አጌርኩ ሞሴሴንካ ሹማጌል

ዘውዴ በካሉ

ሽማጌልቱ ቴርት አጌራውሳ ዊዳፌ ሴላሞ ቼሜትጝፅጝስ፣ ጋቻዴስ ሴላምሾ ዙርጝስ ያኽስታው እርኩ ቴርቲያኽ:: አሌም አቡቑ አችስ ጋቻዋ ካንትኹስ ሚንችካ ፃፋንትካ ሊሊቴ ሊሊቴ ካንቴስታ አሳቦ እንኩራና:: /ፊሽር 2000/ ዲግለስ ፒ ፋውይ እስታው ፃፋንቲ “ጋቻ ንጝ ላጛስታ ላጛዴስጃላ ያኹንኩ አቕ ክቻዳ ጛርቱ ፋይስ ጆው አስሚምጜ አቲጜኽ” ናና:: ጋቻ ፌቴርስታው ጊዛይ አጌራኻዳ ውላዳጊ ዙራሙርካዳ አቕ ፄዋኑ ማይቤራዊ ልቕልቕቲዳ ጋቻ ፌቴርስትጝስ ካላው አኽጝስ እንሳ ጋቻዋ ሴላማዋ ያኹኽ ዳድስ ኽይጝስ ዙራሙሪው ባይልታስታ ወግታ ጛው ያኹኽ ጋቻዋ ኽይፅካ ቴርትካ ዝኩና:: እኒ ሹማጌልቱ ቴርትካ ክቻዴስ አማኻሪ ክልልዳስታ ትግራይ ክልልዳ “ ሹማጌልቱ ቴርት” እስቴ:: ኦሮሚያ ክልልዳስታ ዙራሙሪዳ “ጀርሱማ”፣ ሲዳማዳ “አቱባ”፣ ሱማሊያ ክልልዳ “ገረድ” እንቲታኪ አፋርኩ እዝብካውላዳ ዴሜካ “ገረብ” እስትካማ ጛው ባይልስታ ወግስ ጋቻዋ ኽይፅካ ሹማጌልቱ ቴርትካ ዝኩና:: እኒጛ ቴርትካስ ሴላም አግጝስ እንፃኽስታና:: እንጜዋ ሹማጌልቱሳ ቴርቶ ካንትኹስ ናካስ ቴርትኹ አጌራኻዳ አግስታንኩ እርኮ ጉሳንኩ ሹማጌልቱ ቴርትካ ክቻዴስ አዊ ብሄረሰቡ ቺፅጝፂዳ ሹማጌልቱ ቴርት እንዳራ ፄጌሬ ናውሳያኽ::

አዊ ብሄረሰቡ ቺፅጝፂዳ  ድንቤርዳ፣ ብቲዳ፣ ዳዴኽዳ ፣ አራኹናው ጊዊዳስታ አቒው ይዎት ድስጝዳ /አቔ ኩጝዳ እንቲታኪ ፄጌርጙንኩ አሳብስ ቱትጜ አቲጝስ አቕ ክቻዳ ጋቻ ፌቴርስቴ:: እኒጚ አስሜምጜ አቲጝስ ፌቴርስትኹ ጋቻ ባስጛቲታ አጌር ሹማጌልካ፣ አይማኖትኩ ታብልሰታ ዙራሙሪዳ አግስታንኩ ፄትቲኩ አካልካ ሹማጌልቱሳ ቴርቶ ካስጝፃና::

ሹማጌልቱ ቴርትስ ጐሌልስታንኩ አቕኪላ ድሚስ 45 ዴስ ጃላ ያኹንኩ፣ፆቴ ጐሌላውላስ ካንቴስታ አሳቦ ቤንጝፃንኩ፣ ውኔቴንካ፣ ዲብስካማ ዝኩክ፣ እምፕልታቕሉዳ ቻቤልስታንትስታ አቕሊ አስሜምጛማ ዝኮው አቒ ሹማጌልቱ ጐሌልስቴ::

