ፅምቕቱ ባል

ዘውዴ በካሉ

ይቶፒያ ሚንችካ ባይልካስታ እሴትካ እንቲታኪ ታሪክኩ ማኼትካ አግስታንቲ አጌራኻ:: አይማኖትኩስታ ባይልኩ ባልካ ወጐስታ ባይሎ ሲፍካማ አደባባይዳኪ ያኻ ባል ኬቤርስትጝ ቱስታው ስፍሪዳ ኬቤርስቴ:: ባይልካኪላ ማኼትካዳ ሜዴብስታና:: አጌራኻዳ ኬቤርስታንኩ ባይልካ አሌሙ አችስ አቕስቴካማ ዳሴሴታንኩስታ ዳሴስታቲንኩ ማኼትካ እስትካማ ቤንስታና:: አሌሙ ማኼታኻዳ ዳስስታቲንኩ ማኼትካ እስትካማ ሜዴብስታንኩ ባልካ ክቻዴስ ፅምቕቱ ባል እምፕልያኽ::

ፅምቕቱ ባል አይማኖቱ ባል አኽጝዴስ ድምክና አለሙ ማኼቲው ሜዝጌብዳ ሜዜጌብስትካ:: ቴቤቤርጙንኩ ምንግስታትካው ክንቲው ሳይንሱስታ ባይሉ አችት (ዩኒስኮ) ቴሳስ 01 ጌርክ 2012 ም.አሜትዳ ኮሎምቢያ ማኺቴ ማንዲጙ ዙሪዳ ፄውስትኹ ኩፕትዳ ፅምቕቱ ባል ዳሴስታቲው ባይሉ ማኺቴ ያኻማ ሜዜጌብስትⶓ ሊሊትጙንኩ ፁፍኩ ንባርካ ካንትፃና::

ፅምቕቱ ባል ዳሴሴታቲው ማኺቲዳ ሜዜጌብስታታ ካሊፅኹ ዲብዴስ እምፕልስታ ቹዋ ፅምቕቱ ባል ኬቤርስቱስ እዝብካውሳ (እምፕልታቑሳ) እምፕልቶስታ ኪቢቢርጜ፣ ቲቢቢርጜ ካንትፃው አኽⶓኪላ ንባርካ ቶኬማና::

ሊሊትጙንኩ ፁፍኩ ንባርካ ካንትፃኑስታጊ አጌራኻዳ ሊሊትጙንኩ ዙራሙርካዳ ፅምቕቱ ባል ብሩኽ አኺኒስ ኬቤርስታንኩ ስፍርካ ዝኩና:: ምስሊታጊ ጐንዴርዳ አፄ ፋሲል ባንቢፂዳ፣ አክሱምዳ ንግስት ሳባው ባንቢፂዳ “ማይሹምዳ”፣ ላስታዳ ላሊበላው ባንብፂዳ፣ ሸዋዳ አፄ ዘርያዕቆቡ ፍርዶ እይፂ አደባባይዳ፣ ሲዚፅካ ሴዛ ታቡትካ ቻኑ ሽንኮረው ውታኺ “ረቡቴ ብንዳ” ስታ አዲስ አበባዳ ዴሜካ ጃንሆዩ ውታኺዳ ባል  ብሩኽ አኺኒስ ኬቤርስታኩ ስፍርካዴስ ልቓ አኽⶓ ሊሊትጙንኩ ፁፍካዴስ አግፁንኹ ንባር ቶኬሜ::

ፅምቕቱ ባል አይማኖቱ ባል አኽጝዴስ ድምክና አደባባይዳ ኬቤርስታው ባል አኽጝስ ባሎ ኬቤርፅጛ ባርኾቼዴስ አጌራኻሾ ይንታንኩ ጐቤናንትካዋ ጉስጝስ ቱሪስቱ ጉስፂ ያኻማ ሚፂው አሊ ያኻ::

ፅምቕቱ ባል ኬቤርስቱስ ክስታንቱሳ እምኔቶ ሲፋንትካ ውላጊ ጋያኪ ይቶፒያ ኦርቶዶክስ ብሽታና ኢየሱስ ክርስቶስ አዳም ይሪሱሳ ቤዴሎ ድፅጝስ (ዴምሴስጝስ) ሰማይዴስ ጌማማ ፄሜቕስትⶓ ታክስጝስ ባሎ ኬቤርፃና::

