ትቬቩ አድሪ

ዘውዴ በካሉ

አጌራኻዳ ሚንችካ ትቬቭስስታ አቕትስ አድርቱንኩ አቕ ዝኩና:: እኒጛ ትቬቬን አቕ ጛው ትቬቭስ አጌራውሳ ታሪኮ፣ ወጐ፣ ባይሎስታ ማይቤራዌ፣ ይኮኖሚያዌስታ ፖለቲካዌ ልቕልቕቴ አሌምስ አቕትጝፃና:: አጌራውሳ ክብሮኪላ ጌሌፃና:: ትቬቭ ሚንችካ እንፅኽካዋ አቡቓማ እሜው ያኹኒኪላ ትቬቭካ ክቻዴስ ጅሚ እምፕልያኽ:: ናካስ አንቤብፅጝስ ፋኑኽኪላ ጅሚስ አጌራውሳ ኬፍቴ፣ ባይሎ፣ ወጐስታ ታሪኮ አሌምስ አቕትጝፁንኩ ትቬቬንካዴስ እምፕል ጅማንቲ አስቻለው ፈተነውሳ ታሪኮስታ ጅሙክሳ ጅምካዋ ካንትኹስ አሚኮ ባኩርሊ ፄውኑሳ እጂጜኽ::

ጅማንቲ አስቻለው ፈተነ ካሜንስታማ ሌጌስኹ አዊ ብሄረሰቡ ቺፅጝፂ ቻግኒ ኬቴም ሊሊቲ ስም መድሃኒአለም እስታው ስፍሪዳኽ:: ክንቴ እምፕላንቲ ቤንዴስ 12ንቲ ቤኖኺስታ ቻግኒ ኬቴምዳ ክንታ::

ዲፕሎማውሳ ክንቴኪላ መርቱለማርያምዳ አግስታው ግብርኒው ኮሌጅዳ ክንታማ ዳቔርስታ::

ግብርኒው ውማይስ ዚጋሚ ወረዳዳስታ ዳንጉር ወረዳኩ ኬቤልካዳ ሲዚ አሜታስ እንፃኽስታ::

ጅማንቲ አስቻለው ግብርኒው ውማይስ እንፃኽስቱኒኪላ እንፅኺሊ ኬምፕስ ኬምፖ ባይሉሳ ሙዚኪውሳ ሜሳሬ እንክርጝስ ሊሊቲ ፋይ እሺኹ አኽጝስ ክራሮ እንክርጝስ እዝቡላዳ ቻቤልስታንቶ አግፃ:: ሊሊትጙንኩ ኮንክካስ ሚንችካ ጅምካዋ ጅምጝስ አቕስታው ጅማንቲ አስቻለው 10 ዴስ ጃላ ያኻንኩ ጅምካዋ እንኮኻንትካስ ታምፃ:: እኒጛ ጅምካ ክቻዴስኪላ አውጚስ ጅሙኽ “እርክብ ዳባኒ” “ጆላይ ጆላይ” ናው ጅሚስ አዊው እዝቡላዳ አቕስታንቶ አግፃ::

እናትዋ ጐንደር፣ ካሲናው ጐጃም፣ አድዋ፣ አባይስታ እሊኩስኪላ አማኻርጚስ፣ አውጚስ፣ ጉምዝጚስስታ እሊኩስጊ ኮንክካስ  ኒፂሌ ዜሜ እዝብስ ታምፅኹ ጅማንቴኽ:: ጅማንቲ አስቻለው አሚኮ በኩርሊ ፄውኹ እጂጚዳ ጅሚሾ ቱዋታ ጉሽጝፁኽ ታብሊ ክራሮ ሚንቺትስ እንክራው አኽጝስ ታብሊዴስ ወሬስኹ አኽⶓ ዲብሳ:: ሴንካስታ ታብሉ ክራሮ እንክርጝዴስ ድምክና ሴንካ መዝሙሮ ዜሜራንኩ አኽጝስ መዝሙሮ ዜሜርⶓ፣ ክራሮ እንክርⶓ እንፃኺትዴስ ጄሜርኹ አኽⶓኪላ እንክርፃ:: ጅሚሾ ቱጝስ ጝን አቑ እርዳቲ እሺያሱ አኽⶓ ጉሽኹ ጅማንቲ አስቻለው ክራሮ ታሳማጊ አፄብካስ ጅማኒ ካሌኻኽ ንካማጊ ይስጝፃሺኑ  አኽⶓ ዙማ::

ጅሚ ይቶፒያዊ እሚስታ ኽሪ ዝኮታ ሊሊትጙንኩ ሙዚኪኩሳ ሜሳርካዋ ቴኬምስትⶓ ዙሙኽ ጅማንቲ አስቻለው ይቶፒያኩሳ ባይልኩሳ ሜሳርካዋ ንጝኪ ማሲንኮ፣ ኪሪዌ፣ ክራሮ፣ እምቢልቲ/ዱኾ፣ ዙምባራ፣ ሾሬንጐ፣ ባገናዋስታ ደቡቡሳ ባይሉሳ ተርከሽብል እስታውሳ ሙዚኪውሳ ሜሳሬ  ቴኬምስትⶓ ድኹዋ::

