“አጌራዊ ኩስጝጚ አጌራው ሴላምስ”

ታደለ አጋጄ

አጌራዊ ኩስጝጚ ሊሊትጙንኩ ጊዝካስ ኬሴትስታንኩ ችግርካ ኽይጝስ ቱትጜ አቱንኩ ጉዳይካዳ ኩስጝጚ ፄውስታማ ቴግባርዳ እሼው ጋቻዋ ኽይጙ እምፕል ሴልያኽ::

ይቶፒያዳ አጌራዊ ኩስጜ ፄውጝስ ፋይፅኹ ቹዋ ዲብኪላ ሊሊትጙንኩ ዙራሙርካዳ ሊሊትጙንኩ ጊዝካስ ኬሴትስታንኩ ችግርካዋ  ኽይጝስ ታክስስታማኽ::

ጋቻ ኽይጙ ዳድካዴስ እምፕል ያኹኽ እን አጌራዊ ኩስጝጚ ፄውስታታ እዝቡ ዎኬልስታንትካው ኩስጚ ጝና ይቶፒያው አጌራዊ ኩስጝጚው ኮሚሽን አዋጁ ቼፍስ 1265/2014 ቲሪትጛ::

አጌራዊ ኩስጝጚዳ እምፕል ዎጌንካ ይቢችካ ኩስጝጛኑ ያኻውላስ አጀንድካዳ ሊሊትጙንኩ አሳብካ፣ ትክምካ፣ ፋይካስታ ሜብትካዳ ኩስጝጚ ፄዉስታዉ ያኹስ፤ እኒጛ አሳብካ ዎኬላንኩ ሊሊትጙንኩ እምፕልታቕኩ ቤንካ አሴቴፍጛኑ ሚንችካው ሜድሬኽያኻ::

አጌራዊ ኩስጝጚ ምሁራንካስታ ሊሊትጙንኩ እምፕልታቕኩ ቤንካዋ አሴቴፍጝፅጝስ ይጋሬ ኽይቴ ፋይጝስ ካሊፃውሳ ዳዶ ፋይጝስ ፄውስታውያኻ::

ኩስጝጚ ጊዛይ አጀንድካዳ ሊሊትጙኽ አሳቦ፣ ትክሞ፣ ፋዮስታ ሜብቶ ዎኬልጝስ ኩስጝጚ ፄውስቴ:: ህብረ ብሄራዊ እምፕልቶ ካንትፃው ዳድስ ውላ ዝኮ ናኑሳ አሳቦ ቲሪፒዚ ዙሪዳ ኩስጝጚስ ዲግሳና:: ሼውስ ዙሚትጝጝስ ፋይፃንኩ አጀንድካዳ ትኩትስ ኩስጝጚ ፄውስቴ:: እንስኪላ አጌራዳ ዊዳፊ ኽይቲ ያኽጝስ ካላንኩ አሳብካ አግስታና እስታማ ማንዲስቴ:: ውላጊ ይጋሪ ኽይቲስ አሬባሬብጜ ፄዋና እስታማኪላ ማንዲስቴ::

ይቶፒያው አጌራዊ ኩስጝጚው ኮሚሽን ጎሌሌስቱንኩ 11 አባልካዋ እሚኹያኽ:: ይቶፒያው ኩስጝጚው ኮሚሽኑ ቹዋ ኮሚሽነር መስፍን አርአያ ፌይኹ ጊዝዳ እዩኑ ጊሊፂዳ አዋጅስ ቲሪትጙኽስታ ይቶፒያንካ እዝብካ ካስጝፃኑ አጌራዊ ኩስጝጚዉ ጉዳይ ኩክሪዴስ ጃላሾ ውላ አሴቴፍጝፃው ዳድስ አጌራዌ ቱትጜ ውና ያኻታ ፄውስታዋያኽ ንካ::

አጌራዊ ኩስጝጚ ሰላም ሴፌናታ ፄውጝስ፣ ጋቻዋ ድፅጝስ፣ ፖለቲካውሳ ካይጝጜ አሬኽፅጝስ ኽሳንቲ ትክም ዝኩኽያኽ:: ጋያኪ አጌራዳ ጌቴምኹሳ ሊሊትቶ ኔኬትጝስ ጛስጛው ቱትጜ አግጝስ ፄውስታው እስታማኪላ ጋሚስቴ::

