ታደለ አጋጄ
ውላ ይቶፒያንካው ቲቢቢርጚስ ግቢስታማጊ አግስታው ኽሳንቲ ይቶፒያው እዳሲው ዴዴክ ፅክራ ሹኻ አሜታዴስ ፍና ሜጋቢት 24 ጌርክ 2003 ም.አታዳ እሺኾ ጄሜርስትኹ::
ይቶፒያንካ ቻፊዴስ ቻፌ እምፕልቶስታ ቲቢቢርጜ ካንትፁኑ፣ ዋሺኒኪ ዲቦ ሳኪትጝፅጝስ ካሊስታው አኽⶓ ካንትፁኑ ኽሳንቲ አጌራዊ ፕሮጄክቲያኽ::
ይቶፒያ ጚውሳ አኹሳ አብቶ ቴኬምስታቲታ ፌያቲንኩ አይልካ ዝኩኒውላ ታሪክ ዙሚስቱስ ሴጛው እዳሲው ዴዴክ ውላ ይቶፒያንካው አሻሪ ፉሩኽ አኽጝ ጌሌፅስቴ::
ናካዳ ላንቡሳኺስታ ግቢስትኹ ሊኽዴስ 95 ታፋስ ታምብጝ ጌሌፅስታ::
ቤዴራስኩ ጄግንካ ታብል አድዋዳ ኽሳንቴ ድሎ እንፃኽስቱኑውስታ ናኪኒ ክምንት ዴሜካ እዳሲውሳ ዴዴኮ ግቢትጝስ እሊውሳ አድዋ እንፃኽስቴካማጊ አግስታና::
ግቢስትⶓ ጄሜርስትኹ 13ንቲ አሜቶ ምክኒያታ ፄውጝስ ፓናሉ ኩስጚዳ አግስቴካማ ዙሚትጜ ፄውንኩ ትክትሊ ትክላይ ሚኒስትር አቶ ተመሰገን ትሩነህ ይቶፒያንካ ዴዴኮ ግቢትጙ ካስትዳ ዲፕሎማሲስ ዊፅኹ አድዋው ዝማቺታ ህብረ ብሄራዊ እምፕልትስ ጁጝስ ንካ::
ዴዴኮ 42 ቢሊዮን ሜትር ኪዩብዴስ ጃላ አኾ እሜው ኽሳንቲ አቓ ግብሪ አይክ ፌቴርስታኽ ኑንኩ ትክትሊ ትክላይ ሚንስትር ዴዴክ አሌድስታውላ አሲው ምርትስስታ ኤሌክትሪኩሳ አይሎ ቴኬምስትⶓ ጄሜርስትኹ አኽⶓ ዙሜካ::
ይቶፒያው አኹስታ ኢነርጂው ሚኒስትር ኢንጅነር ሃብታሙ ኢታፋ ጛሾስ ናካዳ እዳሲው ዴዴኩ ግብሪ ሊኽዴስ 95.8 ታፋስ ታምባ ንካ::
ዴዴኩ ቹዋ አካል ዴሜካ ሊኽዴስ 99 ታፋ አሌድስትⶓ ዙሜካ::
አባዊ ዴዴክ ናካሱ ጊዝዳ ላጛ ተርቦይንካስ 540 ሜጋ ዋት አይሎ ፍልቕፃማጊ ያኹስ ዴዴክ አሌድስታኒ ዴሜካ 78 ዴሴትካዋ ፌቴርስታና እስታማ ማንዲስቴ::
ዴዴክዳ ፉኽ አይክዳ አሜትስ 10 ሻይ ቶን አሲው ምርት አሜሬትስታው ያኹስ ኤሌክትሪኩሳ አይሎ ፍልቕፅጝስኪላ አፍሪካዴስ ቤዴራዳ ቶኬምስቴቲያኽ ይቶፒያ::
እዳሲው ዴዴክስ ላንቡሳ ኺስታ 19 ቢሊዮን ብር እዝብዴስ ኩፓ::
ዴዴክ አሌድስታኒ ዴሜካ ትክላሊ ኤሌክትሪኩ አይሉ ሜቴን ሊኽዴስ 25 ታፋሳ ታምቤ::
እዳሲው ዴዴኩ ቴቤቤርጝፂው ፅፌት ጝናሱ ቹዋ እንፅኼ ፌፄምፃንቲ አረጋዊ ብርሄ (ዶ/ር) እምፕልታቑ ማቔችስታ ኩርፄንትስ ዳሬ ታምብኹ፣ አባዊ ዴዴክ እያው ትክሞ ካንትስታኒ እምፕልትስ ኪሚፅጝ ዋሳላካ ቴኬማው አኽⶓ ቼሜትጝፅንኹዊያኽ ንካ::
እምፕልታቕ 19 ቢሊዮን ብሮ ፍሽጝፃ፤ ጌንዜቡ እርዳቲዴስ ድምክና ግርብስኪ እንፃኽስቴካ ንካ::
ሚዲቢኒው ዲፕሎማሲዴስ ኬምፕስ ኬምፖ ሪፕበሊክ ዲፕሎማሲው እንፅኼ አጌራኻዳኪ ያኻ ባርኾቼዳ ዝኩንኩ ይቶፒያንካ ጉዶ ልቕልቕቴ ፄውⶓ ዙሜካ::
አጌሮ ሊሚፅጝስ ፄውስታው ፅሬትዳ አሊዲዳ ዴዴኮ ዊድጝስ ካሊፃኽ ኑኑ::
እን አሜትዳ አንኩዋ ተርባይንካ እንፅኼ ጄሜራ ኑንኩ ዶ/ር አረጋዊ ይንታው አሜትዳ ዴሜካ ይጉንኩ ተርባይንካ እንፅኼ ጄሜራና ንካ::
ይንታው አሜቱ አሊዲዳ 13 ተርባይንካ እንፅኼ ጄሜራንኩ አኽⶓ ጌሌፅካ::
አጌርካ ፖለቲካውሳ ኔፃኔቶ አግፅጝስ ይቶፒያው አድዋዴስ ክንቱኑውስታ ኢኮኖሚውሳ ኔፃኔቶ አግፅጝሰ ዴሜካ ዴዴክዴስ ዴስጝስ ካላና ንካ::
እምፕላ አኽናና ጁኑኒ ዝኩኹሳ ችግሮ ኽይጝስ ካሊኔ ኑንኩ ዶ/ር አረጋዊ ባርኾቼስ ቻኒስቶ ካላካልጝጝስ እምፕልቶ ይስጝፃማ ዴዴኩሳ ግቢትⶓስታ አምሉ አሻሬ እንቲታኪ እሊኩሳ ልማትካዋ እንፃኽስትጝ ቱስቴ ንካ::