84ንቲ አገው ፌርስቴንካው ማቢሪ ብሩኹ ዳድስ ኬቤርስትኾ

ታደለ አጋጄ

84ንቲ አገው ፌርስቴንካው ማቢሪ ሊሊትጙንኩ ቴርትካስ እንጃቢሪ ኬቴምዳ ኬቤርስታ::

“ሰላሙ አርቤንት ላጛ ሴንትስ” ናው ቹዋ እንፅኼንትስ  ክልልኩ ኬፍቴንካ እንፅኺኩ አላፍካ አግስቱኑዳ ብሩኹ አኺኒስ ኬቤርስታ::

ባሉ ቴርትዳ ዙሚትጜ ፄውንኩ አዊ ብሄረሰቡ ቺፅጝፂው  ቹዋ ቺፅጝፃንቲ አቶ ቴዎድሮስ እንዳላው 84ንቲ አገው ፌሬስቴንካው ባልስ እንኳን ታምፁናስ እንፅኼንቶ ፌያፌይጝፄካ::

ፌሬስቴኑ ማቢሪ ንጝ አዊው እዝብዳ ልማትስ፣ ጌውስጙኽስ አሬክጝፅጝስ፣ ኪዳማ አሜሬትጝስ፣ ችግሩ ወክትስ ዜሜችጝስ እቺትጙኽስ ታምትጝፅጝስ፣ ሰላሙ ጉዝማ ዴሜካ አሜሬትጝስ ኽሳንቲስታ ታሪክ ዌና ማቢሪያኽ ኑንኩ አቶ ቴዎድሮስ አገው ፌሬስቴኑ ማቢሪው ልግስኒ እኒጚዴስ ጃላኽ፤ ኽታዊኒ ጊዝዴስ ጄሜራማ ፖላቲካው፣ ኢኮኖሚውዳስታ ማይቤራዊ ልግስኒዳ አጌሩ አችስ ይጉፃውላ ቴኬምስትናናጊ አጌራ ምንግስቱ ግንባቲዳ ጝሺ ታምንኹ ክምንትስ እንጛርትጛሱሳ ታምቦ ፊትጙኽ አኽⶓ ካንትፃው ማቢሪ አኽⶓ ጌሌፅካ::

አዊው እዝብ ሰላሞ እንካናው፣ ኹፃ ዝቕፃንቲ፣ እንፃኽስታንቲ ፣ አቖ ኬቤርፃንቲስታ አሴቴዌላው እዝብያኽ ኑንኩ አቶ ቴዎድሮ ፌሬስቴኑሳ ባሎ ኬቤርፅኑስ አማኻሪ ክልልዳ ሚንች ዙራሙርካዳ ፌቴርስትኹሳ ጋቻዋ ጌውጝስ ሰላሞ አግጝስ እንፃኽስትናናጊያኽ ንካ::

“ጊዊስታ ዎሬም አዋኪላ ቴኬማላኽ:: እምፕል አጌርዳ ዝኩንኻ እዝብካስ ኩስጝጚጉ ፍሽጝፃው ጊዊስታ ዎሬም ዋሺኔኪ ካሴ ኽያላኽ” ንካ ቹዋ ቺፅጝፃንቲ አቶ ቴዎድሮስ::

ቱስታ ጋቲታ አቒው ይዎት ድሳቲታ፣ ብሬ ዙርፅጝ እሳንጛቲታ፣ ጊዊስታ ጋቻ ሰላምስስታ ኩስጚስ ኽይስታታ ፄውጝ ፋይፃው አኽⶓ ዙሙንኩ አቶ ቴዎድሮስ ዙራሙሪዳ እሺኹሳ ሴላሞ ቼሜትጝፅጝስ ፅንፌንካዋ ካላካልጝጝ ማንዲስታው አኽⶓ ዙሜካ::

ንጙዊኔ 84ንቲ ጊዝስ ኬቤርፅኑስ “ሰላሙ አርቤንት ላጛሴንትስ” ቹዋ እንፅኼንትስ  ኬቤርፅናዉ ቹዋ ምክንያት እንጚስያኽ   ንካ::

