“ክርፄ ዋይሜ አግፅጝስ ይስናና ቴርትና”

  ዘውዴ በካሉ

አጌራው አችስ ክንቲውሳ ፃንኩቶ ማንዲፅጝስስታ ካሌቕትስ አድርትኹሳ ክምንቶ አፌርጝስ ሰካዊ ክንቲው ፍኖተ ካርቲ ቴግባርዳ እሺኒዴስ አሜትካዋ ቼፍፃ::

እንጚ ስካዊ ክንቲው ፍኖተ ካርቲ ቴግባርዳ እሺኒዴስ 12ንቲ ቤኑ ፍታኒው ቴርት ዩኒቨርስቲዳ እይስትⶓ ጄሜሩኒዴስኪላ ሴኔቤታ::

12ንቲ ቤኑ አጌር አቡቑ ፍታኒ ዩኒቨርስቲዳ እይስትጝ ክንታንትካ ሊሊትጙንኩ ዙራሙርካዴስ ይንቱንኩ ክንታንትካሊ ዴሶ ኪስጝጝዴስ ድምክና ፍታኔ ችምቢትጜ ኔኬትጝስ ክንቲው ፃንኩትዳ ኽሳንቲ ፍሺ ዝኩዌ:: 2016 ም.አሜትዳኪላ 12ንቲ ቤኑሳ አጌር አበቑሳ ፍታኔ ዳርኪ ፄትቲው ችግር ጋቲታ እይስታታኪላ ፌዴራሉ አችስ ኩስጜ ካስጝⶓ ይቶፒያ ፕሬስ አችት አንቤብፃ::

ፌይንኩ ላጛ አሜትካዳ እይስቱንኩ 12ንቲ ቤንኩ ፍታንካው ይሴንቶስታ ክርፂ ዋይሜ እንቲታኪ እሺኹሳ ዳንጉዊኔ ክችስጝስ ቤዴራ ቴርትዳ ኩስጚ አያኽስትጝኪላ ቶኬምስታ:: አዊ ብሄረሰቡ ቺፅጝፂ ቻግኒ ኬቴሙ ቺፅጝፂዳ ህዳሴ ትክላሊ ላጛንቲ አች ክንቲ ጝናስኩ ክንታንትካኪላ 2016 ም.አሜት 12ንቲ ቤኑሳ አጌር አቡቑሳ ፍታኔ ፌቴንስትጝስ ዝኩኽሳ ቤዴራ ቴርቶ ካንትኹስ ናካስ ቴርስና::

ክንታንቲ አበባው የሻለም ህዳሴ ትክላሊ ላጛንቲ አች ክንቲ ጝናሱ 12ንቲ ቤኑ ክንታንቲያኽ:: 2016 ም.አሜትዳ 12ንቲ ቤኑሳ አጌር አቡቑሳ ፍታኔ ፌቴንስትጝስ ቤዴራ ቴርቶ ፄዋማ ፍታኒስ ዲግⶓ ድኹዋ:: አጌራው አችስ ናማኪ ብሄረሰቡ ቺፅጝፂዳ ፌቴርስትኹ ሰላሙ አኺኒስ እምፕሎላ ጌርኮ ክንቲው ማንድዴስ ሴጋ ያኹኑላስ ክንቴ ወክትስስታ እክድስ ክንትጝ ፍታኒስ ቤዴራማ ቴርትጝስ እርዳትኹ አኽⶓኪላ ዙማ ክንታንቲ አበባው:: አጌር አቡቑ ፍታኒዴስ ክርፄ ዋይሜ ሜዜጌብፅጝስ ቴርትⶓ ዙሙኹ ክንታንቲ ክንትፃንትካ ክንቲው ፋንቲቲው አሊዲዳ ካሴ ቴርስካማ እይጝስስታ ሊሊትጙንኩ ጊዝካስ ፌቴንስቱንኩ ሽትካዋ ዲግስካማ ፍታኒስ እርዳታንኩሳ ካስካዋ እንፃኽስትጝስ እርዳትካማጊ አኽⶓ ድኹዋ::

2015 ም.ኤሜትዳ ሜዜጌብስትኹሳ ዜርቕቲኔ ዋይሜ ታክሳማ ሼውፅንታስ ጉዲስትጝዴስ ኬሽኹሳ እንፃኽስትጝስ ቴርትጝ ፋይፃው አኽⶓኪላ ክንታንቲ ዙማ:: ፍታኒ ዩኒቨርስቲዳ እይስታው አኽጝስ ክንታንትካው ሼው ፅንታዳ ቻኒስት ታምባቲታ ክንቲ ጝናሱ ጛሪኪ፣ ክንቲ ጝናሱ psycholog /ሳይኮሎጅው ክንትፃንቲኪ፣ እሊኩ ክንትፃንትካኪ፣ እንጃቢሪ ኮሌጅዴስ ይንቱንኩ ሼው ፅንትኩ ውማይቴንካኪ ዳላውሳ ሼውቴ ፌቴርⶓ ክንታንቲ አበባው ድኹዋ::

