አንኮሌ እንፃኽፁንኩ ኮሜችካ ክንታንትካ

ዘውዴ በካሉ

ክንቲ አቑሳ አንኮሌ ጊምባው አቕ አቕትስ፣ አሳብስ፣ ልማትስ፣ ማይቤራዊ ታምትጚስስታ ፄጌርጙንኩ ኩምችንካዋ ቴግባርካዋ ፄውጝስ አንኮሌ ብሳው ኩልፌኽ:: አቕ ክንቲስ ይሱንኩ አኽጝ ጛርቱሳ አቕቶስታ አቕስታንቶ አግፅጝዴስ ድምክና ፖለቲካው፣ ማይቤራዊሰታ ኢኮኖሚው ችግርካዋ ኽይጝስ ቹዋ ዳድያኽ:: ምንግስት ፃንኩት ዝኩኽ ክንቲ እምፕልታቕስስታ ስካዊ ክምንትስ እይስታታ ክንቲውሳ ፍኖተ ካርቴ ኪሳማ እንፃኽስታማጊ አግስቴ::

ፃንኩት ዝኩኽ ክንቲ እምፕልታቑሳ እርዳትስትጙሳ አክሞ ሌጌፄ፣ አጌርስ ፋይፃውሳ አኺኔ ሺሽፄ፣ እምፕልታቑላዳ ዝኩኹሳ ኬቤቤርጜስታ ካሊትጜ ይስጝፄ? ጋቻ ኩስጚስ ኽይስታታ አቕቶ እዬ:: እን አጌራዳ ናማኪ አማኻሪ ክልልዳ ኬሴትስትኹ ጋቻ ክንቲው ዜርፍዳ ቻኒስቶ ታምፅጝ አቕስቴ:: እን ችግራኻዳስታ ያኼካማ ክንቲዳ ክርፄ ዋይሜ ሜዜጌብፁንኩስታ ቻ አጌሮ አሬኬብስታንኩ ክንታንትካ ዝኩና:: እኒ ክንታንትካስ 2015 ክንቲው ዝቤንዳ 12ንቲ ቤኑሳ አጌር አቡቑሳ ፍታኔ ፌቴንስትካማ ክርፄ ዋይሜ ሜዜጌብፅጝስ ዩኒቨርስቲሾ ካሳንኩ ክንታንትካስ ክልሉ አችስ ሽልማቲ እይስታ::

አማኻሪ ክልሉ ክንቲው ቢሩ 2015 ም.አሜትዳ 12ንቲ ቤኑ አጌር አቡቑሳ ፍታኔ ፌቴንስትካማ ክርፄ ዋይሜ ሜዜጌብፁንኩ ክንታንትካስስታ ክንታንትካዋ ዋኽስዋኾ ፌይፅኹ ክንቲ ጝናስ ሽልማቲ እይስታ:: ቴርትዳ አግስቱንኩ ትክትሊ ቺፅጝፂ ጛራሱ ማሬግስ ማይቤራዊ ዜርፉ ቴቤቤርጝፃንታስታ ክንቲው ቢሩ አላፋ ሙሉነሽ ደሴ /ዶ/ር/ 2015 ም.አሜትዳ 12ንቲ ቤኑሳ አጌር አቡቑሳ ፍታኔ ፌቴንስቱንኩ ክንታንትካ ክቻዴስ 8 ሻይ 434 ክንታንትካ ይቢችካ ፌይⶓ ጌሌፅካማ   ፍትሬቱ ሳይንስስ 44 ጝርጃስታ 11 ኹን ትክላሊስ 55 ክንታንትካ 600ዴስ ጃላ ዋይሜ ሜዜጌብፅⶓ ጌለፅካ:: ማይቤራዊ ሳይንስስ ዴሜካ አንኩዋ ጝርጃስታ እምፕል ኹና ትክላሊሰ ዋልታ ክንታንትካ 500ዴስ ጃላ ዋይሜ ሜዜጌብፅⶓ ጌሌፅካ::

ክልሉ አችስ ሜዜጌብስትኹ ኬፍቲኒ ዋይሚ 646 ፍትሬቱ ሳይንስስ ደሴ ሊሊቲ አዳሪ ክንቲ ጝናዳ አኽⶓ ጌሌፁንኩ ዶ/ር ሙሉነሽ ሳይንሱ ክንቲው ዜርፍስ ዴሜካ 533 ዋይሚ ክቡር ዶክተር ሀዲስ አለማየሁ ሊሊቲ አዳሪ ክንቲ ጝናዳ ሜዜጌብስትኹ አኽⶓ ጌሌፅካ:: ደሴ ሊሊቲ አዳሪ ክንቲ ጝና፣ ክቡር ዶክተር ሀዲስ አለማየሁ ሊሊቲ አዳሪ ክንቲ ጝናስታ ባርዳር ዩኒቨርስቲ ስቲም ክንቲ ጝና ፌቴንፁክሳ ክንታንትካዋ ዋኽስ ዋኾ ፌይፅⶓኪላ  አላፋ ዙሜካ::

