ብሄር ብሄረሰብካውስታ እዝብካው ባል ጅጅጋዳ

ታደለ አጋጄ

18ንቲ ብሄር ብሄረሰብካውስታ እዝብካው ባል ሶማሌ ክልል ጅጅጋ ኬቴምዳ ኬቤርስትኾ::

“ሚንችትስታ ክችክችት አጌራዊ እምፕልትስ” ናው ቹዋ እንፅኼንትስ ኬቤርስትኹ ብሄር ብሄረሰብካውስታ እዝብካው ባልዳ ኬፍቴንካ ምንግስትኩ እንፅኺኩ አላፍካ አግስቴካማ እንፅኼንቶ ፌያፌይጝፄካ::

ባሉ ኬቤርጚዳ አግስቴካማ ዙሚትጜ ፄውንኩ ሶማሌ ክልሉ ቺፅጝፂ ጛራ ሙስተፌ መሃመድ ባል እምፕልቶ ይስጝፅጝስ ህብረ ብሄራውት ፂናታ ፄዋውያኽ ንካ::

ይቶፒያንካ ሊሊትጙኹ ባይሎ፣ እምኔቶስታ አይቶ እሚጝስ አጌራዋ ሌጌፅጙ እጂኹ ዴስ ዝኩክያኽ ንካ::

“እኖጂ ይቶፒያንካ ዛኺታስታ ምንጊታ አኽናና ዝኩናኻ እዝብካኽ” ኑንኩ ቺፅጝፂ ጛራ ፍትሬትስ እይስትኹሳ አብቶ ቱስቲስ ሊሚፅጝስ ቴኬምስትናና ላጛሴንቶ ይስጝፅጝ ቱስቴኪላ ንካ:: ክልል ላጛንቲ ጊዝስ ባሎ ኬቤርፃታ እይስትጝስ ምስጋኔ ዲግስካ::

ፌዴሬሸኑ ኩስጚ ጝናሱ ጉባይ ኽምባ አገኘሁ ተሻገር ብሄር ብሄረሰብካውስታ እዝብካው ባል አጌራዊ እምፕልቶ ይስጝፅጝስ ጉዋል ንኹ ትክም ዝኩኽያኽ ንካ::

ይቶፒያንካ ሊሊትዴስ ኪቻ እምፕልትዳ፣ እቺትጚዴስ ዲግጚዳ ታራታርጚዴስ አምንጚዳ ታምናታ እርዳታዊያኽ ንካ:: ይቶፒያ ሚንችካት አጌራ፤ እኑስ ህብር ብሄሪዊ አይት ዝኩቲያኽ ኑንኩ ቺፅጝፂ ጛራ ሜርህኪላ ክችክቺቲያኽ ኑኑ::

ይቶፒያንካ ሊሊትጙኽ ታሪኩ አጋታማዳ እምፕልትስ እታጁዌካማ እጂፁንቲ አጌራ ኑንኩ ጉባይ ኽምባ እፕልቶስታ ህብረ ብሄራውቶ ይስጝፅጝስ ካሊፃዊያኽ ንካ::

አጌራዊ ካሲዴስ ፋሌንጋ ኬስትስቱንኩ ሚንችካ ፅንጋኽካ ዝኩኒውላ ፅናትስ ፌይፅጝስ ኬሽኹሳ ዋይሜ አግጝስ ካሊስታኽ ንካ:: አጌር አጌርታ ያኻማ ሲፋታ ውላ ታምቦጊ ፊትጝጝ ቱስታዌያኽ ኑንኩ ጉባይ ኽምባ ፅካ አሜታዴስ ፍና ባል ሶማሌ ክልልዳ አባላምቲ ጊዝስ ባል ኬቤርስቱስ ፄትቲው ችግር እሺⶓ ቶኬምካማ ናካ ህብረ ብሄራዊ ይቶፒያስ ምሳላ ያኹኽ ክልል አኽⶓ ጌሌፅካ::

ትክላይ ሚንስትር አብይ አሀመድ ብሄር ብሄረሰብካውስታ እዝብካው ባሎ ካንትኹስ ፌያፌይጝፁኑ እንፅኼንትዳ ንጙኒ ብሄር ብሄረሰብካው ባል ህብረ ብሄራዊ እምፕልቶ ስራ ፄውኹስ ብሄራዊ ትክሞ ክንፅፃውሳ ትርክቶ ኬፍፅናው ባልያኽ ንካ::

