ግብሮ ኩፕፅጝስ ፅንጋኻ ያኹኽ ጋቻ

ታደለ አጋጄ

ምንግስት እምፕልታቑ ኢኮኖሚው፣ ማይቤራዊስታ ፖለቲካው ልግስኔ አሬኽፅጝስ ሊሊትጙንኩ እምፕልታቕዴስ ሚፄ ኩፕፄ::

ምንግስት ኩፕፃው ሚፂዴስ ግብርዴስ አግስታው ሚፂ እምፕሊያኽ:: ግብር እምፕል አጌሩ ኢኮኖሚው፣ ልማቱስታ ፖላቲካው ልግስስ ቹዋ ስር አኽⶓ ዜርፍኩ ውማይቴንካ ጌሌፃና:: ያኼስጉ ግብር ኩፕናው ጊዝካዳ ክልላኻዳ ኬሴትስትኹ ሰላሙስታ ፄትቲው ችግር ሚፂ ኩፕናቲታ ፄውስታማ እጄ:: አማኻሪ ክልልዳ ሰላም ሴፌኑንኩ ዙራሙርካዳ ሚፄ ኩፕፃንኩ  ኾትካ ግብሮ  ኩፕፅጙ እንፅኺ ጄሜርስታ:: አዊ ብሄረሰቡ ቺፅጝፂዳ ሊሊትጙንኩ ወረድካዳ  ፌቴርስትኹ ሰላሙ ችግርስ ግብር ወክትሰ ኬይስታቲታ ችግሮ ፌቴርⶓ ጌቤው ሜምሪው አላፊ ጌሌፅካ::

ብሄረሰቡ ቺፅጝፂው ሚፂው /ጌቢው/ ሜምሪው አላፊ አቶ ውባንተ ዳምቴ ዞንታ ዝኩኹ ሚፄ ኩፕፅጙሳ ቴግባሮ ካንትኹ ስልኪስ እዩኑ ንባርታ አባላምቲ ኩርማን አሜቱ ፊፂምጚዳ አሜቱሳ እክዶ ወረድካስስታ ኬቴሙ ቺፅጝፅካስ እይⶓ ዙሜካ:: እን አሜትዳ ኬቴሙ አግልግሎቲዴስስታ ሚዲቢኒ ሚፂዴስ 2 ቢሊዮን 880 ሚሊዮን 192 ሻይ 808 ብሮ ኩፕፅጝስ አኬድስትⶓ ጌሌፅካ::

እክዱ ስሬትስኪላ ሰላም ዝኩክ ዙራሙርካዳ ሚፄ ኩፕፅጝስ ፅሬት ፄውስታማጊ አኽⶓ ቶኬሙንኩ አቶ ወባንተ ናካሳኺስታ ኩርማን አሜትዳ 245 ሚሊዮን 235 ሻይ 78 ብር ኩፕፅጝስ ካሊስትⶓ ዙሜካ:: እንኪላ እክዱሳ ሊኽዴስ 9 ታፋ ይቢቺ አኽⶓ አቕፅካ::

ክልሉ ሰላሙስታ ፄትቲው ችግር ሚፄ ኩፕፅጝዳ ኬፍቲኔ ቻኒስቶ ታምፅⶓ ቶኬሙንኩ ሚፂው ሜምሪው አላፊ ብሄረሰቡ ቺፅጝፂታ ሚፄ ኩፕፅናናጊ አግስትናው ሰላምስታ ፄትቲ ዝኩክ ዙራሙርኮዳኽ ንካ::

ሰላሙሰታ ፄትቲው ችግር ዝኩክ ዙራሙርካዳ ሚፄ ኩፕፅካማጊ ጋቲው አኽⶓኪላ አቐፄካ::

ሰላሙሰታ ፄትቲው ችግርስ ኩፕንኹ ሚፂ ልቓ አኽⶓ ጌሌፅካማ ሰላሙ ችግር እላ ያኻኒ ኩፂ እንሳላካ ሚፂ ኩፕናቲው  እሺⶓኽ  አቶ ዉባንተ ዙሙኑ::

ብሄረሰቡ ቺፅጝፂው እዝብ ካሊስታው አኺኒስጊ ግብሮ ኬይጝስ ፄዋኑ ፋይስታ ፅሬት ጋሺስታዊያኽ ንካ::

