ማይፄኑ አብጂሊው ካንሰር

ዘውዴ በካሉ

ማይፄኑ ቻፊው ቑንዚ አሌም አቡቑ አችስ ኹንዳ ኬሴትስታው ካንሰሩ አይኔቲያኽ:: እን ካንሰሩ አይኔት ላጛ አችስ ቤንስታ:: ቲኑ ሚንስቴርዴስ አግፅንኹ ንባርታጊ አሌምዳ አሜት ቺፋ ኪንዲ ሚሊዮንዴስ ጃላ ያኹንኩ አቕ ማይፄኑ ቻፊው ካንሰሩ ቑንዚስ ይዎቶ አታና:: ቑንዚስ ፂኪስታንኩ አቑ ቼፍ አሜትዴስ አሜቶ ዴሜካማጊ አግስቴ:: ማይፄኑ ካንሰሩ ቑንዚስ ይዎቶ አቱንኩ አቕ ሊኽዴስ 90 ታፋ ያኻንኩ ሌጌስጝዳ ዝኩንኩ አጌርካዳኽ:: አጌርዳ አሜትቺፋ ዴሜካታ ፄዋንኩ ዲብካዴስ ልቓስ ካንትናኒ ድሚ አራኹንት ታምትጛስ ታምባውላስ አራኹንት ታምትጛሳ ፄውጝ፣ ኮንደሞ ጌርክ ቺፋ ቴኬምስትጝ፣ እምፕል አምፕላስ አኹኪ እምፕላ እምፕልስ ወሴንጛኑላስ ይጉጝስታ ማይፄኑ ቻፊው ካንሰሩሳ ቢዲሬ ምርመሬ ፄዋውላስ ይጉጝ እን ቑንዚስ ፂኪፃው አኽⶓ ቲኑ ሚንስቴርዴስ አግፅንኹ ንባር ቶኬሜ::

ይቶፒያዳ ብሄራዊ ካንሰሩሳ ቑንዜ ካላካልጚስስታ ቼፍጝጚስ እክድ አውሮፓው እዝቡ ቼፍታ ትክምቲ 26 ጌርክ 2015 ም.አሜትስ አቕስትⶓ ንባርካ ካንትፃና::

ማይፄኑ ቻፊው ካንሰር ንጝ ኹኑሳ ማይፄኖ ብልትሊ ታምትጝፃው ቤኔኽ:: እን ማይፄኒ ቻፊ ጄር ካሜንስታው ወክትዳ ካሚንፂ እሳናማ ጄር ማይፄንዴስ ፋታ ፄዌ:: ማይፄኑ ቻፊው ካንሰርኪላ እንጚ ማይፄኑ ቻፊዳ ጁዋውስታ እሊኩሳ አካልኩሳ ቤንካዋ ንጝኪ ማይፄን፣ እንኩላሉ አንቓሪ፣ ዝሮ፣ ቻኻ ኩፕፄ ጉዳው እንቲታኪ ሳንቦ፣ ዶሌቶ፣ ጛፅስታ እሊኩሳጊ አካልኩሳ ቤንካዋ እሳንጛማ ካንሰሩ አይኔት እስቴ:: እኒጚ ካንሰሩሳ ቑንዜ ዋትጛ ካላካልጝጝስ ካሊስታው፣ ፊያፌይጝፅካ ዳድካ እንዳርካይ? ናንኩስስታ እሊኩስጊ ካስካዋ ካንትኹስ ባርዳር ዩኒቨርስቲዳ ትቨቨ ጊዮን ስፔሻላይዝድ ሆስፒታልዳ ማይፄኒስታ ፅንስ ክንቲው ቤንዳ ማይፄኑስታ ፅንስታ ስፔሻሊስት አኪሞ ዶ/ር ዳንኤል ምስክርሊ እጂጜ ፄውና::