ሚንቺትስ እንክራኩ ሙዚኪኩ ሜሳርካዴስ እምፕል ክራር አኽⶓ ድኹዋ:: ጅማንቲ አስቻለው ይቶፒያኩ ባይልኩ ሙዚኪኩ ሜሳርካ ጛው ያኹኽ ሊሊቲ ድምፅ ዝኩኽ ያኹኒኪላ ክራር ድምፆ ጐዋል ፃማ ፋሻው ሜሳሪ አኽⶓ እንክርፃ:: ጅሜኪላ አውጚስ፣ አማኻርጚስ፣ ጉምዝጚስ፣ ጅምⶓ ድኹዋማ ፍንሾስ ዴሜካ ዳርሼ እስታው ደቡብ ኮንኪስ፣ አሪውሳ፣ ጐራግጜስታ እሊኩሳ ኮንክካዋ ቴኬምስታማ ጅማው አኽⶓ ጅማንቲ አስቻለው ዙማ::

ክራሩሳ እንክሬ ጊዝዴስ ጊዞ ዴስጛማ አልባማኻዳ እንኩዋኽስታው ክራሩ ድምፅ ጚ እንክርኹ አኽⶓ ድኹኽ ጅማንቲ አስቻለው ክራርዴስ ድምክና ቤዝ ጊታሮ እንክርጝስ ሞኬርⶓ ዲብሳ::

ቼፍ ላጛዳ አልበምዳ ቤዝ ጊታሮ እንክርጝስ እክድ ዝኩⶓኪላ ድኹዋ::

አሌምዳ ዲጋንኩ ጅምካ ሊሊትጙንኩ ኮምፒተርስ ቴርቱንኩስስታ ባርኾቼኩ ሜሳርካስ አጄብስትካማ ዲጋኒስ ዋኽስዋኾ ባይልኩ ሜሳርካስ አጄብስታማ እዝቡላ ዲግጝስ ጅፊስታሺኹ አኽⶓ ድኹኽ ጅማንቲ አስቻለው እናትዋ ጐንደርስታ ካሲናው ጐጀም ናው ጅሚስ እዝቡላዳ ቻቤልስታንቶ አግፁኽ አኽⶓ ዙማ::

ሙዚኪው አለምዳ ምሳላ ያኻንኩስታ እንካንስትካ ኮሜችካ ይቶፒያኩ ጅማንትካ ክቻዴስ ጋሼ ባህሩ ፣ እጅጋያው ሽባባው፣ ቴዋድሮስ ካሳሁን፣ ተሾመ ምትኩስታ እሊኩኪላ እንፅኺስ ኬቤርፃኩ  ጅማንትካ አኽⶓ ጅማንቲ አስቻለው ቶኬማ::

ጅማንታ እጅጋየሁ ሽባባው ጅምታኩ ጅምካኻዳ ውንስትሳ ይቶፒያዋ ካንታው፣ ድምፅስ ይቢቺስ ያኻውላስ ድርሴትስ፣ ሜንድሬኽዳ ዲግስታው ዲግስጝጚስ፣ ጅሚስ ዝኩኽ ካንቲስስታ ሚንችካ ዲብስካስ ጋሺስቴት ጅማንታ አኽⶓኪላ ጅማንቲ አስቻለው ዙማ::

ጅማንቲ አስቻለው ግብርኒው ውማይዳስ ጅሚሾ ይንቱኹ ሙዚኪው ውማይዴስ ሚንቾ ሚፄ አግፅጝስ ያኻውላስ ፅሌ እንፃኽስታኒ ሚንቾ ሼሌማው ይቶፒያው እዝብ ዝኩኽ አኽጝስ ትቬቩ እንፅኺሾ ቱጝስ ጉሽጝፁኽ አኽⶓ  ዙማ::

“ትቬቮ ሳንቲምስ ሊካላኽ” ንኹ ጅማንቲ አስቻለው ይዎትስ ዝኩኽ ጊዝዴስጊ ዴስፃው ሚንቾ ብሮ አግፃኒ ያኻውላስ እምፕሎ ግትሞ ፃፋኒ አኹኪ እምፕሎ ዜሜ ታምፃኒ አኹኪ ፍሻኒ አኽⶓ ድኹዋ::

ጅሚስ አጌራውሳ ሰላሞ ሴቤክጝስ አኹኪ ሰላሞ ባፃባፅጝስ ካሊስታው አኽⶓ ጉሽኹ ጅማንቲ አስቻለው ጅሚ ሰላሞ አግጝስ ኽሳንቲ ሜሳሪ አኽⶓ ዙማ:: ጅማንትካ ዎሬሞስታ ስዴቶ ባይካማ እምፕልቶ፣ እንካኖ፣ ሰላሞ ሴቤካውሳ ጅሜ ጅምጝስ አጌራውሳ ሰላሞ ቼሜትጝፅጝስ ካሊስታው አኽⶓ ዲብሳ::

ጅሜ ሰላሙ ሜሳሪ ፄውጝስ ዴሜካ ጅሚስታ ሙዚኪው ሜሳሪ ቹዋ ዲብ  አኽⶓኪላ  ጅማንቲ አስቻለው ድኹዋ::

አጌራውሳ ታሪኮስታ ወጐ ካንትፅጝስ አጌራኻዴስ ፋማ ባርኾቼዳ ሊሊትጙንኩ ኮንስርትካዳ አኹኪ ሜንድሬኽዳ ትቬቭኩሳ እንፅኽካዋ እንፃኽስትጝስ ፋይ ዝኩⶓስታ  ናካኪላ እንፃኽስታማጊ አኽⶓ ጅማንቲ አስቻለው ዲብሳ::

ፍንሾስኪላ ውላዴስጊ ኪቻ ባርኾቼኩ አጌርካስ ይቶፒያ አጌራዋ ሙዚኪኩ እንፅኽካስ አቕትጝፃው አኽⶓኪላ ድኹዋ::