እምፕላ ሼውታማ ዴኮ ማንዲፅጝ

እን አጌራ ባይልስስታ ታሪክስ አድርቲት አጌራ አኽጝ አቕስቴ:: ትር አርፊኪላ እዝባዊስታ አይማኖታዊ ባልካ እሳንስ ኬብርስታኑ አርፌኽ::

እስጜ እዝባዌስታ አይማኖታዌ ባሎ ኬቤርፅጝስስታ ጐቤንጝስኪላ ባርኾቼዴስ  ሚንችካ ጎቤናንትካ ይቶፒያሾ ይንታና::

እን ንጝኪ አጌራው ሚፂ ዴሜካታ ፄውጝስ ጛውሳ ፍሼ ፄዌ:: ጎቤናንትካ ባርኾቼዴስ ይቶፒያሾ ይንቴካማ ሊሊትጙንኩ ዙራሙርካሾ ካስጝስ ፋያኑሳ ባሎ ኬቤርፅጝስ ካላንታ ዴሜካ አጌራው ሴላም ማንዲስትጝ ፋይፃንቲያኽ::

ትሩ አርፊዳ ኬቤርስታንኩ አድባባይኩ ባልካ ክቻዴስኪላ ፅምቕቱ ባል እምፕል እሺኾ:: እን ባልኪላ ሴላምስ ኬቤርስታታ ሊሊትጙንኩ አጌራው ቤንካዳ አግስታንኩ ትኩታኩ ቤንካኪ ያኼካ እምፕልታቕ ፄውኑ አሬባሪብጚስ ፄትቲው ችግራ ጋቲታ ባል ኬብርስታ::

እንዳ ካንትስትኹ ሴላሞ ማንዲፅጙ ፅሬት ዴሜካ ስስትስ ማንዲስታዉ አስተርዮዉ ፣ሰባሩ ባልስታ ትሮ ባህርዳርዳ ፣ ትር 23/2016 ም.አ ብሩኽስ ኬቤርስታውሳ አገው ፌሬስቴንካው ማቢሪዉሳስታ ትር 25/2016 ም.አ ኬቤርስታውሳ መርኮርዮሱሳ ባሎኪላ እምፕልታቕ ሴላምስ ፌካማ ኬቤርፅጝስ ካላንታ ሴላሞ ማንዲፃንትካ ቤንካስታ እምፕልታቕ ይሳማ ኬፄልጝ ቱስቴ::

ሴላሞ ማንዲፅጙ አላፍት ምንግስቱ ታምብ ይቪቻ ፄውስታማ ካንትስታው ሼውቲኪላ ክቺጝ ፋይፄ::

አጌራው ሴላም ማንዲስታታ ፄውጝስ ካሊስታው ፅሊዴስ ኽሳንቴኺስታ ውላ ይጋሪስ አሬባሬብጛማ እንፃኽስትጝስ አኽጝስ ሴላም ውላውሳጊ ቴሳትፎ ፋያዌኽ:: አድባባይዳ ኬቤርስታንኩ ባይልኩስታ አይማኖትኩ ባልካዋኪላ እዝብ ይዌኽ ናው እንኮኽስትስ ባል ሰላምስ ኬቤርስታታ ፄውጝ ቱስቴ:: እንሳ ሳኪትጝፅጝስኪላ ታፍስ ታፎ እምትጛ:: እምፕላ ሼውትጝ አባኪ እማኪ እፃቲው ይቢቻኽ::