አሜት ቺፋ ትር አርፊዳ ትር 10 ጌርክስ ጄሜራማ ባሩ ባል ንጝስ ጌፄሩ ዙራሙሪዳኪ ፅምቕቱ ዋዚሚታዋ ክምሾስ ታቡት ብሽታንዴስ ፋማ ብንሾ ጌማማ ብን ስራዳ ቼ:: ኬቴምዳ ዴሜካ አኹ አኹኪ ብን ዲጊዳ አግስታውዳኪ ብንዳ አንዴስ ይጐኪ አቓ ግብሬ ዴዴኮ ቴርስካማ ፅምቕቱ ባል ኬቤርስታውሳ ስፍሬ ቴርስካማ አንጚዳ ታቡት ቼ:: አቕኪላ “ፅምቕትስ ያኻያሱ ክቢስ ታንኩ ታንኩ  ንጝስ” ንካማ ፅሊ ኽሳንቲ፤ ኹን ጝርጃ ፍቼ ሴይካማ ታቡቶ አጄብካማ ፅምቕቱሳ ባሎ ኬቤርፅጛ  ካሳና:: ኪሳኪሳው ዜሚ፣ ፅናፅሉ፣ ድንጋሪቲው ድምፅስ ብሩኽ አኺኒስ አጄብስታማ ዊዚሜ ማህሌትስስታ መዝሙርስ ኬቤርፅካማ ቻና:: ትር 11 ጌርክስ ፅምቕትታዋ ዴሜካ ክዳሲው ቴርት አሌድስታማ ኪሳኪሳ እዝቦ ጉሴካማጊ ፅምቕቱ ባርሾ ካሳና:: አንዴስኪ አኾ ቤሬክካማ ፆሌቶ ፄውካማ እዝቦ ፄሜቓና:: እዝብ ፄሜቕስታማ ድኻኒ አምናንትካ ታቡቶ እልልቲስ፣ ችብቻቡስ፣ መዝሙርስ አጄሜብካማ ብሽታንሾ ካፃና:: እን ፅምቕቱ ባል አይማኖቱስ እሚስ ዋትጛይ ኬቤርስቴ ናውሳ አዊ ብሄረሰቡ ቺፅጝፂዳ አገረ ስብኬት ሰንቤቱ ክንቲው ሜምሪው ቺፅጝፃንቲ ሊከ ትጉሃን ተስፋዬ አረጋ እምኔቱ ታብሊ አኽጝታጊ ፅምቕቱ ባል አይማኖቱሳስታ ባይሉሳ እሜ ሲፋማ ኬቤርስታው አኽⶓ ጌሌፅካ::

ፅምቕቱ ባል ኬቤርስቱስ ትር 10 ጌርክስ ጄሜራማ ኪሳኪሳው ዜሚስስታ ምስጋኒስ እዝብ ዴሜካ እልልቲስስታ ችብቻቡስ ታቡቶ አጄብካማ ኬቤርፃንኩ አኽⶓ ጌሌፅካ:: ፅምቕቱ ባል ኬቤርስታው ቹዋ ምክንያት አዳምስታ ሄዋን ድባን አዜዝኹስ ትዛዞስታ እጐ ሻርካማ፤ እፀበለሱሳ ካኔ ኹዬንኪ ንኹሳ ትዛዞ ሻርካማ ሲኦላ ጌማኒ፣ ድባን አዳምስታ ሄዋኖ ኬሽፅጝስ 5500 ዝቤንዴስ ፋሌንጋ ጄርጄራዴስ አንቓ ማሪያምዴስ ካሜንስታታ፣ ፄሜቕስታታ፣ ሴኬልስታታ ኬሽፃኻኽ ናማ ቱኹሳ ስራ ፄዋማ ፄሜቕስትኹ አኽⶓ ሊከትጉሃን ጌሌፅካ::

