ኽብፂውሳ ማዳባሬ ወክትስ አሬሳቻንትካስ ታምፅጝስ ፅሬት

ታደለ አጋጄ

“ኽብፂውሳ ማዳባሬ ዎክትስ ዲግስጝ አሜሬትጝዴስ ጃላ እልውኒው ጉዳዬኽ” አማኻሪ ክልሉ ግብርኒው ቢሩ::

ክልልዴስ ፌያማ አጌራው ምርትስስታ ምርታምትስ ጎል ንኹ ፍሺ ዝኩኽ አማኻሪ ክልሉ ግብርኒው እንፅኺ ንⶓ ዜርፋ ሚንቺ አቓ ግብሪስታ ፍትሬትኩ ችግርካስ ፌቴንስታማጊ አግስቴ::

ችኹ እሪ ቤዴራማ ቱጝስታ እምቢታማ ፊጝ እንቲታኪ ክልሉ ሊሊትጙንኩ ዙራሙርካዳ ፌቴርስትኹ ባግት ግብርኒው ዜርፍዳ ቻኒስቶ ታምፃ::

እንስኪላ ግብርኒው ዜርፍ አሜሬትጝዴስ ጃላ እልውኒው ጉዳይ ያኻታ ፄዋ:: ፌይኹ አሜትዳ ክልልዳ ፌቴርስትኹ ኽብፂው ማዳባሪው እንፂት ግብርኒው እንፅኺዳ ቻኒስቶ ታምፅጝዴስ ፌያማ ክርፂ ቺፅጝፂው ችግር ያኻማ እጂጝ ታክስስታዊያኽ::

ክልሉ ግብርኒው ቢሩስታ ፌዴራል ምንግስቱ ታምብ ዌንካ አካልካ ፌይኹ አሜትዳ ክልላኻዳ ፌቴርስታሺኹ ኽብፂው ማዳባሪው እንፂትዴስ ክንቴ ካፅጝስ 2016/17 ምርቱ ዝቤንዳ ምስሊ ችግር ፌቴርስታቲታ ማዳባሬ ጄውጝስ ውል ቤዴራማ ፌፄምስታታ ፄውስታ::

አማኻሪ ክልል ምርቱ ዝቤንዳ ፋይፃው 8 ሚሊየን 57 ሻይ 900 ኩንታል ኽብፂውሳ ማዳባሬ ጄውⶓ ትክትሊ ቺፅጝፂው ማሬግስ ጌፄሩ ዜርፍ ቴቤቤርጝፃንቲስታ ክልሉ ግብርኒው ቢሩ አላፊ ድረስ ሳህሉ( ዶ/ር) ዙሜካ:: ትክምቲ አርፊዴስ ጄሜራማ ዎዴብዴስ ማይኬልሾ ኽብፂውሳ ማዳባሬ እንዜጝትጝፅጙ እንፅኺ ጄሜርስታ ንካ:: ኽብፂውሳ ማዳባሬ ዳላው ሜቴንስስታ ዎክትስ ንⶓ ሊሊቲ ትኩትስ ጄው ፌፄምስቱኒውላ ክልልዳ ፌፄምስትኹ ፄትቲው ችግር እሊው ፅንጋኻ ያኹኽ ጉዳዬኽ ንካ::

ክልሉ ግብርኒው ቢሩ ምርቱ ዝቤንዳ ክልልዳ 160 ሚሊዮን ኩንታልዴስ ጃላ ምርቶ አግፅጝስ አኬዳማ እንፃኽስስታማጊ ያኹኒውላ ኬሴትስትኹ አቓ ግብሪስታ ፍትሬትኩ ችግርካስ ቤዴራ ምርቱ ግምጋሚ 145 ሚሊዮን ኩንታል ይቢቺ ምርት አግስታው አኽⶓ ንባርካ ካንትፃና እስታ:: ቤዴራ ምርቱ ግምጋሚ ፌይኹ አሜትዳ ኩፕንኹዴስ 140 ሚሊዮን ኩንታል ምርት ዝኩኹ አኽⶓ ካንትፄ::

ያኼስጉ ፌይኹ አሜትዴስ ኬሽኹ ምርት ዝኩዋው ምርትስታ ምርታምት ዴሜካማ ያኺትየስ እምስትኹ ባጄት አሜትዳ 300 ሻይ ሄክታርዴስ ጃላ ድምክኒ ብቲ አሬስስታማኽ ንካ::

እምፕልታቕ ጋያኪ አሬሳቻንትካ ኽብፂው ማዳባሪ እንኩርስትኹ ጊዝስስታ ዳላው ሜቴንስ ታምባታ ፄውጝስ ዙራሙሪውሳ ሴላሞ ማንዲፅጝ ቱስቴ ንካ::

