ሰላምስታ እጎ ኬቤርፅጙ እንፅኺ

ታደለ አጋጄ

አማኻሪ ክልልዳ ኬሴትስትኹ ጋቻስ እምፕልታቕዳ ዜርፋ ሚንቺ ቤዴሎ ታምፃ።ክልልታ ሚሊዮንስ ቼፍስታንኩ ክንታንትካ  ክንቲዴስ ሴጋ ፄዋ።ሚንችካ ምንግስቱሳ አግልግሎቴ እያንኩ ኾትካ እንፅኺዴስ ሴጋ ያኼካ።ትክላሊስ ጋቻው ምክኒያቲስ አቕቱ፣ንብሬቱስታ ማይቤራዊ ችግሮ ሲፍፃ።

ክልሉሳ ሰላሞ ቼሜትጝፅጝስ እምቢትንኹ ጊዙ አዋጅ አዌጅስታማ ኮማንድ ፖስትስ እጎ ኬቤርፅጙሳ እንፅኺ እንፃኽስስታማጊ አግስቴ።ክልላኻዳ ኬሴትስትኹ ጋቻው ምክኒያቲስ ብሄረሰቡ ቺፅጝፂታ ጉዋጉሲ ሽኩዳድ ፣ፋግቲ ለኮማ ፣ዳንግሊስታ ጃዊ ወረድካ እንቲታኪ አዮ ጉዋጉሲ ወረዳ እሳንስ ሰላሙስታ ፄትቲው ችግር ታምባማጊ አግስታንኩ ወራድካኽ።እኒጛ ወረድካዳ ትክላሊስ ምንግስቱ እንፅኺ ቲሬ።ክንታንትካ ክንቲዴስ  ሴጋ ያኼካ። ብሄረስቡ ቺፅጝፂታ ፅንፌንካ አይልካ ልቕልቓንኩ ወረድካዴስ ይሴን እጎ ኬቤርፅጙሳ እንፅኼ ካሰጝፅጝስ ሰላሞ ሴፌንፅጙ እንፅኺ እንፃኽስስታማጊ አግስቴ።

አዊ ኮምኒኬሽኑ ዜጌቢታ እጎ ኬቤርፅጙ እንፅኺ ካስጙኹ አዲስ ክዳም ኬቴምዳ  ወክታዊ ፄትቲውስታ ሰላሙ ጉዳይ ዙሪዳ እዝቡ ኩስጚ ካስጛ።ሰላሙስታ ፄትቲው ዙሪዳ አዲስ ክዳም ኬቴሙስታ ዙራሙሪዳ አግስታው ሚንች እምፕልታቑ ቤንካ  ችግርካዋ ካንትኹስ ኻልትስ ኩስጜ ፄውካ።አዲስ ክዳም ኬቴምስታ ዙራሙሪ ሚንችካ አርፍካዋ ፅንፊኒ ኬቹ ስርዳ እጂቲት ታኼስጉ ምንግስቱ ፄትቲው አይልካስታ ብሄረሰቡ ቺፅጝፂው አመራርካ አግስቴካማ እዝቡሳ ሜድሬኾ ካስጝፄካ።

ኩስጚው ሜድሬኽዳ አግስቱንኩ አይማኖቱ ታብል፣አጌር ሹማጌል፣ኹን ስታ ወታትካ አዲስ ክዳም ኬቴምስታ ዙራሙሪ ሰላሞ  አቱኒኒዴስ ሚንቾ አርፍካዋ ቼፍፅⶓ ዙሜካ።ፋግቲ ላኮማ ወረዳ ጊፅስታ ግብርኒስ እንቲታኪ ዴኑ ልማትስታ እንሴስካው አብትስ  ኬሽኹ አክም ዝኩኹ ያኽስጉ ፄትቲው ችግሩ ምክኒያቲስ ልማት ቱስቲስ ሊማቲታ ፄዋ ንካ።