አጌራዊ ጉዳይካስ ምሁራንካ፣ ዎታትካ፣ ፖለቲካኩ ፓርትካስታ ሊሊትጙንኩ እምፕልታቕኩ ቤንካ አጌራዊ እምፕልትስ ቱስታውሳጊ እሜንታ ፄውጝ ፋይፄ:: እንስኪላ ዊዳፌ ሰላሞ ቼሜትጝፅጝስስታ ፅንፌንቶ ድፅጝስ እምፕል ኽይቲታ ካፅስቴ::

“አጌራዊ ኩስጝጚ ዴስስትኹስታጊ ምሁራንካው ኩስጝጚ ይቢቺ ያኺትየስ ኩክሪኒ እምፕልታቕዴስ ጄሜራማ ውላዋ አሴቴፍጝፃውስታ ሊሊትጙኽ አሳብ ዲጋማ ኩስጝጚ ፄውስታው፣ ግልፅስስታ ካሲስታንቲ ዳድስ ጉስስታዊያኽ” ናኒስ ጌሌፁንኩ ኮሚሽነር ኩስጝጚስ ያኻው አሳብኪላ ውላአቡቕ ኽይቴ አግጝስ ካሊፃው አኽⶓ ጌሌፅካ::

ይቶፒያው ኩስጝጚው ካስት ካሴኩ ቹዋ ጉዳይካ ክቻዴስ አጀንዴ ኩፕፅጝ እምፕሊያኽ:: አጀንዴ ኩፕፅጙ ካስትዳ እምፕልታቕ ኩታ ያኻ ኩታ ጋቲው ዳድስ አሴቴፍጛንትካ ያኻና:: እን ካስት እምፕልታቕ ያኻ ታምብዌን አካልካ “አሳቦ እንኮኽፃያና” ናንኩሳ ጎሌልጝስ፣ ክልልካስ፣ ኬቴሙ ቺፅጝፂስ፣ ፊዴራልስስታ ዲያስፖራው እምፕልታቕስ አችቺፋ አጀንዴ ኩፕፅጙ ካስትዳ ዎኬልስትጝስ አሴቴፍጛንትካ ያኻና::

አጌራዊ ኩስጝጚ እምፕልታቕስታ ሊሊትጙንኩ ታምብዌን አካልካ አሳቦ ኔፃስ ጌሌፅጝስ እምፕል እሊኩሱሳ ችግሮ ኽስኹስ አቕጝስ ይጋሪ ችግርካስ ይጋሪ ኽይቴ ፋይጝስ ፄውስታው ኩስጝጚ አኽጝታጊ አጌርታ ቱትጜ አቱንኩ ቹዋ ጉዳይካ ጎሌልጝስ ጁፂ ምክኒያቶ ፍሽጝስስታ ውንስ ዙሚትጝጝስ ይጋሪ ቱትጝጜ ፌቴርጝስ ፄውስታው ዳድያኽ::

“አጌራዊ ኩስጝጜ  ፄዌካማ ሳኪትጝፁንኩ ሚንችካ አጌርካ ዝኩና:: እሊውሾስ ዴሜካ አጌራዊ ኩስጝጜ ካስጝፅካማ ሳኪትጝፅካያስኩ አጌርካኪላ ዝኩና::

አጌራዊ ኩስጝጚውሳ ካስቶ ፌዩንኩ አጌርካ እን ካስትዳ ሊሊትጙንኩ ዋይምካስታ ጉድካ ድልካዋ አግፄካ::

አጌራዊ ኩስጝጜ ፄውስታው አኺኒ አጌርዴስ አጌሮ ሊሊትጛው ያኹኒላ ሊሊትጙንኩ አጌርካስ ኩቲስታ ኩታ ጋቲዉ ዋይሚ ካንትስትⶓ ሊሊትጙንኩ ሴኔድካ ካንትፃና::

አጌራዊ ኩስጝጚው ካስታኻዳ አግስቱንኩ ዋይምካ ክቻዴስ ዲሞክራሲው ባይል ሌጌስጝ፣ አጌራዊ ኩስጝጚዴስ አቕቶስታ ዴሶ ክንትጝስታ ዙሚትጚውሳ ባይሎ ሌጌፅጝ ቶኬምስታና::

አጌራዊ ኩስጝጚውሳ ካስቶ ፌዩንኩ አጌርካው ዴስ ካንትፃውስታጊ ሊሊትጙንኩ አጌርካ እጋ-ምንግስቶ ሻሪጝስ ስካዌ እጋ ምንግስቶ ቲሪትጝፅካ:: ጎሌልስቱንኩ ቱንዝካዳኪላ ኬሽጝጜ ፄዌካ::