ይቶፒያውት እምፕላሾስ ብሄር ብሄራሳብካውሳ ሚንቺቶ ቻቤላኑ እሊውሾስ ዴሜካ ሚንቺቶ ፃምርሳማ እሚኹስታ ዝቤንዴስ ዝቤንሾ ካይጙኽ ይሴን እምፕልትስ አምንጝፃው ባሊያኽ ንካ:: ባል ህብር ብሄራዊ እምፕልትዳ ስራ ፄውኹሳ ብሄራዊ ትክሞ ካንፅፃውሳ ትርክቶ ኬፍፅናው ባልያኽ ንካ::

አጌሮ ድፅጝስስታ ቤንጝፅጝስ እንፃኽስስታው አጌራ ይጉዊ ትርክትዴስ ፍናው፣ ፖለቲካው ታሪክዴስ ይጎ ማይቤራዊ ታሪኮ ኬፍፅናው፣ አይጛዴስ ኪቻ ናካሱስታ ቻሱ ድልዳስታ እንፅኽካዳ ስራ ፄውኹሳ እንፅኼ እንፃኽስትናው እጋ ምንግስቱ ቴርትዳ ቲሪኹሳ እምፕሎ ፖላቲካውሰታ ኢኮኖሚውሳ እምፕልታቖ ፌቴርጝስ ካሊፃው ቹዋ ትርክት አኽⶓ ዙሜካ::

ብሄራዊ ትርክቱ ጉሽፅካ ጜዌን ብሄር ብሄረሰብካኽ ኑንኩ ዶክተር አብይ ይቶፒያ ብሄር ብሄረሰብካው ችግርስታ ፍታኒ ጎሌልጝፃውላ ይጋሪ ድልስስታ እምፕልትስ ኬያኑ ሜስዋቲስ ፂኒጝዴስ ጁኽ አኽⶓ ጌሌፅካ::

“ይቶፒያዋ ሌጌፃያሱ፣ ይቶፒያስ ኑስ ዋይሜ ኬያያሱ አይኪ እዝብ እላኽ:: ውላጊ ብሄር ብሄረሰብካ ሌጌፁንቲ እንቲታኪ ዋይሜ ኬይንቲ ይቶፒያ፣ ፍታውትስ ክችክችትስስታ እንቲታኪ ኔፃኔትስ ዝኩጙ ሜብትኪላ ዝኩክያኽ ንካ::

ዝቤኖ ካያውስታ ውላ ታክስፃው ይቶፒያ ሌጌፅጝስ ካሊናው ብሄራዊ ትርክቱ ስሬትስያኽ ኑንኩ ትክላይ ሚንስትር አብይ አህመድ ባሎ ኬቤርፅኑስ እንሱ እንኮኽስትስ አኽጝ ቱስቴ ንካ::

18ንቲ ብሄር ብሄረሰብካውስታ እዝብካው ባልዳ አግሰቴካማ እንፅኼንቶ ፌያፌይጝፁንኩ ኢፌድሪው ፕሬዝዳንት ሳህለወርክ ዘውዴ አጌርታ እምፕልትስ ሲፍጝስ ፋይፁኒጊ ክችክትስ ዝኩጝዴስ ይጎ እሊው ጉላሊ እላቲው አኽጝስ አይቶ ቻቤላማ ሌንጌድፅጝ ፋይፄ ንካ::

ይቶፒያው ኽሳንቲ እዝብ ኽሳንትዳ ስራ ያኹኽያኽ ኑንኩ ፕሬዝዳንት ይቶፒያውት ታሪኩ፣ ባይሉስታ እሴቱ ዋይሚያኽ ናኒስ ጌሌፅካ::

ሊሊትዴስ እምፕልትሰ ኬቤቤርጚስስታ ክችከችትስ ጋቻዴስ ኪቻ ካሊትጚስ እንቲታኪ አሳቡ ኽሳንትስ ቢዲሬ እይጝስ እምፕልቶ ይሴን ስርዳ ፄውጝስ ካሊፃው አኽⶓ ጌሌፅካ::

ጋቻ ኬሴትስታኒ ኩስጚስስታ ውላ አቡቒ ኩስጚስ ኽይጝ ቱስቴ ንጝስ ታክስፁንኩ ፕሬዝዳንታ ባል ኬቤርስትጝ ውላ ብሄርካስታ ብሄረሰብካ  ጛስ ጛዋ ባይሎ ቤንጛንታስታ ኩስጛንታ ካሊፃው አኽⶓኪላ ዙሜካ::

19ንቲ አሜትስ ብሄር ብሄረሰብካው ባል ደቡብ ይቶፒያ ክልል አርባ ምንች ኬቴምዳ ኬቤርስታው አኽጝ ማሊስታ::