አምፕልታቕ ግብሮ ኬይጝስ ጉዶ ልቕልቕቴ ካንትፅካማጊ አኽⶓ ጌሌፅካማ ኬቴምካዳ ፄውስታው ሴላሙ ኩስጚዳ ሚፂ ኩፕናታ እምፕልታቕስ እንኮኽስቶ ፌቴርካማጊ አኽⶓኪላ ዙሜካ::

እምፕልታቕ ጉሻንኩ ልማትኩ ካስካስ ዙርሜ እይጝስ ውላ እምፕልታቕ ግብሮ ወክትስ ኬይጝ ቱስታው አኽⶓኪላ ጉሽካ:: ሚፂ ኩፕናውላስ  ምንግስትኩ እንፃኽስታንትካዴስ ኬይስታው ዳሞዚስስታ  እምፕልታቕስ ልማትኩ ካስካስ ዙርሜ እይⶓስ ቼጌርፃው አኽⶓኽ ጌቢው ሜምሪው አላፊ አቶ ውባንተ ዙሙኑ::

እምፕልታቕ እንፃኽስቱኑ ልክስ ግብሮ ኬያቲንኩ ያኹኒጊ ጌንዜቡ እንፂት ፌቴርስታዊያኽ ኑንኩ ሜምሪው አላፊ እን ዴሜካ እምፕልታቑ ካሲስ ዙርሜ እይጝስ ካሊስታቲው አኽⶓ ጌሌፅካ::

አምፕልታቕ ግብሮ ኬያንታ አግፃኑ አኺኒዳጊ እንኮኽስቶ ፌቴርጙ እንፅኺ አኮሜችስታማጊ አኽⶓ ቶኬምካማ እምፕልታቕ አግፃኑ ልክስ ግብሮ ኬይጝስ ፄውስታው ፅሬት ጉድ ልቕልቕቲ ዝኩⶓ ጉሽካ::

ግብሮ ኬያንታ  እምፕልታቕሊ ኩስጝጚስ ቱትጚዳ ታምብስትⶓ ጌሌፅካ:: እምፕልታቕሊ ፄውኑ ኩስጚዳኪላ ጉድ ልቕልቕቲ ዝኩⶓ ቼሜትጝፅና ንካ::

ፌዩንኩ አርፍካስ ሰላሙስታ ፄትቲው ችግርስ ግብሮ ኩፕፅጝሰ ካሊሰታያ ንካ::

ግብሮ ኩፕፅጝስ ጉድ ልቕልቕቲ ካንትፅካማጊ ዝኩንኩ ወረድካ ክቻዴስኪላ ባንጂ፣ ዚጋሚ፣ ቻግኒ ኬቴሙ ቺፅጝፂ ጃዊስታ እንጃቢሪ ኬቴሙ ቺፅጝፂ ጉድ ፊፂምጚ ዝኩንኩ ወረድካ አኽⶓ ጌሌፅካ::

አችቺፋ ዝኩንኩ አመራርካ ያኻ ውማይቴንካ ሚፄ ኩፕፅጙ ቹዋ ቴግባር ፄዌካማ እሚጝ ቱስታው አኽⶓ ጌሌፅካማ ጌቢው ውማይቴንካኪላ ግብሮ ኩፕፅⶓ ቹዋ ጉዳይ ፄውካማ እሚጝስ፤ እምፕልትስስታ ቱትጚስ እንፅኼ ፌፄምካማጊ አግስታንኩ አኽⶓ እርዳትፅካ:: ናካ ጄሜርስትኹ ግብሮ ኩፕፅጙ እንፅኺ ይስጛማ ሲፍጝ ቱስታው አኽⶓኪላ ጌሌፅካ::

አማኻሪ ክልሉ ሚፂው /ጌቢው/ ቢሩ ትክትሊ አላፊ አቶ ፍክረማርያም ደጀኔ ሰንብቶ አሚኮ ወክታዊ ቴርትዳ ክልሉ ሚፂ ኩፕፅጙ አኺኒዳ እይኑ ኽይትጝፂስ 2016 ቤጄት አሜትዳ ሚዲቢኒ ጌቤዴስ 56 ትኩሚ 15 ቢሊዮን ብር ኬቴሙ አግልግሎቲዴስ ዴሜካ 15 ትኩሚ 5 ቢሊዮን ትክላሊስ 71 ትኩሚ 6 ቢሊዮን ብሮ ኩፕፅጝስ አኬድስታማ እንፅኺሾ ቱⶓ ጌሌፅካ:: እንኪላ ፌይኹ አሜቱ እክድሊ ካንትጛኒ ሚዲቢኒስ 17 ትኩሚ 7 ቢሊዮን ኬቴሙ አግልግሎቲዴስ ዴሜካ 11 ቢሊዮን ትክላሊስ 28.8 ቢሊዮን ብር ትክላሊ እክድዴስ ሊኽዴስ 70 ታፍ ድምክኒ ዝኩኹ እክድ አኽⶓኪላ ቶኬምካ::