ፄትቲው ፃምርትጙኹ አይል አዲስ ክዳም ኬቴሞ ሊጊሲሚ አርፍካዴስ ፋሌንጋ ፅንፌኒ ኬችዴስ ኔፃ ፄውጙ እንፅኺ ኬፍቲኔ ልኻስስታ ጁትጚስ እንቲታኪ እምፕልትስ እንፅኽካዋ አኮሜችካማጊ አኽⶓ እዝቡሳ ኩስጜ ጉሱንኩ አመራርካ ጌሌፅካ።ሲፋውስ አዲስ ክዳም ኬቴሙስታ ዙራሙሪው እምፕልታቑሳ ሰላሞ ቼሜትጝፅጝስ ምንግስቱ ፄትቲው አይሉ ኬምፕዳ ቲሪጝስ ዴስስትኹ እጎ ኬቤርፅጙ እንፅኺስ ታምቦጊ ፊትጛንታ እቑዊ ዲጋ።

እሊው ሰላሙስታ ፄትቲው ችግር እሺኹ ጉዋጉሲ ሽኩዳድ ወረዳ ቲሊሊ ኬቴምዳ ፄትቲው ችግርዳ እዝቡ ኩስጚ ካስጝጛ።ቲሊሊ ኬቴም ሊጊሲሜ ጊዞ ፅንፊኒው ስርዳ እጂቲት ታኹኒውላ  አጌሩ ካላካልጚው ሰራዊቲ፣ ብሄረሰቡ ቺፅጝፂው አመራርካስታ ፄትቲው አይል፣ኬቴሙ ቺፅጝፂው አመራርካስታ ፄትቲው አካልካ ፃማርትጚው አይሉ ስሬትስ እዝቡ ኩስጚው ሜድሬኽ ቲሊሊ ኬቴምዳ ካስጛ።

ሚንቾ ጊዞ ፅንፊኒ አይል ዜሬፉስ፣ኩስሰታ ቼጌርፁስ እጄኹ እንፅኼ እንካናንቴ ስታ ጊፁሳ ዜርፍዳ ኽሳንቲ ስም ዝኩኹሳ ቲሊሊውስታ ዙራሙሪው እዝብ ሰላም እቺኒዴስ እጂናኽ ንካ ኬቴሙ ዝኩዋንትካ። “እንዴስ ጌና ቼጌርስትጝ ቤዴል ዳላዌኽ፤ምንግስቱ ኬምፕዳ ቲሪናና እንፃኽስትጝስ ሰላሞ  ዙርፅጝ ዝኮ” ናኒስ ሰላምስ ዝኩኹሳ ኩርፄንቶ ዙሜካ።

ዎሬምዴስ አይኪ ፊቲሳው እላኪኽ ኑንኩ ኩስጚው አሴቴፍጛንትካ አማኻሪ ክልሉ እዝብ እጂንኩስታ ሴጙንኩ ካስካ ዙርጝ ዝኩኹ ሰላማዊ ዳድስስታ ኩስጚስ ጃጊ ጋቻስታ ወሬምስ ኽይስታው ካሲ አላቲዌኽ ናኒስ ጉሽካ።

ፃምርትጙኹ አይል ቲሊሊ ኬቴሞ ፅንፌኒ አይልዴስ ኔፃ ፄውጙሳ እንፅኼ ኬፍቲኒ ልኻስስታ ጁትጚስ እንፅኽስትካማጊ አኽⶓ እዝቡሳ ኩስጜ ጉስንኩ አጌሩ ካላካልጚው ሰራዊቲው አመራርካስታ ብሄረሰቡ ቺፅጝፂው ጉሳንትካ ዙሜካ።ቲሊሊ ኬቴማ ሊጊሲሚ ጊዝዴስ ፋሌንጋ ፅንፊኒ ኬችዴስ ኔፃ ታኻታጊ አግስቲ።