ህዳሴ ትክላሊ ላጛንቲ አች ክንቲጝናሱ 12ንቲ ቤኑ ክንታንታ ማኪያ መሃመድ አጌር አቡቑሳ ፍታኔ ፌቴንስትጝስ ቴርትⶓ ድኹታ:: 2016 ም.አሜትዳ ክርፂ ዋይሚ ሜዜጌብስታታ ክንታንትካውኪ ያኻ ክንትፃንትካው እርዳቲ ኬፍቲኒ አኽⶓኪላ ዲብስታ:: ስካዊ ክንቲው ፍኖታ ካርቲስ ሜፃፍ ክንታንትካው ታፍዳ ታምባውላስ ይጉኒኪላ ክንትፃንትካ ኮፒስ ቴርስካማ ሜፃፍ ጝናዳ እንኩርጝስስታ ኬችስኪ ያኻ ጛርትስ ክንታንትካስ ታምፅጝስ እርዳትካማጊ አኽⶓ ክንታንታ ማኪያ ድኹታ::

ክንታንትካ ዳርኪ ሴኬኬናስት ጅፍንታ ጋቲታ ዩኒቨርስቲዳ ፍታኔ ፌቴንስትጝስ ካሊፃውሳ ሼው ፅንታውሳ ኩስጜ ክንቲ ጝናስኩ አካልካኪ ያኻ ሼው ፅንታው ውማይቴንካ ክንታንትካስ ሼውቴ ፌቴርⶓኪላ ዙሜ::

ህዳሴ ትክላሊ ላጛንቲ አች ክንቲ ጝናዳ ታሪኩ ክንትፃንቲ ያኹንኩ ክንትፃንቲ ንጉሴ ከበደ ክንታንትካ ፍታኒስ ቤዴርካማ ቴርትⶓ ጌሌፅካ:: ውላጊ ክንቲ ጝናስኩ ክንትፃንትካ 12ንቲ ቤንኩ ክንታንትካስ ፋንቲቲው አሊዲዳ ፍታኒስ እርዳታንኩሳ ካስካዋ ቴርስጝስታ ፋንቲቲዴስ  ፉንኩሳ ሽትኩሳ ካስካዋ ቤናኻዳ እንፃኽስትጝስ እርዳትጜካማጊ አኽⶓኪላ ዙሜካ:: ክንቲው ሳትዴስ እንግራ ክዳማ አድጉዊዳስታ ፊቲ ጊዝዳ ክንታንትካዋ እርዳትካማጊስታ ክንቲውሳ ጛሬ ጋምቢጝስ ዝኩኹ ኩርፄንት ክርፂ አኽⶓ ክንትፃንቲ ዙሜካ::

ቻግኒ ኬቴሙ ቺፅጝፂዳ አግሰታው መድሃኒአለም አካዳሚ 12ንቲ ቤንኩ ክንታንትካ ክርፄ ዋይሜ ሜዜጌብፃንታ ክዳማ አድጉዊዳ ክንትፃንትካዋ ሜዴባማ፤ ፕሮግራሞ ቴርሳማ ክንታንትካዋ ክንትፃማጊስታ ክንቲጝናዳ ንጝኪ ቤናኻዳ ክንታኒስ ግልፃ ያኻያሱሳ ክንቴ ጋምቤካማ ክንታንታ ባኩ ፍትስ እንፅኼ እንፃኽስታማጊ አኽⶓ ክንትፃንቲ ንጉሴ ጌሌፅካ::

ክንቲ ጝናስኩ ክንትፃንትካኪላ ፊቲ ጊዝስ ክንታንትካ ፋያኑሳ ክንቲውሳ አይኔቶ ጋምቢጝስ እንቲታኪ ካስካዋ እንፃኽስትጝስ ቤዴራ ቴርቶ ፄዌካማጊ አኽⶓኪላ እርዳትፅካ::

