“ችኽ ዴስ አኾቲስ ሊሚፅጝ ኬሼ”

ታደለ አጋጄ

ይቶፒያ ዲጊ ጊዝዴስ ናቴ አኾቲ አሬሳቻንትካ ልማቱ እንፅኺስ ሊሊቴ ትኩቶ እይጝስ እንፃኽስቴታጊ አግስቲ:: ሊሊትጙንኩ አኹክሳ ጉላልካዋ ቴኬምስትጝስ አሬሳቻንትካ ሳኑ አኾቲስ ሊሊትጙንኩ ሴብልካዋ አሜሬትጝስ ቴኬምስታንታ ያኼካ:: አኾቲውሳ ስንዳዮ ክላስተርሰ አኹኪ ምስሊስ ዜርጝስ አሜት ቺፋ ኬሽኹ ምርት አሜሬትስታማጊ አኽጝ ጌሌፅስቴ::

አዊ ብሄረሰቡ ቺፅጝፂ ዞን አንኪሺ ጉዋጉሲ ወረዳ ማንጃ ቱንኪሺ ኬቤሊኩ አሬሳቻንትካ አውጚው ራዲዮንሊ ስልኪስ ፄውኑ እጂጚዳ አኾቲው ልማቱ እንፅኼ እንፃኽስትካማጊ አኽⶓ ዙሜካ::

ማንጂ ቱንኪሺ ኬቤሊው አሬሳቻንቲ አለነ ሽቱነህ አኾቲውሳ እንፅኺስ እርሼ አሬሴካማጊ አኽⶓ ዙሜካ:: ፌይኹ አሜትዳ አኾቲዉስ ስንዳዮ ሊሚፅጝስ ኬሽኹሳ ምርቶ አግፅⶓ ጌሌፁንኩ አሬሳቻንቲ ንⶓኪላ ፌይኹ አሜትዴስ ኬሽኹሳ ሴብሎ ዋግፅጝስ ቤዴራ ቴርቱሳ እንፅኼ እንፃኽስትካማጊ አግስታንኩ አኽⶓ ጌሌፅካ::

እንዴስ ቤዴራ ሴዛ ሄክታር ብቲዳ ስንዳዮ ምስሊስ አኹኪ ክላስተርስ ዜርጝስ 30 ኩንታልዴስ ጃላ ምርቶ አግፅⶓ ዙሙንኩ አሬሳቻንቲ አለነ ንⶓ ዴሜካ እምፕል ሄክታር ብቴ ዴሜክጝስ አንኮ ሄክታር ብቴ አኾቲስ ሊሚፅጝስ ቴርትⶓ እንክርፄካ::

ኬቤሊዉ ግብርኒኩ ውማይቴንካ እርሼ አሬስጝዴስ ጄሜርካማ ዜሮ ዜሪኒባኺስታ ኩስጜ ቤንጝፃንኩ አኽⶓ ቶኬምካማ ስንዳዮ ምስሊስ አኹኪ ክላስተርስ ሊሚፃንታ ፄውጝስ አሬሳቻንትካ ቴኬምስታንታ ፄዌካማጊያኽ ንካ::

ወክታዊ አማኻሪ ክልልዳ ኬስትስትኹ ሰላሙስታ ፄትቲው ችግርስ ግባትስታ ምርት ዜር አሬሳቻንትካስ ዲጋዉላ ይጉⶓ ጌሌፅካማ ኬሽኹሳ ምርቶ አሜሬታቲንታ ግባቱ ችግር ኽሳንቲ ፅንጋኺ አኽⶓኪላ ዙሜካ::

ናካ አሬሳቻንትካ ጌፄንካዴስ እምፕሎ ኩሪፂቴ አቓ ግብሪ ማዳባሬ ሲዚ ሻይ ብርስ ጄውጝስ ስንዳዮ ዜርካማጊ አኽⶓ ጌሌፅካ::