“ሲፋውስ ቲሊሊስታ ዙራሙሪው እምፕልታቕ ሰላሞ ቼሜትጝፅጝስ ምንግስቱ ፄትቲው አይሉ ኬምፕዳ ቲሪጝስ ዴስስትኹስታ እጎ ኬቤርፃንቲ አኽⶓ ቴግባርስ ካንትፅጝ ዝኮ” ናኒስ እቑዊ ዲግስካ።ሰላሙስታ ፄትቲው ችግሩ ምክኒያቲስ ምንግስቱ አግልግሎቲ ኬውጛሺኩ ወረድካዳ እንፅኼ ጄሜርፅጝስ እንፃኽስስታማጊ አኽⶓ  አዊ ብሄረሰብ ቺፅጝፂ አቕፃ::

አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው ፌዩንኩ ሱኺቲ አርፋካዳ ብሄረሰብ ቺፅጝፂዳ ፌቴርስትኹስ ሰላሙ ችግርስ ሚንች አቕቱስታ ስር ልማትዳ ችግር ታምባ፣ አጌር አቕ ጛው ዙራሙሪዳ ፌኔኬልጜካ፣ማቤራዊስታ ኢኮኖሚያዊ ልቕልቕቲዳ ጉዳት ታምባ ንካ።ቹዋ ቺፅጝፃንቲ ፅንፊኒ አይል ብሄረሰብ ቺፅጝፂዳ ልቕልቕናኩ ዙራሙርካዳ ሰላማውካ ኩስቴካ፣ አቺትጙኽስ ዜሬፍጝስታ ማቤራዊ ኾትካዋ ዎዴምጙሳ ቴግባሮ እንፃኽስታ ንካ።

ፄትቲው አይልካ እምፕልታቕሊ ፃምርትጚስ እንፃኽስቱኑ እጎ ኬቤርፅጙ እንፅኺ ሊጊሲሚ አርፍካስ ፅንፊኒ አይልካው ቼፍጛኻዳ እሺንኩሳ ዙራሙርካዋ ኔፃ ፍሽጝስ ሚዲቢኔ ምንግስቱሳ አግልግሎቴ ጄሜርፅጝስ እንፃኽስስታማጊ አኽⶓ አቶ ቴዎድሮስ ጌሌፅካ።

ፖላቲካው አመራር ፄትቲው ሜዋክርሊ ፃምርትጚስ ውላ ብሄረሰብ ቺፅጝፂውሳ ዙራሙሬ ኩስጝፅጝስታ ምንግስቱሳ ሜዋክሮ ጄሜርፅጙ  እንፅኼ እንፃኽስታማጊያኽ ኑንኩ ቹዋ ቺፅጝፃንቲ ውላ እምፕልታቕ እንዴስ ቤዴራታ ሰላምስ ዝኩኽሳ ኩርፄንትስ  እርዳቴ ይስጝፄካማ ሲፋንታ እቑዌ ዲግስካ።

አማኻሪ ክልሉ ትክትሊ ቺፅጝፂ ጛራሱ ማሬግስ ቺፅጝፂው ጉዳይካው ቴቤቤርጝፃንቲስታ ሰላሙስታ ፄትቲው ቢሩ አላፊ ደሳለኝ ታሰው ጛሾስ ወክታዊ ክልሉ ሰላሙ ጉዳይዳ እዩኑ ጊሊፂዳ ፌዩንኩ ላጚቲ አርፍካሳ ችግር ጌቴማሺኹ ክልሉ ሰላሙ አኺኒ ኬሽጛማጊ አኽⶓ ጊሊፂዳ ዙሜካ።”ቴኬሜ ኑኑሳ አሳቦ ሰላምስታ ዲሞክራሲው ዳድስ ዲግሳማ ኩስጝጝስታ ካራካርጝጙሳ ጉላሌ ባይካማ “አን ንኹ ይቤቺ ያኽስ” ናው ኬች ክልሉሳ ሰላሞ አዌካማ እጄ” ናኒስኪላ ጌሌፅካ።”እን ፅንፊኒ ካንቲ ስታ ቴግባር ክልሎ እንግርግራ ይጉፃ” ናኒስ ዙሜካ።

