ፅንጋኺ ሚንቹኹ ክንቲው ዝቤን

ዘውዴ በካሉ

ክንቲ እምፕል አጌራው ማይቤራዊ፣ ይኮኖሚያዊስታ ፖለቲካዊ ጉዳይካው ልግስኒስ ቹዋ ስሪያኽ:: አጌራውሳስታ ጛርትአ            ቑሳ ልግስኔ ሲፍፅጝስ እንቲታኪ እምፕልታቑሳ አንኩዋሊውሳ ኪሴ ያግጝስ ክንቲ ኽሳንቲ ፍሺ ዝኩኺያኽ:: ሌጌሱንኩ አጌርካው ልግሱ ዳድ ክንቲ አኽⶓ ሊሊትጙንኩ ፁፍኩ ንባርካ ካንትፃና:: ሌጌስጝዳ ዝኩንኩ አጌርካው ልግስኒው ኩንቹዳ ታምብጝስ ክንቲስ ዝኩኽ ካንቲ ኬፍቲኒያኽ:: አጌራኻሱ ክንቲው ቴርት ክንቲውሳ ፃንኩቶ ኬሽጝፅጝስስታ ክንቲውሳ ታምብስታንቶ እሳንጝፅጝስ ክንቲውሳ ፍኖታ ካርቴ ኬሽጝፅካማጊ እንፃኽስታና:: አጌርኻዳ ክንቲው ፍኖተ ካርቲ ጊዝዴስ ጊዝሾ ኪስስትጝስ ኬሽጝጝ ክንቲውሳ ፃንኪቶ ማንዲፅጝስስታ ክንቲውሳ ታምብስታንቶ እሳንጝፅጝስ ያኹኒኪላ ክንቲው ፍኖተ ካርቲ ኪስስትጝስ ግብአትካው ዲግስጝጚ ክንታትካው ዋይሚዳስታ ክንቲዳ ቻኒስቶ ታምፃ::

አማኻሪ ክልልዳ 2016 ም.አሜቱ ክንቲው ዝቤንዳ እምፕላንቲ ክንቲ ድንቤሩ ክንቲ አሌድስታማ ላጛንቲ ክንቲ ድንቤሩ ክንቲ ጄሜራ:: 2016 ክንቲው ዝቤንዳ ክንቲው ፍኖተ ካርቲ ኪስስትⶓ ሲፋማ ሜፃፋ ክንታንትካስ ወክትስ ዲጋውላስ ይጉጝ እንቲታኪ አጌራኻዳ ናማኪ አማኻሪ ክልልዳ ፌቴርስትኹ ስላሙ አኼናኻዳ ያኼካማ ክንታንትካ ወትጛይ ክንትካማጊ ዝኩኑ? ናውሳ ካንትኹስ ናካስ አንቤብፅጝስ ፋኑኻ::

አማኻሪ ክልልዳ ፌቴርስትኹ ሰላሙ አኺኒስ ውላጊ ክንቲ ጝንካ ክንቲው ማንድዳ አግስቴካማ ክንትጝስ ካልካያላኽ፤ ያኼስጉ እምፕል እምፕልካ ልቓ ሰላም ዝኩክ ዙራሙርካ ክንትጝ ክንትፅጙሳ ቴርቶ ካስጝፄካማ እምፕላንቲ ክንቲው ድንቤሩ ክንቲ አሌድስታማ ላጛንቲ ክንቲው ድንቤሩ ክንትጝ ክንትፅጙ ቴርት ካስጛማጊ ዝኩክ ዙራሙርካዴስ አዊ ብሄረሰቡ ቺፅጝፂ ጉዋንጉዋ ወረዳ ኪቢ እምፕልቲስታ ክቻክቺ ክንቲ ጝና እምፕልያኽ:: ኪቢ እምፕላንቲ ክቻክቺ ክንቲ ጝናስኩ ክንታንትካ፣ ክንትፃንቲስታ ክንቲ ጝናሱ ቺፅጝፂ ጛራ 2016 ክንቲው ዝቤኑ እምፕላንቲ ክንቲውሳ ድንቤሩሳ ክንትጝ ክንትፅጙሳ ካስቶስታ ሜዜጌብስትኹሳ ዋይሜ ካንትኹስ አውጚው ትርት ቤናሊ እጂጜ ፄዌካ::

