ዴኑ ልማት ቻሱ ዝኩዊኒስ

ታደለ አጋጄ

ዴኑ ልማት አቒያስኪ ያኻ እሊኩ ፍትሬትካስጊ ዜርፋ ሚንቼ ትክሞ እዬ:: ይቶፒያው ፌዴራሉ ሪፐብሊክ እዝቡ ዎኬልስታንትካው ኩስጚ ጝና አዋጅ ቼፍ 1065/2018 ዴን ልማቱሳ ቴኬምስትጜስታ ማንዲጜ ካንትኹስ ፍሽኹ አዋጅዳ ዴን ልማቱ ዜርፍ አይር እግልታው ኪሲ ሲፍፃው ቻኒስትዴስ ይጉፅጝስ ኽሳንቲ ፍሺ ዝኩኹ አኽጝታጊ አጌራዳ ኬፍቲኒ አችስ ዴኑ ቻፋቻፍስትⶓ ምክንያቲስ ኬሴትስታው ማይቤራዊስታ ኢኮኖሚው ችግርካዋ ኽይጝስ ዊዳፊ ዴኑ ልማትስታ  አንኬባኬብጚ ቹዋ ጉዳዬኽ ::

ዴኑ አብት አይሮ ሰንክራው ጋዝዴስ ማንዴ:: ፅንኩት ኦክስጅን አግስታታ ፄዌ:: አይሩ አኺኒው ኪሲስ ፌቴርስታውሳ እንኩዊንቶ ካላካልጝጜ:: ዴኑ አብት አቒያስ ፍትኽፅጝዴስ ፌይኹስ ዴስቴ እያውሳ እንኮኽስቶ ፌቴሬ:: ኩሪስስታ እሊኩ ዲብካስ ኽብፂ ሻራሻርስታቲታ ማንዴ:: ቤሬኽት ፌቴርስታቲኪላ ፄዌ::

እንኩዊንት ዴሜክጙ ምክንያቲስ ፌቴርስታው አይር እግልታው ኪሲስ አቒያሱ ይዎትዳ ታምባውሳ ቤዴሎ ማንዴ:: እኒጛ አጉዊዳ ዛራዛርስቱንኩጊ ውላ ዴኑ ልማትዴስ አግፅናዉ ትክምያኽ::

ያኼስጉ ይቶፒያዳ እምፕል ሹኻንቲ ያኹኽ ብቲ ዴንስ ሾፌንስቱኒውላ ኬፍቲኒ አችስ ዴን ቻፋቻፍስታማጊ አኽⶓ ሊሊትጙንኩ ፅናትካ ካንትፃና::

ቴቤቤርጙንኩ ምንግስትካው አችቱ ዴን ልማቱ ፕሮግራምስ አቴምስታው ቾይስ- ዘ ሂውማን ዴቨሎፕመንት እስትኹ ሜጋዚንዳ ጌሌፅስትኹስታ አሌሙ ቤንዳ አሜት ቺፋ 4 ሚሊዬን ሄክታር ብቲዴስ ዴን ቻፋቻፍስትኹ አኽⶓ ፅናትዳ ቶኬምስታ::

ብራዚልዳ አማዞኑ ብሄራዊ ምርምሪው ኾትዳ ማራማርጛንቲ ያኹኽ ዶክተር ፋሊና ፈረንሳይድስታ ዶክተር ፋላቪዮ ሉዊዛኦ ዴን ውላ አሌምስ እያውሳ ትክሞ ጌሌፅካ::

“ዴን እያው ትክምዴስ እምፕል ብቲው እንኩዊት ዴሜካታ ፄዋውሳ ካርቦንዳይ ኦክሳይዶ ኩፕፃማ እጄታ ፄውጝስ ኽብፂውሳ ሻራሻርስትⶓስታ ኩሬ ካላካልጝጝስ እሪውሳ ሜቴኖ ክችሴ ፤ድስጝዳ ታምቡንኩ ካዌንኩ እንሴስካው ዝኩፂ ያኻታ ፄውጝስ ዜርፋ ሚንቼ ትክሞ እዬ:: ድምክኒስኪላ ዴን ዙራሙሬ ግዲፅጝስስታ ፍትኽፅጝስ አጌላጌሌ:: እኒጛ ዙራሙሪስ ቴኬማንትካ ያኹንኩ ውላጊ ኢኮኖሚው ትክምስ ጎል ንኹ ፍሺ ዝኩኽያኽ” ናኒስ   ማራማርጛንትካ  እርዳትፃና::

ፋግቲ ለኮማ ወረዳ ዝኩዋንቲ ተስፋ አደመ  ዙራሙሪዳ ሊሊትጙንኩ ቴክልካዋ  ቴኬልⶓ ዙሜካ:: እምፕልታቕ እምፕልትስስታ ጛርትስ ቴኬልጝስ ቴኬምስታንታ ያኹንኩ ቴክልካዴስ ዲከረንስ ችግንስ ኢኮኖሚውሳ ቴኬምስታንቶ አግፅⶓ ዲብስካ:: ኢኮኖሚውሳ ትክሞ እያውሳ ዴኑሳ ልማቶ ጉድጛ አንኬባኬብጝስ ትክሞ አግፃንታ ፄውⶓ እርዳትፅካ::