2015 ም.አሜቱ 12ንቲ ቤንካው አጌር አቡቑ ፍታኒ እይስታው ወክትዳ ክልልዳ ኬሰተስትኹ ፄትቲው ችግርስታ እሊውጊ ችግርስ ዊፅስታኑላስ ኬፍቲኔ ዋይሜ ሜዜጌብፁንኩ ክንታንትካስ ክብር ቱስቴ ንካ ዶክተር ሙሉነሽ:: እኒ ሼሌምስቱንኩ ክንታንትካ  ይሴንካስታ ጛጂሶ ሲፋንኩስ ዴሜካ ምሳላ ያኻንኩ አኽⶓ ዙሙንኩ ዶክተር ሙሉነሽ እን ሽልማቲ ክንታንትካዋ ይስጝፃውስታ እሊኩ ሲፋንኩ ክልልኩ ክንታንትካኪላ ይሰካማ ክንታንታ እንፅኼንቶ ፌያፌይጝፅጝስ አኽⶓ ጌሌፅካ::

“አጌራ ፄጌርታው እምፕልታቖኽ፤ እምፕልታቕኪላ ፄጌራኑ ክንቲውሳ ቴርቶኽ” ኑንኩ ዶክተር ሙሉነሽ ቢኩኽሳስታ ይሴኖ ክምንቶ ፌቴርጝስ ፃንኩት ዝኩኽ ክንቲው ቴርት ቴግባርዳ እሺጝ ፋይፃው አኽⶓ ጌሌፅካ::

አማኻሪ ክልሉ ትክትሊ ቺፅጝፂ ጛራ አቶ አብዱ ሁሴን ክንቲ ዋይሚሰታ ያኻታ ታምብዌን አካልካዋ ቴቤቤርጝፅጝስስታ ፃምርስጝስ አኮማችስታንኩ እንፅኽካ ይስካማ ሲፋንኩ አኽⶓ ጌሌፅካ::

ክልል 2015 ም.አሜቱ 12ንቲ ቤኑ አጌር አቡቑሳ ፍታኔ ፌቴንስትካማ ኬፍቱኔ ዋይሜ ሜዜጌብፁንኩ ክንታንትካ እንዴስ ጃላ እንፃኽስትጝስ ሲፋውሳ ቴክኖሎጄ ይስፅጝስ አጌራ ማንዴውሳ አላፍቶ ፊትጝጝ ቱስታው አኽⶓ ታክስፅካ::

ናካ እይስታው ሽልማቲ አቕት ይቢቺ ያኻውላስ ይንታው እንዝጚዳ አላፍቶ ቱስቲስ ፊትጛንታ እይስትኹ አዴር አኽⶓ ጌለፁንኩ ትክትሊ ቺፅጝፂ ጛራ ቻ አጌሮ ኬሽኹ ዳድስስታ ክንቱኹ አንኮሊስ ጉሳንታ እርዳታው አኽⶓ ጌሌፅካ::

ሼሌምስቱንኩ ክንታንትካ ይንታው ጊዝዳ ኬሻንቲ ቴክኖሎጂስ፣ ልግስኒው ካንቲስ አጌሮ ጉስጝስ፣ ክልሎስታ አጌሮ ሌጌፅጝሰ፣ እይስትኹሳ አላፍቶ ቱስቲሰ ቴኬምስትካማ እምፕልቱ ካንቲዳ ቲሬንታ ትክትሊ ቺፅጝፂ ጛራ ታክስፅካ::

ዩኒቨርስቲው እጂጚዳኪላ ውላ ይቶፒያው ቤንዴሰ ፊትጙንኩ ብሄር ብሄረሰብካሊስታ እዝብኪላ አኽጝስ ጛጂ ፋያኑሳስታ እኖጂ ጛጂዴስ ክንትናውሳ ማሊጝስ አማኻሪ ክልል ይቶፒያው ብሄር ብሄረሰብካሊስታ እዝብካሊ ዝኩኹሳ ካንቴ ኬፍፃንታኪላ እንፅኼንቶ ፌያፌይጝፅካ::

