ጊኒስታ ላሊበላ

ዘውዴ በካሉ

ይቶፒያዳ ሚንችካ አይማኖትኩስታ ባይልኩ ታሪክካስታ ወግካ እንቲታኪ ባይልካ አግስታና:: እኒጛ ባይልካስታ ወግካ ዙራሙሪው ዴስታስታ ባይልታ ሊሊቲ ያኹኒኪላ እምፕል አይኔት ባይልዳ ትኩትኹያኽ:: አጌራኻዳ ኬቤርስታንኩ ባይልካ ክቻዴስኪላ ጊኒው ባል እምፕልያኽ::

ጊኒው ባል አሜት ቺፋ ቴሳስ አርፊዳ ኬቤርስቴ:: እንጚኪላ አይማኖትሊ እምትጛማ ድባን ካሜንስትኹሳ ምክንያታ ፄውጝስያኽ:: እንቲታኪላ ድባኑ ክምንቱ ባልሊ አብርታ  ክዱስ ላሊበላው ባልኪላ ኬቤርስቴ::

ጊኒው ባል ኬቤርስቱስ ባይሎስታ ወጐ ማንዱኽ ዳድስያኽ:: ክስታንቱሳ እምኔቶ ሲፋንትካ ጊኒውሳ ባሎ ኬቤርፃኒስ አሜት ቺፋ ቴሳስ አርፊዳ ያኹኒኪላ አሜትዴስ  እምፕላኒ ቴሳስ 28 ጌርክስ ኬብርስታው ያኹስ እሊኩ አሜትካስ ዴሜካ ቴሳስ 29 ጌርካስ ኬቤርስቴ:: ኢየሱሰ ክርስቶስ ቤተልሄምዳ ክምካውዳ ድባይዳ ካሜንስትⶓ ሲፍካማ ጊኒውሳ ባሎ ኬቤርፃኒስ ዙራሙሪኩ አቕ ውታኺዳ ዳባዋ እንክራና::

ጊኒው ባልዳ አይማኖቱ እሚዴስስታ ታሪክዴስ ድምክና አኮሜስታንኩ ባይልኩ ቴርትካ ዝኩና:: እንጚኪላ ዳባ እንክራ  እስቴ:: ካኒዴስ ኬውስታማ ዳባዋ ኮሻማ አኹኪ ታሳማ ፋይስታው ሰፍሪሾ ታምፃው ኩልማሚ ግምብ እንጁክ እስታው አኽⶓ ታሪክኩ ሚፃፍካ እርዳትፃ:: አዊ ብሄረሰቡ ቺፅጝፂዳ እርሺው አኹኪ ግብርኒው እንፅኺ አሌድስታማ ፊኹዌ አግፁንታጊ ጊኒውሳ እንክሬ ጄሜራኑ ዳሩ አርፊዴስ ጄሜርካማኽ::  ጊኒውሳ በሎ እንክራንኩ ጝርጃ ይቪችካኽ:: ሌጌሳ ታምብካኪ ያኻ ኽሳንትካ አቕ ካላስስታ እንፅኺ እላቲው ጌርክስ ውታኻ ካስካማ ኬችስ ኬችስ ቤንጜካማ ላጛ ኬችስ ዳባውሳ እንክሬ ካስጝፃና:: “ዳባዋ” ቴርሳኑ ካኒዴስ እንኩልሉሳ አኹኪ ኩታውሳ ማሊፊ እምፅካማ ኬሜምጝስ አኹኪ ሌግስ ላባላብጝስ እንቲታኪ ፃፍርዴስ፣ ጎማዴስ ዳባዋ ቴርሳና:: ዳባ እንጁክስ ታሳኒ ክምብብልቴት አኹኪ ታፋስ ብቲዳ ታሳኒ ኩንቴት አኽጝ ዝኮ::