ማቤርአቕዳ ጁዋንኩ ማይቤራዊስታ ኢኮኖሚዊ ጉዳይካው ችግርካስ ኩስጝጚ ፄውስታማ ኬሻንቲ ዋይሚ ሜዜጌብስታ::

ክርፂ ቺፅጝፂው፣ ክንቲው፣ ቲኑ፣ ኢኮኖሚው ቴኬምስታንትሊስታ እሊኩሊ እምትጙንኩ ችግርካስ ጉድ ዋይሚ ካንትስታ::

ይቶፒያው ኩስጝጚው ኮሚሽኑ ኮሚሽነር ፕሮፌሰር መስፍን አርአያ ፌዩንካ አርፍካዳ ይቶፒያው ፕሬስ አችትስ ጌሌፁኑውስታ ሚንችካ አጌርካ ኩስጝጜ ካስጝፄካ፤ እኖጂሱ ዴሜካ ሊሊትታዊያኽ ንካ:: ሚንችካ አጌርካ ካስጝፁኑ ኩስጝጚ እሊኩ አጌርካ ትልካ ቱጝስ ሳኪትጛቲታ ፄውⶓ ቶኬምካ::

ይቶፒያው አጌራዊ ኩስጝጚ እሊኩ አጌርካው ዴስዴስ ሊሊትታዊያኽ ኑንኩ ፕሮፌሰር መስፍን ላንቡሳኺስታ ዝኩኹ እሊኩ አጌርካው ቴሞክሩ ካንትፃዉ አጀንዲ ምንግስትስ አኹኪ እሊው አካል ኬሬፅስታው አኽⶓ ቶኬምካ::

ይቶፒያው አችስ ዴሜካ አጀንዲ ይንታው እምፕልታቕዴስ አኽጝስ ሊሊታ ፄዋው አኽⶓ ጌሌፅካ::

ፕሮፌሰር መስፍን አጌራዉ ኩስጝጚ ሳኪትጛታ ውላ አካልካውሳ ቴሳትፎ ካሴው አኽⶓ ዙሜካ::

ይቶፒያ ናካ ዝኩኹ ችግርዴስ ፊጝስኪ ያኻ ዊዳፊ ሰላሞ ቼሜትጝፅጝስ ችግርካዋ ኽይጝ ዝኮ:: ምሁራንካ፣ ፖለቲካኩ ፓርትካ፣ አይማኖትኩ ታብልስታ ሚንች ታምትጝፅካ ውንዳ ሜሴሬትስትካማ አጌራስ ይስካማ እንፃኽስትጝ ማንዲስቴ::

እምፕልታቕ አጉዊዴስ ኩክሬኺስታ ልቕልቕቴ ፄውጝስ ካሌቕትዳ ማሴሬትስትኹ ኩስጝጚ ፄውጝ ቱስቴ::

አጌራው ሰላም ቼሜትጛታስታ ኩስጝጚው ካስት ሳኪትጙኽ ያኻታ አጌራዊ ኩስጝጚ ኮሚሽን ቴግባርዳ እሼታ ፄውጝ ዝኮ::

ይቶፒያንካ ኩስጝጚስ ዊፃንትካ ያኼካማ ፊጝስ ሳኪትጙኽ ዳድስ አኮሜችስታታ ውላጊ ታምቦ ፊትጝጝ ቱስቴ::

ይቶፒያው ሰላምስታ ዴክት ማንዲስታታ አይማኖትኩ ታብል፣ አጌር ሹማጌልካ፣ ዎታትካስታ ኹናኹን አሬባሬብጜ ፄውጝ ማንዲስቴ:: እንስኪላ ሊሊትጙኽ ይቶፒያው ቤንዳ ካንትስታው ጋቻ ቲሬማ ዊዳፊ ሴላሞ ቼሜትጛታ ትይቱሳ ድምፆ እንኮኻቲኑሳ ጊዞ  ማንዲትጜካማ አግስታና::

ንባሮ፡- አጌራዊ ኩስጝጚው ኮሚሽኑ ማይቤራዊው ታምትጝፂው ፍንዴስስታ ሊሊትጙንኩ ንባርኩ አግፅካዴስ ቴኬምስትና::