ፅንኩት ዝቒው አኹ ችግር

ታደለ አጋጄ

ይቶፒያዳ ሚንችካ ጌፄርኩ ዙራሙርካዳ አግስታንኩ እምፕልታቕኩ ቤንካስ እሌት ቺፋሱሳ ዝኩዊኔ ጉስጝስ ካሊፃው አኹ ታምብስታንት ማልጛ ዜሬቕቲኒ አኽⶓ ፅናትካ ካንትፃና:: እንስኪላ ሚንችካ እምፕልታቕኩ ቤንካ ፅንኩት ዝቒውሳ አኾ አቲጝስ አኹስ ይንታንኩ ቑንዝካስ እምስትካማ ክርጝስ ታምብⶓ ሊሊትጙንኩ ቲኑ ኾትኩ ንባርካ ቶኬማና::

ግቢስትኹ አኹ እምቢት እምቢታማ አቤሌሽስትጝስ እምፕልታቕስ እሌት ቺፋሱሳ ቴግባሮ አኮሜቻቲንታ ቻኒስቶ ታምፅጝ ጌሌፅስቴ:: አዊ ብሄረሰቡ ቺፅጝፂ ጉዋንጉዊ ወረዳ አንጓይ ኬቤሊዳኪላ ፅንኩት ዝቒው አኹ ችግር እምፕልታቕዳ ቹኒስቶ ታምፃማጊያኽ::

አቶ ስሜነህ ሙሉነህ ጉዋንጉዊ ወረዳ አንጉዋይ ኬቤሊው ዝኩዋንትካኽ:: አንጉዋይ ኬቤሊ ፅንኩት ዝቒውሳ አኾ አቲጙ ችግርስ ዝኩዊኒዳ ቻኒስት ታምባማጊ አኽⶓ ዙሜካ:: አቶ ስሜነህ ኬቤሊው ማይኬል ቲሪትጙኒዴስ ጄሜራማ አምል ኬቴምኩ ዝኩዋንትካ ፅንኩት ዝቒው አኹ ችግርስ ቤዴልስትⶓ ዲብስካ:: እን ችግር ኽይስታያታ ካቢትጝጚስ ወረዳው፣ ዞኑስታ ክልሉ አኹ ቢሩስ ካሴ ካሲኒውላ ችግርስ ዙርሜ አግፄካያስኩ አኽⶓ ዙሜካ:: እንኮጛ  ወረዳው አኹ ፅፌት ጝና አኾ ግሽፅጝስ አምፕል ብቲዳ አኹ ፋማ እምፕልታቕ ቴኬምስታሺንኩ አኽⶓ ቶኬምካማ ቴኬምስታንትካ እምፕልታቑ ቼፍ ሚንቺጝ አኹ አምቢት እምቢታማ አቤሌሽስታታ ፄውስትኹ አኽⶓ ዙሜካ::

እንኮጛ ግቢስትኹ ፅንኩት ዝቒው አኹ አኽዳ ዝኩንኩ አክኽካ አቤሌሽስትካማ ትክሞ እይⶓ ቲሪፅⶓ ዙሜካ:: አንጉዋይ ኬቤሊ አምል ኬቴምዳ ዝኩዋንኩ እምፕልታቑ ቼፍ ሲዚ ሊኻዴስ ጃላ አኽጝስ ግቢስትኹ ፅንኩት ዝቒው አኹ ቴኬምስታንትካው ቼፍሊ ካንትስታኒ ዳላቲው አኽⶓኪላ እንክርፄካ አቶ ስሜነህ:: ኬቤሊኩ ኾትሾ ይንታንኩ እምፕልታቕ ዝቓኑሳ አኾ አግፅጝስ ካላቲንኩ አኽⶓኪላ ዙሜካ::

ኬቤሊታ ሊሊትጙንኩ ዙራሙርካዳ ፅንኩት ዝቒው አኹ ግቢስታማ አግልግሎቴ እያማጊ አኽⶓ ቶኬሙንኩ አቶ ስሜነህ ማልጛ ባስኹ ኩፅኒ  ቹዋ ኬቤሊው ማይኬልዳ አኽⶓ እርዳትፅካ::

ፅንኩት ዝቒውሳ አኾ አግፅጝስ ናኒስ ኬቤሊኩ ዝኩዋንትካ እምፕል ሳትዴስ ጃላ እንዜጝጝስ ቴሮ ማንዴካማ፤ ብኑሳ አኾ ችምቤካማ ቴኬምስታንኩ አኽⶓ ዙሜካ::