እሊው አንኪሺ ጉዋጉሲ ወረዳው ዝኩዋንቲ አቶ አለማሁ መለሰ  ቴኬሉኑሳ ችግኖ ዋይጝስ ትክሞ አግፅⶓ ድኹዌካ:: ቴኬሉኑ ዴን ኢኮኖሚውሳ ትክሞ እይጝዴስ ፌይኹስ ብቲ ዙራማ ሊማታ ፄውኹ አኽⶓኪላ  ድኹዌካ::

ብሪቲሽ ኮሎምቢያ ዩንቨርስቲዳ ሹኻንቲ ዲግሪው ክንታንቲ አምሳሉ ንጋቱ ዴን ልማቱ ማራማርጛንቲ ያኻኒስ ዴን ዙራሙሬ ማንዲጝስስታ ሚፂ አግፅጝ ቴኬማው አኽⶓ ዙሜካ:: ዴን ልማት ፍትሬትስስታ አቒ ቴክልጝስ ላጛ አይኔታስ ሊሚስታውያኽ ንካ::

ዴን ፍትሬትስስታ አቒ ቴኬላማ ሊሚፃንኩ እስትካማ ላጛስ ሜዴብስታው አኽⶓ ዙሙንኩ አቶ አምሳሉ ይቶፒያዳ ሊሊትጙንኩ ስፍርካዳ ፍትሬትስ ዋጉንኩ ሊሊትጙንኩ ቴክልካ ዝኩⶓ እርዳትፅካ:: ሊሊትጙንኩ ዙሪሙርካዳ አግስታንኩ እምፕልታቕ ሊኽዴስ 40 ታፋ ያኻውሳ ትክሞ ዴኑ ልማትዴስ አግፃንኩ አኽⶓ ዙሜካ:: እንዴስ ጃላ ትክሞ አግፃንኩ ዙራሙርካ ዝኩⶓኪላ ቶኬምካ::

እንዴስ ቤዴራ ፍትሬትስ ቴኬልስቱንኩ ቴክልካ ኬውስትⶓ ቶኬሙንኩ አቶ አምሳሉ ናካ ኩፂ እምፕልታቑ ዴን እያውሳ ትክሞ እርዳትስትጝስ ጛርትስስታ እምፕልትስ ቴኬልካማጊ አግስታንኩ አኽⶓ እርዳትፅካ::

ምንግስት አሜት ቺፋ ዝማቺስ ቴኬልፃው አምሉ አሻሪው ሜርሃግብር አይሩ አኺኒውሳ ኪሴ ማንዲጝስ እስታማ ቴኬልስታማጊ አኽⶓ ቶኬምካማ ሊሊትጙንኩ እምፕልታቕኩ ቤንካ ዴሜካ እሌቱ ኢኮኖሚውሳ ትክሞ አግፅጝስ ዴን ቴኬልስታማጊ አኽⶓ ዙሜካ::

እምፕልታቕ ዴኖ ቴኬላኑ ጉዝማ እምቢታማ ትክሞ  እያዉሳ እርዳትስትጝስታ ዙራሙሪዉ አይሩ አኺኒሊ አስሜምጛውሳ ዴኖ ጎሌልጝስ  ቴኬልጝ ቱስታው አኽⶓኪላ ዙሜካ::

ባርኾቼዴስ ይንታንኩ ቴክልካዳ ትኩት እይስታማ እንፃኽስትጝዴስ ኪቻ እምቢቴካማ ትክምዳ እሼንኩ አጌራኻስኩ ቴክልካዳ ትኩቶ ፄውጝስ ቴኬልጝ ቱስታው አኽⶓ አቶ አምሳሉ እርዳትፅካ::

አጌራኻዳ ጛሬ ካሉኹ ዴኑ ኾት እላቲው አኽጝ ዴኑ ልማቱ ትክም ኬፍናቲታ ፄውⶓ ቶኬሙንኩ አቶ አምሳሉ ዴኑ ልማትስ ጛሬ ካሉኹ ኾት ቲሪትጝጝ ቱስቴኪላ ንካ::

ዴን ልማት ሚፄ አግፅጝዴስ ፊይኹስ ባርኾቼውሳ ምንዛሬ አግፅጝስኪላ ኬፍቲኒ ትክም ዝኩኹ አኽⶓ ዙሜካ::

አቶ አምሳሉ ፅናቶ ቶኬምካማ ጌሌፁኑውስታ 6ዴስ 10 ታፋሳ ኺስቴ ዴኑ ልማትሰ አጌራ ሚፄ አግፄው አኽⶓ ዙሜካ::

አጌራስ ሚንቾ ሚፄ አግፅፃው ዴኑ ልማትስ ምንግስት ሊሊቴ ትኩቶ ፄውጝስ አጌራ ፌሬምስትኹሳ ውሎ እምቢታማ ዋኽትጝፅጝስ ካሊስታው አኽⶓኪላ ዙሜካ::

ይቶፒያ አይር እግልታው ኪሲስ ፌሬምትኹሳ አስሚምጜ ሳኪትጝፅጝስ ዴን ልማትዳ ሊሊቲ ትኩትስ እንፃኽስትጝ ቱስታው አኽⶓ ዙሜካ::

ዴኑ ልማት ዎታትካስ  እንፅኺው ድል ፌቴርስታታ ፄውጝ ቱስታው አኽⶓ ዙሜካ:: ቴኬልስትኹ ዴን ትክሞ እያታ ምንግስት ቼፍጝጛማ  ጉድ እንፅኺው ዜርፍ ፌቴርስታታ ፄዋዉ አኽⶓኪላ ጌሌፅካ::