ኻስስታ ሜቴንዴስ ጃላ ፍሺ

ዘውዴ በካሉ

ቱትጚ እምፕልታቑ ቹዋ ስርያኽ:: እምፕል ጝርጂስታ ኹና ቱትጜ ስርቴካማ ዝኩዊን እግስ፣ አይማኑትስ እንቲታኪ ማይቤራዊ አላፍትስ አስሜምጜካማ ሜሴሬታኑ ታምትጚያኽ:: እምኔትኩ ታብል ዲብሳንውስታ አይማኖትኩ ሜፃፍካዳ ፃፊስታማ አግስታውስታጊ ድባን አቒ ይቢቺ ዝኩዋታ ጉዳ ጋቲውያኽ ናማ አዳምስ ሄዋኖ ፌቴራያኹ አኽጝ ማሊስቴ::

ድባኑሳ ካሎ ሲፍካማ ታብል እምፕል ጄር ካሜንስታማ 18 አሜትዴስ ጃላ ያኻኒ ትዳርትፃ አፄባዋ ፋዬ:: ጄርስ ታኻፃ ጄራዋ ካሲፅካማ ፋያኑ ልኩስ አግፃኒ ጄራዉ ጝን አቕሾ ሹማጌሎ እንፃኻና::ጄራዉ ጝን አቕ ዴሜካ ጄሩሳ ጝን አቖ ጄራዋ ቻቤልካማ ሌንጌድፃና፤ ጝን ፍሽፅካማ ዋግስ ታምፅካ ንካማ አሳብስ አስሜምጛኒ “ያኼስ” ናውስ ካሎ ሹማጌልስ ልቓ ጌርክዴስ ፋሌንጋ ዙርሜ እያና:: እንዴስ ፋሌንጋ ወሴኑኑ ስፍሪዳ ታምትጜካማ ዜሮ ቼፍጜካማ ዳርኪ ድንግርስታ ቱትጜ አጌዳው ዲብ እላ ያኹኒጊ ዊድጜ ፄዋና:: ጄርኩ ጝን አቕ ጄራኩ ጝን አቕስ ማቼ አኹኪ ጌንዜብ እያና:: ኻስ ዋኒ ያኻው አኽⶓ ጌርኮ ኬውካማ ጝን ዋሴንኹስ ካላኑ አክምስ ዴጌስካማ ጄራኩ ጝን አቕ ጄራውሳ ስዮስታ ሚቴ፣ ጄንዳ፣ ባርኮቴ፣ አገልግሎ፣ ሳንዱክስታ ፄጌርጙንኩስ አኽካዋ ጄዌካማ ዲግሳና:: ኻሱ ጌርክ ታምባኒ ፂኻራ ፂኻዋ ካሱስ አጄባንኩ ፂኻርካሊ ፊሪሲሲ አኹ ብቕሊስ ካሴ:: ፂኻ ዴሜካ ሴታ ሜቴታ ሹፊፊንስስታ ሱፋሌ አኹኪ ካቤ፣ ባርናቴ ሴታታ ልሽቴ:: ፂኻራ 12 ያኻማ ፂኻኾ ታምባማ ጅማ ጐዴባማ ፂኻዋ ፂኻኩ ዛኽካዴስ እምፕል ቦማ ብቕላዳ ማቺፃኒ ፂኻራሊ ይንቱንኩዴስ እምፕል እንግዳቢ ፂኻሊ አብርታ ፊሪስዳ ያኻማ ዳጉላማ እሚ:: ፂኻ ፂኻሪኾ ካታኒ ቻጉሊ ጊቢስታማ ቻጉሊዳ ቱዋና:: እንጚስታ ያኻማ ጝን ፌኬድኹ አክምስ ዴጌስካማ ቱትጚውስ አኹኪ ኻሱሳ ቴርቶ ካስጝፃና::

ያኼስጉ እንታኮው ባይልስታ ወግ ዝቤንስ ሾፌንስታማ አክምዴስ ጃላ ድግስስታ ፍሼ እምፕልታቑ ዝኩዊኒዳ ኬፍቲኔ ቻኒስቶ ታምፄ:: አዊ ብሄረሰቡ ቺፅጝፂዳ ዚጋሚ ወረዳዳስታ ወሌን ዙራሙርካዳ ካንትስታማጊ ዝኩኽሳ ጉዳ ጋውሳ ፂዌ አኹኪ ቴግባሮ ይጉፅጝስ አጌር ሾማጌልካስታ አይማኖትኩ ታብል ፃምርትስ እንፃኽስትካማጊ ዝኩኽሳ አንቤብፅጝስ ፋኑኻ::

