ዚጋሜን ዴክ ጌማታ እቑዌ ዲግሱና

ካሳነሽ ተረፈ

ዶንጌታንትካ አይልካ ክልሉ ምንግስት ዲግስኹሳ ሰላሙሳ እቑዌ ቻቤልካማ ሴላምሾ አንትጝስ ችግሮ ዙሚትጚስ ኽያንታ ናኒስ ዚጋሚ ወረዳው ዝኩዋንትካ ካሲና::

ዚጋሚ ወረዳ ክላጅ ኬቴምዳ ስንብቶ ወክታዊ ፄትቲው ጉዳይዳ እዝባዊ ኩስጚዳ አሴቴፍጙንኩ ዙራሙሪኩ ዝኩዋንትካ ናካ ኬሴትስታማጊ ዝኩኽ ብሄሩሳ ፄጌራውሳ  ፅካቶ ቲሬታ እቑዌ ዲግስካ::

እዝቡ ኩስጝጚዳ አሴቴፍጙንኩ ዚጋሚ ወረዳ ጐደር ጃዊ ኬቤሊው ዝኩዋንትካ አሬሳቻንቲ ታረከኝ አለም ኑኑውስታጊ ክልልታ ናሚኪ አጌርታ ችግሮ ሲፍፃማጊ ዝኩኽ ፄትቲው ችግር ዶንጌታንትካ አይልካስ ዙራሙሪው ናማኪ ብሄረሰቡ ቺፅጝፂው ዝኩዋንትካዳ ታምፃማጊ ዝኩኽ ችግር እሳን አኽⶓ ጉሽካ::

ብሄሮ ስራ ፄዌካማ ሶሪት፣ ጐኻ፣ እሁዲትስታ አምቢሊ ዙራሙሪዳ ታምባማጊ ዝኩኽ ሴላማውካ አቑ ፅካት  ቲሪጝ ቱስቴ ንካ::

“ካሲ ዝኮ፤” ናንኩ አይልካ ችግርካ ሴላማዊ ዳድስኪ ያኻ እግ ፌኬዳው ዳድስ ትኩታው ቤንስ ካሴ ዲግስጉ አግፃዋ ሰላማውካ አቕዳ ፅካቶ ታምፅጝኪ አዌጌዝስትጝ ቱስታው ቴግባር አኽⶓ ዙሜካ::

“ካሜንጛማስታ እንካንጛማ ዝኩዋውሳ እዝቦ አጉሌልጝፅጝስ እንፃኽስታንኩ አካልካ ኪላ ፂዊዴስ ክብስስትጝ ቱስቴ” ኑንኩ አሬሳቻንቲ ታሪከኝ እሊው ፖለቲካው ካሲስ ሴላማውካ አቕዳ ብሄሩ ፅካትታ ፄዋማ ፅካቶ ታምፅጝ ቲንዌና አካልዴስ ማንዲስታው ቴግባር ጋቲው አኽⶓ ሼው ንጝስ ምንግስትኪላ እንታ ፄዋንኩ አካልካዳ እንቢት ንኹሳ እርምጄ ካፅጝስ አጌር አቕ ሴላምስ ዝኩጙሳ ሜብቶ ማንዲፅጙሳ አላፍቶ ፊትጝጝ ቱስቴ ንካ::

እሊው እዝባዊ ኩስጝጚዳ አሴቴፍጙንኩ ዲያኮን ሃይማኖት ነብዩ እዝቦ ምኽምኽፅጝስስታ ኩጝስ ኽይቲ ይንታናማ ታክስጝ ኩፂ ኬርቲያኽ:: ክቺክቼ ኽዮ አግፅጝስ ትኩታው ምንግስቱ አካልሊ ዲግጛማ ችግሮ ኽይጝ ቱስቴ ንካ::

ዙራሙሪዳ ዝኩንኩ እምፕልታቕኪላ እሊው ፖለቲካው እንፅኼንት ዝኩክሳ አይልካውሳ እንፅኼንቶ እሚካማ ብሄረሰቡ ቺፅጝፃኻዳ ዝኩኹሳ ሴላማዌ እዝቦ አዌክጝ ኩፂ ቻ ኪላ ካሲሲታንትዴስ ፍሻቲው አኽጝስ ዶንጌታንትካ አይልካኪ ያኻ ቴልኮ ፌፄምፃንትካ ሴላምስ ዙሚትጝጜ ፄውጝስ ችግሮ ኽይጝ ቱስታው አኽⶓ ዲያኮን ሀይማኖት ዲብስካ::

“ብቴኪ ያኻ ዝኩኹሳ አብቶ እምፕልታ አስሜምጛማ ኹጝስ ጄርካዋኪ ያኻ አጌራዋ ሌጌፅጝስ አምኽጚያኽ” ኑንኩ ዲያኮን ሀይማኖት ብሄረሰቡ ቺፅጝፃኻዳ ዝኩንኩ ጐኻ፣ እሁዲትስታ ሶሪቱ ዝኩዋንትካኪላ እስጜ ግምታኻዳ ሚፅጝስ እሊው ቴልኩው ፌፄምፃንትካ አኽጝዴስ ክብስስታንታ ታክስፅካ::

እዝባዌ ኩስጜ ካስጝፁንኩ ብሄረሰቡ ቺፅጝፂው ቹዋ ቺፅጝፃንቲ አቶ እንግዳ ዳኛው ጛሾሰ ብሄረሰቡ ቺፅጝፃኻዳ ታምባማጊ ዝኩኽ ፄትቲው ችግር እዝብዳስታ ንብሬትዳ ኽሳንቴ ችግሮ ሴፍፃማጊ አኽⶓ ጌሌፅካ:: ጋያኪ አቑ ይወትዴስ ፌይኹስ ሴብልካዋ ድፅጝ፣ አሬ ሌጌስ ኹፅጝስታ ጝኖ ታንኬንፅጝጊ ብሄረሰቡ ቺፅጝፃኻዳ ሌንጌድቱንኩ ችግርካኽ::

ጋያኪ ፅንፌንካ አይልካ ፖለቲካው ካሲስ ጄሜሩኑሳ ድፄ ቴግባሮ ብሄሩ ፅካትሾ ዙርፅጝስ ብሄረሰቡ ቺፅጝፂዳ አግፁኑ አጋታሚስጊ ታምፃኑ ፅካት ሳሴር ጋቲዌያኽ:: እስጜኪላ እዝቡስታ ምንግስቱ ካላካልጚስ አቒው ይወትዳ ታምባውሳ ፅካቶ ካላካልጚ ሲፋታ አኽⶓ እርዳትፅካ:: ፍንሾስኪላ ዶንጌታንትካ አይልካ ብሄረሰቡ ቺፅጝፂዳ ታምፅካማጊ ዝኩኑ ፅካት ቲሬታ ምንግስት ትኩትስ እንፃኽስታታ አቶ እንግዳ እቑዌ ዲግስካ::