አዊ ብሄረሰቡ ቺፅጝፂዳ እንዳርማኪ እምፕልታቑሳ ሴላሞ አዌካው ዲብ ኬሴትስታቲታ እኑስ እኖ እምፕልትናና ማንዲንስ ኑንኩ አቶ ቴዎድሮስ ኮንኪስስታ አይማኖትስ ትንክፍጚ ፋይፃላኽ፤ ዎሌንሊ፣ እሊኩ ብሄርካሊስታ ውላ ይቶፒያንካሊ ዳጉልጝናና እምፕልትስ እንዜጝንስ፤ ዙራሙሬ ማንዲንስ፤ ፅንፌንቶ አብርታ ካላካልጝንስ ንካ ቹዋ ቺፅጝፃንቲ::

“አዊ እዝብ ሰላማዊ እዝብያኽ፤ ዝቤን ያኻ ዎክት፣ ፖላቲካ ያኻ ፖለቲኬንካ ኪስጙኒ ዎሺኔኪ አኺኒስ ፌቴርስታውሳ ችግሮኪ ያኻ እሊውሳ ዲቦ ቱስቲስ እርዳትስታውስታ አሴቴዌላንቲ እዝብ አኽⶓ ቶኬሙንኩ ቹዋ ቺፅጝፃንቲ ሊሊትጙንኩ ጊዝካዳ ፌቴርስታንኩ  ፖላቲካውሳ ታክስጜ ቱስቲስ እርዳትስታው ማቤርአቕ አኽጝስ ሰላም ዋሺኒኪ ዲብስ ፋይፃንቲ አኽⶓ እርዳትስታው እዝብያኽ” ንካ::

አዊው እዝብ አሜት ቺፋ እንሳ ማቢሬ ኬቤርፃው ቹዋ አላሚ አገው እዝብ እሊኩ ይቶፒያንካሊ አኽጝስ አድዋኺስታ ካስጝስ ቡንክትጙኑሳስታ ድላ ፄውኑሳ፣ አጌራዉ ክብርስ፣ አጌሩ ሰላምሲያኽ ኑንኩ አቶ ቴዎድሮስ አዊውው እዝብ ጚጛርትጛስኪ ያኻ ዎሌንካስ ሰላሞ ፋያንቲ ኽሳንቲ እሴት ዌናስታ ኬቤርስትኹ እዝብያኽ ንካ:: እንሳ ኽሳንቴ ሰላሙሳ እሴቶ ይዎቱ ሜሜሪ ፄዋማ እሜው እዝብ አኽጝስ  ሴላሙ እይትስ ቡንክትጛው እዝብያኽ:: ሰላምስ ዝኩዋውስታ ሰላሞ ፋያንቲ እዝብያኽ  ንካ::

አዊው እዝብ ሊጊሲሚ አሜቱ ታሪክ ዝኩኽ እዝብያኽ፤ አዊው እዝብ አጌራ ምንግስት ቲሪኒዴስ ፋሌንጋ አጌርስ ስልታኔ ዴፅኹ እዝብያኽ ኑንኩ አቶ ቴዎድሮስ ላሊበላውሳ ብሽታኖ  ግቢትኹስታ አሌምስ ስልታኔ ክንትፅኹ ሴላሞ እንካናንቲ፣ ፖለቲኬንካ ኪስጙኑ ቺፋ ኪስጛቲው ሴላምስ ቲጋውስታ ሴላሙሳ ዴስ እሊኩስ ቤንጝፃው ሰላማዊ እዝብያኽ ንካ::

አገው ፌርስቴኑ ማቢሪው ባል አግስቱንኩ አማኻሪ ክልሉ ትክትሊ ቺፅጝፃንቲ ዶ/ር እብዱ ሁሴን አገው እዝብ ሰላም እንካናንቲ አኽጝታጊ አገው ፌሬስቴኑ ማቢሪው አባልካ ታብል ሴጝሱኑሳ ሰላሞ ዊዳፊ ያኻታ ፄውጝ ማንዲስቴ ንካ::

አገው እዝብ ሰላምስ ዝኩኹ ኩርፄንትስ ኬፍቲኒ አኺኒስ ውላጊ ታምቦ ፊትጝጝ ቱስታዊያኽ ኑንኩ ትክትሊ ቺፅጝፃንቲ ፅንፌንትስ ዶንጌትካማ ልቕልቓንኩ ምንግስት ዲግስኹሳ እቑዌ ቻቤልካማ ሰላሞሾ ዙራንታ እቑዌ ፌያፌይጝፄካ::