አይሸሽም አባተ
“አማኻሪ ክልልዳ እምንኹ ባጄት አሜትዳ ሹኻ ቢሊዮን ብርዴስ ኽሳው ፍሺስ ዳዶ ግቢትጝስታ ፅጋኒ አኮሜችስታውያኽ”
ክልሉ ዳዱ ቢሩ 2016 ባጄት አሜቱ ዳዱ ግንባቲውሳ ፕሮጀክቶ አቕትጝፅጙ ሜንድሬኽ ጐንዴር ኬቴምዳ ካስጝጛ:: ቢሩው አላፊ ዶክተር ጋሻው አወቀ አቕፁኑውስታጊ ክልላኻዳ ዝኩኽሳ ልቓ ሰላሞ ቴኬምስትጝስ ባጄት አሜትዳ አኬድስቱንኩ ዳዱ መሰረተ ልማቱሳ ፕሮጀክቶ ዋኽስ ቴግባራዋ ፄውጝስ ቤዴራቴርት አሌድስታ::
ባጄት አሜትዳ ዳዱሳ ታምብስታንቶ ቼሜትጝፅጝስ 388 ኪሎ ሜትር ስካዊ ፄፄሩ ዳዱሳ ግንባቴ ዴሜካማ 10 ሻይ ኪሎ ሜትርዴስ ጃላ ሴጙንኩ ዳድካዋ ፄጌንጙ እንፅኺ አኮሜችስታው አኽⶓ ቼሜትጝፄካ:: ድምክኒስ 92 እንፄንካስታ ክቻክቺ እቺት ዌኒ ዳንምብካዋ እንፃኽስትጝስ አኬድስትⶓ ቶኬምካ:: ዳድካው ግንባቲ ምንግስቱስታ እምፕልታቑ ቴሳትፉስ ግቢስታንኩ አኽⶓ ዙሜካ::
ዳድካው ግንባቲስታ ፅጋኒው እንፅኺስ ሹኻ ቢሊዮን ብር ፍሺ ፄውስታው ያኹስ እንጚዴስ 171 ሚሊዮን ብር ዴሜካ እምፕልታቕዴስ ኩፑኽ ጌንዜብ አኽⶓ ቢሩው አላፊ ጌሌፅካ:: ባጄት አሜትዳ ባግትስ ቤዴልስቱንኩ ዙራሙርካሾ እርዳቲውሳ አሬ እንዜጝትጝፅጝስ ካሊስታታ 80 ኪሎ ሜትር ፄፄሩ ዳድ አሬኽኹ አኹኪ እምቢት ንኹ አኺኒስ ፅጋኒውሳ እንፅኼ አኮሜችጝስ አግልግሎቲስ ብስታ ያኻታ ፄውስትⶓ እርዳትፅካ::
ዳዱ እንፅኺው ፕሮጀክት 22 ሻይ ዴስ ጃላ ያኻንኩ ክልላኻዳ አግስታንኩ እንፅኼ አቱንኩ ወታትካስ እንፅኺውሳ ድሎ ፌቴራው አኽⶓ ቶኬሙንኩ ቢሩው አላፊ ዶክተር ጋሻው እምፕልታቕ ዙራሙሪውሳ ሰላሞ ማንዲጝስ ዳዱ ግንባቲስስታ ፅጋኒው እንፅኺ ሳኪትጛታ ጚውሳ ታምቦ ፊትጝጚ ማንዲስታው አኽⶓ ታክስፅካ::
ክልላኻሱ ስካዊስታ ሴጙኽ ዳዱ ፅጋኒውሳ እንፅኼ አኮሜችጝስ ቤዴራ ቴርት አሌድስትⶓ ጌሌፁንኩ ዴሜካ አማኻሪ ክልሉ ጌፄር ዳዱ ክንስትራንክሽን ኤጀንሲው ቹዋ ስራ አስኪያጅ አቶ ከለሙ ሙሉነህ አጄንሲ ናካሱ ወክትዳ ቤዴራ ቴርቱሳ እንፅኼ አሌድጝስ እምንኹ ቴሳስ አርፊዴስ ጄሜራማ እይስትኹሳ እክድ ሳኪትጝፅጝስ ዋኽ ልቕልቕቲሾ ቱስታውስታ ጌሌፅካ::
እንጚሊ እምትጙኽስ ምራብ ጐንዴር ዞኑ ዳዱ ሜምሪው አላፊ አቶ አባይነህ ወረታው ጛሾስ ዞናኻዳ ቼሜትጙኽሳ ሰላሞ ጉሽፃ ፄውጝስ እምፕልታቑ ቴሳትፉስ 290 ኪሎሜትር ፄፄሩ ዳዱ ፅጋኒ አኮሜችስታው አኽⶓ አቕፄካ::
ዙራሙሪውሳ ቺፅጝፄስታ እምፕልታቖ ቴኬምስትጝስ እንቲታኪ ቴቤቤርጝፅጝስ ዳዱ ፅጋኒው እንፅኺስ እሼው 37 ሚሊዮን ብሮ ኩፕፅጙ እንፅኺ ጄሜርስትⶓ ቶኬምካ:: እከዶ አቕትጝፅጙ ሜድሬኽዳ ክልሉሳ አመራሮ ዴሜካማ ሰሜንዴስ ክቻክቺስታ ምዕራብ ጐንዴር ዞንካዴስ ፊትጝጙንኩ ዳዱ አላፍካስታ ውማይቴንካ አሴቴፍጛንትካ አኽⶓ ይቶፒያው አብኑ አግልግሎቲዴስ አግፅንኹ ንባር ቶኬሜ::