ሹማጌልቱ ቴርትኪላ ጐሌሌስቱንኩ አቕስ ጐሌልስቱኽ ስፍሪዳ ብሸታንዳስታ ሹማጌልካስ አሜቻው ስፍሪዳ ባልጌርካስ ስግላ ሜንቾ ጊዞ ላጛ ሳታዴስ ዋልቲ ሳታስኺስታ ካስጜ:: ሹማጌልካ ጐሌልስታኑ ሹኻዴስ ጃላኽ:: እንጚኪላ ጋቻ አስሜምጚዳ ታምባኑላስ አግሰ ካስቲንታ አቖ አምንፅካማ ሴላሞ ያጋንታ አኽጝ ዲብስስቴ::

ሹማጌልቱ ቴርት ካስጙስኪላ አጌር ሹማጌልዴስ ድምክና ኪሳኪስ አኹኪ እምኔትኩ ታብል አግስታንታ ያኽስቴ:: ኪሳኪሳኪላ ላጝጊጊ ወጌንካ አሳቦ ዲግስጝዴስ ፍና እምኔቱ ስሬትስ ዳዊቶስታ ሚስኪሌእሚካማ ፆሌትስ ዳቔርካማ ጄሜርፃና፤ ላጝጊጊ ወጌንካ አሳብስ አስሜምጜ አቴካማ ሹማጌልቶ ፌሬስፂቲንታ አዌጌዝጝስ፤ ፋካዴንካ ያኼካማ ዲጋኒ ዴሜካ “ማሪ ማሪ” ትጜካማ ሴላሞ ፌቴራንታ ፄዋና:: እን ቴርት ሊጊሲሚ ዝቤን ቤኖ ክምንትዴስ ክምንትሾ ፌያፌይጛማጊ ይንቱኽ ባይሌኽ:: እን ሹማጌልቱ ቴርት እምፕልታቑላዳ ኽሳንቲ ስፍሪ ዝኩኽ አኽጝዴስ ጁኽሳ ሹማጌሎ ዱንፃማ ካስኹ አቒዳ ድኪ ዲብ ታምቤ እስታማ ታክስስታው አኽጝስ ሼውዴስ ቑሎ ድፅካማ እሺኹሳ ቤዴሎ ዜኔግካማ አሬክጛና:: እን ሹማጌልቱ  ቴርት ናኪኒ ክምንትዳ ቤዴራ  አሺኹዴስ ኔኬታማጊ ይንትጝ አቕስቴ:: አቕ ክቻዳ ጋቻ ፌቴርስታኒ እግሾ ካስጝ፣ ግርብስ ቴኬምሰትጝ ሚንቻማጊ ይንታ:: አጌር ሹማጌልካውሳ ኩስጜስታ ባይሎ ቻቤላውላስ ይጉጝስ ሚንች አቒው ይዎትስታ ንብሬት ድሳታ ፄዌ:: እን ሹማጌልቱ ቴርት ናኪኒ ክምንትዳሰታ እንዴስ ፍና ዳራ ፄጌሬ?  ናውሳኪላ አጌር ሹማጌልካስታ እምኔትኩ ታብል ድኹዋና::

አዊ ብሄረሰቡ ቺፅጝፂ አዩ ጉዋጉሲ ወረዳው ዝኩዋንቲ ያኹንኩ ኪስ አስማረ አሳዬ ሹማጌልቱ ቴርት ሳላሞ አግጝስ ኽሳንቲ ፍሺ ዝኩኽ አኽⶓ ጌሌፃና:: አይማኖትኩ ታብልኪ ያኻ አጌር ሹማጌልካ ሹማጌልቱሳ ቴርቶ ስራ ፄውካማ ሳላሞ ዙርፅጝስ እንፃኽስትካማጊ ያኹኒኪላ ናካ ፌቴርስታማጊ ዝኩኽ ፄትቲው ችግርስ ሚንች አቒው ይዎትስታ ንብሬት ድሳማጊ አኽⶓኪላ ዙሜካ::