አማኻሪ ክልሉ ብልፅግኒ ፓርቲው ቻፊው ፅፌት ጝናሱ አላፊ አቶ ይርጋ ሲሳይ ሜንድሬኽዳ አግስቴካማ እንፅኼንቶ ፌያፌይጝፅካ:: ይሴንስታ ፂኒት አጌራዋ ፌቴርጝስ አቕትስ ሌጌስኹ እምፕልታቕ ፋይፃው አኽⶓ እርዳትፅካ:: እንስኪላ ስላም ቼሜትጙኽ ክንትጝ ክንትፅⶓ ቴርትስታ ሰላም ያኹኽ ዙራሙሪ ፋይፃው አኽⶓኪላ ድኹዌካ:: ሰላሞ ፋያቲንኩ አቕ ክንታንትካ ክንታቲንታስታ ልኺትጛንቲ ክምንት ፌቴርስታቲታ ፄዌካማጊ አኽⶓኪላ አቶ ይርጋ ጌሌፅካ::

አቶ ይርጋ ሼሌምሰታንትካ ክንታንትካ ችግርስ ዊፅስታኑላስ ዋይሚስ ቢኩንኩ አኽⶓ ቶኬምካማ አማኻሪ ክልልስ ናማኪ ይቶፒያስ ሚንችካ ይሴንካ ጄርካ ፋይፃንኩ አኽⶓኪላ ጉሽካ:: ሼሌምስታንትካ ክንታንትካ ዩኒቨርስቲው እጂጚዳ እንሳ ዋይሜ ካቢጝስ እዝቦስታ አጌሮ ቴኬማውሳ አቕቶ እሚካማ ይንታንታ ታክስፅካ::

2015 ም.አሜቱ 12ንቲ ቤኑሳ አጌር አቡቕሳ ፍታኔ ፌቴንስትካማ ኬፍቲኔ ዋይሜ ሜዜጌብፁንኩ ክንታንትካ ክቻዴስ ክንታንቲ  ኤልያስ ደሳለኝ እምፕልያኽ:: ደሴ ሊሊቲ አደሪ ክንቲ ጝናሱ ክንታንቲያኽ:: 2015 ም.አሜቱ 12ንቲ ቤኑ ፍታኒዴስ 700ዴስ 646 ዋይሜ ሜዜጌብፃ:: ክንቲው ዝቤንዳ ሚንችካ ችግርካዋ ፌይፃማ እን ዋይሚስ ቢኪⶓ ድኹዋ:: ይንታውስኪላ ኬሻንቴ ዋይማ ሜዜጌብፅጝስ ካሊፃው ኬፍቲኒ ኾት አኽጝስ ዩኒቨርስቲዳ እንዴስ ጃላ እንፃኽስትጝስ ጉሽጝፃው አኽⶓ ድኹዋ:: ዋይሚስ ዴስቲኒ አኽⶓ ጉሻማ እን ዋይሚ ሜዜጌብስታታ ጝን አቕ፣ አፄብካስታ ክንትፃንትካው ፍሺ ኬፍቲኒ አኽⶓ ዙማ::

እሊት ሼሌምስታንታ ክንታንታ ሶስና ሞገስ እስቲ:: ፍታኒዴስኪላ 607ዋይሜ ሚዜጌብፄታ አቕስቶ አግፄ:: ክንታንትካ ይስካማ ፂኒስጝስ እንዴሰ ጃላ ሜዜጌብፅጝስ እንፃኽስታንታስታ ጛጂስታ ይሴኖ ዋይሜ ሜዜጌብፅጝስ አላሚስስታ ትኩትስ እንፃኽስትጝ ፋይፃው አኽⶓ ቶኬምታ:: እይስትኹ ሽልማቲስኪላ ዴስቴና አኽⶓ ድኹታ::

እሊው ሼሌምስታንቲ ክንታንቲ ድልነሳ በካቢል 606 ዋይሜ ሜዜጌብፃማ አቕቶ ሼሌምስታ:: አዊ ብሄረሰቡ ቺፅጝፂዳ አንኪሺ ላጛንቲ አች ክንቲ ጝናሱ ክንታንቲያኽ:: ኬፍቲኔ ዋይሜ ማዜጌብፃታ እርዳትኹ ጝን አቑ፣ ክንትፃንትካውስታ ጚው ፅሬት አኽⶓ ድኹዋ:: እንሳ ዋይሚ ሲፍፅጝስ ሜዴብስትኹ ዩኒቨርስቲኪላ አዲስ አበበ ዩኒቨርስቲ አኽⶓ ድኹዋማ  ዩኒቨርስቲዳ ዲጅታል ላይብራሬኪ ያኻ እርዳታንኩሳ ሜፃፍካዋ አንቤባማ ኬሽኹ ዋይሚስ ቲጋው አኽⶓ ዙማ:: እይስትኹ አላፍትኪላ ይስጝፃማ ሲፍጝስ እርዳታው አኽⶓ ዲብስኹ ክንታንቲ ድልነሳ እይስትኹ አቕትስታ ሽልማቲ አባላምቲጉ አሊዲ ጋቲው አኽⶓ ድኹዋ::