ወክትስ ሳቢስትኹ አሊቢ ሴሜፃ ቺፃዌኽ

ታደለ አጋጄ

ይቶፒያው ሚትሮሎጂው ኢንስቲቲዩት ንⶓ ወክቶ ማንዳያሱ እሪ ይንታው አኽⶓ ካቢትጝፃማ ጊሌፁስ እጂጝ ታክስስቴ:: እንሳ ሲፋማኪላ ፌድራልዴስ ወረዳውሳ አቾኺስታ አግስታንኩ ግብርኒኩ ኾትካ ወክቶ ማንዳያሱ እሪ ሴብልዳ ጉዳቶ ታምፃቲታ ሼውቴ ፌቴራኒስ እጂካ::

አሬሳቻንትካኪላ ታምብኹሳ ሴብሎ እሪ ጉዳቶ ታምፃቲታ ኩፕፅጝዳ ፅሬቶ ፄዌካማጊ አግስታና:: አውጚው ራዲዮንሊ እጂጜ ፄውንኩ ድማሚ ኬቤሊው አሬሳቻንትካ ወክቶ ማንዳያሱ እሪ  ሴብልዳ ጉዳቶ ታምፃቲታ ውቢሪስ ኩፕፅካማጊ አግስታንኩ አኽⶓ እንክርፄካ::

አሬሳቻንቲ እምቢያለ ፈንታሁን አንኪሺ ጉዋጉሲ ወረዳ ድማሚ ኬቤሊው ዝኩዋንትካኽ:: ኬቤሊዳ ስንዳይ፣ ታፊ፣ ሹምቢስታ ፄጌርጙንኩ ሴብልካ ዋጋኑ ዙራሙሪ አኽⶓ ዲብስካ:: እኒጛ  ሴብልካዴስኪላ ቤዴርካማ ታምቡንኩሳ ኩፕፅካማጊ አግስታና:: እንዴስ ፍና ችኹ ስንዳይዳ ወክቶ ማንዳያሱ እሪ እሉዋማ ጉዳቶ ታምፅⶓ ቶኬምካማ እሊኩ ታምቡንኩ ሴብልካዋ እምቢት ንካማ ኩፕፅካማጊ አኽⶓ ዙሜካ::

አሬሳቻንቲ እምቢያለ ታምቡንኩሳ ሴብልካዋ ውቢሪስ ያኼካማጊ ኩፕፅጝዳ አኽⶓ ጌሌፅካማ ናካዳ እሪ እሎውላ ይጉኒውላ እሪ ይንታው ንካማ ስጋትዳ አኽⶓኪላ ቶኬምካ::

ታምቡንኩሳ ስብልካዋ ኩፕፁኒዴስ ፋሌንጋ አኾቲው ልማቱሳ እንፅኼ ሲፍፃንኩ አኽⶓ አሬሳቻንቲ እምቢያለ እርዳትፅካ::

ክልሉ ፄትቲው ችግርስ ውማይቴንካ ኬቤሌኺስታ ካስካማ እርዳትጝስ ካሌካያስኩ አኽⶓ ጌሌፅካማ ኬቤሊው አመራርካ እምፕልታቕስ ሴብሎ ወክትስ ኩፕፃንታ ፄዌካማጊ አግስታንኩ አኽⶓ ዲብስካ::

ታምብኹ ሴብልዳ ይው ኩው ትጛኑላ ዎሌንሊ እምፕልትስ ታምብኹሳ ሴብሎ ኩፕፅካማጊ አኽⶓ ጌሌፁንኩ አሬሳቻንቲ ሴብል ኩፑኒዴስ ፋሌንጋ ኪዲስታማ ጎተሪሾ ቱዌምባ ትንካኬ ፄዋንኩ አኽⶓ ድኹዌካ::

አሬሳቻንትካ ሴብሎ ኩፕፁኒዴስ ፋሌንጋ ውዳኔ ፍሽካማ ኪዲⶓ ጄሜሩንኩ እምፕልታቕ ዝኩⶓኪላ ዲብስካ:: አሬሳቻንቲ እምቢያለ ታምብኹ ሴብል ትንካኪስ አፄድስቱኒዴስ ፋሌንጋ ጎግልስታው ጊዝይ እሪ ቱዋማ አቤሌሽስታቲታስታ ፆፃ ኹዋቲታ ፄውጝስ ትንካኪስ ጎግልጝ ቱስታው አኽⶓ ዙሜካ::