ማይፄኑ አብጂሊው ካንሰር ንጝ ኹናኹንዳ ኬሴትስታንኩ ካንሰርካዴስ እምፕል አኽⶓ ጌሌፁንኩ ዶ/ር ዳንኤል ማይፄኒሳ ቹዋ ሽል ጝናሱሳ ሚፅፂ አብጂሊዴስ ጁዋማ ኬሴትስታው ቓንዚ አኽⶓ ዙሜካ:: እን ቑንዚስ ፂኪስታንኩ አቕ ሚንቺትስ ካሜንጝዳ ድሚዳ ዝኩንኩስታ ድሚ 45 ዴስስታ 50ዴስ ጃላ ያኹንኩሳ ፄኬ:: አይሎ ሚንቻማ ካንትስታውስታ ኽሳንቲ ትኩት እይስታማ ማራማርስትጝ ቱታው ድሚ 30ዴስ 50ኺስታ ዝኩንኩ ኹን አኽⶓ ድኹዌካ::

ማይፄኑ አብጂሊ ቑንዚ አቓዳ ኬሴትስቱኒዴስ ዳርኪ ምልኻቶ ካንትፃውላስ እጄው አኽⶓ ጉሽንኩ ዶ/ር ዳንኤል እምፕላኒ እምፕላኒ ቑንዚ ካንሰር ታምባውላስ ምልኻትካዋ ካንትፃው አኽⶓ ጌሌፅካ:: እሊው እሊው ቑንዚ ምልኻቶ ካንትፃውላስ ቤዴራማ ካንትፃንኩ ምልኻትካኪላ ምንጊ እሼያሱ አኹት ዲብ ማይፄንዳ  ካንትስትጝ፣ አራኹንት ታምትጛ ጊዛይ አኹት ዲብ አኹ ብሪ ካንትስትጝ፣ ስታ አሊኩጊ ቑንዳስቱንኩ አቕ አኪም ማራማራማ  ማሊጝዴስ ፍና ድኹዋኑ አኽⶓ እርዳትፅካ::

እክምኒው ውማይቲኒ ማራማራማ ዴሜካ ሼሹክ ምልኻትካ ዴሜካ ማይፄኑ ሜቴን ዴሜክጝ፣ ብልት ድሚታማ ኬሌም ኪስጝ ካንትስታው አኽⶓ ዶ/ር ዳንኤል እርዳትፅካ::

እንጉ ካንሰርዴስ ሲፋማ አቖ ክርጝስ ታምፃውስታ አይሊኒ ቑንዚ ማይፄኑ አብጂሊው ቑንዚ አኽⶓ ድኹንኩ ዶ/ር ዳንኤል እን ቑንዚስ ፂኪስትጝዴስ ፍና ድሚ 30 አሜትዴስ 49 አኹኪ 50 አሜቶኺስታ ዝኩንኩ ኹን ሹኻ አሜታስስታ አንኩዋ አሜታስ ምርማሬ ፄውካማ ጛውሳ ቲኖ ቼሜትጝፅጝ ፋይፃው አኽⶓ ጌሌፅካ::

ቲኑ ሚንስቴር ፍሽኹ ምርማሪኪላ ውላጊ ኹን ቑንዚው ምልኻት ካንትስታውላስ 30ዴስ 50 ድሜኺስታ ዝኩንኩ ውላጊ ማራማርስትካማ ቑንዚ ዝኩንኩ አክምስታማ ኬሽጝስ ካሊስታው አኽⶓ ድኹዌካ::

ማይፄኑ አብጂሊ ቑንዚስ ፂኪስትጝዴስ ቤዴራማ ፄውጝ ቱስታው ጝርጄ ሚፅካይስኩ ኹን ሚንቻ ጝርጃሊ አራኹንት ታምትጛስ ፄዋኑ ጊዛይ ትንካኬ ፄውጝ እንጚ ጊዛይ ማይፄኒ አብጂሊውሳ ካንሰር ያጋው human papilarna virus /HP/ ስስ ፌያፌይጛው ኹኑዴስኪ ያኻ ጝርጃው አኹትዴስ አኽጝስ እንሳ ቑንዜ ይጉፅጝስ ዎሴንስትኹስ አራኹንት ታምትጛስ ፄውጝ፣ አልኮሎ ሚንቺስⶓ ባይጝስታ ቹዋ ካንሰሮ ያጋውሳ ቑንዜ ድፅጝስ ክትባቲ እይስታማጊ አኽⶓ ዶ/ር ዳንኤል ጌሌፅካ::