ክንታንቲ ፀጋዬ ፈንታሁን ኪቢ እምፕላንቲስታ ክቻክቺ ክንቲ ጝናዳ ሶኼታንቲ ቤኑ ክንታንቲያኽ:: 2016 ም.አሜት ክንቲው ዝቤንዳ እምፕላንቲ ክንቲው ድንቤሩ ክንቲ ክርፂ እሺኹ አኽⶓ ድኹዋ:: ሶኼታንቲ ቤኑ ክንታንቲ አኽጝስ ቲጋማ ፂኒሳው አኽጝስ 11 ሜፃፎ ክንታኑዴስ 1 ሻይ ሊኺዴስ 1ሻይ 40 ዋይሜ ሜዜጌብፁኹ አኽⶓ ዲብሳ:: እን ዋይሚ ሜዜጌብስትጝስ ካሉኽ ክንቲው ፍኖተ ካርቲ ዲጊስ ኪስስትኹ አኽጝስ ሜፃፍ ዋኽትጛውላስ ይጉኒኪላ ክንታንትካው ፍሺ ኬፍቲኒ አኽⶓ ክንታንቲ ፀጋዬ ድኹዋ::

እምፕላንቲ ክንቲው ድንቤሩ ዋይሚ ማንዲስትኹሳ ላካ ጋቲው አኽⶓ ድኹዋ:: ክንታንቲ ፀጋዬ ግብአት ዋኽትጛውላስ ይጉጝ ቻኒስቶ ታምፁኒኪላ ላጛንቲ ክንቲው ድንቤርዳ እንዴስ ጃላ ዋይሜ ሜዜጌብፅጝስ ቴርትⶓ ዙማ::

ክንታንቲ ፀጋዬ 2016 ም.አሜትዳ አጌርታጊ ፉኽ እስካዊ ክንቲው ፍኖተ ካርቲታጊ ዋልታንቲ ቤንኩስታ 8ንቲ ቤንኩ ክንታንትካ ክልሉ አችስ ፍታኔ ፌቴንስታንኩ አኽጝስ ፍታኒስ እርዳታንኩስታ ስካዊ ፍኖተ ካርቲስ ቴርትኹ ሜፃፍስ ቴርትኹ እርዳታው ሜፃፍ ላይበራሪዳ እንኩርስታታ እንቲታኪ ክንትፃንትካ ካሴ ቴርስካማ ክንታንትካስ እይኒ እንዴስ ጃላ ዋይሚስታ አኽጝስ ካላው አኽⶓ ድኹዋ:: ክንቲ ጝና ካላው እክምስ እርዳታታኪላ እንፅኼንቶ ፊያፌይጝፃ::

ክንታንታ ትሩነሽ ብርሃን ኪቢ እምፕላንቲስታ ክቻክቺ ክንቲ ጝናዳ ላጜታንቲ ቤንቲ ክንታንታ ታኹስ 2016 ክንቲው ዝቤኑ እምፕላንቲ ክንቲው ድንቤሩ ዋይሚስ ዴስቴና አኽⶓ ዙሜ:: ክንትፃንትካ ቤኑ ክንትፂ ሜፃፍዴስ ድምክና ክንታንትካውሳ አንኩዋሌ ጊምባውስታ ኽስትስ አንቤብጝስ ጉሽጝፃውሳ ካሴ ቴርስካማ ክንታንትካስ እይካማጊ አኽⶓ ዲብስታ::

ላይብራሪዳ ዝኩንኩ ሜፃፍካ ፍንቲኒ ክንቲው ፍኖተ ካርቲስ ዲጉንኩ አኽጝስ ስካዊ ሜፃፍስ እርዳታንኩ ሜፃፍካ ቴርትካማ ዲጉኒጊ ላጛንቲ ክንቲው ድንቤርዳ ኬሽኹሳ ዋይሜ ሜዜጌብፅጝስ ቴርትⶓ ድኹታ::

ኪቢ እምፕላንቲስታ ክቻክቺ ክንቲ ጝናሱ ክንትፃንቲ የኔአለም ሃይሉ ኪቢ ክንቲ ጝናታጊ 2016 ም.አሜት ክንቲው ዝቤንዳ እምፕላንቲ ክንቲው ድንቤሩ ዋይሚ ክርፂ አኽⶓ ድኹዌካ:: 2016 ም.አሜቱ ክንትጝ ክንትፅጙ ቴርት እንዴስ ፍናዴስ ሊሊት ንኹ አኽⶓ ጉሽንኩ ከንትፃንቲ የኔአለም ስካዊ ሜፃፍ ክንታንትካስ ዋኽትጛያሱ አኽጝስ ክንትፃንትካ sofit cppy ቴኬምስትጝስ ክንታንትካስ ኮፓ  ፄውካማስታ ፃርኪ ስንኪዳ ፃፌካማጊ ክንትፃኑ አኽⶓ ድኹዌካ:: ክንታንትካ እን ሜፃፉ ችግር ዝኩኒኪላ ሜዜጌብፁኑ ዋይሚ ክርፂ አኽⶓኪላ ክንትፃንቲ የኔአለም ድኹዌካ::

