ክልሉ ኩስጚው ሜድሬኽ ውላቱዌ ሰላሞ ቼሜትጝፄይ ኻሲ?

ሰለሞን ስንታየሁ

አማኻሪ ክልልዳ 15 ኬቴምካዳ እዝባዊ ኩስጚው ሜድሬኽ ካስጙኻ።

አማኻሪ ክልልዳ አጌር አቡቑ አችስ “ህብረ ብሄራዊ ላጛሴንት ዊዳፊው ሰላምስታ ውላ ቱዊ ልግስኒስ” ናው ቹዋ እንፅኼንተትስ ኩስጚው ሜድሬኽካ 15 ኬቴምካዳ ካስጙኻ።

ሜድሬኽዳ ክልላዊስታ አጌራዊ ወክታዊ ጉዳይካዳ ትኩቶ ፄውኹ ኩስጚ ሊሊትጙንኩ እምፕልታቑ ቤንካዴስ ፊትጙንኩ ዎኬልስታንትካሊ እሳንስታ ኻልት ዝኩኹ ኩስጚ ካስጛ።

ክልሉ ሊሊትጙንኩ ዙራሙርካዳ ኬሴትስትኹሳ ጋቻዋ ቲሪፅጝስስታ ዊዳፊውሳ ሰላሞ ቼሜትጝፅጝስ፤ይጋሪ አጌራዊ ችግርካስ ኽይቴ እንኩርጝስስታ እዝባዌ እምፕልቶ ፌቴርጝስ ሜድሬኽ ኽሳንቴ አክሞ ፌቴራው አኽጝ ጌሌፅስታ።

ሜድሬኽዳ አማኻሪ ብሄራዊ ክልላዊ ምንግስቱ ሊሊትጙንኩ አችዳ አግስታንኩ፣ፌድራሉ ምንግስቱስታ እሊኩ ክልልካው ምንግስቱ  ቺፅጝፂ ጛርካ እንቲታኪ ኬፍቴንካ አመራርካ ጉሴካ።

እንጃቢሪ ኬቴምዳኪላ እዝባዊ ኩስጚ ካስጙኹ ያኹስ ኬፍቴንካ ፌድራሉስታ ክልሉ ምንግስቱ እንፅኺው አላፍካ አግስቴካ።

ብልፅግኒ ፓርቲው እንፅኼ ፌፄምፃንቲ አባልስታ ቤንሻንጉል ጉምዝ ክልሉ ቺፅጝፂ ጛራ አሻድሊ ሃሰን፣አማኻሪ ክልሉ ትክትሊ ቺፅጝፂ ጛራሱ ማይሬግስ ማይቤራዊ ዜርፉ ቴቤቤርጝፃንታስታ ክንቲው ቢሩ አላፋ ሙሉነሽ ደሴ(ዶ.ር)፣አዲስ አበባ ኬቴሙ ቺፅጝፂው ብልፅግኒ ፓርቲው ቻፊው ፅፌት ጝናሱ አላፊ አቶ ሞገስ ባልቻ፣አቶ ተስፋሁን ተሰማ አማኻሪ ክልሉ ወታትካው ሊጉ ኩስጝፃንቲ፣ አዊ ብሄረሰቡ ቺፅጝፂው ምንግስቱ እንፅኺኩ አላፍካ፣ ሙራንካ፣ወረዳ ቺፋ እዝቦ ዎኬሉንኩ አጌር ሹሜጌል፣አይማኖቱ ታብል፣ወታትካ፣ኹንስታ እሊኩ እቑዊ ፄውስታይኩ ሌንጌድ አግስቴካ።

ኩስጚው ሜድሬኽዳ ዙሚትጜ ፄውንኩ  አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው “አዊ ብሄረሰቡ ቺፅጝፂው እዝብ ሰላሞ ማልጜ ፋያው አኽጝስ ኩስጚ ፋይፃንቲኽ።ሰላም ውላ ልማቱስታ አኮኖሚው ልቕልቕቲስ ፋይፃንቲኽ” ኑኑ አቶ ቴዎድሮስ እንዳለው።