ችኹ ወክትዳ ዜርስትኹ ስብል ኩፑኒዴስ ፋሌንጋ ኩፂ አሬሳቻንትካ አኾቲው እንፅኺስ ልቕልቕቴ ፄዌካማጊ አግስታንኩ አኽⶓ ዙሜካ::

ድማሚ ኬቤሊዳ አኾቲስ ቴኬምስታኑ ዳንዲኒ እስታው ብንዴስ አኾ ፍሽጝስ ማልጛ ቼጌርፃው አኽⶓ ቶኬሙንኩ አሬሳቻንቲ እምቢያለ እን ብንዳ ምንግስት አኹውሳ ፕሮጀክቶ እንፃኽስታታኪላ ካሲካ:: ናካ ኩፂ ሚንችካ ያኼካማ ሚንቾ ሊፌካማ አኾ ፍሽንኩ አኽⶓ ቶኬሙንኩ አሬሳቻንቲ ፕሮጀክትስ ግቢስቱኒ ኩፂ እምፕልታቕ ፍሻኑሳ ግርቦ ይጉፃያው አኽⶓ እርዳትፅካ::

እሊው ድማሚ ኬቤሊው አሬሳቻንቲ በላይነህ አለማየሁ ጛኪላ ታምብኹሳ ሴብሎ ኩፕፅካማጊ አግስታንኩ አኽⶓኽ ዙሙኑ::”ታምብኹሳ ሴብሎ ውታኺዴስ ካንትጝዴስ ጝንዳ ሚፃማ ካንትጝ ኬሻዊያኽ” ኑንኩ አሬሳቻንቲ በላይነህ ታምብኹሳ ታምብኹሳ ሴብሎኪ ውቢሪስ ኩፕፅጙ ዴስ ዝኩⶓኩላ ዙሜካ::

ድማሚ ኬቤሊው ግብርኒው ውማይቲኒ አቶ በርሃን ሞገስ ኬቤሊዳ ችኹ ወክትዳ ሴብልስ ሾፌንስትኹ ብቲዴስ ሹምቢ ዴሜካማ ኬቤሊታ ስብልስ ሾፌንስትኹ በቲዴስ 20 ታፋ ያኻው ይጉስ ውላ ኩፒጝስ ካሊስትኹ አኽⶓኪላ ዙሜካ::

አቶ ብርሃኑ አሬሳቻነተካ ከቤሊታ ልማትኩ አቺትጝካስ አቺትጜካማ ሴብል ኩፕናታ ኩስጝፄካማጊ አኽⶓ ዙሜካማ ግብርኒኩ ውማይቴንካው እርዳቲ ዜሬቕንኹ ያኹኒውላ አሬሳቻንትካ ጛስጛዋ አቺትጜካማ ታምብኹሳ ሴብሎ ኩፕፅጙሳ እንፅኼ አኮሜችካማጊ አግስታንኩ አኽⶓኪላ  ድኹዌካ::

አሬ ጎግላኒስ ብቲዴስ ጃላ 30 ሴንቲ ሜትሮ ኬፍፅካማ ካርⶓ እንኩርጝስ ጎግልጝ ፋይፃው አኽⶓ ዙሙንኩ ግብርኒው ውማይቲኒ ጎግልስትኹ ሴብልዳ ጉዳት ታምባቲታኪላ ጊዝቺፋ ካንትጝ ቱስታው አኽⶓ ጌሌፅካ::

ጎግልስትኹ ጎግሊዳ እሪ ቱዋማ አቤሌሻቲታ ጉጆ ግቢትጝ አኹኪ ሻራዋ ጄዌካማ ሾፌንጝስ ትንካኪስ እሚጝ ፋይፃው አኽⶓኪላ ዙሜካ::

አፄድስትኹ ሴብል ትንካኪ ፄውስታውላ ይጉኒጊ 30 ታፍዴስ ጃላ ያኻው ባኪኬንጝስ ካላው አኽⶓ ጌሌፁንኩ ግብርኒው ውማይቲኒ ኪዲስቱስኪላ ትንካኪስ ኪዳንታ አሬሳቻንትካስ ኩስጝፃንኩ አኽⶓ ዙሜካ::