እንኪላ ፃንኩቶ ማንዳያሱ አኹ አኺኒ ባንታ ሊሊትጙንኩ አኹስ ይንታንኩ ቑንዝካስ እምፕልታቕ ፂኪስትካማጊ ቲንዳኪላ ቤዴሎ ታምፅⶓ ዙሜካ:: ሚንቺትስ ኬቤሊታ እምፕልታቕ ቑንዳስትካማ ካሳኒ ጃርዲያስስታ አሜባው ቑንዚስ እምስትጝስ እክምኒስ ፍሻኑ ጌንዜቡ ፍሺ ኢኮኖሚዳ ቻኒስቶ ታምፅኹ አኽⶓኪላ አቶ ስሜነህ ዙሜካ::

እምፕልታቕ አኾ አግጝስ ንካማ ሚንቾ ጊዞ ፌይፅጝስታ እንፅኼ እንፃኽስታኑ ጊዝ ባኬናማጊ አኽⶓኪላ ጉሽካ::

ኬቴማዳ ስልኼ ዋይጝስ ቺትጛንኩ ዴሜካ አኹ ችግርስ ሜሬርስትካማ እንፅኼ ቲሪፅⶓኺስታ ታምቡንኩ ዝኩⶓኪላ ጌሌፅካ:: እንስኪላ እምፕልታቕዳ ኢኮኖሚ ችግር ታምባማጊ አኽⶓ እርዳትፅካ::

ኬቤሊኩ ዝኩዋንትካ ዎሌን ኬቤሊዴስ ክዳማጃዴስ እምፕል ጄሪካን አኾ ፅካ ብሮ ኺስታ ኬይጝስ ጄዌካማ ቴኬምስታኑ አኽⶓኪላ አቶ ስሜነህ ዲብስካ:: ፃንኩቶ ማንዳኑላ ይጉዋማ ዝቓኑ አኹ እላቲው አኽⶓኽ ጌሌፁኑ::

አቶ ስሜነህ ዙሙኑውስታ ኬቤሊዳ እንኮጛ ግቢስትኹ እምፕል አኹዳ ቴኬምስታንትካ ሚንችካ አኽጝስ ቴሮ ማንዴካማጊ ችምባና:: አኾ እን ችምፔ ችምፔዳ ጛርት አቕ ጌውስጜካማጊ ኬቤሊዳ ክርፂ ቺፅጝፂው ችግር ፌቴርስታማጊ አኽⶓ ዙሜካ:: ግቢስትኹሳ አኾ ቱስቲስ እሚጝዳ እንዳርማኪ ችግር እላኽ ኑንኩ አቶ ስሜነህ:: አኾ ቴኬምስታንትካ ሚንቺጝ ዴሜካ አኽዳ ዝኩንኩ አክኽካ አቤሌሽስትጝስ ትክምዴስ ሴጋ አኽⶓ እንክርፄካ:: ናካኪላ ያኹኒ እንኮጛ ግቢስትኹ አኹ አቤሌሽስታማ ቲሬ ንካ::

ወረዳው አኹ ፅፌት ጝናሳ አኹ አቤሌሽስትⶓ ድኹዋኒ ኪስስታው አክኺ ዝኮ ናኑሳ ዙርሜ አይⶓ ዲብስካ:: ላንቡሳኺስታ ኩፂ አኹ ኮሚቴ አክኼ ጄዋማ አግጝስ ካሊስታያሱ አኽⶓ እርዳትፅካ::

እሊው አንጉዋይ ኬቤሊው ዝኩዋንቲ አቶ ካሳሁን ፀጋ እምፕል ኬቴምዳ ፅንኩት ዝቒው አኹ ችግርስ እምፕልታቕ ብኑሳ አኾ ችምቤካማ አግጝስ ስግልዴስ ኻሮ ኺስታ ቴሮ ማንዲትጜካማ ቴኬምስታኑ አኽⶓ ቶኬምካማ እንኮጛ ምንግስት ግቢትፅኹ ፅንኩት ዝቒው አኹ ቴኬምስታንትካው ሚንቺትስ አቤሌሽስታማ ትክሞ እይጝስ ካሊስታያላ ንካ:: ብኑሳ አኾ ዝቓኒ አኹስ ይንቱንኩ ቑንዝካስ ፂኪስትካማ ቲንዳ ኬፍቲኒ ያኹኽሳ ቻኒስቶ ታምፅⶓ ዲብስካ::

