አክሊሉ የኔው
1963 ም.አ ጄሜርስትኹ ይቶፒያው አትሌቲክስ ሻምፒዮና ንⶓ 53ንቲ ጊዝስ አዲስ አበባ ኬቴም ይቶፒያ ስፖርት አካዳሚዳ ትር 21/2016 ም.አ ጄሜራማ ዋልታ ሲፍጝጙንኩ ጌርክዋ አኮሜችስቱስ ሴኔቤታማ ትር 26/2016 ም.አ አሊዴ አግፃ::
ልኺትጚው ብስፂ (ጂሚርፂ ጌርክ)
ትር 21/2016 ጄሜሩስ ብስፂ (ጂሚርፂ) ፕሮግራምዳ ክብሩ ሊንጊዲ ኢፌድሪ ባይልስታ ስፖርት ሚንስቴር አቶ ከጀላ መርዳሳ ጂሚርፄ ዙሚትጜ ፄዋኒስ እንጚ ቴርትዳ ኢፌድሪ ባይልስታ ስፖርት ሚንስቴር ስፖርት ልማቱ ዜርፍ ሚንስቴር ዴኤታ አምባሳደር መስፍን ቸርነት፣ ይቶፒያ አትሌትክስ ፌዴሬሽን ፕሬዝዳንት እርዳታንታ ኮሚሽነር ደራርቱ ቱሉ፣ ይቶፒያ አትሌትክስ ፌዴሬሽን ቤዴራንቲ ትክትሊ ፕሬዝዳንት አትሌት ገዛኸኝ አበራ፣ ይቶፒያ ኦሎምፒክ ኮሚቴ ቹዋ ፃፋንቲ አቶ ዳዊት አሰፋው፣ ይቶፒያ አትሌቲክስ ፌዴሬሽን እንፅኼ ፌፄምፃንቲ ኮሚቴ አባልካስታ እቑስቱንኩ አትሌትካ እንጚታኪ እቑዊ ያኽስታይኩ ሴሌቴንፃንትካዋ ዴሜካማ እሊኩ ሌንጌድካጊ አግስቴካማ ልኺትጚ ብሩኹ አኺኒስ ብስስታ::
ልኺትጚው አሴቴፍጛንትካ
ሚንቾ እድሜ ቼፍፅኹስታ ሚንችካ ኽሳንትካ አትሌትካዋ አፌሩኽ ንጙዊን 53ንቲ ጊዝስ አኮሜችስትኹ ይቶፒያው አትሌቲክስ ሻምፒዮናዳ 1100 ጃላ አትሌትካ ጛውሳ ክልሎ፣ ክሌቦስታ ኾቶ ዎኬልካማ አሴቴፍጜካ:: ይቶፒያ ንግድ ባንክ ሲዳማ ቡና ትሩነሽ ዲባባ አካዳሚ ኢትዮ ኤሌክትሪክ መቻልስታ እሊኩጊ እንጚታኪ ሊሊትጙንኩ ክልልካዴስስታ ቺፅጝፂ ኬቴምዴስ ይንቱንኩ አትሌትካ (ልኺትጛንትካ) አሴቴፍጜካ::
ልኺትጚው አይኔትካ
ሌጌሴምቱ ፕሪጝ፣ አምፑ ፕሪጝ፣ 400 ሜትር ጝርጀካው ጊጚው፣ 1500 ሜትር ኹኑስታ ጝርጅካው፣ 4X100 ሜትር ግምቡ (ዱሌ) ቻቤልጝጚ፣ 4X400 ሜትር ሪሌ፣ ምርኩዙ ፕሪጝስታ እሊኩ ልኺትጝካጊ አከሜችስትካ:: እንዲስ ድምክናኪ ሚንችካውሳ ትኩቶ ጉሳሺኹ 10ሻይ ሜትር ላጝጊ ፆቲስ እንጚታኪ 5ሻይ ሜትር ኹኑ ጊኒ ኪላ አኮሜችስታማ አሊዴ አግፃ:: 10ሻይ ሜትር ኹኑ ልኺትጚዳ ፅጌ ገ/ስላሴው ኢትዮ ኤሌክትሪክዴስ እምፕላንታ ታኻታ አሊዲስ ብርቱካን ወልዴ ሲዳማ ቡናዴስስታ ውዴ ከፋለ ኢትዮፒያ ንግድ ባንክዴስ ሲፍጝጚስ ላጛንታስታ ሹኻንታ ያኼካማ አሌድካ:: ምሳሊስ ጝርጅካው 10ሻይ ሜትር ጊጚ ካስጙስ ቡኪ ድሪባ ሻገር ኬቴምዴስ እምፕላንታ ያኹስ፣ ንብረት መላክ አማኻሪ ክልልዴስ ላጛንቲ እንጚታኪ ገመቹ ዲዳ ኢትዮ ኤሌክትሪክዴስ ሹኻንቲ ያኻማ አሌዳ::