አጌሩ አችስ ናማኪ አማኻሪ ክልልዳ ፌቴርስትኹ ፖለቲካው ዛቢትጚስ ሚንችካ ዙራሙርካዳ ሰላም እላኪያኽ ኑንኩ ኪስ አስማረ ዊዳፌ ሴላሞ ቼሜትጝፅጝስ ሹማጌልቱሳ ቴርቶ አኮሜችካማጊ አኽⶓ ዙሜካ:: ሹማጌልትስ ሚንች ዝቤኖ እጂኹ አጌሩ ሰላም እሼኹዴስ ሰላሙ አኺኒዴስ ፋማ ሼቤርፃንትካ ኬችካ ሚንቹኑ፤ ዜሬፋንትካ፣ አቒውሳ ይዎቶስታ ንብሬቶ ዎዴምፅⶓ እንጉስታው ክምንት ሚንቻማ ሽምግልኔ እንኮኻቲው ያኻማ ሸምግልኒውሳ ቴርቶ አኮሜችጝስ ቼጌርስትካማጊ አኽⶓኪላ ዲብስካ::

ሹማጌልቱ ቴርት ካስጙስ ብሄረሰብ ቺፅጝፂታጊ ቤዴሉ ይዝኩትስታ ሳሴርትታ ሊሊቲ ያኹኒኪላ ቤዴልስትኹስ እንኩዋሊውሳ ካሴ እይጝ፣ ቑሎ ዜኔጋማ “ማሪማሪ” ንጝ ዴስስትኹ ባይሌኽ ኑንኩ ኪስ አስማረ እን ዝቤንዳ ዴሜካ ሹማጌልቱሳ  ቴርቶ ቻቤላው አቒ እንፃማጊ ይንቱኽ ፖለቲካው ዛቢትጚ አኽጝስ ጛርቱሳ ፋዮ ስራ ፄዌካማ ልቕልቕ ናኑ አኽጝስ ሹማጌልጝስ ይዝኩዌው አኽⶓኪላ ድኹዌካ::

እሊው አዊ ብሄረሰቡ ቺፅጝፂ አዮ ጉዋጉሲ ወረዳ አምቢሊ ኬቤሊው ዝኩዋንቲ ያኹንኩ አቶ ተሰማ በየነ እስታና:: ሹማጌልጙ ቴርት ዊዳፌ ሴላሞ ቼትጝፅጝስ ቹዋ አኽⶓ ዙሜካ:: ናካ ካንትስታማጊ ዝኩኹ ፖለቲካው ዛቢትጚ ሜንች አቒውሳ ይዋቶስታ ንብሬቶ ጉዳማጊ አኽጝስ ሹማጌልጙ ቴርት እሳንስ እንፃኽስስታማጊ አኽⶓኪላ ዲብስካ::

“ሰላም አቒያስ ይጉዋማ ካዌንኩ ንሴስካስ ፋይፄ” ኑንኩ አቶ ተሰማ አቒ ሴላምስ ፋማ ሰላምስ ቱዋታ ሰላሞ ፋይፃው አኽጝስ ካንትስታማጊ ዝኩኹ ፄትቲውሳ ችግሮ ዊዳፊ ሰላምሾ አግጝስ አጌር ሹማጌልኪ ያኻ አይማኖትኩ ታብል ታምቦጊ ፊትጛካማጊ አኽⶓ ድኹዌካ::