ወረዳውሳ አኹ ፅፌት ጝናሳ ካቢትጚስ አኹ ግቢስታያታ ካሲናውላ ቤጄት እላኽ ንጝስ ዙርሜ እያንኩ አኽⶓ ዙሙንኩ አቶ ካሳሁን ኬቤሊው አኹሳ ችግሮ ኽይጝስ ክልልስ አምስታኽ እስታውሳ ዙርሜ እይⶓኪላ ዙሜካ::

ኬቤሊኩ ዝኩዋንትካ አኹሳ ችግሮ ኽይጝስ እንዴስ ቤዴራ ግርቡሳ እርዳቴ ፄውⶓ ጌሌፅካማ ናካኪላ ዋሺኒኪ አኺኒስ አኹ ግቢስታታ ፋይፃውሳጊ እርዳቴ ፄዋንኩ አኽⶓ ዙሜካ::

ጉዋንጊ ወራዳው አኹስታ ኢነርጂው ፅፌት ጝናሱ አላፊ አቶ ተሻይነህ አሳዬ ጛሾስ ወረዳታ ፅንኩት ዝቒው አኹ ታምብስታንት ሊኽዴስ 67 ታፋ አኽⶓ ቶኬምካማ ፅንኩት ዝቒውሳ አኾ ውላ ዙራሙርካስ ታምፅጝስ ኩፂ እንፃኽስትናው ሚንች እንፅኺ ይጉዌ ንካ። አንጉዋይ ኬቤሊዳ እንዴስ ቤዴራ አኾ አቲጝስ እምፕልታቕ ቼጌርስታሺⶓ ጌሌፁንኩ አቶ ተሻይነህ ፌይኹ አሜትዳ እምፕል ቦንቢው አኹ ግሽስታማ ፋታ ፄውስታ ንካ። ያኼስጉ ኬቤሊዳ እንኮጛ ግሽስትኹ አኹ አቤሌሽስታማ እምፕልታቕስ አግልግሎቴ እይⶓ ቲሪፃ ንካ።

ኬቤሊዳ ቲሪትጙኽ አኹ ኮሚቴ አቤሌሽስትኹሳ አክኼ ጄውጝስ ፄጌንስታታ ዙሚትጝናናጊያኽ ኑንኩ አላፊ ግሽስታማ ፉኹ አኹ ኬቤሊኩ ዝኩዋንትካስ ዳላቲው አኽጝስ ይንታውስ አሜትስ ቤጄት አግስቱኒጊ እንፃኽስትናዊያኽ ንካ። ኬቤሊውሳ አኹሳ ችግሮ ክልልዴስ ውማይቲኒ ይንታማ ፅናቶ ካስጝፅⶓ ቶኬሙንኩ አቶ ተሻይነህ ኬሽኹሳ አኾ ግሽፅጝስ እምፕልታቕ ቴኬምስታንታ ያኻንታ እንፃኽስትናናጊያኽ ኑኑ። እንዴስ ቤዴራ ግሽስትኹ አኹ እምቢት እምቢታማ አቤሌሽስትጙ ምክኒያት ፋብሪኪዳ ግቢስታንኩ አኹኩ አክኽካው ችግርስስታ እምፕልታቕ ቱስቲስ እሚጙ ዳንጉኒስ አኽⶓ ጌሌፁንኩ አላፊ እን ችግርስኪላ እምፕልታቖ ክንትፅጝ ፋይፃዊያኽ ንካ። ኬቤሊታ ቲሪትጙኹ አኹ ኮሚቴ እምፕልታቕ አኾ ዋታጛ ቴኬምስታኑውስታ ክንትፅጝ ቱስቴ ንካ። እምፕልታቕ ዴሜካ ግቢስትኹሳ አኾ ቱስቲስ እሚጝ ፋይፃው አኽⶓ ጌሌፅካ። አቶ ተሻነህ እምትጝፄካ “ክልሉ ሰላሙስታ ፄትቲው ችግርስታ ሜዴብስትኹ በጄት እላቲው አኽጝስ እን አሜትዳ ግቢስታው አኹ አላኽ” ኑኑ።