5ሻይ ሜትር ኹኑሳ ጊጜ ብርቱካን ሞላ ኢትዮ ኤሌክትሪክዴስ እምፕላንታ ታኻታ አሊዲስ፣ የኔዋ ንብረትስታ ታየች አይቸው ላጝጊጊ ይቶፕያ ንግድ ባንክዴስ ሲፍጝኒስ ላጛንቴስታ ሹኻንቴ አቾ እሚካማ አሌድካ::
ልኺትጚው ቹዋ አላሚ
ሴኒ 19-23/2024 አዝቼ ካሜሩን የውንዴዳ አኮሜችስታው 23ንቲ አፍሪካ አትሌትክስ ሻምፒዮናዳ ይቶፒያ ወኬላንኩሳ አትሌትካ ጐሌልጝስ ኽሳንቲ ታምብ ዝክኹ ልኺትጚ አኽⶓ ይቶፒ አትሌቲክስ ፌዴሬሽን ጋዜታዊ ጊሊፂዳ ቤዴራማ ይፋ ፄዋ:: እንዴስ ድምክናኪ ይንታው መጋቢት አርፊዳ ጋና አክራዳ ካስጛው 13ንቲ ውላ አፍሪካው እንክሪዳ አትሌትክስ ዜርፍስ ይቶፕ ወኬላንኩ አትሌትካ እንጚ ልኺትጚዳ ሜዜጌብፁኑ ዋይሚስ ጐሌሌስታንኩ አኽⶓ ኪላ ይቶፕያ አትሌቲክስ ፌዴሬሽን እምትጝፃማ ጌሌፃ:: እሊው ልኺትጚው ቹዋ ትክምኪ ይንታው ናሲ አርፊዳ አኮሜችስታው ኽስንቲ ፓሪስ ኦሎምፒኩ ልኺትጚስ አትሌትካ ጛጛራስ ቤዴራ ቴርቶ ፄዋኑ ልኺትጚ አኽⶓኪላ ይቶፒያ አትሌቲክስ ፌዴሬሽን ማይቤራዊ ታምትጝፂ ፍንዳ ዴሜካማ አቕፃ::
ልኺትጜ ዊፃንትካ
ኹኑውሳ ልኺትጚስ ትክላሊስ ይቶፒያ ንግድ ባንክ 205 ዋይሚስ እምፕላንታ ያኹስ፤ መቻል 151 ዋይሚስ ላጛንቲስታ ኢትዮኤሌክትሪክ 87 ዋይሚስ ሹኻንቴ አቾ እሚካማ አሌድካ::
እንዴስ ድምክናኪ ጝርጅካው ትክላሊስ ዊፃንቲ 152 ዋይሚስ ጝሺኪላ ይቶፒያ ንግድ ባንክ ያኹስ፣ 129 ዋይሚስ ኢትዮ ኤሌክትሪክስታ 102 ዋይሚስ መቻል ሲፍጝጚስ ላጛንቴስታ ሹኻንቴ አቾ እሚካማ አሌድጝስ ካሌካ::
53ንቲ ይቶፒያ አትሌቲክስ ሻምፒዮናዳ ኹኑውስኪ ያኻ ጝርጅካውሳ ትክላሊስ 360 ዋይሚስ እምፕንቲ ያኻማ ይቶፒያ ንግድ ባንክ ዊፃንቲስታ ዋንቼ ሼሌምስታንቲ ያኹስ 253 ዋይሚስ ላጛንቲ መቻል፣ 216 ዋይሚስ ኢትዮ ኤሌክትሪክ ሹኻንቴ አቾ እሚካማ ልኺትጜ አሌድካ::