ህዳሴ ትክላሊ ላጛንቲ አች ክንቲ ጝናሱ ጛሪ አቶ ደረስ ሙሉአለም 2016 ም.አሜትዳ 12ንቲ ቤኑሳ ፍታኔ ፌቴንስትጝስ ሜዜጌብስቱንኩ 351 ክንታንትካዴስ ፎርሞ ዋኽፁንኩ 347 ክንታንትካ አኽⶓ ጌሌፅካ:: ፍትሬቱ ሳይንስስ ጝርጃ 80 ኹን 94 ትክላሊስ 174 ክንታንትካ ፍታኒስ ቴርቱንኩ ያኻኒስ ማይቤራዊ ሳይንስስ ዴሜካ ጝርጃ 85 ኹን 98 ትክላሊስ 183 ክንታንትካ አኽⶓኪላ ድኹዌካ:: 2016 ም.አሜቱሳ 12ንቲ ቤኑሳ ክርፄ ዋይሜ ሜዜጌብፅጝስ ሜፃፍ እንፂት ጌቴሙኒኪላ ቤንሻንጉል ጉምዝ ክልልዴስ ሜፃፎ አግፅጝ ዝኩኽ አክምስጊ ክንትፃንትካኪ ያኻ ክንታንትካ ቤዴራ ቴርቶ ፄውካማጊ አኽⶓ አቶ ድረስ እርዳትፅካ:: ቤናኻሱ ክንቲዴስ ድምክና ፊቲ ጊዝስ ሽቶ እንፃኽስታንታ፣ ክንትፃንትካ ካሴ ቴርስካማ ክንታንትካስ እያንታስታ ክንታንትካ ሜፃፍ ጝናሳ ቱስቱስ ቴኬምስትካማ ፍታኒስ ዳላውሳ ቤዴራ ቴርቶ ፄዋንታ እንፅኺ እንፃኽስትⶓኪላ ክንቲ ጝናሱ ጛሪ ጌሌፅካ::

ቻግኒ ኬቴም ቺፅጝፂው ክንቲው ፅፌት ጝናሱ አላፊ አቶ አምሳሉ ሞላ 2016 ም.አሜቱ 12ንቲ ቤንካው ፍታኒስ ክንታንትካ ቤዴራ ቴርቶ ፄውⶓ ጌሌፅካ:: ቻግኒ ኬቴሙ ቺፅጝፂዳ ላጛ ትክላሊ ላጛንቲ አች ክንቲ ጝና ዝኩⶓ ጌሌፁንኩ አቶ አምሳሉ ላጛጊ ክንቲ ጝናዳ ፍትሬቱ ሳይንስስ ጝርጃ 434 ኹን 428 ትክላሊስ 862 ክንታንትካ፤ ማይቤራዊ ሳይንስስ ዴሜካ ጝርጃ 405 ኹን 365 ትክላሊስ 770 ክንታንትካ ፍታኔ ካፃንኩ አኽⶓ ድኹዌካ:: ትክላሊስ ኦንላይንስ ፎርሞ ዋኽፁንኩ ክንታንትካ ጝርጃ 839 ኹን 793 ትክላሊስ 1632 አኽⶓኪላ ጌሌፅካ::

ክንታንትካ ክርፄ ዋይሜ ሜዜጌብፃንታ ታምብዌን አካልካሊ ኩስጜ ካስጝፅⶓኪላ አቶ አምሳሉ ጌሌፅካ:: ቹዋ ታብል፣ ክንታንትካ፣ ክንትፃንትካ፣ ክንቲጝናሱ ጛሪ ክንቲው ፅፌት ጝናስታ ኮሚቴ ዳራ ፄውጝ ዝኮ ናውሳ ኩስጝጜካማ እንፅኺሾ ቱⶓኪላኽ ጌሌፁኑ::

2015 ም.አሜትዳ 12ንቲ ቤኑ አጌር አቡቑ ፍታኒዴስ ሊኽዴስ 40 ታፍ ያኻንኩ ክንታንትካ ክርፄ ዋይሜ ሜዜጌብፃንታ አኬድስታማ ሊኽዴስ 8 ትኩሚ 6 ታፋ ያኻው ክንታንቲ አጌር አቡቑ ፍታኒዴስ ክርፄ ዋይሜ ሜዜጌብፅⶓ አቶ አምሳሉ ጌሌፅካ:: 2016 ም.አሜትዳኪላ ሊኽዴስ 40ታፋ አኬድስትኹ አኽጝስ እክዶ ሳኪትጝፅጝስ ትኩታኩ አካልካ ታምቦ ፊትጛንታ አላፍት እይስታማ እንፃኽስታማጊ አኽⶓ ጉሽካ::

ክንታንትካ ፍታኔ ካፃኑ ዩኑቨርስቲዳ አኽጝስ ቤዴራማ እንፃኽስትጝ ቱስታኩሳ ቴግባርካዋ ንጝኪ ክንታንትካ ሴኒ 30 ጌርክስ ጄሜርካማ ዩኒቨርስቴ ቱዋንኩ አኽጝስ ትራንስፖርት ፅፌት ጝና፣ ጌንዜቡ ፅፌት ጝና፣ ክንቲ ጝና፣ ክንቲው ፅፌት ጝናስታ ፄትቲኩ አካልካ ቤዴራ ቴርቶ አሌድⶓስታ እንዝርናንትካ ክንታንትካዋ ዙራዙርፅጝስ ኩንትራቲ እምስትⶓ አቶ አምሳሉ ጌሌፅካ::