አንስታ ያኽስታማ ዳባዋስታ እንጁኮ ቴርሱኒዴስ ፋሌንጋ ጝርጃ ውታኺሾ ካስካማ ላጛ ኬችስ ያኼካማ እንክሬ ጄሜራና:: እንክሪ ጄሜርስትጝዴስ ፍና ኩፂ ጌቴምጛንኩ እምፕል ሙሪኩ አቕ አኹኒኪ ላጛስጊ ኬችስ ክችክቺ አቒው ቼፍስ ቤንጛና:: ሊሊትጙንኩ ሙሪኩ አቕሊ ጌቴምጛኑ ያኹኒኪ ዴሜካ ሙሪስ ሙሬ ጌቴምጛና:: እምፕል ሙሪኩ አቕ ጌቴምጛኑ ያኹኒጊ ላጛ ኬችስ ቤንጙኒዴስ ፋሌንጋ ላጛዴስጊ ኬችዴስ እንክሪስ ኬሽኹሳ እምፕሎ ኬቾ ዋኬልካማ እንክራንትካዋ ጐሌላና:: እንክራንትካ ጐሌሌስታኒስ ላጛላጛ ያኼካማጊ ጛው ያኹኽስ ሺሽፄ ስሞ ላጛጊ ኩስጜካማ ሴየማና:: ምሳሊስ “ድባንዴስስታ ብቲዴስ” ንጝስ ካላና:: እምፕልኪ ድባን እሊው ዴሜካ ብቲ ናውሳ ስሞ እሚካማ ጐሌላንትካውላ ዲጋና:: ጐሌላንትካስኪላ “አውራ አውራ” ንካማ ላጛጊ ጐሌልስታንትካዴስ እምፕል ዲብሴ:: እሊው ዴሜካ ዴሜካ “ምንታውራ” ናኒ አውራውራ ንኹ ድባንዴስስታ ብቲዴስ ንጝስ ጐሌልፄ:: “ምን ታውራ” ንኹ ጐሌላንቲኪላ ድባኖ ጐሌላው ያኹኒጊ አው ድባን ናማ ጐሌሌ:: ብቲ ናውሳ ስሞ እሚኹ ጐሌልስታንቲ ላጛንቲ ኬችሾ ካሴ:: እንጚስታ ንካማጊ ጐሌልጛካማ እንክሬ ጄሜራና:: እንዴስ ፋሌንጋ ዳባዋ ውታኺውዳ ክችዳ ፄዌካማ ላጛጊ ኬችዴስ እምፕል እምፕል አቒ ዲጋማ ዳባዋ እንጁክስ አኬችካማ ላጛዴስ  እምፕል እምቢት ናማ ዳባዋ አይልስ ታስጝስ ጚው ኬችስ ቻቤልጝፄ:: ዳባዋ ዙርፅጝስ  እሊው ኬችዳ ሚፅጝስ እንጁኮ ቡዌካማ ጊጝትጛና:: “በገና ጨዋታ አይቆጡ ጌታ” ናውስ ሲፍካማ ጊኒው እንክሪዳ ታስጜካማ ታፎ ልኮ ዶንቱኒ፣ እሎ ታስስቱኒ፣ እርኩዌ ታስስቱኒስታ ሊሊትጙኽ ቤዴል ታምቡኒጊ ቑሎ እሜላኽ:: ጋያኪ  ዳባዋ ትክስጝስ ውላጊ ዳባዋ ታስጝሰ ፋያና::

ጊኒው እንክሪዳ ዊፅጝስታ ዊፅስትጝ ዝኮ:: ዊፅኹ ኬችጊ “እምቦ ሳሪ እምቦ” ናማ ዊፅⶓ ኬችስ አቕፄ:: እንስታ ያኽስታማ አዋ ቲያታ ክማማ እልስ ጉጅምባኺስታ እንክራና:: እንክሪዳኪላ ኽሳንትካ አቕስታ ኪሳኪሳ አግሰቴካማ እንክሪ አሌድስቱኒዴስ ፋሌንጋ ዳቔራና:: እን ጊኒው እንክሪ አሜት ቺፋ ዝኩኽ አኽጝስ እንክሪዴስ ፋሌንጋ አሜት ቺፍ እንጅኮ ሚፃኑ ጝን ቴርስ ቴርስ ዝኮ:: እንጁክ ቱዋውዳ ጝንዳ ስልኺ፣ አሪኪስታ ኹጝ ዝቒ ቴርቴ:: እንጁክ ቱዋው ጝንሾ ካሳኒስኪላ ጄር ዝኩኒኪ ጄሮ ጄር እላቲው ያኹኒኪ ጝንዌናሳ ፂኻራ ፄውካማ ዋኾ ፂኻራውሳ ስዮ ሴይፅካማ ቡዌካማ ጝንሾ ካስና:: እንጚኪላ ይንታው አሜትዳ ድግስ ዝኩⶓ ጌሌፅጝስያኽ::