ክልልታ ኩስጚ ፄውስትጝ እዝባዌ እምፕልቶ ይስጝፅጝስታ ካንቲዳ ዝኩኽሳ ሊሊትቶ እምፕልስጝስ ኬፍቲኒ ታምብ ዝኩኽያኽ ንካ።

ብልፅግኒ ፓርቲው እንፅኼ ፌፄምፃንቲ አባልስታ ቤንሻንጉል ጉምዝ ክልሉ ቺፅጝፂ ጛራ አሻድሊ ሃሰንኪላ ኩስጚዳ አግስቱንኩ አካልካስ ኩስጚስ ያኻውሳ ሴኔዶ ዲግስካ።

ሴኔድዳኪላ ጉሹኑ አጌርታ ሰላሞ ቼሜትጝፅጝስ ብልፅግኒ ፓርቲ እዝቦ እምፕልሳንኩ ኩስጚው ሜድሬኽካ ክልል ቺፋ ፄውስታታ ዳብዜ እንኩሩኹ ስሬትስ አማኻሪ ክልልዳ ውላ እንፅኼ ፌፄምፃንትካ  ኩስጝፃንታ ፄውስታኽ ንካ።

እንዴስ ድምክና አጌርታኪ ያኻ ክልልታ ፌቴርስትኹ ሰሜኑ ዎሬም፣ክልልታ ፅንፌንካ አይልካ ፌቴሩኑ ፄትቲው ችግር፣ሊሊቲ አይልካዋ ዙርፃማ ቲሪትጝፅⶓ ችግርታ ጉሽጝስ ፄትቲውሳ ችግሮ ፌቴርጝ፣ማዳባሬ ዲግስጚዳ ፌቴርስትኹ ችግር፣አማኻሪ ክልሉ እዝብ እሊኩ ዙራሙርካዴስ ፌኔኬልጚው ችግርካ ቹዋስ አጌርታስታ ክልልታ ጆንኩ ችግርካ አኽⶓ አቶ አሻድሊ ሃሰን ጉሽካ።

ፅንፌንቱሳ ችግሮ ቡንክትጝⶓ አቲጝ ፖለቲኬንካስ ካንሰሬኽ ኑንኩ አቶ አሻድሊን ፅንፌንት አዊ ዞንስኪ ያኻ ክልሉ ውላ ቱዊ ልቕልቕቲስ ፅንጋኺ አኽጝስ ትኩቶ እይናና ቡንክትጝጝ ፋይፃንቴኽ ንካ።

ፅንፌንካ አይልካ ፌቴራንኩ ችግርካ ሚንችካ አኽⶓ ዝርዝርስ ጉሹንኩ አቶ አሻድሊ፤ፓላቲካውስታ ኢኮኖሚው ዜርፍዳ፣ኽሳንትካ ልማቱ ፕሮጀክትካ ቲሬንታ ፄውጝ ፣ትራንስፖርቱ ልቕልቕቲ ቲሬታ ፣ቲኑስታ ክንቲኩ ኾትካ አግልግሎቴ እያቲንታ ፄውጝ፣ካላካልጚው ሰራዊቲዳ ፌፄምስትኹ ስሞ ድፅጙ ችግር፣ፄትቲው አካልካዳስታ ጝን አቕዳ ሊሊትጙንኩ አንኮሊዳ ፌቴርጝ እሳንስ ካንትስታንኩ ችግርካኽ ንካ።

ፅንፌንካ አይልካ እዝብኩ ካስካ ዙርሜ አግፃቲንታ ፅንጋኽ ያኼካ፡፡ ያኼስጉ እኒ አይልካዋ ካላካልጝጝስ ክልልዳ እምቢት ንኹ ጊዙ አዋጅ አዌጅስታታ ፄውጝስ ሚንችካ ዙራሙርካ ኔፃዋ ፋንታ ፄውስታኽ ንካ። እንስኪላ ካላካልጚው ሰራዊቲስታ ፄትቲው አካልካ ሜስዋቴ ኬይጝስ ሰላም ይንታታ ፄውስታኽ ኑኑ።

