ዩኒቨርስቲሾ ሚፅፂ ፍታኒው ምዝጋቢ ካስጝጛማጊያኽ

ታደለ አጋጄ

12ንቲ ቤኑ አጌር አቡቑ ፍታኔ ካፅጝስ 670 ሻይዴስ ጃላ ክንታንትካ ሜዜጌብስትጝ ጌሌፅስትኾ::

ንጙዊኒ 12ንቲ ቤኑ አጌር አቡቑሳ ፍታኔ ካፅጝስ 670 ሻይዴስ ጃላ ክንታንትካው ምዝጋቢ ካስጝⶓ ክንቲው ምዛኒስታ ፍታኒው አግልግሎቲ ጌሌፃ::

ክንቲው ምዛኒስታ ፍታኒው አግልግሎቲው ቹዋ ዳይሬክተር እሸቱ ከበደ ዶ/ር ኢዜአስ እዩኑ ጊሊፂዳ አጌር አቡቑ አችስ 12ንቲ ቤኑሳ ፍታኔ ሳኪትጙኽ ዳድስ አኮሜችጝስታታ ቤዴራ ቴርቱ እንፅኺ እንፃኽስስታማጊ አኽⶓ ዙሜካ::

ክንታንትካ ፌቴንስታንኩሳ ክንቲኩ አይኔትካዋ ያቔካማ  ቤዴራ ቴርቶ ፄዋንታ ታምብዌንካ አካልካሊ እንፅኽካ ቲቢቢርጚስ  አኮሜችካማጊ አኽⶓ ጉሽካ::

ፄትቲውስታ ሰላሙ ችግር ዝኩክ እምፕልካ እምፕልካ ዙራሙርካዴስ ይጎ ክንታንትካው ምዝጋቢ ካስጝጛማ አሌድስትⶓ ቹዋ ዳይሬክተር እሸቱ ቶኬምካ:: እንስኪላ ላንቡሳኺስታ 670 ሻይዴስ ጃላ ክንታንትካ ፍታኔ ካፅጝስ ሜዜጌብስትⶓ ጌሌፅካ::

ፄትቲውስታ ሰላሙ ችግር ዝኩክ ዙራሙርካዳ አግስታንኩ ፌቴንስታንትካስ ክንታንትካው ምዝጋቢ እን ሶኼትዳ አኮሜችስታው አኽⶓ  ቼሜትጝፄካ ቹዋ ዳይሬክተር እሽቱ ከበደ::

ፍታኒው ቴርቱ እንፅኺ አጌራውሳ ክንቲውሳ ቴርቶ ሲፋማስታ ክንታንዋ ቱስቲስ ሊኪጝስ ካሊፃው ዳድስ ቴርትⶓ ቶኬሙንኩ ዶክተር እሸቱ ፍታኒው እትሜት አሌድስታማጊ አኽⶓ ዙሜካ::

ሲፋውዳ ፍታኔ አቴምፅጙ ካስት ጄሜራው አኽⶓ ቶኬምካ::

ፍታኒ እይስታው ጌርክ ፍንሾስ ይፋ ፄውስታዊያኽ እስታ::

ይቶፒያው ክንቲው ሚኒስትር ፕሮፌሰር ብርሃኑ ነጋ ኢቢሲሊ ፄውኑ እጂጚዳ ክንቲዳ ፄውስትኹ ኬሽጝጚስ ኪሲ ይንታማጊ አኽⶓ ዙሜካ::

12ንቲ ቤኑ ዩንቨርስቲው ሚፅፂ ፍታኒዳ ሜዜጌብስትኹ ዜሬቕቲኒ ዋይሚ ክንቲው ቴርት “እቱኹሳ” ቹዋ ችግርካዋ ግልፅስ ካንትፅጝዴስ ፌይኹስ እምፕልታቕ ሼውናንታ ፄውኹ አኽⶓ ጌሌፅካ::

ዩንቨርስቲሾ ሚፅፂ ፍታኒ ዜሬቕንጝ ክንቲ ጝንካ፣ ክንታንትካ፣ ክንትፃንትካስታ ክንታንትካኩ ቹዋታብል እንቲታኪ ታምብዌንካ አካልካ ክንቲዉ ፃንኩትስ ትኩቶ እያንታ ጁትጝፅኹ አኽⶓ እርዳትፅካ::

ዩንቨርስቲው ሚፅፂ ፍታኒዳ ካንትስትኹ ዜሬቕቲኒ ዋይሚ ክንቲውሳ ማቤር አቖ ሼውናንታ ፄዋኽ ንካ::

ዜሬቕቲኒ ዋይሚ ሜዜጌብስትጝ ቹዋ ታብል ጄርካዋ ክንቲ ጝናሾ እንፃኽጝዴስ ፌይኹስ ክንታንትካ ክንቲዳ ዝኩኹሳ ሲፍጝጜ ዲግካማ ሲፍጝጛንታ ፄውኽ አኽⶓ ዙሜካ::

እንዴስ ቹዋ ታብል ክንቲውሳ ፃንኩቶ ቼሜትጝፅጝ ክንቲ ጝንካሊስታ ክንትፃንትካሊ ዲግጜካማ እንፃኽስታንታ ፄውጝስ “ክንቲ ክምንትስ” ናው ልቕልቕቲ ግልፅስ ካንትስትⶓ ቶኬምካ::

ሊኪፂ ፍታኒ ክንታንትካ ክንቴ ቱስቲስ ሲፍጛንታ፣ ክንትፃንትካ አላፍትስ ክንትፃንታ፣ ክንቲ ጝናስኩ አላፍካ ዴሜካ ክንቲውሳ ካስቶ ቱስቲስ ጉሳንታ ፄውጝስ ጉዶ ጂሚርጜ ፌቴርኹ አኽⶓ ክንቲው ሚኒስትር ፕሮፌሰር ብርሃኑ ነጋ ዙሜካ::