እን እክድ አኬድስታታ ፄውስትኹ ቹዋ ምክኒያትታ ጉሹንኩ ዲብካ ክቻዴስ አማኻሪ ክልል ፌዩንኩ አሜትካዳ እሺኹ ዎሬሙ ውራሪስ ዎዴሙንኩ ስር ልማትካ ፄጌንጝስ እክድ ኬፍናማ አኬድስታታ ፄውስትⶓ ጉሽካ:: ያኼስጉ ክልልዴስ ሴጋ ዳዱ ልምትጝ፣ ጌፄንካ ሊሊትጙንኩ ስፍርካሾ እንዜጝጝስ እንፃኽስታቲታ ፄውስታው አቑ አጌትጝስስታ እሊኩ ችግርካጊ ክልሉሳ ጊፁሳ ልቕልቕቴ ኔኬታታ ፄውኹ አኽⶓኪላ ጌሌፅካ::

አማኻሪ ክልሉ ግብር ኩፕናው ወክትዳ ኬሴትስትኹ ሴላሙስታ ፄትቲው ችግር ኩፂ ፋይስታው ልክስ ሚፂ ኩፕናቲታ ፄዉⶓ ጉሸካ::

ሚፂ ኩፕናው ወክትዳ ክልሉ ሰላሙስታ ፄትቲው ችግርስ ሚንችካ ሚፄ ኩፕፃንኩ ኾትካ እንፅኺዴስ ሴጋ ያኼካማ እጂⶓ ጌሌፅካ:: ሜሴኬሩም ኪንዲዴስ ጄሜርካማ ሰላም ሴፌኑኩ ዙራሙርካዳ ሚፄ ኩፕፅⶓ ጄሜርⶓ ቶኬሙንኩ አላፊ ኩርማን አሜትዳ 18 ቢሊዮን ብሮ ኩፕፅጝስ እክድ እሺኹ ያኼስጉ አምሊስታ ናሲ አርፊዳ እንዳርማኪ እንፅኺ እንፃኽስታውላ ይጉጝስ ፋይስታውሳ ላካ ግብር ኩፕናውላ ይጉⶓ ዙሜካ::

ሰላሙስታ ፄትቲው ችግርስ ጊፁ ማቤርአቕ ሼውታ ጊፁሳ እንፅኼ እንፃኽስታኑላ ይጉጝ እንቲታኪ ጌቤ  ኩፕፃንኩ ኾትካኪላ ክልሉ ሰላሙ ችግርስ እንፅኺዴስ ሴጋ ያኼካማ እጂጝ ክልልታ ልቓ ጌቤ ኩፕናታ ፄውስትⶓ እርዳትፅካ::

ክልላኻዳ እንዴስ ቤዴራኪላ ሰላሙስታ ፄትቲው ችግር እሺⶓ ቶኬሙንኩ አላፊ ሚፂው ኾትካ ግብሮ ኩፕፅጝስ እሊኩ እርዳታንትካ ኾትካሊ አኽጝስ እንፃኽስትካማጊ አኽⶓ ዙሜካ::

ሰላሙስታ ፄትቲው ችግር ዝኩኹ ዙራሙርካዳ ውማይቴንካ ግብሮ ኩፕፅጝስ ፄዌካማጊ ዝኩኒ ፅሬትስ ምስጋኔ ዲግስካ አቶ ፍክረማርያም::

ግብሮ ኬያንትካ ጉሽንኩ ክሬትካ ኽይጝስ ፅሬቶ ፄዌካማጊ አኽⶓ ቶኬሙንኩ አላፊ አቕ እንፃኽስታኑ አኽጝስ ችግር ፌቴርስትጝስ ካላው አኽⶓኽ ዙሙኑ::