እንዴስ ፋሌንጋ ጝን ቺፋ እንዜጝካማጊ አያሆሆ… አያሆሆ… አያሆሆ… አያሆሆ አይሆ ጊኒ ንካማጊ ጅሜካማጊ አሪኬ፣ ብሮ፣ ስልኼ፣ ጛርጌስታ ፄጌርጙንኩሳ ሼሌምስትካማ ሙሬ ዙሬካማጊ እንክራና:: ዝኩኽ አቒ ዴሜካ ታዮ፣ ፍየሎስታ ዱሬ አሬድካማ እያና:: አሜት ቺፋ እያው አቒኾ ካስካማ እንኮጛ እይኹሳ ታክስፅጝስ  ”አን ኪራ አንቱኻ እንኮጛ ካንቱኻ ይንትኹሳ ዴሱኻ” ንካማጊ ጝንዌናሱሳ ስሞ እቑዊካማጊ ጌቴምካማ ጅማና:: እንጚስታ ዙሬካማጊ ጅማኒስ ብቴ ቼ:: እምፕል እምፕል ዙራሙሪዳኪ ዴጌስኹ አቒውሳ ሴብሎ ኩፕፅጝስ እንፃኽስታንኩኪላ ዝኩና:: ጊኒው ባል እንሳ ቴርቶ እሜማ ሊጊሲሜ ጊዞ ክምንትዴስ ክምንትሾ ፌያፌይጛማ እንስ ታምባ:: ያኼስጉ እን እንክሪ ጊዝዴስ ጊዞ ኔኬታማጊ ይንታ:: ጊኒው ባል ጊኒውሳ ባሎ ማንዳማ ይቢቺ ያኻውላስ ፅምቕቱ ባልዳ፣ ታቡት ፋስ ብሩኹ አኺኒስ ኬቤርስቴ:: እንሳ አሜቶ ጊኒውሳ እንክሬ እንክርጝስ ሌጌስታምብካ እንጉስ ማንዳና::

ጊኒው ባልዴስ ድምክና እን አጌራዳ ብሩኽ አኺኒስ ኬቤርስታው ክዱስ ላሊበላው ክምንቱ ባሌኽ:: ላሊበላ አማኻሪ ክልልዳ ውሎዳ አግስቴት ኬቴማኽ:: ንጉስ ላሊበላ ካሜንስቱስ ፅኻራ ኬቤብታታ ካሜንስትኹ አኽጝስ ላሊበላ ናውሳ ስሞ አግፅⶓ ታሪክካ እርዳትፃና:: ላል ንጝ ጛርጊ ንጝ ያኹስ ላሊበላ ንጝ ዴሜካ ጛርጌ ኹዌስ ንጝ አኽⶓ ታሪክካ እርዳትፃና:: ላሊበላዳ /ዳግማዊ እየሩሳሌም/ ጊኒውሳ ባሎ ቴሳስ 29 ጌርክስ ብሩኽ አኺኒስ ኬብርስቴ:: ክዱስ ላሊበላውስታ ድባኑ ክምንቱ ባል እምፕልትስ ኬቤርስትጝ ዴሜካ ባሎ ሊሊታ ፄዌ:: ላሊበላውሳ ባሎ ኬቤርፅጝስ ሚንችካ አይማኖትኩ ሲፋንትካ አጌራኻዴስኪ ያኻ ባርኾቼዴስ ላሊበላሾ እንዜጛና:: ባሎ ካንትኹስ ደብረ ሮሃ ክዱስ ላሊበላው ቹዋ ቺፅጝፃንቲ አባ አርያቆብ ፀጋየ አባታ አሚኮሊ ፄውኑ እጂጚዳ  ይቶፒያው ታሪክዳ ሶኼታንቲዴስ 12ንቲ ጊዝ ዝቤን ቤናሳ ኺስታ እሺኹ ዝቤን ልላኹ ዝቤን እሺኾ:: እንጚኪላ ዮዲት ጉዲቱ ዝቤንዳ ብሽታን ዌዴምኹ፣ ሜፃፍ ብብርኹስታ ማኼትካ ዋዴሙኑ እሸኹ አኽጝስ ድባን ክዱሳንትካዋ ጉሽኾ:: እኒ ክዱሳንካዴስ እምፕላ ክዱስ ላሊበላኽ::

