አንጉ ካንሰር

ዘውዴ በካሉ

አንጉ ካንሰር ንጝ አንጉዋኻዳ ዝኩንኩ ሴልካ ፍትሬቱ አኺኒዴስ ጃላ ያኹኽ ዳድስ ቼፍጝጚዴስ ሴጋ አኽጝስ ሩባኑ ጊዝዳ ፌቴርስታው አኹኪ ኬሴትስታው ቑንዚያኽ:: አንጉ ካንሰር ኹንዳ ሚንቺትስ ኬሴትስታው ያኹስ ፆቴ  ጐሌሊቲውያኽ:: ይቶፒያዳ ፂንስስትኹ ፅናቱ ንባር ቶኬምኹስታጊ ጝርጂው አንጉ ካንሰርስ ፂኪስትጙ ድል ሊኽዴስ ዋልታዴስ ላጜታዋኺስታ አኽጝ ጌሌፅስታ::

አንጉ ካንሰር ኹንዳ ኬሴትስታንኩ ካንሰርኩ አይኔትካዴስ እምፕልያኽ:: ትክላሊስ ዴሜካ ሳንቡ ካንሰርዴስ ሲፋማ ላጛንቲ አችዳ አግስታው አቖ ሚንቺትስ ፂካው ይዝኩዊ ቑንዚ አኽⶓ ንባርካ ቶኬማና::

ሚንቺትስ አንጉ ካንሰር ድሜ ስራ ፄዋማ ቑንዚስ እምስትጙ ድል ዴሜኬ:: ድሚ 35 አሜትዴስ ጃላ ዝኩኽ ድሚው አችዳ ኬሴትስቴ:: እንቲታኪ አክምዴስ ጃላ ቡዚትጝ፣ አካሉሳ ልቕልቕቴ ፄውⶓ ባይጝ፣ ሆርሞኖ እክምኒስ ካፅጝስታ እሊኩ ምክንያትካስ አንጉ ካንሰሩ ቑንዚ ኬሴትስቴ:: ናካስ አንቤብፅጝስ ፋኑኽ አንጉሳ ካንሰሮ ካንትኹስ እንጃቢሪ ዩኒቨርስቲው ክንትፃንቲስታ እንጃቢሪ ሆስፒታልዳ ቔድፃማ አኪምጙ ውማይቲኒ ዶክተር መዝገቡ ቦጋለሊ ፄውንኹስ እጂጜኽ::

አንጉ ካንሰር ኹንዳ ሚንቺትስ ኬሴትስታው ቑንዚ አኽⶓ ዶክተር መዝገቡ ጌሌፅካ:: አንጉ ካንሰሩ ቑንዚው ጉሽፂ ዜርስ ፌያፌይጛው አኹኪ ሆርሞንሊ ታምትጙኽ ዳድስ ኬሴትስትጝስ ካላው አኽⶓኪላ ድኹዌካ:: ዜርስ ፌያፌይጛው እስቱስ እምፕላ አቓዳ አንጉ ካንሰር ዜርስኪ ያኻ ሆርሞንሊ ታምትጙኽ ዳድስ ኬሴትስቱኒጊ ሴንካዳ፣ ጄርካዳስታ ዛኽ ዝሜድካዳ ኬሴትስትጝስ ካላው አኽⶓ ዶክተር መዝገቡ ጌሌፅካ::

