ዳሴስስታቲንኩ ማኼትካ

ዘውዴ በካሉ

ማኺቲ እምፕል አጌሩ እዝቡ ትብቡ፣ ካሌቕቱስታ እይቱ ጊሊፂያኽ:: ማኺቲ እዝቡስታ አጌሩ ታሪኪያኽ:: አጌራኻዳኪ ያኻ አሌሙ አችስ ፍትሬትኩኪ ያኻ አቓ ግብርካ ማኼትካ ቱሪዝምኩ ጉስፅካ ስታ ሚፂኩ አልካኽ:: እኒጛ  ፍትሬትኩስታ አቓ ግብርካ ማኼትካዋ ማንዲጝስ ባይሉስታ ቱሪዝሙ ኾትካው አላፍት ኬፍቲኒያኽ:: ቴቤቤርጙንኩ ምንግስታትካው ሳይንሱ ባይሉስታ ክንቲው ኾትዳ አኹኪ ዩኒሰኮዳ ማዜጌብስቱንኩኪ ያኻ ጌና ሜዜጌብስትጙ ካስትዳ አግስታንኩ ማኼትካ ክምንትዴስ ክምንትሾ ፌያፌይጛንታ አንኬባኬብጝስታ ማንዲጝ ቱስቴ:: ይቶፒያኪላ ፍትሬትኩስታ አቓ ግብርካ ማኼትካዋ ዳሴስታንኩስታ ዳሴስታቲንኩ እስትካማ አሌሙ ማኼትካ ያኼካማ ዩኒስኮዳ ሜዜጌብፅጝስ ካሌ::

ይቶፒያ ቴቤቤርጙንኩ ምንግስታትካ ክንቲው፣ ሳይንሱስታ ባይሉ ኾት አኹኪ ዩኒስኮ አሌሙ ማኼታኻዳ ሜዜጌብስቱንኩ ሚንችካ ማኼትካ ዝኩና:: እኒጛ ክቻዴስ ዴኔክፂ ብቲው እንጅኩዊ፣ አይሩ አኺኒ፣ ዴኔክፅካሰታ ቱሪስቱ ጉስፃ ያኻንኩ ካዌንኩ ንሴስካ፣ እንቲታኪ ሊሊትጙንኩ ስፍርካ አግስታና:: እኒጛኪላ ቱሪስትኩ ጉስፅካ ያኻንኩ ዲብካዴስ ቤዴራ ፄዌ:: ይቶፒያ አሌሙ ማኺቲዳ 15 ዳሴስስታንኩሰታ ዳሴስሰታቲንኩ ማኼትካዋ ሜዜጌብፅጝስ አሌምዴስ ቤዴራ አኹኪ አባላምታ አጌራ ታኻ::

እኒጛ ማኼትካኪላ፡-

ላሊበላው ውክር አብየተ ክርስትያን ፣ሰሜን ካንካው ብሄራዊ ፓርክ፣ፋሲሉ ግቢሰታ ጐንደር አውልት፣ አክሱም ፣ ኩክረኒ አዋሹ ሼሬንቕ ፣ ቲያው ትክሊ ካርጝ ፣ኩክሪኒ ኦሞ ሼሬንቐ አርኪኦሎጂው ስፍሪ ፣ሀረር ጀጐሉ ኽታዊኒ ፣ኮንሶ ስታ እሊኩኪላ ማኬትካ አሌሙ ማኼቲዳ ሜዜጌብስትካማ አግስታና::

ናካስ አንቤብፅጝስ ፋኑኽኪላ  ይቶፒያ አሌሙ ማኼቲዳ አኹኪ ዩኑስኮዳ ሚዚጊፂኩሳ ዴሴስታቲንኩ ማኼትካዋ ካንትኹስያኽ::