ክዱስ ላሊበላ 12ንቲ ጊዝ ዝቤን ቤናዳ ጁኽ ክህነቶስታ ስልታኖ ፃምርሳማ ፊትጙኽያኽ:: ክዱስ ላሊበላ ብሽታኖ ግቢትጝስ ጁትጝፅኹ ድባኔኽ:: ክዱስ ላሊበላ ንጉስታ ያኻማ ፌሬዴ፣ ኪሳያኻማ ኬዴሴ:: እን አኽጝስኪላ ክርፄ እንፅኼ እንፃኽስታ:: ላሊበላዳ ሊሊቲ ቴርትስ ክምንቱ ባል አይማኖቱ ቴርት ፌፄምስታው ቤተማርያም ብሽታንዳኽ:: አሌምዴስ ሊሊት ንኹ ላሊበላ ጌዳሙ ክምንቱ ባሉ ሊሊቲ ቴርት ፌፄምስታው ዴሜካ ዴስስ እስታማ አቕስታው ዙራሙሪዳኽ:: ማሜ ጋር- ቤተ ማርያም ፍትሬቱ አፂ /ከቢ/ ያኹኽሳ ኩር ያኹኽ አሌፄኾ::

ላጛ ሻይ አሜትዴስ ፍና ቤተልሄምዳ ኢየሱስ ክርስቶስ ካሜንስትⶓ ሲፋማ ድባን አምፓዴስ ክምካዋ ማንዳንኩ አባላምክሳ ድባን ድኹዋኒ “ቤዛ ኩሉ አለም ዮም ተወልደ” ንካማ ሜሴጌንፁኑሳ ባሉ ቴርትዳ ስግላ ካስጛው ቤዛ ኩሉ ቴርትኪላ እንጜዋ ታክስፃዌኽ::

ይቶፒያ ኦርቶዶክስ ብሽታና ክምንቱሳ ባሎ ኬቤርፂስ ዊዚሚዴስ ጄሜራማ ኻሮ ቺፄ ሜሴጌንፃና:: ላሊበላዳ ኩፂ እሊኩ ብሽታንካዴስ ሊሊት ንኹ ዳድስ  ቤዛ ኩሉ ሲፌ:: ኪሳኪሳ ቤዛኩሉ ቴርትሾ ቱዋኒስ እዴቴ፣ ፉቼ ቼርኮ፣ ብሽታኑሳ ስዮ ሴይካማ እንቲታኪ ካቤ ዴሬብካማ ግዲትካማ ዲጋና:: ቤዛኩሉ እምፕል ሳትዴስ ጃላ እጂው ያኹስ ኪሳኪሳውስታ ባልዳ አግስቱንኩ አምናንትካውስ እልልቲስስታ ችብቻቡሳ ኬቤርስታማ ቴርት አሌድስቴ::

ድባን ክዱስ ላሊበላስ ቱኹሳ ካሎ ስራ ፄዌካማ ሴዛስጊ ዳብዚስ አቕ ላሊበላሾ እንዜጛና:: 800 አሜትዴስ ጃላ ላሊበላዳ ባል ኬቤርስቱስ እጄ:: ሚንችካ ፍታንካኻዳስታ ችግራኻዳ ያኼካማኪላ ባሎ ኬቤርፃና::