ይቶፒያዳ ፌቴርስታንኩ ችግርካዋ አጌራኻሱ ዲፕሎማሲስ አኹኪ አምኽጚስ ኽይጝ አጌራ ፄውታታጊ ዝኪኹሳ ዙሚትጚስ ችግር ኽይጙሳ ዴሶ ሌጌፃዌኽ፡፡ ጋቻዋ ዙሚትጚስ ኽይጝ አጌርካው ቴሬትዳ ዳድትጝስ ሚዚጊቢፄታጊ ዝኪኽ ዋይሚ ፅሊስ ጋሚስታው ጋቲዊያኽ:: “ፃጝስታ እርኩዊሊኪላ ጋቺትጜ” ናኑውስታጊ እምፕላ አጌራዳ ሚንች ብሄር ብሄረሰብካስታ እዝብካ፣ ሚንች አይማኖት ሌንጌድታው አጌርዳ ጋቻ ጁጝ ዴሜካ ዴኔክፃውኪ ኪንክፃውኪ ጋቲዊያኽ::
አጌራኻዳ ጁዋውሳ ጋቻዋ፣ ቱትጜ አቲⶓስታ ማቔችጜ አጌሩ ዴስስ፣ ዴንብስስታ እጉ ስሬታስ ዳራዳርጜ ፄዋማ አምኽጚዳ ታምብጝ ዴሜካ እሊኩ አጌርካስ ምሳሊታ ጉሽፃው ቴግባርያኽ::
ይቶፒያ ናካ ላጛስታ ሹኻ አሜታዴስ ናቴ ጁዋው ፖለቲካው ካሲስ ፌቴርስታውሳ ፄትቲውሳ ችግር ቲሪፅጝስ ፕሪቶሪያዳ ምንግስትስታ ህውሃት ዙሚትጚስ አምኽጜዳ ታምብጝ ዲጊ ጊዙ ኩምችኒያኽ:: እሊውሾስ ዴሜካ ኦሮሙው ኔፃ ፍሻንቲ /ኦነግሸኔ/ሊ ፌቴርስትኹሳ ቱትጜውሳ ችግሮ ኽይጝስ ሰላምዳ ዙሚትጜ ጄሜራማ ላጛንቲ ጊዝስኪላ ስንብቶ አምኽጚስ ዲግጝ ታክስስቴ:: ጊዝቺፋ ፄውስታው አምኽጚው ካስት ዳሬ ታምባታ ምንግስት እቑዌ ዲግሳማጊያኽ::
እሊውሾስ ዴሜካ አማኻሪ ክልልዳ ፌቴርስትኹሳ አማኻሪ ፋኑውስታ ምንግስቱ ፄትቲው ችግርስ ክልላኻዳ ዝኩንኩ ሰላማውካ አቑ ይወት ድስጝስታ ንብሬት ወዴምጝ ክልልስኪ ያኻ ዝኩዋንቲ እዝብስ ፍታና ያኻ:: እስጜ ሼው ንጝስኪላ አማኻሪ ክልሉ ምንግስት ዝኩኽሳ ችግሮ ሴላምስ ኽይጝስ አቫላምቲ ጊዝስ ፄውኹሳ ሴላሙሳ እቑዌ ላጚኒ ፄዋ::
ምንግስትዴስ ካሲ ዝኮ ናው አካል አኹኪ ዶንጌታንትካ አይልካ ኪላ ምንግስት ፍሽኹሳ ሰላሙሳ እቑዌ ቻቤልጝስ አጌራው እምፕልትስስታ እዝቡ ዴክትስ እንፃኽስትጝ ቱስታው ኽሳንቲ ቴግባሪያኽ:: ምንግስትኪላ ሰላሙሳ እቑዌ ታምፅጝ አኹኪ ዲግስጝ ይቢቺ ያኻውላ ዳራዳርጚስ አኹኪ አምኽጚስ ካሊፃንኩ ቤዴራ ቴርትካዋ አሜቼችጝፅጝስ ኽሳንቴ አላፍቶ ፊትጝጝ ቱስቴ:: እንዴስ እሊው ጋያኪ ዶንጌታንትካ አይልካ ቻቤልጚው ዳድ ኪላ ግልፅስ እዝብስኪ ያኻ እኒ አይልካስ አቕፅጝስ እዝብዳ ታምባማጊ ዝኩኹሳ ችግሮስታ ክርⶓሳ ኬሴቶ ቲሪፅጝ ቱስቴ:: ዶንጌታንትካ አካልካኪላ ውላው አላሚ አጌራዋ ኬሽኹ አችሾ ታምፅጝስታ ክልሉ ዝኩዋንቲ ሴላምስ ዝኩዋታ ፄውጝ አኽጝስ ዲግኹሳ ሰላሙሳ እቑዌ ዊዳፊ ሰላምስ ቴግባርሾ ኪስጝስ ችግሮ ዙሚትጝጚስ ኽይጝስ እንፃኽስትጝ ቱስቴ:: ክልሉ ምንግስት ዲግስኹሳ እቑዌኪላ ዋይሚ እላቲውስታ ካንትⶓ ባያማ እቑዌ ሰላምስ እሺፅጝ ቱስቴ::