አማኻሪ ክልልዳ ኽብፂው ማዳባሪው ዲግስጚዳስታ ቤንጝፅጝዳ ታምብ ዌንካ አካልካሊ ባርዳር ኬቴምዳ ካስጙኽ ሜድሬኽዳ ክልሉ አመራርካ፣ ካላካልጚው ሴራዊቲው ኬፍቴንካ መኮንንካ፣ፄትቲኩ አካልካስታ ዳዱ ትራንስፖርት አግስቴካማ ኩስጜ ፄዌካ::

ቺፅጝፂ ጛራው ኩስጝፃንቲ ዶ/ር ዘለከ አንሉ ኑኑውስታ እንኮጛ እሺኹ ማዳባሪው ዲግስጝጚው እንፂትስታ ታምፅጙ ካስትዳ ፌቴርስትኹ እጋፊ እንፃኽስትጝጚስ ምርትዳስታ ምርታምትዳ ቻኒስቶ ታምፅኹ አኽⶓ ቶኬምካማ ንጙዊኒ አሜትዳ ምንግስት ሊሊቴ ትኩቶ እይጝስ ኽብፂው ማዳባሪ ክልልሾ ቤዴራማ ቱⶓ ዙሜካ::ዎዴብዴስ ክልልሾ ታምብኹሳ አሬሳቻንትካስ ቤዴራማ ታምባታ ፄውጝስ ግብርኒ ቢሩ ይቢቺ እይስታው ያኻውሌስ ውላጊ ቲቢቢርጚስ አኮሜችስታው ቹዋ ቴግባርያኽ ንካ::

አማኻሪ ክልሉ ሰላሙስታ ፄትቲው ቢሩ ትክትሊ ቢሩ አላፊ ዶ/ር እሸቱ የሱፍ ፄትቲው ሜዋክር ላጛ እንፅኼንቶ እሜማ እንፃኽስስታማጊ አኽⶓ ዙሜካ:: አባላምቲ ሰላሞ ቼሜትጝፅጝስታ ሲፍፅጙ እንፅኺ እንፃኽስስታማጊ ያኹስ ላጛንቲ ዴሜካ ክልላኻዳ ልማቱ እንፅኺ እንፃኽስስታ አሜቻውሳ አኺኔ ፌቴርጝ አኽⶓ ዙሜካ::

ዎዴብዴስ ክልልሾ ኽብፂውሳ ማዳባሬ እንዜጝትጝፅⶓ ካላካልጚው ሴራዊቲስ አጄብስታማ ፋይስታው ስፍሪሾ ታምባታ ፄውጝስ ኻሮስታ ጌርኮ እንፃኽስታማጊ አኽⶓ ዙሜካ:: እንኪላ ይስጛማ ሲፋዊያኽ ንካ::

ትክትሊ ቺፅጝፂው ማሬግስ አማኻሪ ክልሉ ጌፄሩ ልማት ክላስተር ቴቤቤርጝፃንቲስታ ግብርኒው ቢሩ አላፊ ዶ/ር ድረስ ሳህሉ ክልሉ ታምብ ያኹኽ 1.1ሚሊዮን ኩንታል ኽብፂው ማዳባሪ ዎዴብዴስ ጌምኹ አኽጞ ዙሜካማ ይንታንኩ 20 ጌርክካስ እንዜጝትጝፃማ ታምፅጝስ ኬፍቲኒ አላፍት ዝኩንኻኽ ንካ:: ጋያኪ ዳዱ ትራንስፖርትካ ዝኩኽሳ አክሞ ቴኬምስትጝስ ማዳባሪ እንዜጝትጛማ ታምባታ ፄውጝስ ዝኩኽሳ አክሞ ቴኪምስቲካማ እንዝርፃንትካ ማዳባሬ እንዜጝትጛታ አላፍቶ ፊትጝጝስ ቱስታውሳ እንፅኼ እንፃኽስትጝ ፋይፄ ንካ::  ቤዴርካማ ዜርስታንኩ ጋያኪ ሹምቤ አሜሬታንትካስ ኽብፂው ማዳባሪ ወክትስ ታምፅጝስ ክልሉ ግብርኒው ቢሩ ኬፍቲኔ ፅሬቶ ፄዋማጊ አኽⶓ ዙሙንኩ ዶ/ር ድረስ ሳህሉ አቓ ግብሪስታ ፍትሬቱ አዲጊስ አቲንኹሳ ምርቶ አግፅጝስ ጊዝ እላኽ:: ሜንፌስስታ ማቔችስ እንፃኽስትጝ ቱስቴ ንካ::