ሆርሞንሊ ታምትጙኽ አንጉ ካንሰር ካላካልጝጚስ ካሊስታው ያኹስ ሆርሞንሊ ታምትጛቲው አንጉ ካንሰር ዴሜካ ካላካልጚስ ካሊስታቲው አኽⶓ ዶክተር መዝገቡ እርዳትፅካ:: እኒጛ ምክንያትካስኪ ያኻ እሊውስ ዳድስ ፌያፌይጛው ያኹኒኪላ ቹዋ ቹዋ አንጉ ካንሰሩ ቑንዚኩ ጉሽፅካ ዴሜካ ድሚ ታምባውላስ አኹኪ ድሚ 12 አሜትዴስ ኩክራ ዝኩኽ ድሚዳ  አርፊው ብሪ ይንትጝ፣ አርፊው ብሪ እጄማ አሌድስትጝ ንጝኪ እምፕላ ቹዋ ብሬ ዊዴው ድሚው አችዴስ እጄማ 55 አሜትዴስ ፋሌንጋ አርፊው ብሪ አሌድስትጝስ፣ ካሜንጝ ቱስታው ወክትዳ ካሜኑላስ እጂጝ፣ ሆርሞን ረፕሌስመንት ቴረፒ አኹኪ ሆርሞን እንፂጝስ እክምኒስ ሆርሞኖ ዴሜክጝ፣ ድሚ ዴሜክጝስታ እሊኩኪላ ዳድካስ አንጉ ካንሰር ጄሜርጝስ ካላው አኽⶓ ዶክተር መዝገቡ እርዳትፅካ:: ትክላሊስ አንጉ ካንሰርስ ፂኪስትጙሳ ድሎ ኬፍፃንኩ ምክንያትካ ድሚ፣ ጄኔቲክ ሚውቴሽን /ጂንካው ኪሲ/፣ ዜርስ ንጝኪ እምፕላ ኹና ካንሰርስ እምስትጝስ ካሌው ቹዋዴስ አኹኪ ታብሊኩ ወጌንካዳ   አንጉ ካንሰር ዝኩኒ ፣ ቻረሩ እክምኒ፣ አካሉሳ ልቕልቕቴ ፄዋውላስ ይጉጝ፣ አክምዴስ ጃላ ቡዚትጝ፣አልኮሎ ዝቕጝ፣ 30 አሜትዴስ ጃላ ካሜናኑላስ እጂጝስታ አንጐ ፃኹፃውላስ ይጉጝ አንጉ ካንሰሩ ቑንዚስ ፂኪፃንኩ ዳድካኽ::

አንጉ ካንሰር እምፕል አቒዳ ኬሴትስቱስ ምልኻት ዝኩጝስኪ ምልኻት ዝኩዋውላስኪ ኬሴትስታው ቑንዚ አኽⶓ ጌሌፅንኩ ዶክተር መዝገቡ አንጉ ካንሰሩ ምልኻትካ አንጉዳ ቑንዳፃቲው እንቓሪ ያኻማ ሜቴኖ ሌጌስጝ፣ አንጉ ቻፊ ስርጉድ ንጝ፣ አንጉ ቻፊ አኹኪ ኬምፕዳ ላኼንትጝ፣ ቑላቑሊዳ እንቓርጝ፣ አንጉ ሜቴን ላጛጊ ክቼውላስ ይጉጝ፣ አንጉዳ ብርቱካኑዳ ቕብዳ ዝኩኹስታ ቱክቱኪታ ያኻማ አንጉዳ  ፋማ አንጉ ኬምፕዳ ድማ ያኻማ ኬሎሞ ኪስጝ፣ አንጉ ቻፊስ ብሬ አኹኪ ቲሲኔ ፍሽጝስታ እሊኩኪላ ምልኻትካ ካንትስታንኩ አኽⶓ ዶክተር መዝገቡ ጌሌፅካ::

አንጉ ካንሰር ድሚ 20 አሜትዴስ ኩክራ ዝኩንኩ አቕዳ ኬሴትስታው ዜርስ ይንታው ካንሰሩ ቑንዚ ያኹስ 20 አሜትዴስ ጃላ ኬሴትስታው ዴሜካ ሊሊትጙንኩ ጉሽፅካስ አኽⶓኪላ ዶክተር መዝገቡ ድኹዌካ:: አንጉ ካንሰር እምፕላ አቓዳ  ኬሴትስታኒ ቑንዜ ካላካልጛውሳ አቒውሳ አይሎ ኔኬታው እንቲታኪ እንኩላሎ አሜሬታውዳ ኹኑዳ ማይፄንዳ ቻኒስቶ ታምፃው አኽⶓኪላ ጌሌፅካ::