አማኻሪ ክልሉ ምንግስት ችግሮ ኽይጝስ ካላካልጚው ሰራዊቲሊስታ ክልሉ ፄትቲው አይልሊ ቴቤቤርጚስ እንፃኽስስትⶓኪላ ቶኬምካ ቢሩ አላፊ።ፄትቲውሳ አይሎ ሴሌቴንፅጝ ስታ አቺትጝፅጝስ እዝቦ አጌላጌላንታ እንቲታኪላ ሰላሞ ማንዳንቲ አኽⶓ ይስጝፃንታ ፄውጝስ ካሊስታኽ ንካ።እንስኪላ ሰላሙ አኺኒ ሌጌሳማጊ ስታ ኪስስታማጊ አኽⶓ ስታ እምፕልታቕዳ ታምባው ቤዴልስታ ግፍ ኔኬትጝስ ካሊስትⶓ ቶኬምካ።

እዝብሊ ፄውስታው ኩስጚስ እዝብ ሰላሞ ፋያንቲ አኽⶓ ዙማካማጊኽ፣ዳድ ቺፋ ፌፄምስታው ዜሬፍጝስታ አጌትጝ ቲሬታ፣ፋብሪካኩ ዋይምካኪላ ዲግካያንታ ታክስፅካማጊኽ ንካ።እዝብ ካላካልጚው ሰራዊቲስ ክብሮ ካንትፅካማጊ እጎ ኬቤርፃያታ ካሲካማጊኽ፤እንስኪላ ልቓ ሰላም ይንታማጊኽ ኑኑ።

አቶ ደሳለኝ ሰላሞ ኬቤርፅጙ ኬምፕስ ኬምፖ ድፂው አይል እሺንኩሳ ሰላማዊ ዳድስ ቱዋንታ ሰላሙሳ እቑዌ ፄውስትⶓ ጌሌፅካ።እንስኪላ ድፂው እንፅኺዳ ቱዋሺንኩ 12 ሻይዴስ ጃላ  እምፕልታቕሊ አሌቔትጜካማ እምፕልታቖ እርዳትካማጊ አኽⶓ ጉሽካ።ሰላምስ ታፎ እዩንኩ  ሜሳሬ እሚካማ ሰላምስ ዝኩዋንታ ፌኬድስትⶓ ዙሜካ።ፄትቲው ሜዋክሩ ቼፍጚው ስርዳ እሺንኩ ዴሜካ ስልታኒ እይስታማ እዝብሾ አሌቔትጝⶓኽ ጌሌፁኑ።እንኪላ ሰላሙ እቑዊ ሰላምስ ዝኩኹሳ ኬፍቲኔ ታምቦ ቶኬማዌኽ ኑኑ።

ምንግስት እጎ ኬቤርፅⶓ ትኩትስ እንፃኽስትጝስ አግስትኹ ሰላምኪላ ልማትሾ ዙርፅጝስ ካሊስትⶓ አቶ ደሳለኝ ቶኬምካ።ማዳባሬ ዲግስጚው ዙሪዳ ጌቴማሺኹ ችግርኪላ ኔኬትⶓ ፅካ።ክንቲ፣ቲኑ፣ግብርኒው፣ኢንቨስትመንቱ ስታ ስሩ ልማቱ ግንባቲው እንፅኺ ሲፍጝ  ሰላሙ ኬሽጚው ካንትፂ አኽⶓ ቶኬምካ።

ክልሉምንግስት ሰላምስ ልማትስ ዝኩኹ ታምቦ ሼው ንጝስ ሰላሞ ዊዳፊው ፄውጙ እንፅኺ ይስፃማ እንፃኽስታው አኽⶓ ጌሌፅካ።ስጋትዴስ ፌካያስኩ ዙራሙርካዋኪላ እምፕልታቕሊ ኩስጝጝስ ስታ ቴቤቤርጝስ ዊዳፊውሳ ሰላም ቼሜትጛታ እንፃኽስስታው አኽⶓ ዙሜካ።