“ብሄረሰቡ ቺፅጝፂው ሰላምስ ውላጊ ቲሪንስ”

ዘውዴ በካሉ

አዊ ብሄረሰቡ ቺፅጝፂዳ ፌቴርስትኹሳ ሰላሙሳ ችግሮ ኽይጝስስታ ዊዳፌ ሰላሞ ቼሜትጝፅጝስ እንፃኽስስትካማጊ አኽጝ ጌሌፅስትኾ::

አማኻሪ ክልልዳ ናማኪ አዊ ብሄረሰቡ ቺፅጝፂዳ ፌቴርስትኹ ሰላሙ ችግርስ ሚንች ንብሬት ዎዳማ፣ አቑ ይዎት ድሳ:: ጋቻው ምክንያትስ አቕ ማይቤራዊ፣ ይኮኖሚያዊስታ ፖለቲካው ልቕልቐትካዳ ሰላምስ ፋማ ሰላምስ ቱዋቲንታ ስጋት ያኻ::

እንጃቢሪ ኬቴሙ ቺፅጝፂዳ ሰላሙስታ ፄትቲው ፅፌት ጝናሱ አላፊ ኢንስፔክተር ቢያድግልኝ ወርኩ አማኻሪ ክልልዳ ናማኪ አዊ ብሄረሰቡ ቺፅጝፂዳ ፌትርስትኹ ሰላሙ ችግር ዙራሙሪኩ እምፕልታቕዳ ጉዴቶ ታምፃማጊስታ አብት ንብሬት ዜሬፍስታማጊ አኽⶓ ጌሌፅካ:: ሰላሞ ፋያቲው ፅንፊኒ አይል እንጃቢሪ ኬቴምዳስታ ወሌን ዙራሙርካዳ ፅካቶ ታምፃማጊ አኽⶓ ጌሌፅካማ ሰላሞ ፋያው አዊው እዝብስታ ፄትቲኩ አይልካ ፃምርትጝስ እንፃኽስቴካማ ፅላቶ ካላካልጜካማጊ አኽⶓ እርዳትፅካ::

ዙራሙሪውሳ ሰላሞ ቼሜትጝፅጝስ ውላጊ አቕ ታምቦጊ ፊትጝጝ ቱስታው አኽⶓ ጉሽንኩ ኢንስፔክተር ቢያድግልኝ እንጃቢሪ ኬቴምዳኪ ያኻ እሊኩ ኬቴምካዳ ኻጐ እሜማ ቻውሳ አቔኪ ያኻ ዶርሞ ክራይታንኩሳ አቖ ጛውሳ አይቶ ሺሽጝ እንቲታኪ እሊውሳ ዳዶ ካንትፃውስታ ሰላሞ ባፃባፃው ያኹኒ ዴሜካ ፄትቲኩ አይልካስ ቶኬማንታ እንፅኼንቶ ፌያፌይጝፅካ:: ውላጊ ታምብዌን አካልካ፣ ዙራሙሪኩ ማቤር አቕ፣ ፖሊስ፣ ማሊሻስታ ፄትቲኩ አካልካ ምንግስትሊ አኽጝስ ሰላሞ ቼሜትጝፅጝስ ዜቦ ቲሬንታኪላ ኢንስፔክተር ቢያድግልኝ እንፅኼንቶ ፌያፌይጝፅካ::

አዊ ብሄረሰቡ ቺፅጝፂው ፖሊስ ሜምሪው አላፊ ኮማንደር ደመላሽ ብርሃኑ ሚንችካ አቑሳ ይዎቶ ድፃንኩ፣ አብቶስታ ንብሬቶ ዜሬፋንኩሳ ፅላትካዋ ድፅጝስ ምንግስት እጐ ኬቤርፅጙሳ እንፅኼ  እንፃኽስትካማጊ አኽⶓ ዙሜካ:: ፄትቲኩ አይልካ አቺትጜካማ እንፃኽስትጝስ እጎ ኬብርፅጙ ዝማቺስ ኬፍቲኒ ዋይሚ ሜዜጌብስታማጊ አኽⶓኪላ ኮማንደር ደመላሽ ጌሌፅካ::