አንጉ ካንሰርስ እምስትጝዴስ ቤዴራማ ካላካልጝስ ካሊፃንኩ ዳድካ ዴሜካ እምፕለ ኹና 30 አሜትዴስ ኩክራ አባላምቴ ካሜንጝ፣ አንጐ ጄርካስ ላጛ አሜትዴስ ጃላ ፃኹፅጝ፣ አልኮሎ ዝቕⶓ ባይጝ፣ ሆርሞን ረፕሌስማንት ቴርፔ ፄውⶓ ባይጝ፣ ቹዋዴስ ጄርካሾ አኹኪ ዜርስ ፌያፌይጛውላስ ጂን /ዜር/ ፂኒስስታማ  ፌያፌይጛውላ ቑንዜ ፍሽጝ፣ አካላቱሳ ቡዚቶ ኔኬትጝ፣ አካላቱሳ ልቕልቕቴ ፄውጝ፣ ይውዴስ ጃላ ዝባትካ ምስታዊቲውዳ ፍንዳ ቲሪካማ ፃንጋኻ አንጐዋ ሌዋ ታፋስ፤ ሌዋ አንጉዋ ፃንጌኻ ታፋስ ዴሴሳማ ካንትጝ፣ እንቓሪ ዝኩኒ ማራማርጝስ ቤዴራማ ካላካልጚ ካሊስታው አኽⶓ ዶክተር መዝገቡ እርዳትፅካ::

ቤዴራማ ካላካልጚዴስ ፌያማ አንጉ ካንሰርስ እምስቱንኩ አቕ አንኩዋ እክምኒኩ አችካስ እክምኔ አግፃንኩ አኽⶓ ዶክተር መዝገቡ ጌሌፅካ::

እኒጛ አንጉ ካንሰሩሳ ቑንዜ ኬሽጝስ አኹኪ እክምኔ አግፅጝስ አንኩዋ  እክምኒኩ አችካኪላ አቫላምቲ ሰርጃሪ አኹኪ ቔድፃማ አኪምጝ ንጝኪ አንጉዳ ቑንዚ ዝኩዋኒ ቑንዚስ  ጉዲስታያሱ ኬሽጝስ ካላው ያኹኒኪ እንቓሬ ቔድፃማ ፍሽጝ፤ ቑንዚ እሊኩዳ አካልኩ ቤንካዳ ፌያፌይጛው ያኹኒስታ ጉዳቶ ታምፃው ያኹኒ ዴሜካ አንጐ ትክላሌ ኬዋማ አኹኪ ኪቻማ ጌውጝ፣ ላጛንቲ ሆርሞን ቴራፒ፣ ሹኻንቲ ሞርኬላር ቴራፒ፣ ሴዛንቲ ሬድዮ ቴራፒስታ አንኩዋንቲ ዴሜካ ኬሞቴራፒ አኽⶓኪላ  ዶክተር መዝገቡ ጌሌፅካ::

እኒጛ እክምኒኩ አችስስ አኪምስትካማ ሊኽዴስ 80 ታፋ ያኻንኩ አቕ ቑንዚዴስ ኬሽጙ አክም ዝኩኽ አኽⶓኪላ ዶክተር መዝገቡ እርዳትፅካ:: ቑንዚ ዝኩክ አቕ እክምኒውሳ አግልግሎቴ ሶኼትስኪ ያኻ ኬፄሩታጊ ፋይፃው ጊዝስ ሲፋሲፍጜ ፄውጝ ፋይፃው አኽⶓ ጌሌፁንኩ ዶክተር መዝገቡ ቑንዚ ዝኩጝ ቼሜትጙኒዴስ ፋሌንጋ እምፕልኒስ እክምኔ ካፅካውጅካማ ሲፋሲፍጛቲንኩ አቕ ሲፋሲፍጛንታ እንፅኼንቶ ፌያፌይጝፅካ:: እክምኔ አግፅካያስኩ፤ ባይሉ እክምኒስ ጊዞ ባኬናኑላስ እክምኔ አግፃንታ፣ እክምኒውላ ታምቢኒምባ ጛው ታፋስ አንጉሳ ሜቴኖኪ ያኻ እንቓሬ ማራማራንትኪላ ዶክተር መዝገቡ እንፅኼንቶ ፌያፌይጝፅካ::