“ልግስኒው ፅንጋኺ”

ታደለ አጋጄ

አይኪ ምንግስቱ ያኻ እዝቡ ኾትዳ እንፃኽስታው አኹኪ እሊው ዋሺኒኪ አቒ 2007 ም.አሜትዳ ፋኽ አዋጁ ቼፍ 881/2007 ቱንዚ 2 ፃፊስትኹስታ ሙስኒውሳ ባይሬ ዋኽትጝፃውሳ ዎንጄሎ ፌፄማው ጊዛይ ዎንጄልስ ዴንጌግስትኹሳ ክፃቱሳ ውሳኔ ቻቤሌ ኔ::

ምንግስቱ ያኻ እዝቡ ኾትዳ እንፃኽስታው ኩታ ያኻ ኩታ ያኻያሱ ዳድስ ቱስታ ጋቲውሳ ትክሞ ጚጛርትጛሳ አግፅጝስ አኹኪ እሊው አቒስ ትክሞ አግፅጝስ አኹ እሊው አቒውሳ ትክሞ አኹ ሜብቶ ጉዲጝስ ታክስጝ ሙስኒው ዎንጄሎ ፌፄምጝስ ካሲስታንታ ያኼ ናማ ጌሌፄ::

ሙሲኒ እሊኩ ዎንጄልካዴስ ጚው ያኹኽ ሊሊቲ ባይሪ ዝኩኹ አኽጝስ ዎንጄል አዋጅስ  ዴንጌግስታማ አግስቴ::

ሙስኒ ፖሊቲካው፣ ኢኮኖሚውዳስታ ማይቤራዊዳ ቻኒስቶ ታምፃውያኽ:: ፖላቲካው ሜስክዳ ሙስኒ እጉሳ ሴግቴንቶ ሺሽርጝስ ዲሞከራሲው ልግስስ ኽሳንቲ ፅንጋኺያኽ::ኢኮኖሚው ሜስክዳ ዴሜካ አጌሩ አብት ዎዴማታ ፄዌ::

ሙስኒ ዋሺኒኪ አሌሙ አጌርዳ ኬሴትስታው ዲብያኽ:: ሜቴን ሊሊትጙኒጉ ሙሰኒ እላቲው አጌር አግስታላኽ::

ትራንስፖርንሲ ኢንተርናሽናል /TI/ 2013ስ ፄውኽ ፅናትዳ 177 አጌርካዳ ፄውስትኹ ሙሰኒው ፅናት ካንትፃውስታ ፅናት ፄውስቱኩ አጌርካዳ ሊኽዴስ 70 ታፋ ያኻንኩ ባስጙኽ ሙስኒው ችግር ዝኩክ አኽⶓ ጌሌፃ::

ይቶፒያዳኪላ ሙስኒ ኬፍቲኒ እችስ እሳንጛማ አግስታው አኽⶓ ፅናትካ ካንትፃና::

2006ዳ ግሎባል ኢንተግሪቲው ሪፖርት ካንትፃውስታ ሙሰኒ ይቶፒያዳ ፖለቲካው፣ ኢኮኖሚውስታ ማቤራዊዳ ባስኹሳ ችግሮ ፌቴራማጊ አግስታው አኽⶓ ምልኻታ ::

“ትራንስፖረንሲ ኢንተርናሽናል” አሌም አቡቑ ባኩ ፋይዳ እንፃኽስታው አችት አውሮፓው እዝቡ ቼፍታ 2012ዴስ ጄሜራማ አሌምዳ አግስታንኩ አጌርካዳ ሙስኒውሳ ፅናቶ ካስጝፃማጊ አጌርካስ አቾ ፍሻው ያኹስ እን አጌራ ይቶፒያኪላ አችቱ ፅናቱ  ስሬትስ 2019ዳ ፅናት ፄውስቱንኩ 180 አጌርካዴስ ሊኽዴስ 37 ታፋስ አግፅጝስ 94 አቾ እምቴ::

