ትንታግ እንክራንቲ!

ሰሎሞን ስንታየሁ

ቡካዮ ሳካ 2ንቲ አቹ ክንታንቲ ዝኩዋኩስ ዜዛ ክንቲው አይኔትካዋ A+ ሹኻ ክንቲኩሳ አይኔትካዋ ዴሜካ Aዋ አግጝስ ካሉኹ ትንታግ አንኮሊ ዌናኽ:: እነሳጜዋ ጄግነቶ ልኩ ኩታስኪላ ቴኬምስታውላ ይጎላ:: ‘ቡካዮ’ ናውሳ አባልምቴ እቑዊሳ ስሞ አግፁኹ ደቡብ ናይጄሪያዳ ዙሚስታንኩ ዮሩባ ኮንኪዴሴኽ::ኽይኪላ ድምክኒ ዴስቲ ንጝታኽ:: ጚታልስ ታላ ናይጄሪያ ሌጎስዳ ዝኩዋንኩ አብትዌኒዴስ እምፕሌኽ:: እንግሊዝ ለንደንዳኽ ክንቴ ሲፍጙኑ:: እንጚ ጉዝማኽ ናካዳ ልኩ ኩታው አሌሙ ትንታንግ እንክራንቲው ታብሊ ያኹንኩሳ አድኒኬ ሳካዋ ካሜኑኑ:: ሳካኪላ ጊዙ ካስትስ ዮሚ ሳካዴስ ይንታውሳ ዝቤኖ ልኩ ኩታሱሳ ትንታጎ እንክራንቴ 2001ዳ ቡካዮ ሳካዋ አንጚዳ ለንደንዳ ካሜንጝስ ካሉና:: ጚዴስ ቤዴራ ላጛ ጄርካዋ አፌርካማ አሜችኹሳ ዝኩዊኔ ጉሳንኩ አራኹንካስ ድምክኒ ሹኻንቲ ጄር አኽጝስ ዴስቴ ኻሳማ ይንታኹ አኽጝስ ጚራሱሳ ስሞ ቡካዮ(ድምክኒ ዴስቲ) ንጝስ እቑዊካ::

ናኪኒ አሌም ያቑኹ ልኩ ኩታው ትንታግ እክራንቲ አኽጝስ ጌና ሌጌሳታምባንቲ አኽጝዴስ ጉሽፃማ ጝን አቕዴስ ፌያማ አርሴናልስ ድምክኔ ዴስቴ ፌቴርኹ ያኻ:: ናካ ማልጜ ክብሪ ዋይሜ ፍሻንኩ ልኩ ኩታው እንክራንትካው ቴርዴስ ቤዴራንቲ ያኹስ ወታትካዴስ እምፕል ያኹኹ አርሴናሉ ቹዋ እንክራንቲኽ:: ቡካዮ ሳካ ለንደንዳ ካሜንስታማ ለንደንዳ ሌጌስጝስ ሰሜኑ ኬቴማው ኬፍቲኒ ስም ዌና አርሴናሎ ኽሳንትሾ ዙርፅጝ ቴስፋ ፄውስትኩ ትንታግካ እንክራንትካዴስ እምፕል አኽⶓ ካንትፅⶓ ጄሜርኹ ጌና እንፃኺትዴስ ጉሽፃማኽ::

