340 ሚሊዮን ዶላር ሎተሬ ዊፃንቲው ክስ

ታደለ አጋጄ

አሜሪካ ዋሽንግተን ዲሲዳ  ዝኩዋው እምፕል አሜሪካዊ ኬርትስ ሎተሪ ታምባኽ እስቱኒዴስ ፋሌንጋ 340 ሚሊዮን ዶላሩ ክሶ ዲሲ ሎተሪው ቺፅጝፂዳስታ “ፓወርቦል” እስታው ሎተሪው አችትዳ ዲግስጝ ማሊስትኾ::

ጛርት አቒ ታፍዳ እሚኹ ሎተሪው ቼፍ ዊፃንቲው ቼፍሊ እምፕል አይኔት እሺኹ ያኹኒውላ እጄማ ኩፂ ሎተሪው ቺፅጝፂ ቼፍ ኬርትስ ይፋ አኽⶓ አቕፃ::

ጆን ቺክስ እስታው አሜሪካዊ አባላምቲ ጊዝስ ፌይኹ ትር አርፊዳ እሚኹ “ፓወርቦል” ሎተሪ ዊፃንቲው ቼፍሊ ሚስልጛኒ “ኪንኪስ ፌዜዛታ ይኩኻ” ንካ::

ቺክስ ሎተሪውሳ ትኬቶ እሜማ ሎተሪው  ኤጄንሲሾ ካሳኒ ዊፃንቲ ጋቲኻኽ እስታ::

እን አቒ ጉዳዮ ካንታውስ ቢቢሲስ ዙሙኹ ኤጄንሲስ “እይስትኹ ዲብ እሚቲኹ ሎተሪ ክችክቺ ጋቲዊያኽ:: ዳላዊያኽ፣ ፃማ ክብፂዳ ዝጉቴቫኽ” ኑኑ:: ቺክስ ኩፂ ትኬቶ እሚታ ካራካርጛያውሳ ቲቢኬ አግፃ::

ቺክስ ታምብኹ ጉዳትስ ጌንዜብ ታፍዳ  ቱኒጊ ጌርክ ቺፋ አግፃው እሺኹሳ ሚፄ አሴላማ ትክላሊስ 340 ሚሊዮን ዶላር ክሶ ኤጄንሲዳ ሜሴሬታ::

“ፓወርቦል” ቴክኒካል ኬርትስ ቱስታ ጋቲዊ አቒ ዊፃንቲያኽ እስትኹሳ ዲሲዳ ዲጉንኩ ፍርድ ጝናስኩ ሴኔድካ ካንትፃ:: ሲፋማኪላ ቺክስ ሎተሬ ጄውኽ ጊዝዳ ኾቱሳ ታምትጝፂ ፍኖ ፃንኩፃው ኬች ሙካሬ ፄዋማጊ አኽⶓ ቶኬማ::

እንስ ምክኒያቲስ ቼክስ እሚኹ “ፓወርቦል” ሎተሪው ቼፍሊ ሜሴልጛው ቼፍ ታምትጝፂ ፍንዳ “ድንጌትስ” ፋ ኑስ አችት ካራካርጛውሳ ሴኔዶ ካንትፃ::

እን አቒ ዊፃንቲ አኽⶓ ካንትፃው ቼፍ ትር አርፊዳ ሹኻ ሲፍጝጚኩ ጌርክካስ ታምትጝፂ ፍንዳ ፋማ እጄ::

ኾት  ዊፃንቲያኽ ንኹ አቒ እሚኹ ቼፍ ክችክቼ ካስትስ ፉኽ ጋቲዊያኽ ንካ::

ቢቢሲ ሎተሪው ቺፅጝፂ ጉዳዮ ካንትኹስ ካሴ ዲግሱኒውላ ዙርሜ አግፅጝስ ካላያ:: ቺክስ ሎተሬ ቺፅጝፂ ውሎ ታሲⶓ፣ ስሜቶ ጉዲⶓስታ አችቤራቤርⶓ ዴሜካማ 8 ካስካዋ ማሴሬታ::አቒዉ ቲቢኪ ሪቻርድ ኢቫንስ ችሎቱ ሴኔድዳ ዴንቢኒ እሚኹ ሎተሪስታ ዊፃንቲው ቼፍ ሜሴልጛው አኽጝስ ዋኽ ሽልማቲ ቱስታዊያኽ ንካ::

እሊውሾስ ቲቢኪ ኢቫንስ አችት ኬርትኹሳ ቼፎ ሌቴፋማ ታምብኹ ጉዳትስ ካሲሲትጝ ቱስቴ ንካ::

ቲቢኪ ቢቢሲስ እይኹ ዙርሚዳ እን ክስ ዲሲው ሎተሪው ቺፅጝፂስታ ፓወርቦሎ ዴሜካማ ሎተሪው እንፅኽዳ ዝኩኹ አምንስታንትስታ ካሲስታንትዳ ካሴ ጉሽዊያኽ ንካ::

“እን ዲብ ታምትጝፂ ፍንዳ ፉኹ ቼፍ ጉዳይ ይቢቺ ጋቲዊያኽ፣ ካስትዳ ፊትስጝስ ኪሲስታውሳ ድሎ አግናኻኽ ናንኩ ኾትካ ዉንዳ ታራታርጛንታ ፄዋዊያኽ” ናኒስ ዙሜካ::

“ሎተሬ ዊፅጝ ይውሳስታ ጝን አቑሳ ይዎቶ ኪሳዋያ” ንኹ ቺክስ ፍቱ ቴርትዳ ዊፃንታ ፄዋው አኽⶓ አቓ ንካ::

እንሳ ክሶ ዊፃው ያኹኒ ባንኮ ብስጝስ አሳብ ዝኩኹ አኽⶓ ቶኬምካ:: ቼክስ ኬርትስ ዊፃንቲ እስትኹሳ ላካስ ጌንዜቦ ሎተሪስ አግፅጙ ድል ማልጛ ፅባብ ያኹስ እንስኪላ 292 ሚሊዮን አቕዴስ እምፕል እንሱ አፂው ዊፃንቲ ያኽጝስ ካሌ::