ድፂኩ ታፍካ ኩፒኒስ

ሴጙንኩ ሜንችካ ኽይስቴካያስኩ ችግርካ፣ ትንክፍስትጝ እንቲታኪ ዝኩንኩሳ አኼንካዋ እንዳራኪ ያጋቲኑውስታ ካንትጝ እሼማ ቻኒ ኽሳንቴ ችግሮ ታምፃው አኽⶓ ሼው ንጝስ ናካ ዝኩኽ ጊዝዴስ ኪቻ ክንትፃው ዲብ እላኽ::

አጌርታ ናማኪ ክልልታ ፌዮንኩ ላጛስታ ሹኻ አሜትካኻዳ ሊሊትጙንኩ ጋቻኩስታ ወሬሙ ድፅካ ሌንጌድትካ:: ጋያኪ ሰሜኑ ወሬም ትክምቲ 24/2013 ምሬት አሜታዳ ጉሽፃ ፄዋማ ጁኽ ጊዝዴስ ጄሜራማ ይቶፒያ አቒው አብትስኪ ያኻ አብት ንብሬትስ ኽሳንቴ ሜስዋቴ ኬታ::

እን ችግር ኽይስትኹ ላጚኒቻ ዴሜካ አማኻሪ ክልላኻዳ ፌቴርስትኹ ጋቻ እሼቻማ ብሄሩ ፅካትሾ ሌጌስጝስ ሚንችካውሳ ይወቶ ድፃማጊያኽ:: ዙራሙሪ ቺፋ ወሬምስ እዝብ ቱዋ ፋውሳ ዳብዜ አቲጝስ ክራማጊስታ ሴዴድስታማጊ አግስቴ::

ዋሺኔኪ ፖለቲካውሳ ፋዮ ዋኽትጝፅጝስ ያኽስታው ሊሊትጝኹ ፅካትስ ፅካቱ ቤዴራ ፍንት እዝብ ያኻማጊያኽ:: እዝባ ጋታ ሌጌሳውኪ ያኻ ይንታው ልማት እላቲው አኽጝ ማሊስታማጊ ዋሺኔኪ ካሴ ዲግሳቲው ታፍ ፉራማጊ ዝኩኽ እዝብዳ አኽጝ ዴሜካ ሚንችካስ ፍታና ያኻ::

ፌቴርስትኹ ፄትቲው ችግርስኪላ ሚንችካ ጛው ዙራሙሪዴስ ፌኔኬልጜካ:: ውላቱዊ ዝኩዊኒው ልቕልቕቲዴስ ሴጛ ያኼካ::

አጌራ ናማኪ እዝብ ባስኹ ችግርሾ ቱዋቲታ ዴሜካ ምንግስት ኽይቴ እያታ እዝብ ሊሊትጙንኩ ኩስጚኩ ሜንድሬኽካዳ ክልኾ እንኮኽፃማጊያኽ:: ምንግስት እዝቡሳ ክልኾ እንኮኻማ ችግሮ አኹኪ ሊሊቶ ዙሚትጚስ ኽይጝስ ዴሜካ ድፂኩሳ ታፍካዋ ቲሪፅጝ ቱስቴ::

ካቪትጚስ አሌሙ ፖለቲካው ታሪክስ አጌርዴስ ኪቻ እዝብ ዝኩዋኒ አጌራ አጌራ ታኻውስታ ቶኬምስቴ::

ኽይስ ዴሜካ ምንግስት ኪላ ጚውሳ ታምቦ ካፅጝ ቱስቴ:: ምንግስት እዝባ ጋታ እዝብ ዴሜካ ምንግስታ ጋታ ዝኩጝ ቲኹዋ አኽⶓ ሼውናማ እዝብ ዴግሳማጊ ዝኩኽሳ ሴላሙሳ ካሴ ዙርፅጝ ቱስቴ::

ክሪስታ ምራሪ አምፖ ታምብምባ ማንዲጝ ፋሌንጋ አጌራዋ ግቢትጝስ ቺጊርፂ አኽⶓ  እዝቡ አዜዝስታላ ንጝ ናው አቕስትኹ ፁፍዳ እንኩርስትኹሳ አሳቦ ሼው ንጝ ቱስቴ:: ዶንጌታንትካ አካልካኪላ ምንግስቶ ካሴኑሳ ካሴ እጋዊ ዳድስ ፄውጝስጉ እዝብዳ ፅካቶ ፌፄምጝስ ካሲ ዙራቲው አኽⶓ ሼውንጝ ቱስቴ:: እዝብ እዝብታ ሴላማዊ ዳድስ ዝኩዊኔ ጉሳታ ሴላሙሳ ፊኹዌ ፊኹዋታ ድፂኩ ታፍካ ኩፒኒስ!