ቲንስ ችናታ ቲን ሜድኑ አገልግሎቲ ፋይፃዌኽ

ሰሎሞን ስንታየሁ

ቲን ሜድኑ አግልግሎቲ አጌርታ ጄሜርስቱስ ዜርቕቲኒ ዝኩኒው አችዳ አግስታንኩ ያኻ ኬፍ ንኹ አክም ዝኩክ እምፕልታቑ ቤንካ አሜትስ ጝን አቑ ቼፍስ ኬያኑ ዜሬቕቲኒ ጌንዜብ አሜቶ ዋኾ ጌንዜብ ዝኩዋኪ እላኪ ናኑላስ ሲኪኪኒ ጋታ አኪምስታንታ ካሊፃው አግልግሎቲው ዜርፍያኽ::

አማኻሪ ክልልዳ ቲኑ ሜድኑ አግልግሎቲ  እይስትⶓ ጄሜሩኒዴስ 10 አሜታዴስ ጃላ ቼፍፅⶓ ቲኑ ቢሩ ንቫር ካንትፄ:: እን አግልግሎቲው ዜርፉ አላሚ ክርፂ ያኼስጉ አሜት ቺፋ ካንፅስታው ግብአትካው ዲግስጚስታ ዜርፍስ እይስትኹ ትኩቱ እንፂጝስ ሚንችካ ክሬትካ ጀዋኒስ ታዜብጝ ዴሜካ አማትዴስ አማቶ ዴሜካማጊ ይንታ::

እንሳ ፕሮግራሞ ወይሚስታ ፄውጝስ ምንግስት ኬፍቲኔ ድጐሚውሳ ባጀቶ እሜማጊ ቴግባር ኩርማን አሜትስ፣ ኪንዲ አሜትስስታ አሜትስ ጋማጋምስታማጊ አግስቴ:: ፄውስታው ግምገሚው ልክሰ ኩፂ ኩርፂ ኪሲ ይንታ ንጝስ ካሊስታላኬኽ::

አዊ በሄ/ቺፅጝፂዳኪላ 2003 ም/አሜትስ ሹኻ ወረድካዳ ሙኪሪው አችስ ጄሜርስትኹ ቲኑ ሜድኑ አግልግሎቲ ናካ 12 ወረድካዳጊ አግልግሎቲ እይስትጙ ካስት እሳና:: ሚሊዬን ዴስጃላ እምፕልታቑ ቤንካ አግልግሎቲ አግፄካማጊ አኽⶓ ቲኑ ሜምሪው ንቫር ምልኻቴ:: እን አግልግሎቲስ  ያኻው ጌንዜቡ ፍሺኪላ ጝን አቑ ቼፍስ አሜትስ ኩፓማጊ 2015 ም/አሜትስ ይቢቺስ 149 ትኩሚ 4 ሚሊዬን ብር አግልግሎቲስ እሼ::

ቺፅጝፂው አችስኪላ ቲኑ ሜድኑሳ አግልግሎቴ ኬሽኹስ እምፕልታቕስ እይስትጝስ ካሊስታታ አሜት ቺፋ ግምጋሚውስታ ኩስጚው ሜንድሬኽ ታምብ ዌን አካልካ አግሰቱኑዳ ፄውስቱስ እጄ:: 2015 ም/አሜቱ ግምጋሚው ሜንድሬኽኪላ ስንብቶ ቻግኒ ኬቴምዳ ካስጛ::

አዊ ብሄረሰቡ ቺፅጝፂ 2015 ባጀት አሜትዳ 1 ትኩሚ 1 ሚሊዮንዴስ ጃላ እምፕልታቕ አቡቑ ቲኑ ሜድኑ አግልግሎቲስ አቡቑስቱንኩ አጌር አቕ እክምኒውሳ አግልግሎቴ አግፄካ። 149 ትኩሚ 4 ሚሊዮን ብር እን አግልግሎቲስ አሼ።

ብሄረሰቡ ቺፅጝፂታ እምስትኹ ባጀት አሜትስኪላ አባልካውሳ ቼፎ 258 ሻዮ ታምፅጝስ 1 ትኩሚ 3 ሚሊዮንዴስ ጃላ ያኻንኩ አጌር አቕስ ቲኑሳ አግልግሎቴ ታምብስታንታ ፄውጝስ አኬድስታ።