ሜድሬኹ አሴቴፍጛንትካ አዊውሳ እዝቦ እሊኩ ጚፂሪሊ ጌውስጝፅጝስ ፄውስታው ፅሬት ፣ አዊ ብሄረሰብስ ሜዴብስታው ባጀት እንፂጚ፣አዊው ቺፅጝፂውሳ ዙራሙሬ ኬርትኹሳ ካርቴ እንፃኽስትጝ  ፣ብቴ ኪሚጝስ ፅሬቶ ፄውጝ፣ሚንችካ ዙራሙርካ ዜሬፍስታታ ፄውጝ፣እዝብስ ናንኩስታ ዳዴኾ ቡንክትጛንኩ አመራርካ ስልታንዴስ ጌማንታ ፄውስትጝ ፣እዝቡሳ ድምፆ ቹኒትፅጝስ ካሊፃው ሚዲያ ፌኬድስታያ፣ክልል ያኽጙ ካሲ ዙርሜ አግፃያ ፣ዜሮ ድፅጙ ፅካት አዊዳ ፌፄምስታ፣ዞንዳ አመራርስታ እዝብ ዳዴኽዳ አሴሜርጜካ፣አዊው እዝብ ውላዋ አቡቓንቲ ያኽስጉ እሳ እሴቶ ድፃውሳ ቴግባሮ ዞንታ ፌፄምካማጊ አኽጝስ  ክቺጝ ቱስቴ ንካ፡፡ሊሊትጙንኩ ስርኩ ልማትካው ቲሪጝስታ ኬውጚ ክንቲ ጝንካዳ፣ሜፃፍካ ታምባኑላ ይጉጝ፣አስፓልቱ ካሲ፣አኾቲ ልማቱ ፕሮጀክትካው ካሲ፣ ሜብራቱ ሰብስቴሽን እላ አኽጝስታ እሊኩ ካስካጊ እሳንስ ጁዌካ።

ጁንኩ ካስካስ ዙርሜስታ ኽይትጝፄ እዩንኩ አማኻሪ ክልሉ ትክትሊ ቺፅጝፂ ጛራሱ ማይሬግስ ማይቤራዊ ክላስተር ዜርፉ ቴቤቤርጝፃንታስታ ክንቲው ቢሩ አላፋ ሙሉነሽ ደሴ(ዶ.ር) አመራሮ ቲኩጙ እንፅኺ እዝቡ ካስካ ዙርሜ አግፃኑ ዳድስ ፄውስትኹ አኽⶓ ዙሜካ።

ሜፃፍዳ ፉኹሳ ካርቶ ካንትኹስ ዶክተር ሙሉነሽ ደሴ ኽይትጝፄ እይካ።ሜፃፍ አቴምስትኹ ዩንቨርስቲው ሙራንካ አኽጝስ ቴርትኹ ካስት ዳማጚ ናውሳ፣ዋታኻኒ እንስታ ያኹኽ፣ክችክቺማ ጋቲዊ ናውሳ፣ክልሉ ምንግስትኪያኻ ክንቲው ቢሩ ፅናት ፄውስታማጊኽ ንካ።ፍንሾስ እን ካሲ ጋቻው ምክኒያቲ ያኻውላስ ቱስታውሳ ዙርሜ አግፃታ ፅናቶ ስራ ፄውኹ ዳድስ እንፅኽካ አኮሜችስታንኩኽ ንካ።

ሜድሬኾ ጉሳንትካ ክቻዴስ አዲስ አበባ ኬቴሙ ቺፅጝፂው ብልፅግኒ ፓርቲው ቻፊው ፅፌት ጝናሱ አላፊ አቶ ሞገስ ባልቻ፤ናካ ኬሴትስታንኩ ችግርካ ብልፅግኒ ፓርቲ ያጉኽ ችግር ፄውትካማ ካፅጝ ቱስታላኬኽ፤እጂንኩስታ ሴጙንኩ ካስካ ሺንኪስትካማ ፌቴሩኑ ችግርካ አኽⶓ ዙሜካ።ፖላቲካው አኺኒ አቤሌሽስትጝ ሚንችካ ችግርካዋ ኻሳማ ይንቴ ኑንኩ አቶ ሞገስ ፅንፌንት ድኪ እዝቦ ድፃው አኽጝታጊ ቼሜትጝፅናና አርግናማ ኩስጝጝ ፋይፄኽ ንካ።