ስካዊ ክንቲው ፍኖተ ካርቲስ ቴርቱንኩ ሜፃፍካ 2016 ም.አሜቱ ክንቲስ ታምባውላስ ይጉኒኪላ 2017 ም.አሜትስ ያኻንኩ 8 ሻይ 971 ሜፃፍ ክንቲ ጝና ታምብኹ ያኹስ 11 ሻይ ያኻው ሜፃፍ ዴማካ ሰላሙ ችግርስ ክንቲ ጝና ታምባውላስ ይጉኒኪላ ዞን ክንቲ ጝናስ ታምባውሳ እክድስ አቕፅⶓ ጌሌፅካ:: 2016 ም.አሜትዳኪላ ሜፃፍስ ችግሮ ኽይጝስ ቤንሻንጉል ጉምዝዴስ ያግጝስስታ ኮፒ ፄውጝስ ክንታንትካስ ታምብስታንታ ፄውⶓኪላ እርዳትፅካ::

ክንታንትካ ዩኒቨርስቲዳ ፍታኒ እይስታኒ ክንታንትካ አጌርስ ስካዋ ያኻቲንታስታ ሼው ፅንታስ ጉዲስታቲንታ እንጃቢሪ ኮሌጅዴስ ሼው ፅንታስኩ ውማይቴንካስታ ክንታንትካስ ሼውቶ ፌቴርⶓ አቶ አምሳሉ ጌሌፅካ:: ክንታንትካ ላምቡሳ ዴሬቱኑሳ ዋይሜ ሳኪትጙኽ አኺኒስ አሌዳንታ አጌርታኪ ያኻ ክልልታ ፌቴርስትኹ ሰላሙ አኺኒስ ውላጊ ሰላምስ  ታምቦ ፊትጛንታኪላ እንፅኼንቶ ፌያፌይጝፅካ::

አዊ ብሄረሰቡ ቺፅጝፂው ክንቲው ሜምሪው አላፊ አቶ ደስታው አለሙ 12ንቲ ቤኑ አጌር አቡቑ ፍታኒዳ ሰላሙ ችግር ፅንጋኻ ያኻቲታስታ ክንታንትካ ፌቴንስታኑላስ ይጉዋቲንታ ሰላሙ ስጋት ዝኩክ ዙራሙርካዳ አግስታንኩ ክንቲ ጝንካዳ ዝኩንኩሳ ክንታንትካዋ ኬቴምሾ ይንቴካማ ክንታንታ አኽስትⶓ ጌሌፅካ::

ዞንታጊ 19 ክንቲ ጝንካ 12ንቲ ቤኑሳ አጌር አቡቑሳ ፍታኔ እያንኩ አኽⶓ ጉሹንኩ አቶ ደስታው አዊ ብሄረሰቡ ቺፅጝፂዳ ክንታንኩ ክንታንትካ ፍታኔ ፌቴንስታኑ እንጃቢሪ ዩኒቨርስቲዳ አኽጝስ ዳርኪ ሴኬኬና ጋቲታ ፌቴንስታንኩ አኽⶓኪላ ጌሌፅካ:: ክንታንትካ ፍታኒስ አንኩሌ ቴርሳንታ ክንቲ ጝንካ ሞዴሎ ፍታኔ ካቢትጝፄካማ ፌቴንፅጝስታ አዲሪ ክንቲ ጝናሳ ቴኬምስትካማ ክንታንትካዋ ቴርስካማጊ አኽⶓ አቶ ደስታው እርዳትፅካ:: እንቲታኪ  ኬሽኹ ካሌቕት ዝኩክሳ ክንትፃንትካዋ ክንቲ ጝና  ድምክኔ ብሮ ኬያማ ክንትታንትካ እርዳታንታ እንፃኽስስታማጊ አኽⶓኪላ ጌሌፅካ::

2016 ም.አሜትዳ ሜፃፋ እንፂት እሺኹ አኽⶓ ጉሹንኩ ክንቲው ሜምሪው አላፊ ሚንች ችግራኻዳ ያኻማ ክንቲ አሌድስታማ ክንታንትካ ፍታኒስ ቴርታንታ ሼውፅንታው ውማይቴንካ ክንታንትካስ ክንቲ ጝና ቺፍ አግስቴካማ ሼውቴ ፌቴርⶓ አቶ ደስታው እርዳትፅካ::