ዘውዴ በካሉ
ዋልታንቲ እዝቡ ዌኬልስታንትካው ኩስጚ ጝና ሹኻንቲ አሜቱ እንፅኺው ዝቤን 36ንቲ ሚዲቢኒ ጉባዬ ሲኒ 27 ጌርክ 2016 ም.አሜትስ ካስጝፃ::
ኩስጚ ጝና 2017 በጄቱ አሜቱ ረኪኩ በጀትዳ ኩስጛማ ፄዴክፃ:: ፌዴራል ምንግስቱ 2017 በጀት አሜቱ ትክላሊ በጀት 971 ትኩሚ ላጛ ቢሊዮን ብር ያኻማ ዋኽ ድምፅስ ፄዴካ:: በጀት ኢኮኖሚውሳስታ ማይቤሪዊውሳ ልግስኔ አሬኽፅጝስ እንፃኽስትጝስ ታክስኹ አኽጝ ቶኬምስታ:
ትክላይ ሚንስትር ዶክተር አብይ አህመድ ትክላሌ ጌንዜቡሳ ሚፄስታ ፍሼ ካንትኹስ ኑኑውስታጊ በጄቱ አሜትዳ ምንግስት 529 ቢሊዮን ብሮ ሚፄ ኩፕፅጝስ አኬዳማ ፌይንኩ 11 አርፍካዳ 466 ቢሊዮን ብሮ ኩፕፅጝስ እክዱሳ ሊኽዴስ 96 ታፋሳ ሳኪትጝፅኽ አኽⶓ ጌሌፁኑ:: ፍሼ ካንትኹስኪላ 730 ቢሊዮን ብሮ ፍሼ ፍሽጝስ አኬድስታማ 716 ቢሊዮን ብር ፍሺ ፍኽ አኽⶓ ጌሌፅካማ እንኪላ ሊኽዴስ 98 ታፋ አኽⶓ ጌሌፅካ ዶክተር አብይ አህመድ::
አጌራው ሚፂውስታ ፍሺው አኺኒዳ ላጛ ትኩሚ አንኩዋ በጄቱ ዳንጉዊኒ ዝኩኽ አኽⶓ ጉሹንኩ ትክላይ ሚኒስትር ጌንዜቡሳ ፍሼስታ ሚፄ ቼፍጝጝሰ ኮንትሮባንድስ አግስትኹሳ ሚፄ ቤፍፅጝስታ ጊፁ አችቤርቤርጝ ሚፄ ኩፕፅጝስ ፅንጋኻ አኽⶓ ጌሌፅካ:: 2016 ም.አሜቱ በጄቱ አሜትስ ባርኾቼሾ እንፃኽስትኹ ሼኬታ ሼኬትዴስ 10 ቢሊዮን ዶላር አግስትⶓኪላ ጌሌፅካ::
ትክላይ ሚኒስትር ዶክተር አብይ አህመድ እዝቡ ዎኬልስታንትካው ኩስጚ ጝናስኩ አባልካ ጉሹኑ ካሲስኪላ ጊሊፄ እይካ:: ትክላይ ሚኒስትር ጊሊፂዳ ኑኑውስታኪላ ዝኩዊኒው ክብርናቲ አሌሙ አችስኪላ ቺጊርፂ አኽⶓ ጉሽካማ ሌጌሱንኩ አጌር ካኪላ ዝኩዊኒውሳ ክብርናቴ ጉላሊስ እዝቦ ልቕልቕፅጝስ ቴኬምስትካማጊ አኽⶓ ጌሌፅካ:: ይቶፒያ ልማቶ ኬውጝፄውላስ ዝኩዊኒውሳ ክብርናቴ ኔኬትጝስ ፄውትኹ ፅሬትስ ኬሽኹ ዋይሚ ሜዜጌብስትⶓ እርዳትፅካ::