ውላ ይቶፕያንካዋ እምፕልዳ ኩፕፃው ትርክት አኹኪ ታሪክ ፋይፃንቲ አኽⶓ ሼው ንጝስስታ አርግንጝስ  አኽጝ ቱስቴ ኑንኩ አቶ ሞገስ እዝብ ካሴኩ ስርኩ ልማትካዋ ዋኽትጝፅጝስ ዴሜካ ሰላም ፋይፃንቲ አኽጝስ ፅንፌንቱሳ ልቕልቕቴ  ቡንክትጝጝ ዝኮ ንካ።

ሜድሬኽዳ ጁንኩ ካስካስ ቲክሊልፄ ዙርሜስታ ኽይትጝፄ እዩንኩ ብልፅግኒ ፓርቲው እንፅኼ ፌፄምፃንቲ አባልስታ ቤንሻንጉል ጉምዝ ክልሉ ቺፅጝፂ ጛራ አቶ አሻድሊ ሃሰን ፤እዝቡ ካስካ ክልሉ ምንግስትስታ ፌድራሉ ምንግስትስ ሌኬምስትካማ እይስትካማ ኽይቲ እይስታታ ፄውስታዌኽ ንካ።እዝቡ ሰላም አዌክስታታ ፅንፌንካ አይልካ ዋሺኒኪ ክልልዳስታ ዞንዳ ድሳላኬኽ እን አኽጝስ ፅንፌንካውሳ እንፅኼንቶ ቡጝ ኩፂ እዝብካዴስ ማንዲስታላኬኽ ንካ።

“ሚንችካ ክልሉ ዙራሙርካዳ ፌቴርስትኹ ችግር አዊው እዝቡ ቴቤቤርጚስ ቺፅጝፂዳ ታምባቲታ ፄውቱኹ አኽጝስ እንሳ ይስፂካማ ሲፍጝ ቱስቴኽ” ንካ አቶ አሻድሊን ሃሰን።

እዝብዳ ሚንችካ ካስካ ጋያኪላ ኮንኪሊ፣ስሩ ልማትካሊ፣ድንቤርሊ እምትጙኹስ ጁዋንኩ ካስካ ዝኩጝስ ካላና ኑንኩ አቶ አሻድሊ ጊዝስ፣ ፅናትስስታእክድስ እምስትካማ ዙርሜ አግፃንታ ፄውስታው አኽⶓ ሼው ንጝ ፋይፄ ንካ።

ስልታን አግስታው እዝቡ ጉላሊው ውሳኒሴኽ ኑንኩ አቶ አሻድሊን ሃሰን ዋሺኒኪ ፅንፊኒ አይልካ ሰላሙሳ ጉላሌ ፋያቲንኩስታ ሰላምሾ ዙራቲንኩ ያኹኒጊ ይስጙኹሳ እርምጄ ካፅጙ እንፅኺ ይሳማ ሲፋው አኽⶓ ትኩቶ እይካማ ቶኬምካ።

ሜድሬኽ አጌራዊ ያኹስ ብልፅግኒው ፓርቲ ማይኬላዊ ኮሚቴ ኩስጛማ እንኩሩክ ዳብዝካው ስሬታ ፄውጝስ ዊዳፊውሳ ሰላሞስታ እምፕልቶ ይስጝፅጝስ አላሜ ፄውኹ ኩስጚ ያኹስ ውላጊ ሜድሬኽካዳ ቱትጜስታ አምንጜ ፌቴርጝስ አሌድስትⶓ ክልሉ ምንግስት አቕፃ።