እንኮጚኒስታ ንጙዊኒ ልኺትጚው አሜትስ አርሴናሉ ጊሪምፂ ፕሪሜርሊጉ እንዝጚዳ ሴሌቴንፃንቲ ሚኬል አርቴታው ኬች ጅፊፄ ፂኪጙሳ ልቕልቕቴ ፄዋንኩ እንክራንትካዳስ ሳካ ቢዲሪኽ:: ዳሪው ኬምፕዴስ ጁዋማ ኩታዋ ፃንጌኻ ልኩዋስ ሺንካማጊ እሊኩ ጌቴማንትካው ጎሉ ክልልሾ ኻሳማ ጊጛኒ ካላካልጛንትካዋ ሼቤርፄ፤ ፅባባ ብታዴስ ኩታዋ ድክችስ ፍሻኒ አይኪ ታምባቲው ጊሪምፂ ትቤብ ዌና እንክራንቲኽ:: ካላካልጛንትካ እጜዋ ቲሪፅጝስ ኹሉ ቺፋ ፍታናኻዳ ቱዋና:: ፍትሬትስ ሊሊቲ ኩታዋ እንክራንቲ ያኽጝ ሊሊቲ አንኮሊዴስ ፍልቕ ናው አኽጝ አቕስቴ::ሳካ 2ንቲ አቹ ክንታቲ ዝኩዋኩስ ሴዛ ክንቲው አይኔትካዋ A+ ሹኻ ክንቲው አይኔትካዋ ዴሜካ A አግጝስ ካሉኽ ሊሊቲ አንኮሊ ዌና አኽጘ ልኩ ኩታዳኪላ ቴኬምስታውሌስ ይጎላኬኽ:: ጊሪምፂ ካንቲ፣ብቴ እሚጚ፣ጌሬምፃው ቻቤልንትስታ ጚጛርጛስ አምንጛው አኽጝ ድሚዴስ ጃላ እንጃማ ካንፅስታታ ፄውኹ እን ያኽውሌስ ይጎላኪኽ:: ኤምሬትስዳ ካንትፃውሻውሳ እሳ ጊሪምፄ እንክራንቴ አርቴታስ ጋሻው ካል እንፄ::ሲፋው ዝቤኑ ትንታግ እንክራንቲ አኽⶓ ካቢትጝፃማ ምስክርቶ እያ::ቻኒስቶ ቲሪትጙ ዳሊት፣ታክቲክካዋ እርዳትስትጙ አክም ጌሬምፃዌኽ::

ኹሉ ቺፋ ጚጛርጛሳ ኬሽጝፅጝስ ፅሬቶ ፄዌ፣ዴስጚዳኪላ ውላዋ ፅላዋ ዲባስጊ ኽሳንቴ ትኩቶ እያው ክርፂ ፅኹር ዌናኪላኽ ቡካዮ ሳካ:: እንስ ዴሜካ እንግሊዙ ብሄራዊ ኬቹ ሴሌቴንፃንቲ ጋሪስ ሳውዝጌት ስታ ቤዴራሱ ታሪካዊ አርሴናሉ እንክራንቲ ቴሪ ዳንኤል ሄንሪ ማልጜ ሜሴኬራይኹ እንክራንቲኽ::ዝቤኑ ልኩ ኩታው ግዱ ስርኩኒ አኽⶓ ውታኺዳ ካንትፃው ግዲታውሳ ልቕልቕቴ ማልጜ ዙማያው አግስታላኪኽ:: ምራቡ ለንደንዳ ካሜንስትኹ ወታት ትቤቤኒ ጌና ላጜታ አሜታዴስ ጉሽፃማ ሰሜን ለንደኑ አሬስናሉ አካዳሚዳ ሌጌሳማ ስታ ይሳማ ኽሳንትቱ አችሾ ካይጛ::ታብሊ ምራቡ ለንደኑ ዝኩዋንቲ አኽጝታጊ ሰማያውካው ቼልሲው ዴጌፋንቲኽ፣ ያኽስጉ ሌጌሳ ታምቤ ቡካዮ ሊጊ ድሚዴስ ጄሜራማ ዴጌፋው ቼልሲዴስ ይጎ ወታትካ ትንታግካ ካሌቕት ዌንታ ፃንኩፅስትካማ ፋኑ አርሴናሉ አካዳሚሾ እንዜጛታ ፄውጝ ጌሬምፃዌኽ::

ሳካ እንክሪው እንዝጚዳ ታብሊው ታምብ ዳማስኪ ቲኪስታቲው አኽጝ ዙሚስቴ:: ሳካ ሜድፌንካውሳ ሙሬ ፌያማ ካሜንስታማ ሌጌስኹሳ እንግሊዙ ብሄራዌ ኬቹሳ ይዝኩዌ አላፍቶ ቡጝስ ጊዞ ዊዳያኬኽ::ፅንፌንካ እንግሊዛዊያንካ ዴጌፋንትካ አውሮፓው ወንቺው አሊዲው ፍፁሙ ክፃቱሴ ታሴ ይጉፅጝስ አይቱስታ ዜርስ ስሞ ድፃችኹኒውላ አንኮሊስ እንኮኽስታውላስ ብሄራዌ ኬቾ አጌላጌልጝስ እንግርግራ ናያኪኽ:: እሳኪላ ቤዴራሱ ኳታሩ አሌሙ ዋንቺዳ ሳውዝጌቱ ኩፕቲው ኩልፍ እንክራንቲ አኽⶓ ካንትፃ::