ብሄረሰቡ ቺፅጝፂው ቲኑ ሜምሪው አላፊ አቶ አየለ አልማው ኑኑውስታጊ ቲኑ ሜድኑ አግልግሎቲ አጌር አቕ ልቓ አሜትስ ኬያኑ ጌንዜብስ ዋኽትጙኹሳ አግልግሎቴ አግፃንታ ፄውጝስ ካሊስትⶓኽ ዙሙኑ።

ፌይኹ አሜትዳ ትክላሊስ ፄውንኩ አሬቤሬብጚስ ብሄረሰቡ ቺፅጝፂታ 167 ሚሊየን ብሮ ኩፕፅጝስ ካሊና ኑንኩ አቶ አየለ እንስኪላ ቲኑ ጉትፕዳ እሺኹሳ እጁ ዲግስጚውሳ ችግር ኽይጝስ ፅሬቶ ፄውና ንካ፤ ያኼስጉ ናካኪላ ኽይናያስኩ ችግርካ ዝኩካ:: ንⶓ ዴሜካ እንኮጚኒዴስ አግፅንኹሳ ዴሶ ካፅናና፤ ዳንጉዌንካዋ ክችስናና ኬሽኹሳ አግልግሎቴ እይናኻ እናና ታክስኔኽ ኑኑ ቲኑ ሜምሪው አላፊ::

አሌድስትኹ ባጀት አምትስ 167 ሚሊዮን ናቔውሳ ብሮ ኩፕፅጝስ ቲኑ ኾትካዳ አክምኒው ግብአትካዋ ዋኽትጝፅጙ እንፅኺ አኮሜችስትⶓ ቶኬምካም እን አሜትስ ዴሜካ እንኮጚኒዴስ ኬሽኹስ ፌፄምጝስ እንፃኽስስታው አኽⶓ ጌሌፅካ።

ቲኑ እንፅኺ ዋሺኒኪ አኺኒኻዳ ያኻማ ኬውጛቲው እንፅኺ አኽⶓ ዙሙንኩ ቲኑ ሜምሪው አላፊ ምስሊታጊ ፄትቲው ችግር ጌቴሙዳ ወክትስ ድምክኒ እንፅኺ ፌቴርስቴ ጃጊ ኬውጛላኬኽ ንካ::

አሌድስትኹ ባጀት አሜትስ  ሻይ 600ዴስ ጃላ ያኻንኩ ኬይⶓ ካላቲንኩ ባኩ ፍካዴንካስ ሾፌንስትⶓ ጌሌፁንኩ አላፊ እምስትኹ አሜትስ እሳ ክርፄ ቴግባሮ ሲፍፅጝስ እንፃኽስታንኩ አኽⶓ ዙሜካ።

ፌይኹ አሜትዳ እንፃኽስትንኹ እንፅኺስ 288 ያኻንኪ ባኩ ፍካዴንካ ጛርት አቕስታ አችትካ ፄውኑ እርዳቲስ አሜቱ ፍሺ ሾፌንስታታ ፄውስታ ኑንኩ ቲኑ ሜምሪው አላፊ፤ እንሳ ዲቦ ውላጊ “ይስጝፄካማ ሲፍፅጝ ቱስቴ:: እርዳትጜ ይስፅጝ ፋይፄ:: አክም እላቲንኩሳ አቖ አኪምፅጝ ግዲቲኪ አለፍትኪ ውላውጊ ያኽⶓ ሼው ንጝ ቱስቴ ንካ::

ቲኑ ኾትካ ችግር ጉዝማይ ኬፍቲኒ አላፍት ዝኩክ አኽⶓ ሼው ንጝስ ውላጊ ታምብ ዌን አካልካ አግልግሎቴ እይጚ ክችጙኹ ያኻታ ጛውሳ ታምቦ ፊትጝጝ ቱስቴ ናኒስ ቲኑ ሜምሪ ታክስፅካ።

