሊስታያሱ አኽⶓ ዙሜካ::

ግብአቱ ችግር ዝኩኒኪላ ፍትሬቱሳ ማዳባሬ  አኹኪ ኮምፖስቶ ቴርስⶓኪላ ዙሜካ:: ግብርኒኩ ውማይቴንካው እርዳቲ ፍና እሺኹዴስ ናካ ሴላሙ ችግርስ ግብርኒኩ ውማይቴንካው  እርዳቲ ቲሪⶓ ጌሌፅካማ ፍንሾስ ትኩታኩ አካልካ አላፍቶ ካፅካማ እንፃኽስታንታ ካሲካ::

አዊ ብሄረሰቡ ቺፅጝፂ አንኪሺ ጉዋጉሲ ወረዳዳ ግብርኒው ፅፌት ጝናዳ ግብአቱ ዲግስጝጚው ኬቹ ጉሳንታ ዘውዲቱ ስዩም 2016/17 ምርቱ ዝቤንስ ዲግስጝስ አኬድስትኹ ኽብፂው ማዳባሪ ላምቡ ዲጋያሱ አኽⶓ ጌሌፅካ::

2016/17 ምርቱ ዝቤንስ ብሄረሰቡ ቺፅጝፂታኪ ያኻ ወረዳታ ዲግጝስ አኬድስትኹ ግብአት ዲጋቲታ ሴላሙ ችግር ፅንጋኻ ያኹኽ አኽⶓ ዊ/ሮ ዘውደቱ  ጌሌፅካ:: ፌይኹ አሜትዳ አንኪሺ ጉዋጉሲ ወረዳታጊ 2015/16 ምርቱ ዝቤንስ ዲግስጝስ አኬድስትኹ ኽብፂው ማዳባሪ 52 ሻይ 420 ኩንታል ያኹኒኪላ አጌርታጊ ጌቴምኹ ግብአቱ እንፂትስ ዲግኹ 24 ሻይ 555 ኩንታል አኽⶓ ጌለፅካ::

2016/17 ምርቱ ዝቤንስ ዴሜካ አኹዋቲው ልማትስ ይቢቺስ ዩኒሴፍ ቦርንዴስ 959 ኩንታል፣ ኒቢያዴስ ዴሜካ 990 ኩንታል ኽብፂው ማዳባሪ ዲግጝስ አኬድስታማ ሰላሙ ችግርስ ዲግጝስ ካላያሱ አኽⶓ ዙሜካ:: አንኪሺ ጉዋጉሲ ወረዳዳ 14 ኬቤልካ ዝኩⶓ ጌሌፁንኩ ግብአቱ ዲግስጝጚው ኬቹ ጉሳንታ ሹኻ ኬቤልካዳ ሴላሙ ችግርስ ግብርኒኩ ውማይቴንካ እርዳትጝስ ካሊስታውላስ ይጉኒኪላ 11 ኬቤልካዳ እንፃኽስቴካማጊ አኽⶓ እርዳትፅካ:: አጌራው ሴላሙ ችግር ኽይስታማ ሴላም ያኹኒጊ ዳላው ግብአት ዝኩዋው አኽⶓኪላ ጌሌፅካ::

ኹስታውላስስታ ዝቕስታውላስ ቺጝ እሺጝ ካሊስታቲው አኽጝስ ግብአት ዲጋውስ ዳድስጊ ካላካልጝፂው ስራዊቲስ አጄብስታማ ወክትስ ዲጋያታ ናኒስ ካሲካ::

አማኻሪ ክልሉ ግብርኒው ቢሩ ናኪኒ ወክትስ ካንትስታማጊ ዝኩኹ ሴላሙ ችግርዴስ ፊጝስ ኽብፂውሳ ማዳባሬ ዱግስጙሳ እንፅኼ እንፃኽስታማጊ አኽⶓ ግብርኒው ቢሩ አቕፃ::

ትክትሊ ቺፅጝፂ ማይሬግስ ጌፄሩ ልማቱ ዜርፍ ክላስተሩ ቴቤቤርጝፃንቲስታ አማኻሪ ክልሉ ግብርኒ ቢሩ አላፊ ዶ/ር ድረሰ ሳህሉ  ክልሉ ዙራሙሪዳ ግብርኒ ልማቱሳ ዜርፎ ዙርፃማ ሊሚፅጝስስታ እንኮጚኒ ኽብፂው ማዳባሪው ዲግስጚዳስታ ታምብስታንቱ ችግርዴሰ ፊጝስ እንፃኽስትካማጊ አኽⶓ አቕፅካ::

ዶ/ር ድረስ ሳህሉ ፌድራሉ ምንግስት ፄዋይኹ እርዳቲው ስሬትስ ናኪኒ ወክትስ ዲጋታ ክልል 2016/17 ምርቱ ዝቤንስ ሶኼታ ሚሊዮን ኩንታልዴስ ጃላ ኽብፂውሳ ማዳባሬ ጄውጝስ አኬድስታማ ጄው ፌፄምስታማ ሴላም ያኹኽ ዙራሙሪሾ እንዜጝትጛማጊ አኽⶓ ጌሌፅካ::

ያኼስጉ ኽብፂውሳ ማዳባሬ ዜሬፍጝዳ አሴሜርጙንኩ ሰላሙ ፄርካ አይልካው ምክንያትስ ዳድዳ ዜሬፍስታማጊስታ ዳዴኽስታማጊ አኽⶓ ዶክተር ድረስ ሳህሉ ጌሌፅካ::

ውላ እዝብ ጋያኪላ አሬሳቻንትካ ምንግስቱ ፄትቲው አይልካው ኬምፕዳ ያኽጝስስታ ቴቤቤርጚስ ክልልስ ጄውስትኹሳ ኽብፂውሳ ማዳባሬ ጊዝስስታ ወክትስ አኹዋቲው እርሺው ልማትስ ዲግስጝስ አኹዋቲ ልማትስ እንኩርስትኹሳ 40 ሚሉዮን ኩንታል ምርቶ አሜርትጙሳ እክዶስታ ግቦ ሳኪትጝፅጝ ቱስቴ ንካ ዶክተር ድረስ ሳህሉ::

2016/17 ምርቱ ዝቤንዳ 333 ሻይ ሄክታር ዴስ ጃላ ብቲ አኾቲስ ሊሚፅጝስ 40 ትኩሚ እምፕል ሚሊዮን ኩንታል ምርቶ አግፅጝስ አኬድስታማ እንፅኺሾ ቱስትⶓ ጌሌፅካ::

እንጚዴስ ሴስታ ትኩሚ ሴዛ ሚሊዮን ኩንታል ሳኑ አኹዋቲው ስንዳይስያኽ አኽጝ ቶኬምስታ::