ቻሱ ቴስፊ ዌና

ስንሻው አበበ

እበ ለገስ እስቴ፤ ካሜንስታማ ሌጌሱኹ ትግራይ ክልል ሽረ እንደስላሴ ዙራሙሪዳኽ::

እቦ እንፃኺታስ አምፕስ ፌያንኩ ሄሊኮፕተርካዋ ካንታኒ ዴኔክስታው እሺኹ አኽⶓ ታክስፄ:: እንጚ ጊዛይ ጄሜራማ ሄሊክፕተሮ እንፃኽስትጙ ፋይ  እሺኾ::

ክንቲው እጂጚዳኪላ ክንቲ ጝናዳ አግስታንኩ ፌቴሪኩ አኹኪ ስካዌ ዲቦ እንፃኽፂኩ ማይኬልካዳ አሴቴፍጚስ ኤሌክትሮኒክሱ እንፅኽካዳ ሊሊቴ ትኩቶ ፄውⶓ ፋና ብሮድካስት ኮርፖሬሸንስ ዜጌባ::

ኤሌክትሮኒክሱ እንፅኺዳ ዝኩኹሳ ዴሶ ኬሽጝፅጝስ ልቡስ ልቦ ሬዲዩኖስታ ቴሌቭጅኖ ፄጌንጙ እንፅኺ፣ ወርኮ ፍሽፄ ማሽኖ እንፃኽስጝስታ እሊኩ ችግሮ ኽይፅካ እንፅኽካዋ ጄሜርⶓ እርዳትፄ::

እኒ እንፅኽካሊ ኬምፕስ ኬምፖ እንፃኺታስ ዴኔክስትኹሳስታ ፋዩኽሳ ሄሊኮፕተሮ እንፃኽስትጝስ ወሴናማ ቴግባሩሳ ልቕልቕቴ ጄሜርኾ::

እምፕሎ እንፅኼ አኮሜችጝስ ትንካኪስ አሴብⶓስታ ወሴንⶓ ፋይፄ ናው እበ፤ ጄሜሩኒዴስ ፋሌንጋኪላ ጚውሳ አክሞ ሺሽጝስ እንፅኼ ሳኪትጝፄምባ ይስጝፃማ ሲፍፅጝ ቱስታው አኽⶓ ዙማ::

እን አሳብስኪላ ሄሊኮፕተሮ አባላምቲ ጊዝስ ዙራሙሪዳ አግስታንኩ አክኽካስ እንፃኽስትጝስ ሞኬርⶓስታ እንጚዴስኪላ ዴሶ አግፅⶓ ጉሻ:: ሲፋማኪላ አቔ ቡያታ ቤሬርጝስ ካላውሳ ሄሊኮፕተሮ እንፃኽስትጝስ ካሊስታው አኽⶓ ታክስጝስ ስካዊስ እንፅኼ ጄሜርⶓኽ ጌሌፅኹ:: እንጚስኪላ ሄሊኮፕተሮ እንፃኽስትጝስ ሞተር፣ አልሙኒየምስታ እሊኩ አክኽካዋ ዋኽትጝፅⶓ ጄሜራ::

እን ዳድስ እንፃኽስቱኽ ሄሊኮፕተርኪላ ሙኪሪ ሳኪትጛውላ ይጉⶓ ቶኬምጝስ ቴስፌ ኬዋውላ ይንታውስ ኬሽጝፃማ እንፃኽስትጝስ ወሴናማ ልቓ ጊዛኻዳ ኬሽኹሳ አክኼ ቴኬምስትጝስ ቤሬርጝስ ካላውሳ ሄሊኮፕተሮ እንፃኽስትጝስ ካሊⶓ ጌሌፃ::

እንጚስኪላ ዲጋስ ይቶፒያው ሲቪል አቪዬሸን ስልታንዌና ቴርሱክ ሳይንሱስታ ቴክኖሎጂው ፌቴሪው ልኺትጚዳ እምፕላንቲ ያኻማ ሼሌምስትⶓ ዙማ::

ሄሊኮፕተር ሞተርዴስ ይጐ አጌራኻስኩ አክኽካስ እንፃኽስቱኽ አኽⶓ ዙሙኽ እበ፤ ሌጉ ኬሴትስ፣ አምቢቴ ካላካልጚስ፣ ፍትኽ ንጝስ፣ አምቡላንስስታ እሊኩ አግልግሎትካስ እሼው አኽⶓ ቶኬማ::

ይንታውስኪላ ሄሊኮፕተሮ ኬሽጝፃማ እንፃኽስትጝስስታ ችግሮ ኽያንኩ እንፅኽካዳ አሴቴፍጚስ አይር አይል እርዳቴ ፄውጝስ ካሎ ቱⶓኪላ ቶኬማ::

ፍንሾስ እንፅኼ ፕሮጀክትታጊ ኽስኹስ እሳንጝፅጝስስታ ጌቤልዳ እሽፅጝስኪላ ጉዳዬ ካንታኩ ቤንካ እርዳቴ ፄዋንታ ካሴ::