አሬሳቻንቲ አለነ ችኽዳ አሜሬታኑ ምርትዴስ አኾቲስ አሜሬታኑ ምርትስ ኬሽኹስ ቴኬምትንትካ ያኻንኩ አኽⶓ ቶኬምካማ ምንግስት እይኹሳ ሞተር ፓምፖ ቴኬምስትካማ ንⶓኪላ አኾቲስ ኬሽኹሳ ስንዳዮሳ ምርቶ አግፅጝስ ቴርቶ ዙሜካ::

እሊው ማንጃ ቱንኪሺ ኬቤሊው አሬሳቻንቲ ደመላሽ አለማየሁ ኬቤሊታ አኾቲስ ሊሊትጙንኩ ሴብልካ ሊማኑ ዙራሙሪ አኽⶓ ዙሜካማ ዱኒዚ፣ ስንዳይ፣ ቢራው ስምኪስታ እሊኩ ትክልትካስታ ኩፓኩፕካጊ ዋጋኑ ዙራሙሪ አኽⶓ እንክርፄካ:: እኒጛጊ ዋጋንኩ ያኹኒውላ ትክልትካዋስታ ኩፓኩፕካዋ ሊማፅጝዳ አሬሳቻንትካዴስ ይጉዋው ዲብ ዝኩⶓ ቶኬምካ:: ትክልትካዋስታ ኩፓኩፕካዋ ሊሚፅጝ ሚንች ትክም ዝኩኹ ያኹኒውላ ቱስታው ዳድስ አንኬባኬብጚስ ኬሽኹስ ቴኬምስትጝስ ካሉኹ አሬሳቻንቲ እላቲው አኽⶓ ዙሜካ::

ኬቤሊታ ስንዳዮ አኾቲስ ሊሚፅጝስ ኬሽኹ ዴስ ዝኩⶓ ቶኬሙንኩ አሬሳቻንቲ ደመላሽ አኾቲስ ሊሚፅካማ አግፁኑ ምርትስ ጛጛርትጛዴስ ፊቲስጝስ ጌቤልሾ ዲግስጝስ ዝኩዊኒዳ ኪሴ ያግⶓኪላ ድኹዌካ::

ግብርኒው ውማይቴንካውሳ ኩስጜ ቻቤላንኩ አሬሳቻንትካ ኬሽኹስ ቴኬምስታንታ ያኹንኩ አኽⶓኪላ ጌሌፅካ::

እንኮጛ ስንዳዮ አኾቲስ ክላሰተርስ ሊሚፅጝስ ኬሽኹሳ ምርቶ አግፅⶓ ዙሙንኩ አሬሳቻንቲ ደመላሽ ንⶓ ኩፂ ኬሽኹስ ምርቶ አግፃቲንታ ግባቱ አኹኪ አቒ ግብሪ ማዳባሪው ችግር ስጋትዳ ሚፅⶓ ዙሜካ:: አኽጝስኪላ አቓ ግብሪ ማዳባሪው ችግርስ  ግባቶ ቴኬምስታኑላ ዜርⶓ እንክርፄካ:: እንጚስኪላ ምርት እንኮጛዴስ ኔኬታው ንካማ ሲጊጙኽ ዙሙኑ::

ማንጃ ቱንኪሺ ኬቤሊው ግብርኒው ፅፌት ጝናሱ አላፊ አቶ መለሰ ቢተው አሬሳቻንትካ ስንዳዮ ምስሊስ አኹኪ ክላስተርስ ዜራንታ ፄውጝስ እርዳቴ ፄዌካማጊ አግስታንኩ አኽⶓ ዙሜካ:: አሬሳቻንትካ ጛጛርትጛዴስ ፊቲስካማ ጌቤልስ ዲግስጝስ ቴኬምስታንታ ያኻንታ ውማዩሳ ኩስጜ ኩስጝፄካማጊ አኽⶓ ቶኬምካ::