ይቶፒያ ሚንችካ አቓ ግብርካስታ ፍትሬትኩ ማኼትካ አግስታንቲ አጌራ ታኹኒኪላ 15 ማኼትካዋ አሌሙ ማኼትካዳ ሜዘጌብፅጝስ ዴሜካ አፍሪካኩ አጌርካዴስ አባላምታ ታኻታ ፄዋ:: ዩኒስኮዳ ሜዘጌብስቱንኩ ማኼትካዴስ ዴሜካ 4 ዳሴስታቲንኩ ማኼትካዋ ዩኒስኮዳ ሚዚጊብፄ:: ዩኒስኮዳ ባይሉ ማኺቲዳ ዳሴሴታቲንኩ እንቲታኪ አይማኖቱስስታ ባይሉሳ ማኼቴ ማዘጌብፁንኩ አጌርካ ክቻዴስ ይቶፒያ እምፕላኽ:: ይቶፒያው ባይሉስታ ቱሪዝሙ ሚንስቴሩ ንባር ቶኬምኹሰታጊ  ዩኒስኮ ሴዛ ዳሴስታቲንኩስታ 11 ዳሴስስታንኩ ትክላሊስ 15 ይቶፒያኩ ማኼትካስ አቕቶ እያ:: እኒጛ ሴዛ ዳሴስታንቲንኩ ማኼትካኪላ ሜሴኬሉ ባል፣ ኢሬቻው ባል አኹኩ ጋዳው ቴርት፣ ፍቼ ቻበላላስታ ፅምቐቱ ባልካኽ::

ቢዲሪዳ ሜስኬሉሳ ባሎ ካንትንስ::  ክስታንቱስታ እምኔቶ ሲፋንትካ አደባባይዳ ኬቤርፃኑ ባልዴስ እምፕልያኽ:: ኢየሱስ ክርስቶሱ ሚስኪሊ አግስትⶓ ታክሳኑ ባል ያኹኽ ሜስኬሉስታ ዴሜሪው ባል አውሮፓው እዝቡ ቼፍታ 2013 ም.አሜትስ (2006) ዩኒስኮዳ ዳሴስታቲንኩ ማኼትካዳ ሜዜጌብስታ:: ክስታንቱሳ እምኔቶ ሲፋንትካ አሜት ቺፋ ሜሰኬሩም 16 ጌርክስ ሚስኪሊ አግስቱኽሳ  ቴርቶ ታክሰጝስ ዴሜሪው ባል ንጝስ እንቲታኪ ሜሰኬሩም 17 ጌርክስ ዴሜካ ሜስኬሉ ባል ፄውካማ ባሎ ብሩኽ አኺኒስ አደባባይዳ ኬቤርፃና:: ሊሊትጙንኩ ቱሪስትካ አኹኪ ጎቤናንትካ ይቶፒያሾ ይንታና:: ላጛንቲ ዳሴስስታቲንኩ ማኼትካዳ ሜዜጌብሰትኹ “ኢሬቻ” አኹኪ ገዳው ቴርትያኽ::

ገዳው ቴርት  ባይሉ ኦሮሞ እዝብካው ማይቤራዊ፣ ይኮኖሚያዊስታ ባይላዊ ቴግባር አኮሜችስታው ገዳው ቴርትያኽ:: ዳስስታቲንኩ ባይላዊ ማኼትካዳ ዩንስኮዳ ሜዜጌብስትኹ አውሮፓው እዝቡ ቼፍታ 2016 ም.አሜትዳኽ (2009):: ኢሬቻ አኹኪ ገዳው ቴርት ኦሮሞ  እዝብካው ቼፍጝጚው ቴርት ያኹስ አባ ገዳ እስታው ኦሮሞ እዝብካው ቴርታኻዳ ጌውስጙኽሳ አሬክጝፃኑ ባይሎስታ ወጐ ካስጝፃኑ ቴርትያኽ:: ገዳው ቴርትዳ አባ ገዳ እስታማ ጐሌልስትኹ ጉሳንቲ ሶኼታ አሜቶ ስልታንዳ እጂ:: ሱኺቲ አሜታ ዋኹታጊ እምፕሎ ጌርኮ ዴሜካውላስ ጛው ፋይስ ስልታኖ እሊውስ ፌያፌይጝፃኑ ቴርት አኽⶓ ሊሊትጙንኩ ንባርካ ቶኬማና:: ኢሬቻው ቴርትኪላ ኦሮሞው ምሰጋኒው ባል አስታማ አቕሰቴ:: ትክምቲ አርፊዳ ውላ ኦሮሚያዳሰታ ይቶፒያዳ ኢሬቻው ባል እስታማ ኬቤርስቴ::

