ምንግስትካ ወንቤርዳ እንጅኩዋኒስስታ ጁዋኒስ ካንትስትካ:: እምፕል ጁዋታማ እሊው ቲኪስቱስኪላ ሚንችካ ኾትካ ፌሬሳኒስ ባንኩ ዴሜካ እስካዊ ምንግስትስ አሜቻው ዳድስ እስካውትካማጊ እንዜጛኒስ ካንትስትጝ ኽታዋዴስ ጉሽፃማ ጌምትጙስ ይንትኹ ውኒያኽ:: አዋኾዳኪላ እንጚ ያኹስ ሴጛ:: እምፕልኾት ኩፅኒ ይሳን ሜሴሬትዳ ቲሬማ ይንትኹሊስታ ካስኹሊ ኔፌሳውላ እንቲታኪ ትግትግናውላ ክምንትዴስ ክምንቶ ጌምትጛማ 84 አሜትካዋ ቼፍፃማ እንዳ ክምንትዳ ታምባ-አገው ፌሬስቴንካው ማቢሪ::
አገው ፌሬስቴንካው ማቢሪ አዊው እዝብ እሊኩ እዝብካሊ ቡንክትጛማ እንአጌራ አርኔቶ እምቲታ ዲፊርስቴውላስ ክብርሊ እጂቴታ ፄውጝስ ቢኪንኩ ጄግንካ ታሪኮ ድሳቲታ ፄውካማ ቲሪትጝፁኑ ማኺቲ ያኹስ አሜትዴስ አሜቶ እሳንጛማጊስታ ይስጛማጊ ይንታማ 68ሻይዴስ ጃላ አባልካዋ አፌርጝስ ካላ::
እን ይቢቺ ያኻውላስ ክልልዴስ እንቲታኪ አጌራዴስ ፌያማ አሌሙ ማኺቲ ያኻማ ቴቤቤርጙንኩ ምንግስታታካው አችትዳ ሳይንሱ ክንቱውስታ ባይሉ ኾትዳ /UNESCO/ ሜዜጌብፅጝስ ትኩት እጆ እይስትኹ ያኻማ አግስቴ::
እሳ ማቢሬ አሌምዳ ሜዜጌብፅጝስ ፄውስታው ቴርት ክቻዴስኪላ አሜትቺፋ ወረዳቺፋ ዙርስታማጊ ኬቤርስታሺኹ ባል ብርኹ አኺኒስ እንጃቢሪ ኬቴምዳ ሊሊትጙንኩ ስፍርካዴስ ሌንጌድ ይንቴካማ ኬቤርፃንታ ፄውስትጝዳኽ:: እን ኪላ አሜትዴስ አሜቶ ብራማጊ ይንታ::
እን ያኻችኽስጉ አማኻሪ ክልል ናካ አግስታው ዴኮ አቲጙ ዲብ ሻኽሳማጊስታ ዳዶ እንዜጝጝስ ቺጊርፂ ያኹኽዳ አሜትዳ አገው ፌርስቴኑ ማቢሪው ፌስቲቫል ካስጛቲታ ሚንች ፅንጋኺ ኬኼርስታሺኹ አኺኒ ዋዚታ ካንትስታላኽ:: ኬቤርስትኹ አኺኒ ኩፅኒ እዝቡሳ ጄግንቶ ካብስ ካንፅፅኹ ያኻማ አግስታ::
ዙሬ ዴካ ፄዋማ ቑዊስሚስ ናውላ ባሎ ኬብርፅጝስ ካላ:: እንጚስኪላ “አዊ ሽንኩዊስትኹሳ ጅማውላ ይጉዋላ” እፃ:: “አዊ ጉድታኒ አዊ ድኪታኒ ጋኺ” ኑኑውኪላ ሜሊዌና አኽⶓ ካንፅፃውሳ ፄጌሬ::