2015 ምርቱ ዝቤንዳ ኬቤሊታ 7 ሊኻ ሄክታርዴስ ጃላ ብቲዳ ክላስተርስ ስንዳዩ ሊሚፃንታ ፄውጝስ ኬሽኹሳ ምርቶ አሜሬትካማ ቴኬምስትንትካ ያኹንኩ አኽⶓ ጌሌፅካ::

አሬሳቻንትካኪላ ግብርኒኩ ውማይቴንካውሳ ኩስጜ ቻቤልጝስ ኬሽኹሳ ምርቶ ዋግፅጝስ ቴኬምስታንታ ያኹንኩ አኽⶓ ጉሽካ::

አሬሳቻንትካ ስንዳዮ ያኻ እሊውሳ ሴብሎ ምስሊስ አኹኪ ክላስተርስ ሊሚፅጝ አሪሜ እምፕልትስ አሬምጝስ፣ ግባቶ ቱስታው ዳድስ ቴኬምስታንታ ፄውጝስስታ ሴብሎ እምፕላኒስ ኩፕፅጝስ አኹኪ ሳቢጝስ ቴኬማው አኽⶓ ዙሜካ::

አሬሳቻንትካ ክላስተርስ ሴብሎ ዜርጝ ሚንች ትክም ዝኩⶓ እርዳትስካ ኑንኩ ግብርኒው ውማይቲኒ እንስኪላ አሬሳቻንትካ ዋይሚስታ ያኼካማጊ አኽⶓ ዙሜካ::

እንኮጛ ኬቤሊው ላጛ ሳይትዳ ክላስተርስ አኹኪ ምሰሊስ ስንዳዮ ሊሚፃሺንኩ አኽⶓ ጌሌፅካማ ንⶓ ዴሜካ ሴዛ ሳይትካዳ ክላስተርስ ሊሚፅጝስ እክዶ እሚኒውላ ግባቱ ችግርስ ስካዊስ ዴሜክስትኹ ሳይትዳ ስንዳዮ ሊሚፅጝዴስ ኪቻ አሬሳቻንትካ ጛጂ ፋያኑሳ ሴብሎ ሊሚፃንታ ፄውስትⶓ ዙሜካ:: እንኮጛ ሊሚፃሺኑ ስፍሪዳ ኩፂ ንⶓኪላ ስንዳይ ክላስተርስ ሊማታ ፄውⶓ ቶኬምካ::

አኾቲስ ቴኬምስታንኩ ላጛ ብንካ ኬሽኹ አኹ ዝኩኹ አኽጝስ አኹ እንፂት ጌቴማቲው አኽⶓኪላ እርዳትፅካ:: አጌርታ ናማኪ ክልልታ ግባቱ ችግር አሬሳቻንትካዋ ቼጌርፅⶓ ጌሌፅካማ ዜርስትኹ ሴብልዳ አኾ ሚፅጝሰ ቴርትⶓ ዙሜካ::

አኾቲስ ሊሙኽ ሴብል ችኹ ወክትዳ ሊማው ሴብልዴስ ኬሽኹሳ ምርቶ እያው አኽⶓ ቶኬሙንኩ አቶ መለስ አኾቲስ ሊማውዴስ እምፕል ሄክታር ብቲዴስ 32 ኩንታሎኺስታ ምርቶ አግፅጝስ ካላንኩ አኽⶓ ጌሌፅካ:: ችኹ ወክትዳ ሊማው ኩፂ እምፕል ሄክታር ብቲዳ 16 ኩንታልዴስ ጃላ ምርት አግስቴ ንካ:: እንስኪላ ችኽዳ ዜርስታው ሴብልዴስ ኪቻ አኾቲስ ሊማው ሴብል አሬሳቻንትካስ ኬሻንቴ ምርቶ እያው አኽⶓ እርዳትፅካ::

አኽጝስኪላ አሬሳቻንትካ ዋሺኔኪ ሴብሎ ክላስተርስ አኹኪ ምስሊስ ሊሚፅጝ ቱስታው አኽⶓ ዙሜካ::