አጌርታጊ 2016 ክንቲው ዝቤንዳ ዋልታንቲስታ 8ንቲ ቤንኩ ክንታንትካ ክልሉ አችስ  ፍታኔ ፌቴንስታንኩ አኽጝስ ላጛንቲ ክንቲው ድንቤርዳኪላ ክርፂ ዋይሚ ሜዜጌብስታታስታ ጛጛርትጛሳስታ ክንቲ ጝናሳ እቑፃው ዋይሚ ሜዜጌብስታታ እንፃኽስትካማጊ አኽⶓ ክንትፃንቲ ዲብስካ:: ዋልታንቲ ቤንኩ ክንታንትካስ ዋልታንቲ ቤኑ ክንቲዴስ ድምክና ክዳማ አድጉዊዳስታ ፊቲ ጊዝዳ አንኩዋንቲ ቤኑሳ ክንቴ ካቤካማጊስታ ካሴ ክንትፃንትካ ቴርስካማ ክንታንትካስ እይካማጊ፤ እንቲታኪ ሶኼታንቲ ቤንካስ ላጜታንቲ ቤኑሳ ክንቴ ካቤካማጊ ክንትፃንትካ ፊቴ ጊዝስ ክንታንትካዋ እርዳትካማጊ አኽⶓ ክንትፃንቲ የኔ አለም ዙሜካ::

ኪቢ ክንቲ ጝናዳ 8ንቲ ቤንዳ 47 ክንታንትካ ሊኽዴስ 95 ታፋሳስታ እንዴስ ጃላ ዋይሜ ሜዜጌብፅⶓ ድኹንኩ ክንትፃንቲ 50 ታፋዴስ ኩክራ ዋይሜ ሜዜጌብፁንኩ ላጛ ክንታንትካስ አክሞ ሌጌፃንታ ቲቶሪያልስኪ ያኻ ፊቲ  ጊዝስ ክንትፅጝስ ላጛንቲ ክንቲው ድንቤርዳ 90ዋስታ እንዴስ ጃላ ዋይሜ ሜዜጌብፃንታ እንፃኽስትካማጊ አኽⶓ ድኹዌካ::

ኪቢ እምፕላንቲ አችስ ክቻክቺ ክንቲ ጝናሱ ጛሪ አቶ ያዘው ከፋለ ኪቢ ክንቲ ጝናዳ ትክላሊስ 8 ሊኻ 46 ክንታንትካ ዝኩⶓ ጌሌፅካ::

2016 ም.አሜት ክንቲው ዝቤንዳ እምፕላንቲ ክንቲው ዝቤንዳ ማዜጌብስትኹ ዋይሚ 2015 ም.አሜትዳ ሜዜጌብስትኹዴስ ሊኽዴስ 25 ታፋ ኪሲ ዝኩⶓ ድኹዌካ:: 846 ክንታንትካ ክቻዴስ 50ስታ አንዴስ ኩክራ ዋይሜ ሜዜጌብፁንኩ 24 ክንታንትካ አኽⶓ ጉሹንኩ አቶ ያዘው 24 ክንታንትካ ላጛንቲ ክንቲው ድንቤርዳ አፄብካዴስ ጃላ ዋይሜ ሜዜጌብፃንታ ቲቶሪያልስ ክንትፃንትካ እርዳታንታስታ አፄብካሊ እርዳትጛንታ ፄውስታማጊ አኽⶓ እርዳትፅካ::