ሙስኒ እምፕል አጌርዳ እሳንጝጛማጊ ካሳኒ አጌሩ ሰላምዳስታ ዴክትዳ ቻኒስቶ ቺፄ:: ጋያኪ ሙስኒ ታምፃው ፍታዌ ያኻያሱ አብቱ ቤንጝጚ አጌርዳ ጋቻ ፌቴርስታታ ፄዌ:: እንዴስ ፌያማኪላ ጛስጛው ዎሬም ኬሴትስታው አጋታሚኪላ ሚንቼ:: እሊውሾስ ዴሜካ ሙስኒ ምንግስት አሬጌግጛማ ጉሳቲታ ፄውጝስ አጌሮ እልውኒው ችግርዳ ሚፄ:: እንስኪ ምስሊታ ካንትስታንኩ አውሮፓኩ አጌርካዴስ ታሊያን ካቢትጝጚስ ካቢኒ ቤቴንስታታ ፄውስትኹ አኺኒ ዝኮ:: አፍሪካዴስ ዴሜካ ሴራሊዮን፣ ላይቤሪያ፣ ኮንጐዳስታ ሶማሊየዳ ታምብኹ ሚንች ችግር ሙስኒሊ እምትጙኹያኽ:: አኽጝስኪላ ሙስኒ አጌርካው ውላቱዊ ልግስስ ፅንጋኻ አኽጝ አጌርዳ ሰላምስታ ዴክ ዝኩዋቲታ ፄዌ::

ሙስኒውሳ ዎንጄሎ ካላካልጝጝዳስታ ጛጂሱ ዙራሙሪዳ አሴቴዌላኑሳ ሙስኒውሳ አኺኔ ካንትኹ አዊ ብሄረሰቡ ቺፅጝፂዳ ሊሊትጙንኩ ወረድካ አግስታንኩ ጛርት አቕ አሚኮ ህብር አውጜ ቴሌቪጅንሊ ስልኪስ ፄውኑ እጂጚዳ ጌሌፁኑውስታ ሙስኒ ሊሊትጙንኩ አኼንካስ ጌሌፅስታውስታ ሚንችካ ችግርካዋ ፌቴራማጊ አግስታው አኽⶓ ዙሜካ::

ኬቤሊካዳ እምፕልታቕ ክችክቺስ አገልግሎቴ አግፄካማጊ ጋቲው አኽⶓ ዙሙንኩ ዊዛሩ አስናከች ዘላለም ኬቤሊዳ ማይቤራዊው ሽንጎዳ አግልግሎቴ እያንትካ ሙስኔ ፋያንኩ አኽⶓ ጌሌፅጝስ ኬቤሊሾ ካሳንኩ ዋሺኔኪ አግልግሎቲ ፋያንትካ ሻይስስታ ቡንዴስ ይጎ አግልግሎቴ አግፃቲንኩ አኽⶓ ቶኬምካ:: እምፕል እምፕሎ  ጉዳዮ ፌፄምፅጛ ኬቤሊሾ ካሳኒ ጌንዜብስ ፌፄምስታው አኽⶓ ዙሙንኩ ዊዛሩ አስናከች ሙስኒ ኬቤሊኩ አግልግሎቲዳ እያንትካዳ ኽሳንትትስ ካንትስታው አኽⶓ ዙሜካ::

ቾ ታብሉሳ ብቴ ያኻ እሊውሳ ዲብ ዎሬስጝስ፣ ዴብተሮ እንፃኽፅጝስ፣ አቕፄ ፍሽጝስስታ ፄጌርጙንኩሳ አግልግሎትካ አግፅጝስ ኬቤሊሾ ካሳኑ ጉዝማ ድኻ ድኽካስታ ኹንዳ ኬፄሮ ሚንቺስካማጊ እምቢትንኹሳ አግልግሎቴ እያቲንኩ አኽⶓኪላ ዊዛሩ አስናከች ዙሜካ::