ሹኻንቲ ዩኒስኮዳ ዳሴስሰታቲው ማኺቲዳ ሜዜጌብስትኹ ዴሜካ ፊቼ ቻምባላላ እስቴ:: ፊቼ ቻምባላላ ሲዳማ እዝቡ ዝቤኑ ኪስፂያኽ:: ዝቤኖ ቼፋኑ ቤዋዋ ካንትጝስስታ ቼፍጝስያኽ::  ፊቼ ቻምባላላ አሜት ቺፋ አምሊ አርፊዳ ኬቤርስቴ:: ዩኒስኮዳ ሜዜጌብሰትኹኪላ አውሮፓው እዝቡ ቼፍታ 2015 ም.አሜታዳኽ አኹኪ 2008 ም.አሜታዳኽ:: ሊሊትጙንኩ ንባርካዴስ አግፅንኹስታጊ ፊቼ ቻምባላላው ባል ኬቤርሰትⶓ ጄሜርኹ ላጛ ሻይ አሜትዴስ ጃላኽ:: ሲዳማው ብሄረሰቡላዳ እምፕል አርፊ 27/28 ጌርክያኽ:: አርፌ ቼፋኑ ቤዋዋ ካንትጝስ አኽጝስ ማንዲሰቴት ቤዋ 27ንቲ ጌርክሰ ካንትስቲኒጊ አርፊው አሊዲ ያኼ:: ቤዋ ካንትስቴው ጌርክ ሲዳማው እዝቡላዳ ኽሳንቲ ባሌኽ:: ውላጊ ጌርክካ ጛው ያኹኽ ስም እይስታማ ጝኖ ጊቢታኑ፣ ትዳሮ እሜኑ፣ አቕ ክራኒ ዴዋኑስታ ድኪስታ ሼጌ አኹኪ ክርፄ ጌርክ ንካማ ሼሻኑ ጛው ያኹኽ ቤዋዋ ቼፍንትካ ዝኩኑ ቴርት አኽⶓ ንባርካ ቶኬማና::

ሴዛንቲ ዩኒስኮዳ ሜዜጌብስትኹ ዳሴሴስታቲው ማኺቲ ዴማካ ፅምቕቱ ባሌኽ:: ፅምቕቱ ባል ክስታንቱሳ እምኔቶ ሲፋንትካ ኢየሱስ ክርሰቶሱሳ ዮርዳኖሱ ብንዳ ፄሜቕሰትኹሳ ታክስጝስ ትር 11 ጌርክስ ውላ ይቶፒያዳ ሊሊትጙኽ ባይሉሳስታ አይማኖቱሳ ቴርቶ እሜማ ብሩኹ አኺኒስ አደባባይዳ ኬቤርስቴ:: እኒጚ ባል ኬቤርስቱስ ትር 10 ጌርክ ባርታዋዴስ ጄሜራማ ትር 12 ጌርክ ዘገለሊዋ ኺስቴ ኬቤርሰታዌኽ:: ሊሊትጙንኩ ስይካስስታ ኬሌምካስ ብራማ ኬብርስታው ፅምቕቱ ባል ቴሳስ አርፊዳ አውሮፓው እዝቡ ቼፍታ 2019 ም.አ ዩኒስኮዳ ዳሴስስታቲንኩ ባይልኩ ማኼትካዳ ሜዜጌበስትጝስ ይቶፒያስ ሴዛንቲ ዳስስስታቲው ማኺቲ ያኻ::