ብሄረሰቡ ቺፅጝፂው እዝብ ዲቦ ካላማ ፌይፃው፣ አስቴዌላንቲስታ ሰላሞ ፋያንቲ አኽጝስ ምንግስቱዳስታ ፄትቲኩ አይልካውዳ ኬምፕዳ ቲሬማ ፅለቶ ካላካልጛማጊ አኽⶓ ኮማንደር ደመላሽ ድኹዌካ::

ብሄረሰቡ ቺፅጝፂዳ አዮ ጉዋጉሲ ወረዳዳስታ ዚጋሚ ወረዳዳ ፌቴርስታማጊ ዝኩኹ ፄትቲው ችግርስ አቕ እሺኑ ዙራሙሪዴስ ፌኔኬልጜካማጊ አኽⶓኪላ ኮማንደር ደመላሽ እርዳትፅካ::

አምቢሊ ኬቤሊዳስታ አኺቲ ኬቤሊዳ ፌቴርስታማጊ ዝኩኹ ፄትቲው ችግርስ ጝን ሌግስ ድጙስታማ፣ ጎግሊ ድጙስታማ እንቲታኪ አቑ ይዎት ድሳማጊ አኽⶓ ጉሽንኩ ኮማንደር ደመላሽ ዙራሙሪኩ ዝኩዋንትካ እሺኑ ዙራሙሪዴስ ፌኔኬልጜካማ፣ አብት ንብሬት ዋዴማማጊ አኽጝስ ምንግስትኪያኻ ዙራሙሪኩ እዝብካ ፃምርትጝስ ሰላሞ ቼሜትጝፅካማጊ አኽⶓ ድኹዌካ::

አምቢሊ፣ አኺቲ፣ ጁሚሪ፣ ሶሪትስታ አዊሺ  ኬቤልካዳ አብት ንብሬት ዜርፍስትⶓስታ ጝን ሌግስ ብብርⶓ እንቲታኪ አቒው ይዎት ድስⶓ ጉሽንኩ ኮማንደር ደመላሽ እሊኩ ወሌን ዙራሙርካ ቻ ጛጂዳ ታምቤ ንካማ ዙራሙሬ ባይፃማ ፌኔኬልጚዴስ ሰላምስ ዜቦ ቲሪጝ ፋይፃው አኽⶓ እርዳትፅካ::

ብሄረሰቡ ቺፅጝፂዳ ፌቴርስትኹ ጋቻው ምክንያትስ ንብሬት ዌዴማማ እንቲታኪ ጝን ብብራማ ጉዲስቱንኩ ማቤር አቕስ እርዳቴ ፄውጝስ ዞንሊስታ ወረዳሊ እምፕልትስ ቴቤቤርጚስ እንፃኽስታንኩ አኽⶓ ጌሌፅካ:: ጝን ዌዴሙክስ፣ አብት ንብሬቶ አቱንኩስ አቕስ ዝኩፄ ጝኖ ጊቢትጝዴስ ድምክና ቢዲሬ ዙራሙሪውሳ ሰላሞ ቼሜትጝፅጝ ቱስታው አኽጝስ ወረዳ ቺፋ ውላጊ እዝብ ሚሊሻሊ፣ ፖሊስሊ፣ ፄትቲው አካልካሊስታ ምንግስትሊ ኬምፕዳ ቲሬንታ ኮማንደር ደመላሽ እንፅኼንቶ ፌያፌይጝፅካ:: እዝቦ ሼቤርፃው ቼሜትጛያሱ ንባርዴስ ክብስስትካማ አጌሮስታ ጛጛርትጛሳ ማንዳንታኪላ እምትጝፅካማ ዙሜካ::