ክልሉ ኩስጚ ጝናዳ አባላ ዊዛሩ አሰናከች ሊሊትጙንኩ ሜድሬኽዳ እዝብ ሜሬርፃማ ጉሻው ሙስኒው ችግር ኽይስታታ ካቢትጝፅጝስ ካሴ ጉሽⶓ ቶኬምካማ ድኺ ይሪ እንፅኺዳ ኬፄርስታቲንታ ፄውስትⶓኺስታ ታምፅኹሳ ሙስኒዉሳ ጉዳቶ ዙሜካ::

ሙስኔ ድፅጝስ ሙስኔ እያንቲ  ኔውር ናማ ባይጝስታ ሙስኔ ቻቤላንቲ ዴሜካ ትቡሳ ጌንዜቦ ፄዬፍስታማ ባያኑላስጊ ሙስኒ ድሳላኽ ኑንኩ ዊዛሩ አስናከች ድኺ ፍቶ አግፅⶓ አታማ ቤዴልስቱስ አብታሚ ዴሜካ ዋሺኒኬ አግልግሎቴ ጌንዜብስ አግፄ ንካ::

ሊሊትጙንኩ ባንክካዳ ኬፄርስታኒስ ጌንዜብስ ክፅር ፌፄምስታማጊ አኽⶓ ቶኬሙንኩ ዊዛሩ አስናከች ምንግስትኩ እንፃኽስታንትካ እዝብስ ሙስና ጋቲውሳ እንፃኽስትጝጜ ሲፍካማ እንፃኽስትጝ ቱስቴ ንካ:: ዋሺኒኪ እምፕልታቕኪላ ጌንዜብስ አግልግሎቴ አግፅጝዴስ ኮቴብስትጝ ቱስቴ ንካ::

እሊው ሙስኒውሳ ዎንጄሎ ካንትኹሳ ካንቴ እዩንኩ አሬሳቻንቲ ተፈራ አባየ ሙስኒ ኬቴምካዳ ጌፄርዴስ ኽስኹ  ፌፄምስታው አኽⶓ ዙሜካ::

እምፕል አቒ አቕፄ  ፍሽጝስ ሊኽ ሻይ ብሮ ኺስታ ካሲስትካማጊ ናኑሳ አብኖ እንኮኻንኩ አኽⶓ ዙሙንኩ አቶ ተፈራ ሊሊትጙንኩ ኬቤልካዳ ካንትስታው አግልግሎቴ እይጙ ችግር ሙስኒሊ እምትጙኽ አኽⶓኪላ ዙሜካ::

እምፕልታቕ ጛጂሱሳ ሜብቶስታ ግዴቴ ቱስቲስ ያቓኑላ ይጉጝ ሙስኒ እሳንጛታ ምክኒያት አኽⶓ ቶኬምጝስ አግልግሎቴ ፋያንትካኪላ አግልግሎቶ አግፃኑላ ይጉዋኒ ሜሬርፅካማ ጝና ዙርጝዴስ ፋይስታው አካልስ ድኹጝ  ፋይፄ ንካ:: ሙስኔ ድፅጝስኪላ ሙስኔ ኔውር ናማ ባይጝስታ ሙስኔ ቻቤላንቲ ዴሜካ ትቡሳ ጌንዝቦ ፄዴፍስታማ ባያኑላስጊ ሙስኒ ድሳላኽ ኑንኩ ዊዛሩ አስናከች ድኺ ፍቶ አግፅⶓ አታማ ቤዴልስቱስ አብታሚ ዴሜካ ዋሺኔኪ አገልግሎቴ ጌንዜብስ አግፄ ንካ:: ናካዳ አብታሚስታ ድኺ ክቻ አግልግሎቴ አግፄካማጊ ጋቲው አኽⶓኪላ ዙሜካ::

አቶ ተፈራ እንዴስ ቤዴራ ፍቱ ፅፌት ጝናዴስ ውማይቴንኪ ኬቤሊሾ ካስጝስ ሼውቴ ፌቴራሺንኩ አኽⶓ ቶኬምካማ ሹኻ አሜትዴስ ፋሌንጋ ኩፂ እምፕልታቕስ እንዳርማኪ ሼውቲ ፄውስታቲው አኽⶓ ዙሜካ::