ኪስ እንግዳ ካሳ ዚጋሚ ወረዳው ዝኩዋንቲያኽ:: ዚጋሚ ወረዳዳስታ ዎሌን ዙራሙርካዳ ፄውስታማጊ ዝኩኽ አክምዴስ ጃላ ፍሺስታ ድግስ ይጉዋታ እንፃኽስትካማጊ አኽⶓ ድኹዌካ:: ሚንችካ አሜትካዴስ ናቴ ዚጋሚዳ ዴስስትኹ አክምዴስ ጃላ ፍሼ ታፍዳ፣ አንኮኺዳስታ ጉርጉምዳ ወርክ፣ ጄራው ዋኾ ሴይስስታ ጄራኩ  ጝን አቕ ዴሜካ ጄራስ ምሱቦ፣ ሻንታዋ፣ ስንዱኮስታ እምፕል እምፕል ጝን አቕ ዴሜካ ኻጐስታ ዋኾ ጝኑሳ ኮርሻ ማርሼ ጄዌካማ፤ እምፕሎ አኹኪ ላጛ ክሜ አሬድካማ ዴጌሳኑ አኽⶓ ኪስ እንግዳ ዙሜካ::

ጄር ዴሜካ መኪናስ አጄባንኩስ 70ዴስ 100 ያኻንኩ አቖ ኻሳማ ጄራኩ ጝን አቕ ጉሽታማስታ ዝኩኽስ ጄርካዋ ሌጌፃውሳ አብት ንብሬቶ ዋያማ አክምዴስ ጃላ ፍሼ ፍሻው አኽⶓ ዲብስካ:: እንሳ ጉዳንቴ ዴሶስታ ቴግባሮ ይጉፅጝስ ዚጋሚ ወረዳታጊ ኽታዊኒ ቴርት ዙራታ ማቺስስታ ፊሪሲስ ያኻታ ዌሴንⶓ ኪስ እንግዳ ድኹዌካ::

ትዳርስ ታምብኹ ጄር አክም እላቲው ያኹኒጊስታ ጝን አቕ እርዳትጝስ ካላቲንኩ ያኹኒጊ ጝን አቕ ጉሽትካማኪ ያኻ ዝኩኽስ አብቶ ወይካማ አብታሚሊ ክቻ ዴጌስንኩ አኽⶓ ጌሌፁንኩ ኪስ እንግዳ ዲጊስዴስ ፋሌንጋ ጄርኪ ያኻ ንጝ አቕ ዳዴክሾኪ ያኻ እሼኑ ዝኩዊንዴስ ዜርቕ ንካማ ዝኩንኩ አኽⶓ ዙሜካ::

እሊው ዚጋሚ ወረዳው ዝኩዋንቲ ሰማኸኝ መኩሪያው ያኻኒስ እንዴስ ፍና ዚጋሚዳ እሺኹ አክምዴስ ጃላ ፍሺስታ ሚቲዴስ ጃላ ዲግስ ይጉዋታ እንፃኽስትካማጊ አኽⶓ ድኹዌካ:: እንሳ ጉዳ ጋቲውሳ ዴሶ ይጉፅጝስ አጌር ሾማጌልካኪ ያኻ አይማኖትኩ ታብል እንቲታኪ ትኩታኩ አካልካ አላፍቶ ካፅካማ እንፃኽስትካማጊ አኽⶓኪላ ዲብስካ::

አክምዴስ ጃላ ፍሽስታ ድግስ ትዳሮጊ ፌሬስፃው ጝን አቖኪ ችግርዳ ታምፃው አኽⶓ ጉሽንኩ አቶ ሰማኸኝ እንስ ይጉፅጝስ አብታሚኪ ያኻ ድኺ ውላስጊ ሜቴናውስ አክምስ ያኻታ ወረዳኪላ አላፍቶ ካፃማ ቴግባርዋ ፄዋማጊ አኽⶓ ድኹዌካ:: እንዴስ ፍና እምፕል ኻስዳ እምፕል አኹኪ ላጛ ማኪናዳ 70ዴስ 100 እንቲታኪ እንዴሰ ጃላ አጃቢ ካስሺኹስ ኬሽጝፅጝስ ፊሪሲስ 15 አቒ ካስታ፣ ክፅርዳ ክፅርቲኒ እንዴስ ፍና 20ዴስ 30ዋኺስታ ያኻንኩ ካሳሺኑሳ 7 አቒ ካስታ፣ እንቲታኪ ዊድጚዳኪ ያኻ ዙርሜ ቻቤልጝስ ሚንች አቒ ካሳሺኹስ ላጜታ አቒ ካስታ ዋሴንስትⶓ አቶ ሰማኸኝ ዙሜካ::

ዚጋሚታጊ ወሴንስትኹሳ ውሳኔ ፌሬስፅኹጊ 20 ሻይ ብር ክፃት እንኩርስትኹ አኽⶓኪላ ድኹዌካ::

ዚጋሚ ወረዳው ሰላሙ ኮሚቴ አቶ ታረከኝ አለም ዚጋሚዳስታ ዎሌን ዙራሙርካዳ ካንትስታውሻው አክምዴስ ጃላ ፍሺስታ ድግስ ዝኩዊኒዳ ቻኒስቶ ታምፃማጊ አኽⶓ ዙሜካ::