ማይፄኑሳ አብጂሊውሳ ካንሰር ካላካልጚስ አሜትዴስ እምፕላኒ ቤዴራ ካንሰሩሳ ምርማሬ ፄውጝዴስ ድምክና 20 አሜትዴስ ኩክራ ዝኩንኩሳ ኹን ማይፄኑ አብጂሊ ይስጛያሱ አኽጝስ አራኹንት ታምትጛስ ፄውⶓ ባይጝ፣ ኤች አይቢ ኤድስ ብራኻዳ ዝኩክ አቕ ክትባቴ ካፅጝ፣ አባላዘሩሳ ቑንዜ ካላካልጝጝ እሊኩሳጊ ቴግባርካዋ ክብስትጝስ ቑንዚዴስ ካላካልጚስ ካሊስታው አኽⶓ ዶ/ር ዳንኤል ጌሌፅካ::

ማይፄኒ አብጂሊ ካንሰሩ ቑንዚ አክምዴስ ጃላ እጄማ ቑንዜ ሴሜትካማ አቕ እክምኒሾ ይንታኑ ማይፄኑ አብጂሊ ቑንዚሊ ፄጌርጛው ፅኹር ዝኩክ ቑንዝካ ዝኩⶓኪላ ዶ/ር ዳንኤል እርዳትፅካ::

ማይፄኒ አብጂሊ ቑንዚ ኢንፌክሽንሊ፣ ሽል ጝንሱ ካንሰርሊ፣ አባላዘሩ ቑንዚሊ፣  ወክቶ ማንዲውላስ ይንታው ኹኑ አርፊው ብሪሊ ፄጌርጛውስታ እሊውሳ ቑንዜ ፄጌራማ ጉሪንቒዴስ ኩክራ ቑንዳፃኒ አቕ እሊው ቑንዚ ንካማ ቑንዳስቱኒዴስ ሊጊሲሜ ጊዞ አጂካማ እክምኒው ኾትሾ ይንታኑ አኽⶓ ዶ/ር ዳንኤል ድኹዌካ::

እሊው ቑንዚ ዝኩክ አቕ ማይፄኑ አብጂሊው ካንሰሩ ቑንዚስ ፂኪስትጙ አክም ኬፍቲኒ አኽⶓ ዶ/ር ዳንኤል ጌሌፅካ::  ኤች አይ ቪ ብራኻዳ ዝኩክ አቕ፣ ስኳር ቑንካ ዝኩክ፣ ብሪው ሺንኪ አክምዴስ ጃላ ያኹንኩ አቕስታ ፄጌርጙንኩ ቑንዚውሳ እጆ ካፃንኩ አቕ ቴኬምስታኑ እጁ ቑንዚ ካላካልጚውሳ አክሞ ኔኬታው አኽጝስ ማይፄኑ አብጂሊው ካንሰርስ ፂኪስትጝስ ካላንኩ አኽⶓ እርዳትፅካ::

ማይፄኑ አብጂሊው ካንሰር ታምፃንኩ ጉዳትካ ሚንችካ ያኹኒኪላ ብሪው አሬኽጝ ኬሴትስትጝ፣ ብሪ ክቢጝ አኹኪ  ብሪ ፊሲስጝ፣ ፊስቱላው ቑንዚስ ፂኪስታንታ ፄውጝ፣ ዝር ካግጝ   ሼው ካግጝ፣ ቻኺው ቱቡዳ ችግሮ ታምፃማ ቻኼ ቻኽⶓ አቲጙ ችግር፣ ኩርስጝ አኹኪ ጄሮ ካሜናቲንታ ፄውጝ፣ አከላቱ አኽቲኒ ቤን ትክምዴስ ሴጋ አኽጝስታ ፄጌርጙንኩ  ችግርካዋ ታምፃው ቑንዚ አኽⶓ ዶ/ር ዳንኤል እርዳትፅካ::

ዶ/ር ዳንኤል ዋሺኒኪ ቹዋኪ ያኻ ኹና ጄር ማይፄኒ አብጂሊ ቑንዚስ ፂኪስታቲንታ ቑንዚ ኬሴትስትጝዴስ ፍና ድሜ 10 ዴስ 15 አሜቶ ያኹንኩ ኹን ክትባቴ ካፅጝስታ ድሜ 30 ዴስ 50 አሜቶ ያኹንኩ ዴሜካ ቤዴራ ካንሰሩሳ ምርማሬ ካፃንታ እንፅኼንቶ ፌያፌይጝፅካ::