ቻራቲዴስ ፊቱኹ ይቶፒያውጋሺ

ታደለ አጋጄ

ዮናይትድ ኪንግደም መክደላዴስ ዎሬሙ ወክትስ ይቶፒያዴስ ዜሬፍስታማ ካስኹ ጋሺ ቻራቲስ ፉኒዴስ ፋሌንጋ ይቶፒያ ክሬቴ ዲግስታኒ ሴሬዝስትጝ ጌሌፅስትኾ::

ማኺቲ አውሮፓው ዝቤን ቼፍታ 1868ዳ እሺኹ መክደላው ዎሬምዳ ብሪታንያኩ ውታድርካስ ዜሬፍስታማ ካፅስታ::

አንደርሰን ኤንድ ጋርላንድ እስትኹ ቻራቲዉ ኩባንያ ጋሼ ቻራቲስ ዋይጝስ ሰሜን ምስራክ ኒውካስትልዳ ይካቲት 21/2016 ም.አ እክዶ እሜሺኹ አኽጝ ጌሌፅስታ::

“አኺኔ ትንካኪስ ጋማጋምኑኒዴስ ፋሌንጋ ጋሺ ቻራቲው ዝርዝርዴስ ፋታ ዎሴንና:: ጉዳዮ እንግራ ካንታንታ ዋያንትካሾ ዙርፅና” ናኒስ አንደርሰን ኤንድ ጋርላንዱ ካሎ ቻቤልፃንቲ ብሪታንያው ጋዚቲስ ዘ ቮይስስ ዙሜካ::

ይቶፒያው ምንግስት ጋሺው ቻራቲ ሴሬዝስትጝ “ልግዲ ውሳኒ” ኑስ ማኺቴ አጌራኻሾ ዙርፅጙ ካስትዳ ቴስፌ እንኩርⶓ ሮይተርስ አብኑ ኾትስ እይኹ ጊሊፂዳ አቕፃ:: ያኼስጉ ቻራቲው ኩባንያ ቻራቴ ሴሬዝጙ ምክኒያት ይቶፒያው ምንግስት ዜሬፍስቱንኩ ማኼትካ ዙራንታ ዲግኹ ካሲሊ ታምትጚ  እላ እስታ::

ጋሺ ቻራቲስ ዋይስትጝስ ዲግጝ ጌሌፅስትኹ ወክትዳ ይቶፒያኩ ስልታንዌን ቻራቴ “ቱስታ ጋቲውስታ ምግባር ፅንታ ዳንጉኹ” ኑስ ጌሌፃ:: አፄ ቴዎድሮስ መክደላዳ 1868 ም.አ እንግሊዝ አጌርዴስ ይንቱንኩ 32 ሻይ ውታድርካሊ ሴብትጜካማ ጛጛርትጛሳ ድፅⶓ ሲፋማ አጌራኻዴስ ኬፍቲኒስ ዜሬፍጝ ፌፄምስትⶓ ታሪክኩ ሜዝጌብካ ታክስፃና::

እንግሊዙ ዎሬም ማኼትካ መክደላዴስ ካፃኒስ 15 እኒስስታ 200 ብቕልስ እንዜጝትጝፅጝስ ቴኬምስትⶓ ንቫርካ ካንትፃና::

ያኼስጉ እንግሊዙ ዎሬም አፄ ቴዎድሮስ እንፄዋሺኩ ስሬንካ ባይፅጝስያኽ ኑኒውላ ንጉሱ ኮንዳሊዴስ ድምክኒስ ሚስኪሌስታ ታፉሳ ቲባኔ፤ ሸሚዞስታ ሽጉቶጊ ዜሬፍካማ ካፅካ::

እንዴስ ድምክና ሜፃፍካ፣ ሊሊትጙንኩ ወርክዴስ ግቢስቱንኩ ማኼትካ፣ ሜንፌሳዊዉ ስል፣ ታቡት ታሪክኩስታ ይልኩ ማኼትካ ይጉዋኑላስ ዜሬፍስታ:: ማኼትካ ሌግስ ድጙስትካ፤ ሜፃፍካዋጊ ቔድፅካ:: ድምክኒስኪላ እናጛ ጊዛይ ላጜታ አሚቴ ጄር እሺኹ ልኡል አለማየሁ ቴዎድሮሶ ካፁንኩ ያኻኒስ ግፍስ ኩጝኪላ ታክስስቴ::

ይቶፒያ ባዊንድሶር ካስትልዳ ዴውስትኹሳ ልኡል አለማየሁሳ አፅሞ ዙርፃንታ ካሴ ዲጊስቱኒውላ ባኪንግሃም ምንግስት ጝናዳ ቻቤልስቶ አግፃያ:: ይቶፒያ መክደላዴስ ዜሬፍስቱንኩ ሚሊዮን ዶላርስ ጋሚስታንኩ ማኼትካ ዙርፄታ ሊሊትጙንኩ እንግሊዝኩ ኾትካስ ካቢትጝጜስ ካሴ ዲግስቱስ እጂቴ::