ችኹ ወክትዳ ዜርስትኹ ስብል ኩፑኒዴሰ ፋሌንጋ አኾቲው ልማትስ ስንዳዩ ዜርጝሰ ካሊስታው አኽⶓ ቶኬምካማ አኹ ታምባውዳ ሞተር ፓምፖ ቴኬምስትካማ ዜርጝስ አሬሳቻንትካ ኬሻንቴ ትክሞ አግፄካማጊ አኽⶓኪላ ዲብስካ::

ኬቤሊዳ አኾቲስ ስንዳይ፣ ቤርቤርስታ እሊኩ ኩፓኩፕካጊ ሊሚጝስ ካላው አኽⶓ ጌሌፁንኩ ግብርኒው ውማይቴን አሬሳቻንትካ ሴብሎ ቱስቲስ ኩፕፁኒዴሰ ፋሌንጋ ላጛንቲ ዙሪ አኾቲ ልማቱ እንፅኺስ ቤዴራ ቴርቶ ፄውጝ ቱስታው አኽⶓኪላ ጌሌፅካ::

አንኪሺ ጉዋጉሲ ወረዳዳ ግብርኒው ፅፌት ጝናሱ ሴብል ልማቱ ቴቤቤርጝፃንቲ አቶ ተስፋሁን አምሳሉ ወረዳታጊ ሴብልስ ሾፌንስትኹ ብቲዴስ ታምብኹሳ ሴብሎ ኩፕፅጝ ይቢቺ ያኻውላስ ኪዴካማ ጉሊንቲሾ ሚፅካማጊ አኽⶓ ዙሜካ::

ችኻ ዜርስ ሾፌንጝ አኬድስትኹ 17 ሻይ 202 ሄክታር ብቲዴስ 19 ሻይ 8 ሊኻዴስ ጃላ ብቲ ሴብልስ ሾፌንስትኹ አኽⶓ ቶክሙንኩ አቶ ተስፋሁን፤ ታምብኹ ሴብል ውላ ዙሪሙርካዳጊ ኩፕናማጊ አግስታው አኽⶓ ዙሜካ::

ወክቶ ማንዳያሱ እሪ ሴብልዳ ጉዳቶ ታምፃቲታ አሬሳቻንትካስ እርዳቴ ፄዌካማጊ አኽⶓ ጌሌፅካ:: አሬሳቻንትካ ናካ አባላምቲ ዙሪ አኾቲስ ሊሊትጙንኩ ስብልካ ሊሜካማጊ አኽⶓ ቶኬምካማ ላጛንቲ ዙሪ አኾቲስ ቤዴራ ቴርቱ እንፅኺ አኮሜችስታማጊ አኽⶓ ጌሌፅካ:: ትር አርፊዳ ላጛንቲ ዙሪ አኾቲው ልማቱ እንፅኺ እንፃኽስስታው አኽⶓኪላ እርዳትፅካ::

አቶ ተስፋሁን አሬሳቻንቲ ቻ ናካ ናኑላስ ታምብኹሳ ሴብሎ ትንካኪስ ኩፕፃንታስታ ኪዴካማ ጉሊንቲሾ ሚፃንታ እንቲታኪ ሴብል ጁኽዳ ዴሜካ አኾቲስ ሊሚፃንታ አሬሳቻንትካስ እንፅኼንቶ ፌያፌይጝፄካ::

አዊ ብሄረሰቡ ቺፅጝፂዳ ችኹ ወክትስ ሊሙንኩ ሴብልካ ወክቶ ማንዳያሱ እሪ አቤሌሻቲታ አሬሳቻንትካ ኩፕፅካማጊ አኽⶓ ግብርኒው ሜምሪ አቕፃ:: ብሄረሰቡ ቺፅጝፂዳ ችኹ ወክትስ ሴብልስ ሾፎንስትኹ 327 ሻይ 533 ሄክታር በቲዴስ 160 ሻይ 912 ሄክታር ብቲ ክላስተርስ ሊሙኽ አኽⶓ ብሄረሰቡ ቺፅጝፂዳ ግብርኒው ሜምሪው ሴብል ልማቱ ማንዲጚው ኬቹ ጉሳንቲ አቶ አንዱአለም አያሌው ጌሌፅካ::