ትክላይ ሚኒስትር አብይ አህመድ እዝቡ ዎኬልስታንትካው ኩስጚ ጝናስኩ አባልካ እንፅኺውሳ ድሎ ፌቴርጝዳ እንፃኽስቱንኩሳ እንፅኻካዋ ካንትኹስ ጁንኩስ ካስካስኪላ ዙርሚ እይካ:: ይቶፒያዳ ኬፍቲኒ ያኹኽ እንፅኼ ፋያንትካ ወታትካው ችግር ዝኩⶓ ጉሽካማ እንሳ ችግሮ አሜት ቺፋ ዴሜክጝዴስ ችግሮ ኽይጝስ እንፅኺሾ ቱⶓ ጌሌፅካ:: ሹኻ ትኩሚ 8 ሚሊዮንዴስ ጃላ ያኻንኩ አቕስ እንፅኺው ድል ፌቴርስትⶓኪላ ትክላይ ሚንስትር ዙሜካ:: እኒጛ እንፅኺው ድል ፌቴርስታይኩ እምፕልታቕዴስኪላ 3 ትኩሚ 8 ሚሊዮን ያኻንኩ አጌራኻዳ ያኹስ 332 ሻይ ያኻንኩ ዴሜካ እጋዊ ዳድስ ሴሌቴንካማ ባርኾቼሾ እንፅኺስ ካስⶓ ጌሌፅካ:: ዋልታንቲ እዝቡ ዎኬልስታንትካው ኩስጚ ጝና ሹኻንቲ አሜት እንፅኺው ዝቤንዳ 36ንቲ ሚዲቢኒ ጉባይዳኪላ ምንግስት ወሌን አጌርካዴስ ጁዋንኩ ችግርካዋ ሰላምስ ኽይጝሰ እንፃኽስስታው አኽⶓ ትክላይ ሚንስትር አብይ አህመድ ጌሌፅካ::
ይቶፒያ ወሌን አጌርካሊ ይጋሪስ እንፅኽስቴት አጌራ አኽⶓስታ ጁዋንኩ ችግርካዋ ሰላምስ ኽይጝስ እንፃኽስቱስ እጂⶓኪላ ጌሌፅካ::
ትክላይ ሚንስትር አብይ አህመድ እዝቡ ወኬልስታንትካው ኩስጚ ጝናስኩ አባልካ ስላምሊ እምትጜካማ ጅዋንኩ ካስካስኪላ ዙርሜ እይካ:: ትክላይ ሚኒስትር አቕ ቡንክትጛኑ ስልታኖ ፋይካማ ያኻውላስ ችግርስ ኽዮ እይፅጝስ አኽⶓ ጌሌፅካ::
ስካዊ አሳብስ፣ ስካካዊ ዳድስ እንፃኽስትጝስ ኪሲ ይንትⶓኪላ ጌሌፅካ:: ኪሲው ቹዋ ካሲ ላጛ አኽⶓ ጉሹንኩ ትክላይ ሚኒስትር ቤዴራ ጄሜሪማ እሺኹ ፖለቲካዊ፣ ማይቤራዊስታ ታሪካዊ ችግር እሺኹ አኽⶓ ጌሌፅካማ ላጛንቲ ዴሜካ ወክታዊ ችግር ያኹስ ወክታዊ ችግርዴስኪላ እምፕል አብቱ ሜቴን አኽⶓ ኽይትጝፄካ::
ምንግስት ልኺትጛንቲ ፖሊቲካው ፓርትካሊ እምፕልትስ እንፃኽስትⶓ ጉሹንኩ ትክላይ ሚንስትር ውላዋ አቡቓውሳ ፖለቲካውሳ ባይሎ ፌቴርጝ ኪሲው ዋይሜኽ ንካ::
ናካ ሰላም ያኻታኽ ፍናው ኑንኩ ትክላይ ሚኒስትር ሰላምስ ኬይስታውሳ ዋሺኒኪ ዋይሜ ኬይጝስ ቴርቱንኩ አኽⶓ ጉሽካ:: ኦሮሚያዳስታ አማኻሪ ክልልዳ ዝኩኹ ችግር ካዌናኻ ቱኽ ስልታኖ እሚ ናው ፕሮፓጋንዳ ካሜንኹ አኽⶓኪላ ጉሽካ:: ትክላይ ሚንስትር ሴሌቴንኹ ዳድስ ችግሮ ኽይጝስ ኩስጝጚስ ቴርትⶓኪላ ጌሌፅካ::