ሹማጌልጙ ቴርት ካስጙስ ላጛጊ ወጌንካ ንጝኪ ቤዴልስትኹስታ ቤዴሎ ታምፅኹ ሹማጌሉ ፍንዳ ዲጋና:: አቕ ሹማጌሉ ፍንዳ ቲሬኒስ ሴዩኑሳ ጋቤ አኹኪ ቼርኮ ፃንጌኻ ሌዋ ታስካ ሴይካማ  ችግሮ ሹማጌልካስ እርዳትፃና:: እንዴስ ፋሌንጋ ባኒስ ባኔ  ጌውስጙንኩሳ አቖ ዲግስካማ ካሲኒዴሰ ፋሌንጋ ላጝጊሶጊ ዲግስካማ ቤዴልስትኹሳ ካንትካማ አንኩዋሊውሳ ቤዴሉሳ ካሴ ቤዴሉውስታ አይኔትታ ዋሴናና:: አዊ ብሄረሰቡ ቺፅጝፂዳ ካሴ ኬይፅጝ ቑሎ ዴሜክጝጉ ሰላሞ ያጋላ እስታማ ካሲ ኬይስታታ ዴጌፋላ:: እኒጛ ላጛጊ ዎጌንካ አሬክጛኒስ እሺኹሳ ቑሎስታ ቤዴሎ ዜኔግካማ ሰላምስ ዝኮንታ እምኔትኩ ታብል  ካሎ ሚፅፃና:: እን ሹማጌልጙ ቴርት ሊጊሲማ ጊዞ ክምንትዴስ ክምንትሾ ፌያፌይጛማ እንሳ ታምባ:: እን ቴርት ናኪኒ ክምንትዳ ዝቤናዋ አኽጝ ሚንቹኽሳ ፄጌራማ ሹማጌልካዴስኪ ያኻ  እግዴስ ፌይካማ ግርብስስታ ወጌንስ ቤንጜካማጊ ይዎትዳስታ ንብሬትዳ ቤዴሎ ታምፅካማ አኽⶓ አቶ ተሰማ በየነ እንክርፅካ::

ሹማጌልስጙ ቴርት ይስጛማ ሲፉኒጊ አጌሩ ሰላም ቼሜትጛው አኽⶓ ጉሹንኩ አቶ ተሰማ ምንግስትኪ ያኻ ትኩታኩ አካልካ ዊዳፌ ሰላሞ ቼሜትጝፅጝስ አጌር ሹማጌልካሊ እምፕልትስ እንፃኽስትጝ ፋይፃው አኽⶓኪላ ዲብስካ::

አዊ ብሄረሰቡ ቺፅጝፂ ባንጂ ወረዳዳ ኩፕፃንቲ ዳኚ ያኹንኩ ግርማ አጋሉ ሹማጌልቱ ቴርት እግዴስ ድምክናስታ እጐ ሲፋማ ቲሪትጙኽ ጋቻዋ ኽይጙ ቴርት አኽⶓ ጌሌፅካ::

አቕ ጌውስጜካማ እጉላ ይንትጝዴስ ፍና ሹማጌልትስ ኽይስታታ እግ ዴጌፋው አኽⶓ ጌሌፁንኩ ኩፕፃንቲ ዳኚ ክልሉ ጝንአቑ እጉ አዋጅኪላ ሹማጌልቱሳ ቴርቶ ካስጝፃንታ አዜዛው አኽⶓ ድኹዌካ::

ወንጄልዴስ ሴጋ ያኹንኩሳ ዴጌፋው ፍታቤሩ እግ ሹማጌልትስ አሌድስታታ ፄዌ:: ጋያኪ አቕ ፍሼ ኔኬትጝስ፣ ይኮኖሜ ክብስጝስ፣ ዊዳፌ ሴላም አግጝስ፣ ቑሎ ሼውዳ እሜቲንታ ንጝኪ ዊፃንቲስታ ዊፅስታንቲ ሹማጌልቱ ቴርትዳ እላቲው አኽጝስ “ማሪማሪ” ትጜካማ አሬክጛንታ ፄውጝስ ቴኬማው አኽⶓኪላ እርዳትፅካ::

እግዴስ ድምክና ሹማጌልቱ ቴርት እግሊ አብርታ እንፃኽስታታ ፌዴራሉ አችስኪላ እግዳ ዴንጌግስትⶓ ኩፕፃንቲ ዳኚ  ግርማ አጋሉ ጌሌፅካ::