ድባን ካሜንስታማ 30 አሜቶስታ ሹኻ አርፌ ብቲዳ እንዜጛማ ክንትፁኒዴስ ፋሌንጋ 30 አሜቶ ዋኻኒ ዮርዳኖሱ ብንዳ ፄሜቕስትⶓ ጌሌፁንኩ ሊከ ትጉሃን ድባን ዮርዳኖሱ ብንዳ ፄሜቕስትኹ አላሚ ሰይታን አዳምስታ ሄዋን ኬርቲኒዴስ ፋሌንጋ አዳም ሳይታኑ አገልጋይ (ጋግሬኽ) ሄዋን ሰይታንቲ አገልጋያኽ ናውሳ ደብዳቤ እምፕሎኪ ዮርዳኖሱ ብንዳ፣ እምፕሎ ዴሜካ ሲኦልዳ አንኩርኽስ ደብዳቤ ድፅጝስ አኹኪ ዴምሴስጝስ ዮርዳኖሱ ብንዳ ፄሜቕስታማ አምላክ አኽጝስ ልኩስ እንቓሳማ ደብዳቤ ድፅⶓ እርዳትፅካ:: ሲኦልዳ እንኩርኹሳ ዴሜካ ስክሌትታዋ ሴኬልስታማ ሴኬልስታማ ሲኦላ ጌማማ ሲኦልዳ ዝኩኹሳ ድብዳቤ ድፅⶓኪላ ጌሌፅካ::

ፅምቕቱ ባልዳ ናካ አቕ ታቡቶ አጄብካማ ብንሾ ጌምካማ ባሎ ኬቤርፃኑ ዳር ስራ ፄዋማይ? ናውሳ ሊከ ትጉሃን እርዳትፃኒስ ድባን አምላክካው አምላክ፣ ንጉስካው ንጉስ፣ አሌሙ ፈታሪ ዝኩስኩስ አቒያስ  ናማ ጌማማ ዮሃንሱ ታፍስ ፄሜቕስትⶓ እንቲታኪ ዮርዳኖሱ ብንሾ ጌማማ ፄሜቕስትⶓ ታክስጝስ አኽⶓ ገሌፅካ::

ናካ ፅምቕቱ ባልዳ ዳር ምክንያታ ፄውጝሲ አኹስ ፄሜቕስታኑ? ናውሳኪላ አኹስ ድባን ፄሜቕስትኹ አኹ ውላጊ አቕ ክችክቺስ ቴኬምታኑ፣ ዋሺኒኪ ሳትስስታ ዋሺኒኪ ስፍሪዳ ዳርኪ ፍሻ ጋቲታ አግስታው አኽጝስ፣ ድኺኪ ያኻ አብታሚ፣ ስልታን ዌናኪ ያኻ ንጉስ እምፕልዳ እምፕል አይኔትስ ፄሜቕስታንታ አኽⶓ ዙሜካ:: እሊው ዴሜካ ፅምቕት ጛርጊስ አኹኪ ኹዋሺስ ያኹኒጊ  አብትዌናስታ ስልታንዌና ፄሜቕስታኒ አክማ ጋቲው ፄሜቕስታውላ ይጐቲታ አኽⶓኪላ ዲብስካ::

ፅምቕት አኹስ ያኹኽ ዴሜካ ዋሺኒኪ ዲብ ቑፅስታኒ ፃንኩታው አኹስ አኽጝስ አቕ እንፃኽስቱኑ ቤዴል ድሳው (ፃንኩታው) አኹስ አኽጝስያኽኪላ ንካ ሊከ ትጉሃን ተስፋዬ::

ፅምቕቱ ባል ኬቤርስቱስ ውላጊ ክስታንቱሳ እምኔቶ ሲፍንትካኪ ያኻ ባሎ ኬቤርፅጝስ ስፍሪዳ አግስታንኩ ዋሼንካኪ አቕ ባሎ ሰላምስ ኬቤርፅጝስ ውላጊ ሰላምስ ዜቦ ቲሬንታ ሊከ ትጉሃን እንፅኼንቶ ፌያፌይጝፅካ:: ውላጊ ክስታንቱስ እምኔቶ ሲፋንትካ ሰላምስ ኮራኮርስታንኩ፣ ሰላምስ ቲሪንኩ ንጝስ ካሊስታቲው አኽጝስ ፄትቲኩ  አይልካ  እዝብሊ አኽጝ እዝቡሳ ዴክቶስታ ሴላሞ ማንዳንታኪላ እንፅኼንቶ ፌያፌይጝፅካ::

እምኔትኩ ታብል አይማኖት ፌኬዳው ዳድስ እዝብስ ሴላሞ ሴቤክጝ፣ ሴላሞ ክንትፅጝስታ እምኔትኩ ታብል ሰላምስ ምስላ አኽጝስ ፅምቕቱ ባልኪ ያኻ ዋሺኒኪ ልቕልቕቲዳ ሰላም ቼሜትጛታ ታምቦጊ ፊትጝጝ ቱስታው አኽⶓኪላ እምትጝፅካማ ጌሌፅካ::