አክሊሉ የኔው
34ንቲ አፍሪካውሳ ዋንቼ ምራብ አፍሪካት አጌራ ኮትዲቮር 40 አሜትዴስ ፋሌንጋ ላጛንቲ ጊዝስ ቴርስቱስ ልኺትጚኪላ ትር 4 ጌርክ 2016 ም.አ ይፋስ ጄሜርስታ:: እንጚ ልኺትጚዳ 24 አፍሪካኩ አጌርካ ዋልታ ኬችስ ቤንስቴካማ እምፕል ኬችዳ ሴዛ ያኼካማ እንክሬ አኮሜችካማጊ አግስታና::
ኮትዲቮር እንጚስኪላ 1 ትኪሚ 5 ቢሊዮን ዶላርዴስ ጃላ ያኻውሳ ፍሼ ፍሽታ:: እንክርካዋ ሌንጌድፅጝ ትክላሊስ ዋልታ ስቲዲዬሞስታ 24 /ትሬኒግ/ እንክሪው ቤዴራ ቴርት አኮሜችስታውሳ ስታዲዬሞ አንኩዋ ሊሊትጙንኩ ኬቴምካዳ ቴርስታ::
ኮቲዲቨር ልኩ ኩታው ልማትስ ዋሳላካስ ትኩቶ እይታታ እንፃኽስቲት አኽⶓ ማልጛ ጌሬምፃው አኺኒስ ብስፂው ቴርትዳ አሌምስ ካንትፄ::
አፍሪካዊያንካው ኽሳንቲ ልኩ ኩታው ሜድሬኽ ጊዝዴስ ጊዝሾ ሌጌሳማጊስታ ኬሽጝጛማጊ ይንትⶓ ሊሊትጙኽ ማቤራዊ ታምትጝፂስ ጌሌፅስታማጊ አግስቴ:: አፍሪካዉ ልኩ ኩታው ቺፅጝፃንቲ ካፍ /CAF/ እንጚ ሜንድሬኽ ኬሽኹ ፋንቲቲሾ ካይጝፅጝስ ፅሬቶ ፄዋማጊ አኽⶓ ካፍ ኦንላይኑ ንቫር ምልኻታ::
አፍሪካውሳ ዋንቼ አባላምቲ ጊዝስ ቲሪትጝፁንኩ አጌርካ ይቶፒያ፣ ሱዳንስታ ግብፅ ያኻኒስ፣ አቫላምቴ ልኺትጜኪላ ይቶፒያ ብሄራዊ ኬችስታ ግብፅ ብሄራዊ ኬች ዋንቺስ ታምብካማ እንክሬኪላ ግብፅ ሴዛ ናኺሲ ያኹኽ ዋይሚስ ዊፄታ ቻምፒዮን አኽጝስ ካሌ::
ያኼስጉ ሹኺኒ አፍሪካውሳ ዋንቼ ቴርስቱት ይቶፒያ ላጛንቲ አፍሪካው ዋንቺ ልኺትጚዳ ምስሊስ ግብፅ ብሄራዊ ኬችሊ ዋንቺስ ታምብካማ፣ ይቶፒያ ብሄራዊ ኬች 3፡2 ያኹኽ ዋይሚስ ዊፃማ አቫላምቲ ጊዝስ አፍሪካውዳ ሜድሬኽዳኪላ ኔጌስታሽቲኾ::
አፍሪካውሳ ዋንቼ ጉሹንኩ አጌርካ ትክላሊስ 14 ያኻኒስ፣ ግብፅ ላጚቲኒ፣ ካሜሩን አንኩዊኒ፣ ጋና ሲዚኒ፣ ናይጀሪያ ሹኺኒ፣ እንጚታኪ ኮትዲቮር፣ አልጄሪያስታ ዲሞክራቲክ ኮንጐ ላጚኒ አፍሪካውሳ ዋንቼ ሳኪትጝፄካ:: ይጉንኩ እሊኩ አጌርካ እምፕላኒ ይቪቺ ዋንቼ ጉሽካ::
ግብፅ ብሄራዊ ኬች አፍሪካው ዋንቺ ልኺትጚው ታሪክዳ ሚንች ዲብስ ቢዲሪ ያኹስ ላጚቲኒ ዋንቼ ጉሽጝዴስ ድምክና፣ 10ኒ አሊዲ ዋንቺስ ታምቡስ 26ኒ ልኺትጚዳ አሴቴፍጝታ:: እንዴስ ድምክናኪላ 107 እንክሬ አፍሪካው ሜድሬኽዳ አኮሜችታ:: ንጙዊኔ ልኺትጜ ዴሜካውላስ እኒጛ እንክርካዋ ካስጝፃኒስ 60 እንክርካዋ ዊፄታ 168 ጎልካ ይኺሊ ታምትጝፄ:: ግብፅ ብሄራዊ ኬች አፍሪካውሳ ዋንቼ ቴርስጝስኪላ ቤዴራ ታኹስ አንኩዊኒ ቴርስጝስ ካሌ::
ንጙዊኒ አፍሪካውሳ ዋንቼ ዊፃንታ ያኻው አጌርስስታ ኪንዲ አሊዴ ታምባንኩ ብሄራዊ ኬችካስ እይስታው ሽልማቲስታ ይስጝፂ ጌንዜብ ፌይኹ ካሜሩን ቴርስትኹ አፍሪካው ዋንቺሊ ልኺትጛኒ 40 ታፋ ድምክኒ ዝኩኽ ያኹስ ዊፃንቲ ኬች ላጜታ /7/ ሚሊዮን አሜሪካ ዶላር ሽልማቴ አግፄ:: ላጛንቴ አቾ እሜማ አሌዳው ሴዛ /4/ ሚሊዮን ዶላሮ፣ ሹኻንቴ አቾ እሜማ አሌዳው 2 ትኩሚ 5 ሚሊዮንስታ ሴዛንቴ አቾ እሜማ አሌዳው ብሄራዊ ኬችስ 1 ትኩሚ 3 ሚሊዮን አሜሪካ ዶላር ሽልማቲ እይስታውስታ አፍሪካ ኒውስ ዜጌባ::