ክንታንትካው ዋይሚዳ ቻኒስት ያኹኽ ክንቲው ፍኖታ ካርቲ ኪስስትጝሊ እምትጛማስታ ክንቲጝናሱ ግንባቲ ክቼያሱ አኽጝስ ካላው አኽⶓ አቶ ያዘው ጉሽካ:: ይንታውዳ ኬሽኹ ዋይሚ ሜዜጌብስታታ ሜፃፎስታ ፍይፃውሳ ግብአቶ ዋኽትጝፅጙ እንፅኺ እንፃኽስታታ እክድ እምስትⶓ ዙሜካ:: ክንቲ ጝናሱሳ እንፄ /ግንባቴ/ ክንትፂ ቤን ክቼማ ክንታንትካውሳ አንኩዋሌ ጉሳታ ኢትዮ ጀርመን እስትኹ አችት ክንቲ ጝናሳ ጊቢትጝስ ፕሮጀክቶ ኬሬፃማ እንፅኼ ጄሜራማጊ አኽጝስ ላጛንቲ ክንቲው ድንቤርዳ ክርፂ ዋይሜ ሜዜጌብስታታ፤ ክንትፃንትካ እክድስ ጉስስታንታ ክንቲ ጝናሱ ጛሪስታ ክንትፃንትካ እምፕልትስ እንፃኽስታንኩ አኽⶓ እርዳትፅካ::

አዊ ብሄረሰቡ ቺፅጝፂ ጉዋንጉዊ ወረዳ ክንቲ ፅፌት ጝናሱ አላፊ አቶ ኤፍሬም አላምረው 2016 ም.አሜቱ እምፕላንቲ ክንቲ ድንቤሩ ክንትጝ ክንትፅጙ ቴርት አሌድስታማ ላጛንቲ ክንቲ ድንቤሩሳ ክንቴ ጄሜርⶓ ጌሌፅካ:: ጉዋንጉዊ ወረዳዳ 69 ክንቲ ጝንካ ዝኩⶓ ዙሙንኩ አቶ ኤፍሬም አጌራው ሰላሙ አኺኒስ ሚንችካ ክንቲ ጝንካ ክንቴ ልሙኒኪላ ጉዋንጉዋ ወረዳዳ እምፕሉላ ክንቲ ጝና ክንቴ ኬውጝፃያሱ አኽⶓ ድኹዌካ::

እምፕላንቲ ክንቲው ድንቤሩ ዋይሚ ማንዲስታውሳ ላካ ሜዜጌብስታውላስ ይጉኽ እምፕል ምክንያት ሜፃፍ እንፂጙ ችግር አኽⶓ ጉሽንኩ አቶ ኤፍሬም ላጛንቲ ክንቲ ድንቤርዳ ካቢስታቲታ አጌሩ ሰላሙ አኺኒስ ምንግስት ሜፃፎ ዲግሳውላስ ይጉዋኒ ማርኮስዴስ ወረዳው ፍሺስ 30ሻይዴስ ጃላ ሜፃፎ ወረዳሾ ሚፅⶓ እርዳትፅካ:: ወረዳ 45 ሻይዴስ ጃላ ፍሼ ፍሽጝስ ላጛንቲ ክንቲ ድንቤርዳ ክርፄ ዋይሜ ሜዜጌብፃንታ ትኩትስ እንፃኽስትካማጊ አኽⶓኪላ ድኹዌካ:: አጌራው ሰላሙ አኺኔ ዋይሚዳ ቻኒስቶ ታምፃቲታ ፄትቲኩ አካልካ፣ ሚሊሻ፣ ወረዳው ውማይቴንካስታ እዝብ ፃምርትስ ቴቤቤርጛካማ እንፃኽስትካማጊ አኽⶓ አቶ አፍሬም ጌሌፅካ::

2016 ም.አሜቱ ክንቲው ዝቤንዳ ክርፂ ዋይሚ ሜዜጌብስታታ ክንቲ ጝና ክንታንትካስ አሜችኹ ቤን ያኻታ እንፂስ ጊቢታማ፣ ኬቴምዴስ ጌፄሮ ኺስታ ድጋፍስ እርዳትጝስስታ ግብአቶ ዋኽትጝፃማ ዲግስጝስ ወረዳ እክድስ እንፃኽስታማጊ አኽⶓ ድኹዌካ:: ክንቲው ፃንኩትዳስታ ክንቲው ታምብስታንትዳ ሰላሙ አኺኒ ችግሮ ታምፃቲታ እዝብኪ ያኻ ፄትቲኩ አካልካ ፃምርትስ እንፃኽስትጝ ቱስታው አኽⶓ ጉሸንኩ አቶ ኤፍሬም ምንግስት ክንቲው ኾትስ እሊኩ እንፅኺኩ ኾትካታጊ ትኩቶ እያማ እንፃኽስታታኪላ እንፅኼንቶ ፌያፌይጝፅካ::