ይቶፒያኩ ማኼትካ ዩኒስኮዳ ሜዜጌብስትጝ አሌምስ አቕስትጝዴስ ድምክና ማኼትካው አንኬባኬብጚስታ ማንዲጝጚ ፄውስታታ እርዳቴ:: አውጚው ቴርት ቤናሊ ፄውኑ እጂጚዳ አሌም አቡቑ ማኺቲው ፅናቱ ውማይቲኒ አቶ ሃይለኢየሱስ ደስታ ይቶፒያ 2016 ም.ሜትዳ አንኩዋንቴ ዳስስስታቲውሳ ማኺቴ አሌሙ ማኺቲው አችትዳ አኹኪ ዩኒስኮዳ ሜዜጌብፅⶓ ጌሌፅካ::

ማኺቲ ንጝ አሌሙ ዩኒስኮው እግስታ አሌሙ እግ ፋሹኑ ኽይ ያኹስ፤ ማኺቲ ላጛስ ቤንስታማ አቓግብሪ ማኺትስታ ፍትሬቱ ማኺቲ እስታማ ቤንስታው አኽⶓ አቶ ሃይለኢየሱስ እርዳትፅካ::  አቓ ግብሪኪ ያኻ ፍትሬቱ ማኺቲ ዩኒስኮዳ ሜዜጌብስቱስ ዳሴስታቲውስታ ዳሴስስታው ማኺቲ እስታማ ሜዴብስታው አኽⶓኪላ ኽይትጝፄካ::

ማኺቲ አሌሙ ማኺቲዳ ሜዜጌብስትጝስ ሴዛዴስ ጃላ አላሜ ዩንስኮኩ ምሁራንካ ፍሽⶓ ጉሽንኩ አቶ ሃይለኢየሱስ ማኺቲ ሜዜጌብስታታ ፋይፅኹ አላሚ ማኼትካ ጉዲስታቲንታ ማንዲጝ፣ ልማትስ እሼንታ ፄውጝ፣ ቱሪስቱ ጉስፃ ያኻታ ፄውጝ፣ ክምንትዴስ ክምንትሾ ፌያፌይጛታ አንኬባኬብካማ ማንዲጝስታ እጂፅጝ ቹዋ ቹዋ ቴግባርካ አኽⶓ እርዳትፅካ::

ይቶፒያ 2016 ም.አሜትዳ ዳስስታቲው ማኼቲዳ ሜዜጌብፂኹሊ አንኩዋ ዳስስታቲንኩ ማኼትካዋ ዩኒስኮዳ ሜዜጌብፅጝስ አባላምታ አፍሪካት አጌራ አኽⶓ አቶ ሃይለኢየሱስ ጌሌፅካ::

እምፕል ማኺቲ አሌሙ ማኺቲው አችትዳ ሜዜጌበስትጝስ ማኺቲ ሜዜጌብስታታ ካሲስታማ አሌሙ ምንግስታትካው አችት ማኺቴ ካንታማ ሜዜጌብስትጝሰ ቢካኒ ይቢቺ አኽⶓኪላ ኽይትጝፄካ::

አገው ፌሬስቴንካው ባል ዩንስኮዳ ሜዜጌብስትጝስ አባላምቴ ብሄራዊ ማኺቴ ማንዲⶓ ቴርትዳ ሜዜጌብስትⶓ አቶ ሃይለኢየሱስ ጌሌፅካ:: አገው ፌሬስቴኑ ባል አድዋውሳ ታሪኮ እሚኹ፣ አዊውሳ ባይሎስታ ወጐ ካንትፃው ባል አኽጝስ ዩኒስኮዳ ሜዜጌብስታታ ዶክመንተሬ እንፃኽስትጝ፣ አላፍትስ ማኺቴ አቕትጝፅጝ ማንዲስታው አኽⶓኪላ ጌሌፅካ:: እምፕል ማኺቲ ዩኒስኮዳ ሜዜጌብስታታ አጌራው ሚፂው አሊ፣ ቱሪስቱ ጉስፂ፣ ክብርሰታ ኩራቲያኽ ኑንኩ አቶ ሃይለኢየሱስ ማኺቴ ማንዲጝስ አንኬባኬብጝ እንቲታኪ ክምንትዴስ ክምንትሾ ታሪኮስታ ባይሎ ወጐ ቱስቲስ ፌያፌይጝፅጝ ውላውጊ አላፍት አኽⶓ ጌሌፅካ::