ሙስኔ ካላካልጝጝስ ጌንዜቦ እይካማ አግልግሎቴ ፌፄምፃንኩ እምፕልታቕ ጛውሳ ሜብቶስታ ግዴቴ ሺሼካማ ሙስኒ ፌፄምስታቲታ ፄውጝ ቱስታው አኽⶓ ዙሜካ::

ኬቤሊዳኪ ያኻ ወረዳዳ አግልግሎቴ እያንትካ እዝብካስ ክችክቼ አግልግሎቴ እይጝስ ሙስኒው ዎንጄል ፌፄምስታቲታ ፄውጝ ዝኮ ንካ::

ሙሰኒ እግዳስታ ቴርትዳ ዝኩንኩሳ እንፅኽካዋ ምንግስቱሳ ስልታኖ ቴኬምስትካማ ጛጛርስ ትክም አግፅጝስ ፌፄምስታው ድፂው ቴግባር አኽⶓ ዙሙንኩ ዴሜካ እጉ ውማይቲኒ አቶ ሰውበሰው አበበኽ::

ይቶፒያዋ ፄጌርጛንኩ ድኽካ አጌርካዳ ሙስኒ ታምፃው ቻኒስት ማልጛ ኬፍቲኒ አኽⶓ ጉሹንኩ እጉ ውማይቲኒ አጌሩ ኢኮኖሚዳ ሚንቾ ቻንስቶ ታምፄ፣ አጌራው ልማትዳ እሼው ጌንዜብ ቱስታ ጋቲታ ድስጝስ ኢኮኖሜ ማልጛ ኽስኹሰ ቤዴላው አኽⶓ ዙሜካ:: ሙስኒ ፍቱ አግልግሎት ክችክቺ እንፃኽስቲታ ፄዋማ ፍቱ ቴርት ዛብትጚስ ምንግስቶ እዝብ ፍቼታ ፄዋውሳ ቤዴሎ ታምፃው አኽⶓ ዙሜካ::

ሙስኒ ኩታ ጚጛርትጛስስታ እሊው አቒ ትክም አግፃታ ፄውጝስ ላጛ ዳድካስ ፌፄምስታው አኽⶓ ቶኬሙንኩ እጉ ውማይቲኒ አዋጁ ቼፍ 881/2007 ዳስታ 882/2007ዳ ፋንኩ አዋጅካስ ሙስኔ ፌፄምኹ እግስ ካሲንታስታ ያኻው አኽⶓ ዙሜካ::

ሙስኒ እሊኩ ዎንጄልካዳስ ሊሊታ ፄዋው ሙስኔ ፌፄማንቲስታ ቻቤላንቲ ዎንጄልዴስ ኔፃ ያኻቲንኩ አኽጝስታ ሙስኒው ዎንጄል ኩታ ጛርት አቕዳ ታምፃው ቤዴል እላቲው አኽጝስታ ሙስኒ ቤዴሎ ታምፃው ዴሜካ አጌሮ አኽጝ እሊኩ ዎንዳልካዴስ ሊሊታ ፄዋው አኽⶓ ዙሜካ::

ሚፂ ኩፕፃትንካዳ፣ ፍርድ ጝንካዳ፣ ብቴ ቺፅጝፃንኩዳስታ ፄጌርጛንኩዳ ሙስኒ እሳንስ ፌፄምስታው አኽⶓ ቶኬምካማ ሙስኔ ካላካልጝጝስ ሙስኔ ኔውርታ ፄዋማ ቼፍጝስታ ሙስኒው ዎንጄልዳ ፋንኩ እግካ ኽስኹሳ ፌፄማንትካዳ ክፃቶ ዴፃው አኽⶓ ቱስቴ ንካ እጉ ውማይቲኒ::