አቕ እንፃኽስቴካማ ዝኩዊኔ ኬሽጝፅጝ ቱስቱስ አፌሩኑሳ፣ ኩፕፅኑሳ አብቶ ጉዳጋቲው ቴግባርስ እሽፅካማ ዝኩዊኒዳ ቻኒስቶ ታምፃው አኽⶓ እርዳትፅካ:: እንስ ችግሮ ኽይጝስስታ አቕ አክምስ ዝኩዋንታ ትኩታኩ አካልካስታ አጌር ሾማጌል እንፃኽስቴካማጊ አኽⶓ ድኹዌካ::

“አቕ ጝንታጉ ዋልታ ቻላኽ” ኑንኩ አቶ ታረከኝ አክም ዝኩኽ ሴይፃ ሚፃማ፣ ዴጌሳማ ኽይፃኒ አክማ ጋቲው ዴሜካ አፄብዳ ታምፓኻ ናማ ጉሽታማኪ ያኻ ዝኩኽሳ ዋያ ዴጌሳው አኽⶓ ጌሌፅካ:: እንሳ ችግሮ ይጉፅጝስ እንፃኽስቴካማጊ አኽⶓ ድኹዌካማ ፊሪስቴኑ ማቢሪ፣ ሰላሙ ማቢሪ፣ አጌር ሹማጌል፣ አይማኖትኩ ታብልስታ ትኩታኩ አካልካ አብርታ እንፃኽስትካማጊ አኽⶓ ድኹዌካ::

ወረዳታጊ ዴንጌግስትኹ ሜሜሪ ዙራሙሪ ቺፋ ቴግባራዋ ያኻታ ብሽታንዳስታ ሊሊትጙንኩ ኩፕትካዳ ጌሌፅስታማጊስታ ቴግባራዋ ፄዋንታ ኮሚቴ ቲሪትጛማ እንፃኽስታንታ ውላስጊ ኬቤሌኺስታ ሜሜሪ ጌምⶓ አቶ ሰማኸኝ ድኹዌካ:: አክምዴስ ጃላ ድግስስታ ፍሺ ይጉፅጝስ እንቲታኪ መኪናዋስታ ግድስ ቴኬምስታኑውሳ ስዮስታ ሚቴ ኔኬትጝስ ውላጊ ማቢር አቕ አላፍትስ እንፃኽስታንታስ ታምቦጊ ፊትጛንታ አቶ ሰማኸኝ እንፅኼንቶ ፌያፌይጝፅካ::

ጐዋንጉዊ ወረዳዳ ጉባይ ኽምባ ዊ/ሮ ድንካየሁ ሙሉ አቒ ዝኩዊኒዳ ቻኒስቶ ታምፃውሳ አክምዴስ ጃላ ድግሶስታ ፍሼ ይጉፅጝስ ውላጊ ታምቦ ፊትጝጝ ፋይፃው አኽⶓ ጌሌፅካ:: አቕ አክማ ጋቲታ ቼጌርስትካማ ዴጌስጝስታ ቱስታ ጋው ፍሼ ፍሽጝ ጝን አቕዳ ሰላሞ አቲሳው ኢኮኖሚኪላ ጉዳው አኽⶓ ጉሸንኩ ጉባይ ኽምባ ዚጋማ ወረዳዳ እንፃኽታማጊ ዝኩኽ ፍሼ ኔኬትጙ እንፅኺ ይስጛማ ሲፋታ ትኩትስ እንፃኽስትጝ ፋይፃው አኽⶓ ድኹዌካ::

አክምዴስ ጃላ ድግስስታ ፍሺ ኹን ይዎቶ አቤሌሽስታንታ፣ ትዳርስ ዝኮቲንታ ፄዋው አኽⶓኪላ እርዳትፅካ:: ፍሺ ሚንቺⶓ ምክንያትስ ቱትጛኑላስ ካሜንጝ፣ ቱትጙኒዴስ ፋሌንጋ ዴሜካ እንኪስ ዝኮቲንታ ፄዋው አኽⶓ ዊ/ሮ ድንካየሁ ጌሌፅካ:: አክምዴስ ጃላ ድግስ፣ ኻስስ ፋው ፍሺስታ ሚቲስስታ ስይስ ፋው ፍሺ ኢኮኖሚዳ ታምፃው ቻኒስትዴስ ድምክና ባይሎስታ ወጐ ድፃማጊ አኽⶓ ጌሌፁንኩ ጉባይ ኽምባ ዚጋማ ወረዳዳኪ ያኻ እሊኩ ወሌን ዙራሙርካዳ እን ጉዳንቲ ዴስ ድስታ ውላጊ ታምቦ ፊትጛንታስታ አላፍትስ እንፃኽስታንታ እንፅኼንቶኪላ ፌያፌይጝፅካ::