ቻግኒ ኬቴምዳ ካስጙኹ ልቕልቕቲው ሜድሬኽዳ አግስቱንኩ ክቻዴስ ዚጋሚ ወረዳው ቲኑ ፅፌት ጝናሱ አላፊ አቶ ሃይለሚካኤል አለምነህ ቲኑ ኾትካ ሌጌሳማጊ ይንቱኹሳ ቲኑሳ ፋዮ ዋኽትጝፅጝስ አቒው አይልስስታ እክምኒው ግባትካስ አቺትጝፅጙ እንፅኺ ትኩትስ እንፃኽስስታማጊ አኽⶓ ጌሌፅካ።

ቲኑ ኾትካ እዝብዴስ ኩፓው ጌንዜብዴስ 95 ታፋ ያኻውሳ ጌንዜብስ እጁስታ እምትጙንኩ ግባትካዋ ጄውጝስ ይቤቺስ እሽፃንታ ፄውስታማጊ አኽⶓ ዙሙንኩ አቶ ሃይለሚኪኤል፤ ቲኑ ኾትካ ቴግባራዋ ፄውⶓኪላ ይስጙኹሳ ሲፋሲፍጜ ፄውናናጌኽ ኑኑ::

እንስኪላ ወረዳታ እጁ እንፂጙ ችግር ጌቴማውላ ችኽናኽ ንካ::ወክታዊ ክልሉ ፄትቲውስታ ሰላሙ ችግር ቲኑ ኾትካዋ ፍታኒዳ ሚፅⶓኪላ አቶ ሃይለሚካኤል አላምነህ ቶኬምካ:: ፄትቲው ቸግር እንጚታ ሲፉኒጊ እምስትኹ አሜቱ ቲኑ ሜድኑ አግልግሎቲ ፌቴንጝስ ካላው አኽⶓኽ ቼሜትጝፁኑ::

እሊው ሜድሬኽዳ አግስቱንኩ አዩ ጉዋጉሲ ወረዳው ቲኑ ፅ/ጝናሱ አላፊ አቶ ተመስጌን ፈንታሁን ወረዳዳ ሴዛ ቲኑ ጉትፕካዳ እምፕልታቕ አቡቑ ቲኑ ሜድኑ አግልግሎቲ እይስታማጊ አኽⶓ ዲብስካ::አግለግሎቲ ኬውጛቲታ ዴሜካ ቲኑ ሜድኑ አባልካዴስ ኩፑኹ ጌንዜብዴስ ዋልታ ሚሊዮን ብሮኺስታ ጉሼ እይጝስ ፋይፃንኩ ግባትካ ዋኽትጛንታ ፄውስታማጊ አግስቴ ንካ::እንሳ እንኮጚኔ ዴሶ ዴሜካ እምስትኹ ባጀት አሜትስ ካቢጝስ ታክስስታማ እንፃኽስስታማጊኽ ናኒስ ዙሜካ አቶ ተመስጌን::

ክልልዳ ዝኩኹ ፄትቲው ችግሩ ምክኒያቲስ ዳድካ ካቢትጚስ ልምትጝ ግበታካዋ ባርዳርዴስስታ እሊኩ ዙራሙርካዴስ  አግጝስ እንቲታኪላ እሊኩ ቲንሊ እምትጙንኩ እንፅኽካዳ እንፃኽስትጝስ ፅንጋኻ አኽⶓ ጌሌፁንኩ ቲኑ ኾቱ አላፊ ምንግስትስታ ዶንጌታንትካ አይልካ እዝቡ ዴክትስ ናኒስ ጄሜርስትኹሳ ሰላሙሳ ፅሬቶ አሊዴ ታምፃንታ ሼውፅካ።

አጉዊዴስ ኩክሬኺስታ ዝኩንኩ ፄትቲውስታ ታምብ ዌን አካልካ አቺትጜካማ ሰላሞ ኬቤርፅካማ ዳድካ ብስስታንታ ፄውጝስ አግልግሎቲ እስትጝ ይሳማ ሲፋታ ፄውስቱኒ ክርፄኽ ናውሳ ካንቴ ዴሜክካ አቶ ተመስጌን::

ብሄረሰቡ ቺፅጝፂዳ እምስትኹ ባጀት አሜትስ አባልካዴስ አሜቱሳ ፍሼ(ጌንዜቦ) 250 ሚሊዮን ብርዴስ ጃላ ኩፕፅጝስ አኬድስትⶓ ቲኑ ሜምሪዴስ አግፅንኹ ንቫር ካንትፄ።